عِسِرَيِلَ شَ كِسِ
عَلَتَلَ شَ مَسٍنيِ
1عَلَتَلَ شَ مَسٍنيِ نَن يَ،
«وَشَتِ ندٍ قَمَ، ﭑ قِندِ مَ نّ عِسِرَيِلَ بْنسْي بِرِن مَرِفِ عَلَ رَ.
عٍ تَن قَن قِندِ مَ نّ ﭑ مَ حَمَ رَ.»
2عَلَتَلَ بَرَ عَ مَسٍن،
«عَلَتَلَ بَرَ هِننّ عِسِرَيِلَ رَ
عَ نَشَن نَتَنفَشِ سَنتِدّفّمَ رَ فبٍنفبٍرٍن يِرٍ.
عِسِرَيِلَ قَمَ نّ مَلَبُي سْتْدٍ.»
3عَلَتَلَ بَرَ عَ مَسٍن ﭑ بّ كٍلِقٍ يِرٍ مَكُيٍ،
«ﭑ عِ شَنُمَ نّ عَبَدَن.
ﭑ مَ هِننّ مُ حْنمَ عِ بّ.
4عِسِرَيِلَ، ﭑ عِ رَكٍلِمَ نّ، ﭑ عِ يَءِلَن.
عِ مَن بّيتِ بَمَ نّ سّيوّ كُي مَشَسٍيٍ شُي نُن قَرٍ رَ.
5عِ مَن سَنسِ سِمَ نّ سَمَرِ فٍيَيٍ قَرِ.
بْشِ رَوَلِمَيٍ سَنسِ سِمَ نّ، عٍ مَن عَ بٌفِ بَ.
6لْشْي قَمَ عَ لِدٍ،
كَنتَمَيٍ شِلِ تِمَ نّ عٍقِرَ مِ فٍيَ قَرِ،
‹وٌ كٍلِ، وٌن شَ تٍ سِيٌن فٍيَ قَرِ
وٌن مَرِفِ عَلَ نَ دّننَشّ.›»
7عَلَتَلَ بَرَ عَ مَسٍن،
«وٌ شَ سّيوَ يَشُبَ شَ قٍ رَ،
وٌ شَ سِ بِرِن شُن تِ عَلَ مَتْشْي رَ.
وٌ وٌ شُي رَ مِنِ، وٌ شَ عَلَتَلَ تَنتُ،
نَشَن بَرَ عِسِرَيِلَ رَكِسِ، عَ شَ حَمَ نَشَن لُشِ.
8ﭑ عٍ رَفبِلٍنمَ نّ كٍلِقٍ كْولَ مَ،
كٍلِقٍ دُنِحَ يِرٍ بِرِن.
دْنشُييٍ نُن مَبٌلٌنيِيٍ نَ عٍ تَفِ.
قُرِ فِنّيٍ نُن فِنّ نَشٍيٍ نَ دِ بَرِقٍ نَ عٍ يَ مَ.
حَمَ فبٍفبٍ فبِلٍنمَ نّ بٍ.
9عٍ قَمَ نّ وَ رَ، عٍ عَلَ مَشَندِ.
ﭑ عٍ رَفبِلٍنمَ نّ يٍ يِرٍ كِرَ قَنيِ شْن مَ.
عٍ مُ بِرَ مَ بَرِ مَ ﭑ تَن نَن قِندِشِ عِسِرَيِلَ بَبَ رَ،
عٍقِرَ مِ بْنسْي ﭑ مَ دِ سِنفٍ نَ عَ رَ.
10سِ بِرِن، وٌ شَ وٌ تُلِ مَتِ عَلَتَلَ شَ مَسٍنيِ رَ،
وٌ سَ عَ مَسٍن دُنِحَ بِرِن بّ.
وٌ شَ عَ قَلَ،
‹نَشَن عِسِرَيِلَ رَيٍنسٍنشِ،
عَ قَمَ نّ عٍ مَلَندٍ، عَ قَ عٍ كَنتَ
عَلْ شُرُ سٍ دّ مَدٌنيِ عَ شَ فْورّ مَكَنتَمَ كِ نَشّ.›
11وٌ شَ نَ قَلَ، بَرِ مَ عَلَتَلَ قَمَ يَشُبَ شْرّيَدٍ،
عَ عٍ شُن سَرَ مِشِ مَ نَشَن سّنبّ فبٌ عٍ بّ.
12عٍ فبِلٍنمَ نّ، عٍ شُننَكٍلِ سْتْ سِيٌن قَرِ.
عٍ بَرَكّ سْتْمَ نّ عَلَتَلَ بّلّشّ،
عَلْ مّنفِ، وّنِ نّينّ، تُرٍ، يّشّي، نُن نِنفٍيٍ.
عٍ لُمَ نّ عَلْ لَاكْي يِرٍ يٍ نَ دّننَشّ،
عٍ مُ تْورْ مَ سْنْن.
13فِنّ دِ مّدِيٍ لُمَ نّ قَرٍ بٌرٌن نَ،
سّفّتَلَيٍ نُن شّمْشِيٍ قَن شُلُنيِ رَبَ.
عٍ شَ سُننُنيِ قِندِ مَ نّ حّلّشِنيِ رَ.
ﭑ عٍ مَدُندُ مَ نّ عٍ شَ تْورّ كُي، عٍ شَ سّيوَ.
14ﭑ سُبٍ تُرَشِ قِمَ نّ سّرّشّدُبّيٍ مَ،
ﭑ مَ حَمَ قَ لُفَ ﭑ هَرِفٍ رَ.»
15عَلَتَلَ بَرَ عَ مَسٍن،
«وَ شُي مِنِمَ نّ رَ مَ سُننُنيِ نَ دّننَشّ.
رَشٍلٍ وَ مَ نّ عَ شَ دِيٍ شَ قٍ رَ،
عَ مُ نْمَ دُندُدٍ بَرِ مَ عَ شَ دِيٍ مُ نَ.»
16عَلَتَلَ بَرَ عَ مَسٍن،
«عِ سَبَرِ، عِ نَشَ وَ سْنْن.
ﭑ عِ شَ وَلِ سَرٍ رَفبِلٍنمَ نّ عِ مَ،
عِ شَ دِيٍ مَن فبِلٍنمَ نّ كٍلِقٍ عٍ يَشُييٍ يِرٍ.»
عَلَتَلَ شَ مَسٍنيِ نَن نَ كِ.
17«يِفِ نَ عِ بّ يَرٍ،
عِ شَ دِيٍ فبِلٍنمَ نّ عٍ شْنيِ.»
عَلَتَلَ شَ مَسٍنيِ نَن نَ كِ.
18«ﭑ بَرَ عٍقِرَ مِ وَ شُي مّ عَ عَ قَلَمَ،
‹عِ بَرَ ﭑ حَشَنكَتَ، عِ بَرَ ﭑ تْورْ،
عَلْ نِنفٍ نَشَن مُ شُرُشِ.
يَكْسِ، ﭑ مَلِ ﭑ شَ فبِلٍن،
بَرِ مَ عِ تَن نَن ﭑ مَرِفِ عَلَتَلَ رَ.
19سِنفٍ ﭑ نُ بَرَ فبِلٍن عِ قْشْ رَ،
كْنْ نَ دَنفِ شَنبِ، ﭑ بَرَ تُوبِ.
ﭑ تٌ ﭑ حّرّ كِ مَتٌ قَ، ﭑ بَرَ شْنْ ﭑ يّتّ مَ.
ﭑ بَرَ يَافِ، ﭑ شَشِلِ بَرَ عِقُ،
بَرِ مَ كَبِ ﭑ دِ مّدِ تّمُي ﭑ حّرّ كِ مُ قَن.›
20عٍقِرَ مِ ﭑ مَ دِ، قِسَمَنتٍ شَ مُ عَ رَ، ﭑ نَشَن شَنُشِ؟
ﭑ مُ نْمَ دُندُدٍ عَ شَ قٍ مَ،
عَ شَ قٍ لُمَ نّ ﭑ بْحّ كُي، ﭑ كِنِكِنِمَ نّ عَ مَ.»
عَلَتَلَ شَ مَسٍنيِ نَن نَ كِ.
21«عِسِرَيِلَ سّنِيّنشِ، عِ شَ تْنشُمَ تِ كِرَ شْن مَ،
عِ شَ سّبّلِ تِ كِرَ دّ رَ نَشَن عِ رَفبِلٍنمَ عِ شَ تَايٍ كُي.
عِسِرَيِلَ، عِ شَ فبِلٍن عِ شْنيِ.
22ﭑ مَ دِ شُرُتَرٍ، عِ ﭑ مَتَندِ مَ هَن مُن تّمُي؟
عَلَتَلَ وَ مَ قٍ نّينّ رَ مِنِقٍ دُنِحَ مَ،
قٍ نّينّ، فِنّ نَن قَ شّمّ تَن قٍنمَ.»
23عِسِرَيِلَ مَنفّ عَلَتَلَ بَرَ عَ مَسٍن،
«ﭑ نَ يُدَيَكَيٍ رَفبِلٍن عٍ شْنيِ كٍلِقٍ كٌنيِيَ كُي،
مِشِ قَمَ نّ عَ قَلَدٍ يُدَيَ شَ قٍ رَ،
‹مَرِفِ شَ هِننّ عِ رَ يِرٍ تِنشِنشِ، فٍيَ سّنِيّنشِ قَرِ.›
24يُدَيَكَيٍ قَمَ نّ سَبَتِدٍ عٍ شَ بْشِ مَ عٍ شَ تَايٍ كُي،
عٍ شَ وَلِكّيٍ نُن عٍ شَ شُرُ سٍ مَكَنتَمَيٍ.
25ﭑ قَمَ نّ مِشِ تَفَنشِيٍ مَلِدٍ،
ﭑ تْورّ بَ عٍ مَ.»
عَننَبِ يٍرٍ مِ شَ مَسٍنيِ
26نَ تّمُي ﭑ نَشَ شُنُ. ﭑ نُ بَرَ شِ عَ قَنيِ رَ.
عَلَتَلَ شَ مَسٍنيِ
27عَلَتَلَ شَ مَسٍنيِ نَن يَ؛
«لْشْي قَمَ قَدٍ ﭑ عَ نِيَمَ نّ
عِسِرَيِلَ نُن يُدَيَ بْنسْي شَ وُيَ،
عٍ شَ شُرُ سٍيٍ شَ فبٌ.
28تّمُي دَنفِشِ ﭑ بَرَ بِرَ عٍ قْشْ رَ
عَلَكٌ ﭑ شَ عٍ رَحْن، ﭑ شَ عٍ تْورْ، ﭑ شَ عٍ شُن نَكَنَ،
ﭑ شَ عٍ كٍرِ، ﭑ شَ عٍ حَشَنكَتَ.
كْنْ يَكْسِ ﭑ بِرَ مَ نّ عٍ قْشْ رَ
عَلَكٌ ﭑ شَ عٍ تِ، ﭑ شَ عٍ شُن نَقَن.»
عَلَتَلَ شَ مَسٍنيِ نَن نَ كِ.
29«نَ تّمُي يِ تَالِ مُ قَلَمَ سْنْن،
‹بَبَيٍ نَ بٌفِ سٍ يْشْي دٌن،
عٍ شَ دِيٍ دّ بَرَبَرَ مَ نّ.›
30كَنكَن قَشَمَ نّ عَ يّتّ كَن مَ يُنُبِ شَ قٍ رَ.
مِشِ يٌ نَشَن نَ بٌفِ سٍ يْشْي دٌن،
نَ كَنيِ نَن دّ بَرَبَرَ مَ.»
31عَلَتَلَ شَ مَسٍنيِ نَن يَ؛
«وَشَتِ قَمَ عَ لِدٍ، ﭑ سَاتّ نّينّ تٌنفٌمَ نّ عِسِرَيِلَ نُن يُدَيَ بْنسْي بّ.
32عَ مُ لُمَ عَلْ سَاتّ نَشَن نُ تٌنفٌشِ عٍ بَبَيٍ بّ،
ﭑ تٌ عٍ سُشُ، ﭑ عٍ رَ مِنِ مِسِرَ بْشِ رَ.
عٍ نَشَ نَ سَاتّ كَنَ هَلِ ﭑ تٌ قِندِشِ عٍ مَرِفِ رَ.
33سَاتّ نَن يَ ﭑ نَشَن تٌنفٌمَ عِسِرَيِلَ بْنسْي بّ؛
نَ وَشَتِ نَ دَنفِ،
ﭑ نَ ﭑ مَ سّرِيّ لُمَ نّ عٍ بْحّ مَ،
ﭑ عَ سّبّ عٍ سٌندٌنيِ مَ.
ﭑ قِندِ مَ نّ عٍ مَرِفِ عَلَ رَ،
عٍ قَن قِندِ ﭑ فبٍ حَمَ رَ.
34نَ وَشَتِ، مِشِ مُ عَ بٌورٍ شَرَنمَ سْنْن،
مِشِ مُ عَ قَلَمَ عَ نفَشَكٍرٍنيِيٍ بّ،
‹وٌ شَ عَلَتَلَ قٍن،›
بَرِ مَ عَ بِرِن ﭑ كٌلٌنمَ نّ،
كٍلِقٍ دِ مّدِ مَ عَ سَ دْشْ قٌرِ رَ.
ﭑ عٍ شَ يُنُبِيٍ شَقَرِ مَ نّ،
ﭑ مُ رَتُمَ عٍ شَ وَلِ كٌبِ مَ سْنْن.»
عَلَتَلَ شَ مَسٍنيِ نَن نَ كِ.
35عَلَتَلَ بَرَ عَ مَسٍن،
«مَنفّ عَلَتَلَ نَن عَ نِيَمَ سٌفٍ شَ يَنبَ يَنيِ رَ،
كِكٍ نُن تُنبُييٍ شَ يَنبَ كْي رَ.
عَ مْرْنيِ رَكٍلِمَ، عَ مْرْنيِ رَ مَشَمَ.»
36عَلَتَلَ شَ مَسٍنيِ نَن يَ،
«شَ عَ سَ لِ نَ مْولِ مُ رَبَمَ سْنْن،
نَ وَشَتِ، عِسِرَيِلَ بْنسْي قَن مُ قِندِ مَ سِ رَ ﭑ يَ رَ.»
37عَلَتَلَ بَرَ عَ مَسٍن،
«شَ عَ سَ لِ كٌورٍ نْمَ مَنِيَدٍ،
شَ عَ سَ لِ بْشِ دْشْ كِ نْمَ كٌلٌندٍ،
نَ وَشَتِ ﭑ بَرَ مّي عِسِرَيِلَ بْنسْي رَ عٍ شَ وَلِ كٌبِ شَ قٍ رَ.»
عَلَتَلَ شَ مَسٍنيِ نَن نَ كِ.
38عَلَتَلَ شَ مَسٍنيِ نَن يَ؛
«وَشَتِ قَمَ قَدٍ يِ تَا مَن تِمَ نّ عَلَتَلَ بّ،
كٍلِقٍ شَنَنّلِ شَ يِرٍ عِتٍشِ مَ هَن تَا سٌدٍ دّ تُشُي يِرٍ.
39لُوتِ مَن عِتَلَمَ نّ عَ تِنشِنشِ رَ هَن فَرٍبٍ فٍيَ قَرِ،
هَن فٌوَ مَبِرِ رَ.
40فُلُنبَ، بِنبِ نُن تّ شُبٍ وْلّمَ دّننَشّ،
عَ نُن شّ نَشٍيٍ بَشِ سٍدِرٌن فُلُنبَ رَ،
هَن تَا سٌدٍ دّ نَشَن شِلِ قَلَمَ سٌي نَادّ،
نَشَن نَ تّتّ تُشُي قُفٍ رَ،
نَ يِرٍ بِرِن قِندِ مَ نّ عَلَتَلَ فبٍ رَ.
عَ مُ كَنَمَ سْنْن.»