عِسِرَيِلَ عَلَتَلَ شَ سَاتّ كَنَقٍ
1عَلَتَلَ شَ مَلٍكّ نَشَ كٍلِ فِلِفَلِ، عَ سِفَ بٌكِن. عَ نَشَ عَ مَسٍن عِسِرَيِلَكَيٍ بّ، «ﭑ بَرَ وٌ تٌنفٌ مِسِرَ، ﭑ قَ وٌ شُن تِ بْشِ رَ، ﭑ دّننَشّ سَاتّ تٌنفٌ مَرَكَلِ رَ وٌ بٍنبَيٍ بّ. ﭑ نُ بَرَ عَ قَلَ، ‹ﭑ مُ ﭑ مَ سَاتّ كَنَمَ عَبَدَن.› 2عَ مُ لَن وٌ تَن شَ سَاتّ تٌنفٌ يِ بْشِ مِشِيٍ بّ. عَ نُ لَن نّ وٌ شَ عٍ شَ سّرّشّبَدٍيٍ رَبِرَ، كْنْ وٌ مُ ﭑ مَ يَامَرِ سُشُ! وٌ يِ وَلِ مْولِ رَبَشِ مُنقٍ رَ؟ 3نَ نَن عَ تٌشِ، ﭑ شَ عَ قَلَ وٌ بّ، ﭑ مُ قَمَ عٍ كٍرِدٍ وٌ يَ رَ. عٍ قَمَ لُدٍ وٌ سّيتِ مَ نّ. عٍ شَ عَلَيٍ قِندِ مَ فَنتَنيِ نَن نَ وٌ بّ.»
4عَلَتَلَ شَ مَلٍكّ تٌ فّ يِ وْيّنيِ مَسٍندٍ عِسِرَيِلَكَيٍ بّ، عٍ نَشَ وَ عٍ شُي عِتٍشِ رَ. 5عٍ نَشَ بٌكِن شِلِ قَلَ يِ يِرٍ شُن، عٍ قَ سّرّشّيٍ بَ عَلَتَلَ بّ.
يٌسُوٍ شَ قَشّ
6يٌسُوٍ تٌ حَمَ بّحِن، عِسِرَيِلَكَيٍ نَشَ سِفَ عٍ شَ بْشِ مَسْتْدٍ نَشَن نُ قِندِشِ عٍ كّ رَ. 7حَمَ نَشَ عَلَتَلَ شَ سّرِيّ سُشُ يٌسُوٍ شَ وَشَتِ كُي، نُن قٌرِيٍ شَ وَشَتِ كُي، نَشٍيٍ شَ سِمَيَ دَنفِ يٌسُوٍ رَ، نَشٍيٍ نُ بَرَ عَلَتَلَ شَ كَابَنَكٌي تٌ، عَ نَشٍيٍ رَبَشِ عِسِرَيِلَ بّ. 8نُنُ شَ دِ يٌسُوٍ، عَلَتَلَ شَ كٌنيِ، نَشَ لَاشِرَ عَ شَ سِمَيَ حّ كّمّ حّ قُ مَ. 9عٍ نَشَ عَ رَفَتَ عَ شَ بْشِ مَ نَشَن قِندِ عَ كّ رَ، تِمِنَتِ شّرّ سّ، عٍقِرَ مِ فٍيَ يِرٍ، فَاسِ فٍيَ كْولَ بِرِ.
10يٌسُوٍ شُنلَنمَيٍ بِرِن تٌ قَشَ، مِشِ فبّتّيٍ نَشَ مِنِ نَشٍيٍ مُ عَلَتَلَ كٌلٌن. عٍ مُ عَ كٌلٌن عَ نُ بَرَ نَشَن نَبَ عِسِرَيِلَ بّ. 11نَ تّمُي عِسِرَيِلَكَيٍ نَشَ قٍ رَبَ نَشَن مُ رَقَن عَلَتَلَ مَ. عٍ نَشَ تُوبِ بَلِ كُيٍيٍ بّ. 12عٍ نَشَ عَلَتَلَ قِنسِرِوَلِ، عٍ بٍنبَيٍ مَرِفِ عَلَتَلَ، نَشَن عٍ رَ مِنِ مِسِرَ بْشِ مَ. عٍ نَشَ بِرَ عَلَ فبّتّيٍ قْشْ رَ، عٍ رَبِلِنيِ مِشِيٍ نُ عَلَ نَشٍيٍ بَتُقٍ، عٍ نُ قَ عٍ قٍلٍن نٍيٍ بّ. عٍ نَشَ عَلَتَلَ رَحَاشُ، 13عٍ عَ قِنسِرِوَلِ، عٍ بَلِ كُيٍيٍ نُن عَسِتَرَتٍ كُيٍيٍ بَتُ.
14عَلَتَلَ نَشَ شْنْ عِسِرَيِلَ مَ، عَ نَشَ عٍ سَ عٍ وُرُ مِشِيٍ بّلّشّ. عَ نَشَ عٍ سَرَ عٍ يَشُييٍ مَ عٍ رَبِلِنيِ. عٍ مُ قَ نْ تِدٍ عٍ يَشُييٍ يَ رَ سْنْن. 15عٍ نُ سِفَمَ فٍرٍ سٌدٍ دّننَشّ بِرِن، عَلَتَلَ نَن نُ عٍ بْنبْمَ، عَ نُ قٍ حَاشِ دْشْ عٍ مَ، عَلْ عَ نُ بَرَ عَ مَسٍن عٍ بّ كِ نَشّ مَرَكَلِ رَ. عٍ نَشَ تْورْ كِ قَنيِ. 16عَلَتَلَ نَشَ كِيتِسَيٍ رَكٍلِ، عٍ شَ عٍ رَتَنفَ عٍ وُرُ مِشِيٍ مَ. 17كْنْ عِسِرَيِلَكَيٍ مُ تِن عٍ تُلِ مَتِدٍ نَ كِيتِسَيٍ رَ، بَرِ مَ عٍ نُ وَ مَ عَلَ فبّتّيٍ نَن بَتُقٍ، عٍ شَ عٍ قٍلٍن عٍ بّ. عٍ نَشَ فبِلٍن عٍ بٍنبَيٍ شَ كِرَ قْشْ رَ مَقُرٍن. عٍ بٍنبَيٍ نُ بَرَ بِرَ عَلَتَلَ شَ سّرِيّ قْشْ رَ، كْنْ عٍ تَن مُ تِن نَ رَ قٍوٌ.
18عَلَتَلَ تٌ نُ كِيتِسَمَيٍ رَكٍلِمَ، عَ نَشَ عٍ مَلِ عٍ شَ سِمَيَ بِرِن كُي عَلَكٌ عِسِرَيِلَكَيٍ شَ رَتَنفَ عٍ يَشُييٍ مَ. عَلَتَلَ نُ كِنِكِنِمَ عٍ مَ عٍ شَ تْورّ بِرِن كُي. 19كْنْ كِيتِسَ تٌ بَرَ قَشَ، عٍ مَن نَشَ بِرَ عَلَ فبّتّيٍ قْشْ رَ دَنفِقٍ عٍ بَبَيٍ رَ. عٍ نَشَ عٍ بَتُ، عٍ قٍلٍن بْشِ مَ عٍ بّ. عٍ مُ سٍسٍ بَ عٍ شَ وَلِ كٌبِيٍ رَ، عٍ بْحّ شْرْشْشِ تُن.
20نَ كُي عَلَتَلَ بْحّ نَشَ تٍ عِسِرَيِلَكَيٍ شِلِ مَ، عَ قَ عَ مَسٍن، «يِ حَمَ بَرَ عٍ كٌبٍ تِ ﭑ مَ سَاتّ رَ ﭑ نَشَن تٌنفٌ عٍ بٍنبَيٍ بّ. عٍ بَرَ ﭑ شُي مَتَندِ. 21نَ كُي، ﭑ تَن قَن مُ قَمَ سِ كٍرٍن كٍرِدٍ عٍ يَ رَ سْنْن، نَشٍيٍ نُ نَ يِ بْشِ مَ يٌسُوٍ قَشَ تّمُي نَشّ. 22ﭑ قَمَ عِسِرَيِلَكَيٍ مَتٌدٍ شَ عٍ تِنمَ، شَ عٍ مُ تِنمَ، بِرَدٍ عَلَتَلَ شَ كِرَ قْشْ رَ عَلْ عٍ بٍنبَيٍ عَ رَبَ كِ نَشّ.» 23عَلَتَلَ نَشَ يِ سِيٍ لُ نَا، عَ مُ نَشٍيٍ سَشِ يٌسُوٍ سَفٌي. عَ مُ فبَتَ عٍ كٍرِدٍ سْنْن.