بْنسْي فبّتّيٍ كِسِ سْتْقٍ
1عَلَتَلَ شَ مَسٍنيِ نَن يَ؛
«وٌ بِرَ نْندِ نُن تِنشِنيِ قْشْ رَ،
بَرِ مَ ﭑ مَ كِسِ نَ قَقٍ،
عَ فبٍ مُ لُشِ ﭑ مَ تِنشِنيِ شَ تٌ.
2بَرَكَ نَ مِشِ بّ نَشَن وَلِمَ نَ كِ،
نَشَن نَ سّرِيّ سُشُمَ عَ قَنيِ رَ،
نَشَن عَ حْشْ سَمَ مَلَبُ لْشْي شَ قٍ شْن مَ،
عَ مُ عَ مَبٍرٍ، عَ مُ عَ بّلّشّ تِ وَلِ حَاشِ مَ.»
3«شْحّ نَشَن عَ شَشِلِ تِ عَلَتَلَ رَ،
نَ نَشَ عَ قَلَ،
‹عَلَتَلَ ﭑ بَمَ نّ عَ شَ حَمَ يَ مَ ﭑ مَ شْحّيَ شَ قٍ رَ.›
مِشِ بَنَشِ نَشَ عَ قَلَ،
‹ﭑ لُشِ نّ عَلَ بّ عَلْ وُرِ شَرَشِ نَشَن تِدٍ مُ فبٌ.›»
4عَلَتَلَ شَ مَسٍنيِ نَن يَ؛
«مِشِ بَنَشِ نَشٍيٍ عٍ حْشْ سَمَ مَلَبُي لْشْي شَ قٍ شْن مَ،
نَشٍيٍ ﭑ وَشْنقٍ رَبَمَ،
نَشٍيٍ ﭑ مَ سَاتّ مَبَنبَنمَ،
5ﭑ تْنشُمَ ندٍ تِمَ نّ نٍيٍ بّ ﭑ مَ بَنشِ كُي،
نَشَن تِدٍ دَنفِ دِ بَرِقٍ رَ.
ﭑ عٍ شِلِ شُنفبٌمَ نّ عَبَدَن،
نَ بِنيّ مُ بَمَ عٍ مَ قٍقٍ مَ.
6شْحّ نَشٍيٍ عٍ شَشِلِ تِمَ عَلَتَلَ رَ،
عٍ بِرَ عَ شِلِ قْشْ رَ شَنُنتٍيَ كُي،
عٍ عَ بَتُ،
عٍ عٍ حْشْ سَ عَ شَ مَلَبُي لْشْي شَ قٍ شْن مَ،
عٍ مُ عَ مَبٍرٍ،
نَشٍيٍ ﭑ مَ سَاتّ مَبَنبَنمَ،
7ﭑ عٍ شَنِنمَ نّ ﭑ مَ فٍيَ سّنِيّنشِ مَ،
عٍ شَ سّيوَ ﭑ مَ بَنشِ كُي مِشِ ﭑ مَشَندِ مَ دّننَشّ.
ﭑ عٍ شَ سّرّشّ فَن دَاشِ نُن عٍ شَ سّرّشّ فبّتّيٍ سُشُمَ نّ ﭑ مَ سّرّشّبَدٍ قَرِ،
بَرِ مَ ﭑ مَ بَنشِ شِلِ قَلَمَ نّ ‹سَلِدٍ بَنشِ سِ بِرِن بّ.›
8عَلَتَلَ شَ مَسٍنيِ نَن يَ، عَلَ نَشَن عِسِرَيِلَ دِ رَيٍنسٍنشِيٍ مَلَنمَ،
عَ نَشّ، ‹ﭑ مَن عٍ مَلَنمَ نّ ﭑ يِرٍ.›»
9وٌ تَن سُبٍ نَشٍيٍ نَ بُرُنيِ،
وٌ قَ وٌ دّ مَدٌن.
10عٍ كَنتَمَيٍ لُشِ نّ عَلْ دْنشُييٍ،
عٍ مُ فّشِ قَهَامُي سْتْدٍ.
عٍ لُشِ نّ عَلْ بَرٍ نَشٍيٍ مُ نْمَ وٌنوٌندٍ،
عٍ سَشِ تّمُي بِرِن، شِ شْلِ نَن تُن حْشُن عٍ بّ.
11عٍ لُشِ نّ عَلْ بَرٍ نَشٍيٍ مُ لُفَمَ عٍ شَ دٌنسٍ رَ.
عٍ لُشِ نّ عَلْ شُرُ سٍ كَنتّيٍ نَشٍيٍ مُ فّشِ قَهَامُي سْتْدٍ،
كَنكَن بِرَشِ عَ يّتّ شَ كِرَ نَن قْشْ رَ فٍينِ شَ قٍ رَ.
12عٍ عَ قَلَمَ عٍ بٌورٍيٍ بّ،
«وٌ قَ، وٌن شَ بٍيرٍ قٍن، وٌن شَ سِسِ.
تِنَ قَن وٌن شَ فبِلٍن نَ رَبَ رَ.
تّمُندٍ تِنَ قَمَ نّ قِسَدٍ تٌ بّ.»