كٌنيِ نُن دِ
1ﭑ وَ مَ نَشَن قَلَقٍ، كّ تٌنفٌمَ، عَ دِ مّدِ تّمُي، هَلِ عَ بَبَ كّ تٌ قِندِشِ عَ فبٍ رَ، عَ لُشِ عَلْ كٌنيِ نَشَن مُ فّشِ عَ يّتّ سْتْدٍ. 2عَ لُمَ يَتِفِيٍ نُن كَرَ مْشْيٍ شَ يَامَرِ نَن بُن مَ، هَن عَ بَبَ نَ تِن تّمُي نَشّ عَ شَ عَ يّتّ سْتْ. 3وٌن تَن قَن تٌ مُ نُ عَلَ شَ مِشِ سُفَندِشِ عِسَ كٌلٌن، وٌن نُ لُشِ نّ عَلْ دِ مّدِيٍ. وٌن نُ نَ دُنِحَ قٍ كٌبِيٍ شَ كٌنيِيَ نَن بُن مَ. 4وَشَتِ تٌ كَمَلِ، عَلَ نَشَ عَ شَ دِ شّي دُنِحَ مَ فِنّ ندٍ سَابُي رَ. عَ نَشَ بَرِ عَلَ شَ سّرِيّ بُن مَ، 5عَلَكٌ عَ شَ مِشِيٍ شُنسَرَ نَشٍيٍ نُ نَ عَلَ شَ سّرِيّ شَ كِيتِ بُن مَ. عَ نَشَ وٌن شُنسَرَ عَلَكٌ وٌن شَ قِندِ عَلَ شَ دِيٍ رَ. 6وٌ تٌ قِندِ عَ شَ دِيٍ رَ، عَلَ نَشَ عَ شَ دِ شَشِلِ رَ سٌ وٌ بْحّ عِ، شَشِلِ نَشَن شِلِ تِمَ، «ن بَ.» 7نَ نَن عَ رَ وٌ بَرَ مِنِ كٌنيِيَ كُي، وٌ بَرَ قِندِ عَلَ شَ دِيٍ رَ. وٌ تٌ قِندِشِ عَ شَ دِيٍ رَ، عَلَ مَن بَرَ وٌ قِندِ عَ كّتٌنفٌي رَ.
8سِنفٍ وٌ مُ نُ عَلَ كٌلٌن. دُنِحَ قٍ كٌبِيٍ نَن نُ قِندِشِ وٌ مَرِفِ رَ، عَ قَ لِ نٍيٍ نُن عَلَ تَفِ عِكُيَ. 9يَكْسِ وٌ بَرَ عَلَ كٌلٌن. عَلَ بَرَ وٌ قَن كٌلٌن. مُنسٍ قَ عَ نِيَشِ سْنْن وٌ مَن فبِلٍنمَ نَ دُنِحَ قٍيٍ مَ نَشٍيٍ سّنبّ نُن تِدٍ مُ فبٌ؟ وٌ مَن وَ مَ لُقٍ عٍ شَ كٌنيِيَ بُن مَ؟ 10وٌ مَن بَرَ بِرَ يَامَرِيٍ قْشْ رَ، نَشٍيٍ عَ قَلَمَ لْشْي ندٍيٍ نُن كِكٍ ندٍيٍ تِدٍ فبٌ عٍ بٌورٍ بّ. وٌ وَشَتِ ندٍيٍ نُن حّ ندٍيٍ رَقِسَ عٍ بٌورٍ بّ. 11ﭑ فَاشُ نّ وٌ نَشَ ﭑ مَ شَرَنيِ رَبٌلٌ، ﭑ مَ وَلِ شَ لُ ﭑ مَ قُ.
12ﭑ نفَشَكٍرٍنيِيٍ، ﭑ بَرَ وٌ مَيَندِ، وٌ لُ عَلْ ﭑ تَن، بَرِ مَ ﭑ قَن لُشِ نّ عَلْ وٌ تَن. وٌ مُ قٍ كٌبِ يٌ رَبَ ﭑ نَ. 13وٌ عَ كٌلٌن عَ ﭑ مَ قُرٍ نَن عَ نِيَ، عَ سِنفٍ سِنفٍ ﭑ شَ وٌ كَوَندِ عِسَ شَ مَسٍنيِ قَنيِ رَ. 14نَ نُ شْرْشْ وٌ بّ، كْنْ ﭑ مَ قٍ مُ وٌ بْحّ رَحَاشُ وٌ مَ، وٌ مُ وٌ مَكُيَ ﭑ نَ. وٌ ﭑ نَسّنّ نّ عَلْ عَلَ شَ مَلٍكّ ندٍ، شَ نَ مُ عَ رَ عَلَ شَ مِشِ سُفَندِشِ عِسَ. 15وٌ شَ نَ سّيوّ قٌرِ نَ مِندٍن؟ سِنفٍ ﭑ مَ قٍ نُ رَقَن وٌ مَ هَن وٌ نُ نْمَ تِندٍ وٌ يَيٍ يَتِ بَدٍ ﭑ بّ. 16ﭑ نْندِ قَلَقٍ وٌ بّ، نَ بَرَ عَ نِيَ ﭑ شَ قِندِ وٌ يَشُي رَ؟ 17نَ مِشِيٍ وَ مَ وٌ شَ بِرَ عٍ قْشْ رَ، كْنْ نَ مُ قِندِ مَ قٍ قَنيِ رَ وٌ بّ. عٍ وَ مَ وٌن تَفِ عِسٌقٍ، عَلَكٌ وٌ شَ لُ عٍ تَن مَبِرِ. 18شَ وٌ فبَتَ قٍ قَنيِ رَبَقٍ رَ، نَ مُ حَاشُ. وٌ شَ نَ مْولِ رَبَ تّمُي بِرِن، هَلِ ﭑ مُ نَ وٌ يِرٍ. 19ﭑ مَ دِيٍ، ﭑ مَن نَ تْورْقٍ وٌ بّ عَلْ فِنّ شَ تْورّ دِتِنيِ رَ، هَن عَلَ شَ مِشِ سُفَندِشِ حّرّ كِ سَبَتِمَ وٌ عِ تّمُي نَشّ. 20عَ شْلِ ﭑ مَ وٌن بِرِن شَ لُ يِرٍ كٍرٍن، عَلَكٌ وٌن شَ وٌن بٌرٍ قَهَامُ، بَرِ مَ يَكْسِ ﭑ بَرَ هَنمّ وٌ شَ قٍ رَ.
هَفَرَ نُن سَرَ شَ مِسَالِ
21وٌ تَن نَشٍيٍ وَ مَ كِسِ سْتْقٍ عَلَ شَ يَامَرِيٍ رَتِنمّقٍ سَابُي رَ، وٌ مُ عَ كٌلٌن عَلَ شَ سّرِيّ نَشَن قَلَشِ؟ 22عَ سّبّشِ كِتَابُي كُي عَ دِ قِرِن نَن نُ نَ عِبُرَهِمَ يِ رَ. كٌنيِ فِنّ نَشَ كٍرٍن بَرِ عَ بّ، شْرّ فِنّ قَن نَشَ دِ فبّتّ بَرِ عَ بّ. 23عَ نَشَن سْتْ كٌنيِ فِنّ سَابُي رَ، نَ بَرِشِ نّ عَلْ عِبُنَدَ مَ بِرِن بَرِشِ كِ نَشّ، كْنْ عَ نَشَن سْتْ شْرّ فِنّ سَابُي رَ، عَ بَرِشِ لَايِدِ نَن كُي. 24نَ فِنّ قِرِنيِ مِسَالِشِ سَاتّ قِرِن نَن نَ. سَاتّ نَشَن شِرِشِ سِنَيِ فٍيَ قَرِ نَن عَ نِيَمَ مِشِ شَ لُ كٌنيِيَ كُي. هَفَرَ مِسَالِشِ نَ سَاتّ نَن نَ، 25نَشَن شِرِشِ سِنَيِ فٍيَ قَرِ عَرَبُ بْشِ مَ. عَ مِسَالِشِ دَرِ سَلَمُ قَن نَ، نَشَن نَ كٌنيِيَ كُي عَ نُن عَ شَ دِيٍ. 26كْنْ دَرِ سَلَمُ نَشَن نَ عَرِيَننَ، شْرّ تَا نَن عَ رَ. وٌن نفَ نَن نَ كِ. 27عَ سّبّشِ كِتَابُي كُي،
«عِ تَن نَشَن مُ دِ بَرِ مَ، عِ شَ حّلّشِن.
عِ تَن نَشَن مُ دِ بَرِ تْورّ كٌلٌن،
عِ شُي رَ مِنِ، عَ عِتٍ حّلّشِنيِ كُي،
بَرِ مَ فِنّ نَشَن شَ شّمّ بَرَ مّي عَ رَ،
عَ شَ دِ وُيَمَ نّ،
دَنفِ شّمّ تَا عِدْشْي رَ.»
28وٌ تَن نفَشَكٍرٍنيِيٍ، وٌ بَرَ قِندِ لَايِدِ دِيٍ رَ عَلْ عِسِيَفَ. 29نَ وَشَتِ، دِ نَشَن بَرِشِ عِبُنَدَ مَ كِ مَ، عَ نَشَ دِ بٌورٍ تْورْ، نَشَن بَرِشِ عَلَ شَشِلِ سّنبّ سَابُي رَ. هَن يَ عَ نَ نَ كِ نّ. 30مُنسٍ سّبّشِ كِتَابُي كُي؟ عَ سّبّشِ، «عِ شَ كٌنيِ فِنّ نُن عَ شَ دِ كٍرِ، بَرِ مَ كٌنيِ فِنّ شَ دِ نُن شْرّ فِنّ شَ دِ مُ كّ عِتَشُنمَ.» 31ﭑ نفَشَكٍرٍنيِيٍ، نَ نَن عَ رَ وٌن مُ قِندِشِ كٌنيِ فِنّ شَ دِيٍ شَ رَ. وٌن قِندِشِ شْرّ فِنّ شَ دِيٍ نَن نَ.