ثْلُ نُن عِسَ شَ شّيرَيٍ
1حّ قُ نُن نَانِ تٌ دَنفِ كٍلِقٍ نَ بِيَاسِ سِنفٍ مَ، ﭑ مَن نَشَ فبِلٍن دَرِ سَلَمُ. بَرَنَبَسِ نُن تِتٌ نُ نَ ﭑ قْشْ رَ. 2عَلَ نُ بَرَ عَ مَسٍن ﭑ بّ ﭑ شَ سِفَ نَا عَلَكٌ ﭑ شَ دّنتّفّ سَ عٍ بّ ﭑ شِبَارُ قَنيِ نَشَن عِبَمَ سِ فبّتّيٍ تَفِ. ﭑ مُ نَ دّنتّفّ سَ عٍ بِرِن شَ بّ، قٌ دَنشَنِيَتْي كُنتِفِيٍ، بَرِ مَ ﭑ مُ نُ وَ مَ ﭑ مَ وَلِ شُن شَ رَكَنَ.
3كْنْ هَلِ تِتٌ فِرّكِكَ نَشَن نُ نَ ﭑ قْشْ رَ، عٍ مُ عَ كَرَشَن عَ شَ سُننَ. 4مِشِ سُننَقٍ نُ بَرَ قِندِ حْشْنسْسْي رَ مُشُ تَفِ، بَرِ مَ مِشِ ندٍ نَشٍيٍ مُ قِندِشِ دَنشَنِيَتْييٍ رَ، نٍيٍ نَشَ سٌ مُشُ يَ مَ فُندٌ كُي. عٍ نُ وَ مَ وٌن مَ شْرّيَ نَن نَبّنقٍ، عَلَ شَ مِشِ سُفَندِشِ عِسَ نَشَن قِشِ وٌن مَ، عَلَكٌ وٌن مَن شَ فبِلٍن كٌنيِيَ كُي. 5كْنْ مُشُ مُ تِن نَ شَشِلِ رَ قٍقٍ مَ، عَلَكٌ وٌ نَشَ بَ عِسَ شَ نْندِ كِرَ شْن مَ.
6ﭑ مُ ﭑ شَشِلِ تِشِ مِشِيٍ رَ حَمَ بِرَشِ نَشٍيٍ قْشْ رَ، بَرِ مَ عَلَ مُ مِشِ يٌ رَقِسَمَ عَ بٌورٍ بّ. عٍ تَن مُ سٍسٍ سَ ﭑ مَ مَسٍنيِ قَرِ. 7عٍ نَشَ عَ تٌ عَلَ نَن نَ شّيرَيَ تَشُشِ ﭑ نَ، ﭑ شَ عِسَ شَ شِبَارُ قَنيِ عِبَ سِ فبّتّيٍ بّ، عَلْ ثِيّرِ عَ رَبَمَ يُوِقِيٍ بّ كِ نَشّ. 8عَلَ نَشَن ثِيّرِ شّي عَ شَ وَلِ رَبَدٍ يُوِقِيٍ تَفِ، عَ تَن نَن ﭑ قَن شّي عَ شَ وَلِ رَبَدٍ سِ فبّتّيٍ تَفِ. 9يَكِ، ثِيّرِ، نُن يَيَ نَشٍيٍ قِندِشِ كُنتِفِ شُنفبٍيٍ رَ دَنشَنِيَتْييٍ تَفِ، عٍ نَشَ ﭑ نُن بَرَنَبَسِ رَ سّنّ عَ نفَشَكٍرٍن كِ مَ عٍ تٌ عَ كٌلٌن عَلَ هِننّشِ ﭑ نَ كِ نَشّ. عٍ نَشَ لَن عَ مَ عَ مُشُ شَ شّيرَيَ رَبَ سِ فبّتّيٍ تَفِ، عٍ تَن قَن شَ عَ رَبَ يُوِقِيٍ تَفِ. 10عٍ مَن نَشَ مُشُ مَيَندِ مُشُ شَ سٍتَرٍيٍ مَلِ مُشُ شَ وَلِ كُي. قٍ نَن نَ كِ ﭑ نُ وَ مَ نَشَن نَبَقٍ عَ قَنيِ رَ.
يُوِقِيٍ نُن سِ فبّتّيٍ
11ثِيّرِ تٌ قَ عَنتِيْكِ، ﭑ نَشَ عَ مَتَندِ، بَرِ مَ عَ نُ بَرَ تَنتَن. 12بٍينُن يَكِ شَ مِشِ ندٍيٍ شَ سِفَ عَ يِرٍ، عَ نُ عَ دّفٍمَ عَ نُن سِ فبّتّيٍ. كْنْ عٍ تٌ عَ شْنيِ لِ، عَ نَشَ فبِلٍن مِشِيٍ قْشْ رَ نَشٍيٍ قِندِشِ سِ فبّتّيٍ رَ. عَ نُ بَرَ فَاشُ يَكِ شَ مِشِيٍ يَ رَ، بَرِ مَ عٍ نُ لَشِ عَ رَ عَ دَنشَنِيَتْييٍ لَنشِ نّ عٍ شَ سُننَ. 13يُوِقِ فبّتّيٍ نَشَ بِرَ عَ شَ قِلَنكَقُيحَ قْشْ رَ، هَن عٍ نَشَ بَرَنَبَسِ قَن نَتَنتَن.
14ﭑ تٌ عٍ شَ تِنشِنتَرٍيَ تٌ، نَشَن مُ لَنشِ عَلَ شَ نْندِ مَ، ﭑ نَشَ عَ قَلَ ثِيّرِ بّ عٍ بِرِن يَ شْرِ، «هَلِ عِ تٌ قِندِشِ يُوِقِ رَ، عِ نَ حّرّقٍ سِ فبّتّيٍ شَ نَامُنيِ كِ نَن مَ، نَشَن مُ قِندِ يُوِقِ شَ نَامُنيِ رَ. مُنقٍ رَ عِ عَ قَلَمَ سِ فبّتّيٍ بّ عٍ شَ حّرّ يُوِقِيٍ حّرّ كِ مَ؟»
15وٌن تَن نَشٍيٍ بَرِشِ يُوِقِيَ كُي، نَشٍيٍ مُ قِندِشِ يُنُبِتْييٍ رَ سِ فبّتّيٍ تَفِ، 16وٌن عَ كٌلٌن مِشِ يٌ مُ نْمَ عَلَ شَ سّرِيّ بِرِن نَبَتُدٍ، عَ قَ لُ عَ مُ تَنتَن نَ شَ عَ قِندِ تِنشِنتْي رَ. عَ قِندِ مَ تِنشِنتْي رَ عَ تٌ دَنشَنِيَشِ عَلَ شَ مِشِ سُفَندِشِ عِسَ مَ. نَ كُي، وٌن بَرَ دَنشَنِيَ عَلَ شَ مِشِ سُفَندِشِ عِسَ مَ، عَلَكٌ وٌن شَ تِنشِن نَ دَنشَنِيَ سَابُي رَ. وٌن مُ نْمَ عَلَ شَ سّرِيّ بِرِن نَتِنمّدٍ، هَن وٌن شَ قِندِ تِنشِنتْييٍ رَ. مِشِ يٌ مُ نْمَ عَلَ شَ سّرِيّ بِرِن نَتِنمّدٍ، هَن عَ قَ قِندِ تِنشِنتْي رَ.
17شَ وٌن نَ تِنشِنيِ قٍنقٍ عَلَ شَ مِشِ سُفَندِشِ سَابُي رَ، وٌن قَ يُنُبِ ندٍ رَبَ، نَ عَ مَسٍنمَ يُنُبِ رَقَن عَلَ شَ مِشِ سُفَندِشِ مَ؟ عَستْقُلَهِ. 18ﭑ مُ لَمَ عَ رَ سْنْن ﭑ نْمَ عَلَ شَ يَامَرِ بِرِن نَتِنمّدٍ، هَن ﭑ شَ قِندِ تِنشِنتْي رَ. شَ عَ سَ لِ ﭑ بَرَ فبِلٍن نَ شَشِلِ مَ، نَ مُ قِندِ عَلَ شَ سّرِيّ رَ. 19ﭑ تٌ عَ تٌ ﭑ مُ نْمَ عَلَ شَ سّرِيّ بِرِن نَتِنمّدٍ، ﭑ نَشَ نَ شَشِلِ لُ نَ، عَلَكٌ ﭑ مَ حّرّ كِ قَنيِ شَ قِندِ تَنتُي رَ عَلَ بّ. 20عَلَ شَ مِشِ سُفَندِشِ قَشَ كِ نَشّ وُرِ مَفَلَنبُشِ مَ، ﭑ وَشْنقٍ قَن بَرَ قَشَ نَ كِ. يَكْسِ ﭑ مُ بِرَ مَ ﭑ وَشْنقٍ قْشْ رَ. عَلَ شَ مِشِ سُفَندِشِ نَن ﭑ مَ دُنِحّءِفِرِ رَحّرّ مَ. ﭑ ﭑ مَ دُنِحّءِفِرِ رَحّرّ مَ دَنشَنِيَ نَن سَابُي رَ. ﭑ بَرَ دَنشَنِيَ عَلَ شَ دِ مَ نَشَن عَ يّتّ بَشِ سّرّشّ رَ ﭑ بّ عَ شَ شَنُنتٍيَ شَ قٍ رَ. 21ﭑ مُ تِنمَ عَلَ شَ هِننّ رَبٌلٌدٍ. شَ عَ سَ لِ ﭑ نْمَ عَلَ شَ يَامَرِيٍ رَتِنمّدٍ هَن ﭑ شَ قِندِ تِنشِنتْي رَ، عَ لِمَ عَلَ شَ مِشِ سُفَندِشِ شَ قَشّ تِدٍ يٌ مُ نَ وٌن مَ كِسِ شَ قٍ رَ.