عَلَ شَ سّرّشّبَدٍ نُن هْرْ مْبَنشِ تِقٍ
1كِكٍ سٌلٌقٍرٍ تٌ كَمَلِ، عِسِرَيِلَكَ نَشٍيٍ نُ نَ نَ تَايٍ كُي، نٍيٍ بِرِن نَشَ عٍ مَلَن دَرِ سَلَمُ. 2يٌسَدَكِ شَ دِ يٍسُوَ نُن عَ بٌورٍيٍ سّرّشّدُبّيٍ، عَ نُن سَلَتِيٍلِ شَ دِ سٌرٌبَبٍلِ نُن عَ بٌورٍيٍ، عٍ نَشَ كَقُ عٍ بٌورٍ مَ، عٍ سّرّشّبَدٍ تِ عِسِرَيِلَ مَرِفِ عَلَ بّ، عَلَكٌ عٍ شَ سّرّشّ فَن دَاشِيٍ بَ عَلْ عَننَبِ مُنسَ عَ مَسٍن سّرِيّ كُي كِ نَشّ. 3عٍ نَشَ نَ سّرّشّبَدٍ تِ عَ يِرٍ قٌرِ، عٍ مَن نَشَ سّرّشّ بَ قْلْ فّيسّفّ نُن نُنمَرٍ. عٍ نُ نَ بِرِن نَبَقٍ فَاشُي نَن كُي سِ فبّتّيٍ شَ قٍ رَ، نَشٍيٍ نُ نَ عٍ رَبِلِنيِ. 4عٍ نَشَ بَفٍ تِ سَلِ رَبَ عَلْ عَ سّبّشِ كِتَابُي كُي كِ نَشّ، عٍ مَن نُ سّرّشّيٍ بَمَ لْشْ يٌ لْشْ سّرِيّ كِ مَ. 5عٍ نُ سّرّشّ فَن دَاشِ بَمَ كِكٍ نّينّ سَلِ نُن سَلِ شُنفبٍيٍ وَشَتِ، عَ نُن تّمُي فبّتّ مِشِ ندٍ نَ عَ حَنِفٍ تّمُي نَشّ. 6نَ كِكٍ سٌلٌقٍرٍ ندٍ لْشْي سِنفٍ، عٍ نَشَ سّرّشّ بَ قْلْ عَلَ بّ، كْنْ عَلَتَلَ شَ هْرْ مْبَنشِ مُ نُ كْورِنشِ سِندٍن.
7نَ تّمُي عٍ نَشَ كْبِرِ بَ عَلَكٌ سِدْن نُن تِرٍ فّمّ مَسٌلِيٍ نُن بَنشِتِيٍ شَ قَ عٍ مَلِدٍ. عٍ نَشَ سَنسِ شْرِيٍ، وّنِ، نُن تُرٍ قَن بَ عٍ بّ، عَلَكٌ عٍ شَ قَ وُرِ رَ يٍ كِرَ رَ كٍلِقٍ لِبَن هَن يَقَ، عَلْ ثٍرِ سٍ مَنفّ سِرُ سِ عَ يَمَرِ كِ نَشّ. 8نَ حّ عِفبِلٍنيِ، كِكٍ قِرِن ندٍ، سَلَتِيٍلِ شَ دِ سٌرٌبَبٍلِ، يٌسَدَكِ شَ دِ يٍسُوَ، عٍ نفَشَكٍرٍنيِيٍ، سّرّشّدُبّيٍ، لٍوِ بْنسْي مِشِيٍ، نُن حَمَ نَشَن كٍلِ كٌنيِيَ كُي ثٍرِ سٍ بْشِ مَ، عٍ بِرِن نَشَ وَلِ قْلْ. عَلَتَلَ شَ بَنشِ وَلِ نَشَ تَشُ لٍوِ بْنسْي مِشِيٍ رَ، نَشٍيٍ نُ بَرَ حّ مْشْحّن نُن عَ شَنبِ سْتْ. 9يٍسُوَ نَشَ عَ شَ دِيٍ، نُن عَ نفَشَكٍرٍنيِ كَدَ مِيّلِ، نُن عَ شَ دِيٍ تِ هْرْ مْبَنشِ وَلِكّيٍ شُنيِيٍ رَ، عَ نُن شٍنَدَدِ، عَ شَ دِيٍ، نُن عَ نفَشَكٍرٍنيِ نَشٍيٍ كٍلِشِ لٍوِ بْنسْي.
10وَلِكّيٍ تٌ فّ عَلَتَلَ شَ هْرْ مْبَنشِ كْورِندٍ، سّرّشّدُبّيٍ نُن عَسَقِ شَ دِ لٍوِ بْنسْي مِشِيٍ نَشَ عَلَتَلَ مَتْشْ سَرَيٍ نُن مَشَسٍيٍ شُي رَ، عِسِرَيِلَ مَنفّ دَوُدَ شَ سّرِيّ كِ مَ. 11عٍ نُ عَلَتَلَ تَنتُ، عٍ عَ مَتْشْ يِ بّيتِ رَ،
«عَلَتَلَ نَن قَن،
عَ هِننّمَ عِسِرَيِلَ رَ عَبَدَن.»
حَمَ بِرِن نَشَ عَلَتَلَ مَتْشْ عٍ شُي عِتٍشِ رَ، عَلَتَلَ شَ بَنشِ كْورِنقٍ شَ قٍ رَ. 12قٌرِ نَشٍيٍ نُ بَرَ عَلَ شَ هْرْ مْبَنشِ سِنفٍ تٌ، عٍ قِندِ سّرّشّدُبّيٍ رَ، عٍ قِندِ كُنتِفِيٍ رَ، عٍ نَشَ وَ عٍ شُي عِتٍشِ رَ. بٌورٍيٍ نَشَ عٍ شُي رَتٍ سّيوّ كُي. 13حَمَ مُ نْ حّلّشِنيِ شُي نُن وَ شُي تَفِ رَ سَدٍ، بَرِ مَ حَمَ شُي شَ فبٌي نُ سِفَمَ هَن يِرٍ مَكُيٍ.