عَلَ شَ مَرَقَنيِ نُن عَ شَ سّرِيّ
1«سّرِيّ، يَامَرِ، نُن مَسٍنيِ نَن يِ كِ، وٌ مَرِفِ عَلَتَلَ نَشَن سٌشِ ﭑ يِ رَ عَلَكٌ ﭑ شَ عَ شَرَن وٌ رَ، وٌ شَ نْ عَ رَبَدٍ بْشِ مَ عَ قَقٍ نَشَن قِدٍ وٌ مَ. 2وٌ شَ فَاشُ وٌن مَرِفِ عَلَتَلَ يَ رَ. وٌ شَ سِمَيَ كُي، وٌ تَن، وٌ شَ دِيٍ، عَ نُن وٌ شَ مَمَدِيٍ، وٌ شَ يِ سّرِيّ نُن يِ يَامَرِ بِرِن نَبَ ﭑ نَشَن سٌشِ وٌ يِ رَ، عَلَكٌ وٌ شَ سِمَيَ شْنكُيٍ سْتْ. 3عِسِرَيِلَكَيٍ، وٌ وٌ حّنفِ سَ يِ بِرِن شْن مَ، وٌ مَن شَ قّنتّن عَ رَبَ كِ مَ. وٌ قَمَ نّ هّيرِ سْتْدٍ، وٌ قَمَ نّ قِندِدٍ حَمَ فبٍفبٍ رَ يِ بْشِ مَ شِحّ نُن كُمِ فبٍفبٍ نَ دّننَشّ، عَلْ وٌ بٍنبَيٍ مَرِفِ عَلَتَلَ عَ قَلَشِ وٌ بّ كِ نَشّ. 4عِسِرَيِلَكَيٍ، وٌ وٌ تُلِ مَتِ. وٌن مَرِفِ عَلَتَلَ كٍرٍن ثٍتِ نَ عَ رَ. 5وٌ لَن نّ وٌ شَ وٌ مَرِفِ عَلَتَلَ شَنُ وٌ بْحّ قِيشّشِ رَ، وٌ نِي رَ، عَ نُن وٌ سّنبّ بِرِن نَ. 6ﭑ يِ مَسٍنيِ نَشَن شَرَنشِ وٌ بّ يِ كِ، عَ شَ لُ وٌ بْحّ مَ. 7وٌ قَمَ نّ عَ مَبَنبَندٍ وٌ شَ دِيٍ بّ تّمُي بِرِن، شَ وٌ نَ بَنشِ كُي، شَ وٌ نَ بِيَاسِقٍ، كْي نُن يَنيِ رَ. 8عَ شَ شِرِ وٌ بّلّشّ نُن وٌ تِفِ رَ تْنشُمَ رَ. 9وٌ شَ عَ سّبّ وٌ شَ بَنشِ نُن وٌ شَ نَادّ مَ.»
10«وٌ مَرِفِ عَلَتَلَ نَ وٌ شَنِن تّمُي نَشّ بْشِ مَ عَ نَ دّننَشّ سٌقٍ وٌ يِ رَ، عَلْ عَ رَكَلِ وٌ بَبَيٍ عِبُرَهِمَ، عِسِيَفَ، عَ نُن يَشُبَ بّ كِ نَشّ، وٌ قَمَ نّ تَا بٍلٍبٍلٍ تٌقَنيِيٍ سْتْدٍ وٌ مُ نَشٍيٍ تِشِ، 11بَنشِ رَقٍشِيٍ هَرِفٍ مْولِ بِرِن نَ وٌ مُ نَشٍيٍ قٍنشِ، كْلْنيِيٍ وٌ مُ نَشٍيٍ فٍشِ، وّنِ بِلِيٍ نُن عٌلِوِ بِلِيٍ وٌ مُ نَشٍيٍ سِشِ. 12وٌ نَ وٌ دّفٍ هَن وٌ نَشَ وَ سَ تّمُي نَشّ، وٌ نَشَ نّيمُ وٌ مَرِفِ عَلَتَلَ مَ دٍ، نَشَن وٌ رَ مِنِشِ كٌنيِيَ كُي مِسِرَ بْشِ مَ. 13وٌ شَ فَاشُ وٌ مَرِفِ عَلَتَلَ يَ رَ. وٌ شَ عَ كٍرٍن نَن بَتُ. وٌ شَ وٌ كَلِ عَ شِلِ نَن نَ. 14وٌ نَشَ عَلَ فبّتّيٍ بَتُ دٍ، مِشِيٍ نَشٍيٍ بَتُمَ وٌ رَبِلِنيِ، 15بَرِ مَ وٌ مَرِفِ عَلَتَلَ مُ وَ مَ عَ قِرِن ندٍ شْن. شَ نَ مُ عَ رَ عَ شْنْمَ نّ وٌ مَ، عَ مَن قَ وٌ قَشَ.»
16«وٌ نَشَ وٌ مَرِفِ عَلَتَلَ مَتٌ دٍ، عَلْ وٌ نَشَن نَبَ مَسَ. 17وٌ شَ وٌ مَرِفِ عَلَتَلَ شَ سّرِيّ، عَ شَ مَسٍنيِ، نُن عَ شَ يَامَرِ رَبَتُ تِنشِنيِ كُي عَ نَشَن سٌشِ وٌ يِ رَ. 18وٌ شَ وٌ حّرّ تِنشِنيِ كِرَ رَ. عَلَتَلَ وَ مَ قٍ نَشَن بِرِن شْن مَ، وٌ لَن وٌ شَ نَ نَن نَبَ. نَ تّمُي وٌ قَمَ نّ هّيرِ سْتْدٍ، وٌ قَ بْشِ قَنيِ سْتْ عَلَتَلَ عَ كَلِ نَشَن نَ وٌ بَبَيٍ بّ. 19وٌ وٌ يَشُييٍ كٍرِ مَ نّ عَلْ عَلَتَلَ عَ مَسٍنشِ كِ نَشّ.»
20«وٌ شَ دِيٍ نَ وٌ مَشْرِن تّمُي نَشّ، ‹مُنسٍ نَ يِ مَسٍنيِ، يِ سّرِيّ، نُن يِ يَامَرِ رَ، وٌن مَرِفِ عَلَتَلَ نَشَن سٌشِ وٌن يِ رَ يِ كِ؟› 21وٌ قَمَ نّ عٍ يَابِدٍ، ‹قِرَوُنَ شَ كٌنيِيٍ نَن نُ مُشُ رَ مِسِرَ بْشِ مَ، عَلَتَلَ قَ مُشُ رَ مِنِ نَا عَ سّنبّ رَ. 22عَلَتَلَ نَشَ تْنشُمَ نُن كَابَنَكٌ بٍلٍبٍلٍ مَفَاشُشِيٍ رَبَ مُشُ يَ شْرِ مِسِرَكَيٍ رَ، قِرَوُنَ نُن عَ شَ دٍنبَيَ بِرِن نَ. 23عَ مُشُ رَ مِنِ نّ مِسِرَ عَلَكٌ عَ شَ مُشُ شَنِن بْشِ مَ، عَ عَ كَلِ دّننَشّ شَ قٍ رَ وٌن بَبَيٍ بّ سٌقٍ رَ وٌن يِ رَ. 24نَ تّمُي عَلَتَلَ نَشَ مُشُ يَامَرِ، عَ مُشُ شَ يِ سّرِيّ بِرِن نَوَلِ عَ رَوَلِ كِ مَ. شَ وٌن فَاشُ وٌن مَرِفِ عَلَتَلَ يَ رَ، عَ هّيرِ نُن سِمَيَ شْنكُيٍ قِمَ نّ وٌن مَ عَلْ عَ نَ عَ رَبَقٍ كِ نَشّ يَكْسِ. 25شَ وٌن سَ وٌن مَرِفِ عَلَتَلَ شَ يَامَرِ بِرِن نَبَتُ عَلْ عَ مَسٍنشِ وٌن بّ كِ نَشّ، نَ قِندِ مَ نّ تِنشِنيِ رَ وٌن بّ.›»