عَننَبِ مُنسَ شَ مَسٍنيِ سِنفٍ
كٍلِقٍ شٌرٍبٍ فٍيَ
1وْيّنيِيٍ نَن يِ كِ، عَننَبِ مُنسَ نَشَن مَسٍن عِسِرَيِلَكَيٍ بِرِن بّ. نَ تّمُي عَ نُ نَ يُرُدّن سٌفٍتٍدٍ بِرِ رَ، فبٍنفبٍرٍنيِ مَ نَشَن نَ عَرَبَ، سُقِ يَ تَفِ، ثَرَن، تٌقٍلِ، لَبَن، شَسٍرٌتِ، نُن دِ سَهَبِ لٌنفٌرِ. 2كٍلِ شٌرٍبٍ فٍيَ هَن كَدٍ سِ بَرِنٍيَ كِرَ رَ مِنِقٍ رَ سٍيِرِ فٍيَيٍ بِرِ، شِ قُ نُن كٍرٍن حّرّ نَ عَ رَ. 3عٍ شَ كٍلِ حّ تٌنفٌ نَانِ ندٍ مَ مِسِرَ، عَ كِكٍ قُ نُن كٍرٍن ندٍ، شِ سِنفٍ، عَننَبِ مُنسَ نَشَ عَلَتَلَ شَ يَامَرِ مَسٍن عِسِرَيِلَكَيٍ بّ. 4نَ تّمُي عَننَبِ مُنسَ نُ بَرَ شُتُ سْتْ سِشْن مَ، عَمٌرِ مَنفّ، نَشَن نُ سَبَتِشِ شّسِبْن، عَ نُن عٌفٌ، بَسَن مَنفّ، نَشَن نُ سَبَتِشِ عَسَتَرٌتِ نُن عٍدٍرٍيِ. 5يُرُدّن سٌفٍتٍدٍ بِرِ مٌوَبَ بْشِ مَ، عَننَبِ مُنسَ نَشَ عَلَ شَ سّرِيّ تَفِ رَبَ عٍ بّ. نَ وْيّنيِ نَن يِ كِ.
6«وٌن نُ نَ شٌرٍبٍ فٍيَ يِرٍ تّمُي نَشّ، وٌن مَرِفِ عَلَتَلَ يِ نَن مَسٍن وٌن بّ، ‹وٌ بَرَ بُ يِ فٍيَ بُن مَ. 7وٌ تِ كِرَ شْن مَ قَ. وٌ شَ سِفَ فٍيَ مَ عَمٌرِكَيٍ نَ دّننَشّ، نُن نَ لٌنفٌرِ بِرِن، عَرَبَ بْشِ مَ، فٍيَ بِرِ، سٍقٍلَ نُن نٍفٍوِ بِرِ، بَا دّ رَ، هَن كَنَان بْشِ مَ، هَن لِبَن سَ دْشْ عٍقِرَتِ شُرٍ بٍلٍبٍلٍ رَ. 8وٌ شَ نَ بْشِ مَتٌ، ﭑ نَشَن قِشِ وٌ مَ. وٌ سِفَ، وٌ شَ نَ تٌنفٌ، بَرِ مَ ﭑ تَن عَلَتَلَ يَتِ نَن نَ بْشِ لَايِدِ تٌنفٌشِ وٌ بٍنبَيٍ بّ، عِبُرَهِمَ، عِسِيَفَ، عَ نُن يَشُبَ، عَ نُن عٍ بْنسْي بِرِن هَلِ عٍ دَنفِ شَنبِ.›»
عَننَبِ مُنسَ شَ كِيتِسَيٍ
9«نَ تّمُي ﭑ يِ نَن قَلَ وٌ بّ، ‹ﭑ تَن كٍرٍن مُ نْمَ وٌ شَ قٍ نْدٍ. 10وٌ مَرِفِ عَلَتَلَ بَرَ وٌ رَفبٌ يّ. يَكْسِ وٌ بَرَ فبٌ يّ عَلْ تُنبُييٍ نَشٍيٍ نَ كٌورٍ مَ. 11وٌ بٍنبَيٍ مَرِفِ عَلَتَلَ شَ وٌ رَوُيَ هَن. عَ شَ بَرَكَ سَ وٌ شَ قٍ عَلْ عَ مَسٍن كِ نَشّ. 12ﭑ تَن كٍرٍن نْمَ وٌ شَ كَلَمُييٍ مَكِيتِدٍ دِ؟ 13وٌ كُنتِفِ لْننِلَيٍ سُفَندِ، نَشٍيٍ كٌلٌنشِ وٌ بْنسْييٍ يَ مَ. ﭑ نٍيٍ نَن قِندِ مَ حَمَ يَرٍرَتِيٍ رَ.› 14وٌ نَشَ ﭑ يَابِ، عَ ﭑ مَ مَحْشُنيِ، عَ مَحْشُن قَنيِ نَ عَ رَ. 15ﭑ نَشَ وٌ شَ يَرٍرَتِيٍ تٌنفٌ، وٌ شَ كُنتِفِ لْننِلَ نَشٍيٍ كٌلٌنشِ وٌ بْنسْي يَ مَ. ﭑ نَشَ عٍ قِندِ مِشِ وُلُ، مِشِ كّمّ، مِشِ تٌنفٌ سُولِ، مِشِ قُ شُنيِيٍ رَ. ﭑ نَشَ عٍ قِندِ يَرٍرَتِيٍ رَ وٌ بْنسْييٍ يَ مَ. 16نَ تّمُي ﭑ نَشَ يَامَرِ سٌ وٌ مَكِيتِمَيٍ يِ رَ. ﭑ نَشّ، ‹وٌ شَ وٌ تُلِ مَتِ وٌ بَرِبٌورٍيٍ رَ. وٌ شَ بِرِن مَكِيتِ سّرِيّ كّحَ مَ، وٌ نفَشَكٍرٍنيِيٍ تَفِ نُن عٍ تَن نُن شْحّيٍ تَفِ. 17وٌ نَشَ تِ مِشِ يٌ شْن مَ كِيتِ سَدٍ. وٌ نَشَ شُرُنيِ نُن فبٌي مَتٌ. وٌ نَشَ فَاشُ مِشِ يٌ يَ رَ، بَرِ مَ كِيتِسَ نَ عَلَ نَن نَ. شَ كِيتِ سَ شْرْشْ وٌ بّ هَن، وٌ قَ عَ رَ ﭑ شْن، ﭑ تَن كِيتِ سَمَ.› 18نَ كِ ﭑ بَرَ قٍ بِرِن مَسٍن وٌ بّ، عَ لَن وٌ شَ نَشَن نَبَ.»
عَلَ مَتَندِقٍ كَدٍ سِ
19«نَ تٌ دَنفِ، وٌن نَشَ كٍلِ شٌرٍبٍ فٍيَ، وٌن مِنِ فبٍنفبٍرٍنيِ مَفَاشُشِ رَ وٌ بَرَ دّننَشّ تٌ. وٌن نَشَ بِرَ كِرَ قْشْ رَ نَشَن سِفَمَ عَمٌرِ فٍيَيٍ بِرِ رَ، عَلْ وٌن مَرِفِ عَلَتَلَ عَ مَسٍن وٌن بّ كِ نَشّ. وٌن نَشَ سٌ كَدٍ سِ بَرِنٍيَ. 20ﭑ نَشَ عَ قَلَ وٌ بّ، ‹وٌ بَرَ عَمٌرِ فٍيَيٍ لِ، وٌن مَرِفِ عَلَتَلَ دّننَشّ قِشِ وٌن مَ. 21وٌ عَ مَتٌ، وٌ مَرِفِ عَلَتَلَ بَرَ يِ بْشِ تِ وٌن يَ عِ. وٌ سِفَ، وٌ شَ نَ تٌنفٌ عَلْ وٌ بٍنبَيٍ مَرِفِ عَلَتَلَ عَ قَلَشِ وٌ بّ كِ نَشّ. وٌ نَشَ فَاشُ، وٌ شَ لِمَنِيَ.›»
22«نَ تّمُي، وٌ بِرِن نَشَ قَ ﭑ يِرٍ، وٌ قَ عَ قَلَ ﭑ بّ، ‹وٌن شَ مِشِيٍ شّي، عٍ شَ سِفَ يِ بْشِ مَ، عٍ شَ نَا رَبّن. نَ شَ قِندِ نٍيٍ قَن مَ وَلِ رَ، عَلَكٌ وٌن شَ عَ كٌلٌن وٌن لَن وٌن شَ وٌن حّرّ كِرَ نَشَن شْن عَ نُن وٌن سِفَمَ تَا نَشٍيٍ.› 23وٌ شَ مَحْشُنيِ نَشَ قِندِ ﭑ بّ قٍ قَنيِ رَ. نَ نَن عَ تٌ ﭑ نَشَ شّمّ مِشِ قُ نُن قِرِن مَيٍفٍتِ وٌ يَ مَ، وٌ بْنسْي كٍرٍن كٍرٍن مَ تَفِ. 24عٍ نَشَ سِفَ فٍيَيٍ بِرِ رَ هَن عٍ نَشَ فُلُنبَ لِ نَشَن شِلِ عٍسٍكٌلِ. عٍ نَشَ نَا رَبّن. 25عٍ نَشَ يِ بْشِ بٌفِسٍيٍ بَ، عٍ قَ عٍ مَسٍن وٌن بّ. عٍ نَشَ دّنتّفّ سَ وٌن بّ يِ كِ، ‹وٌن مَرِفِ عَلَتَلَ بْشِ قَنيِ نَن قِشِ وٌن مَ.› 26كْنْ وٌ مُ تِن تٍدٍ، وٌ نَشَ تٌندِ وٌ مَرِفِ عَلَتَلَ شَ يَامَرِ رَ. 27وٌ عَ مَشْرْشْ نّ وٌ شَ كِرِ بَنشِيٍ كُي. وٌ نَشَ عَ قَلَ، ‹شْننَنتٍيَ نَ شّيشِ، عَلَتَلَ وٌن تٌنفٌشِ مِسِرَ بْشِ مَ. عَ وَ مَ وٌن سٌقٍ عَمٌرِكَيٍ نَن يِ رَ عَلَكٌ عٍ شَ وٌن هَلَكِ. 28وٌن سِفَمَ مِندٍن؟ لِمَنِيَ مُ نَ وٌن بّ، بَرِ مَ وٌن نفَشَكٍرٍنيِيٍ بَرَ عَ قَلَ وٌن بّ عَ مّننِكَيٍ سّنبّ فبٌ. عٍ مَن فبَنفبَلَن وٌن بّ، نُن نَ تَايٍ شَ قٍ مَشْرْشْ. تّتّ نَشَن نَا رَبِلِنشِ، عَ عِتٍ هَن. مُشُ عَنَكِ بْنسْييٍ يَتِ تٌ نّ.›»
29«ﭑ نَشَ عَ قَلَ وٌ بّ، ‹وٌ نَشَ سِيكّ. وٌ نَشَ فَاشُ عٍ يَ رَ! 30وٌ مَرِفِ عَلَتَلَ نَشَن حّرّ مَ وٌ يَ رَ، عَ فٍرٍ سٌمَ نّ وٌ بّ عَلْ عَ عَ رَبَشِ وٌ يَ شْرِ كِ نَشّ مِسِرَ بْشِ مَ هَن فبٍنفبٍرٍنيِ مَ. 31وٌ مَن بَرَ عَ تٌ، وٌ مَرِفِ عَلَتَلَ قَشِ نّ وٌ رَ عَلْ شّمّ عَ شَ دِ شَنِنمَ كِ نَشّ، وٌ حّرّشِ كِرَ نَشَن بِرِن نَ هَن وٌ نَشَ قَ بٍ لِ. 32كْنْ نَ بِرِن كُي، وٌ مُ نُ لَشِ وٌ مَرِفِ عَلَتَلَ رَ. 33عَ تَن نَن تِ وٌ يَ رَ، عَ يِرٍ قٍن وٌ بّ وٌ لُمَ دّننَشّ. كْي رَ عَ تَن نَن نُ كِرَ عِيَلَنمَ وٌ بّ تّ رَ. يَنيِ قَن نَ، عَ قِندِ نُشُي رَ، عَ تِ وٌ يَ رَ. 34عَلَتَلَ نَشَ وٌ شُرُتُشُرُتُ شُي مّ. عَ شَ شْنّ كُي، عَ نَشَ عَ رَكَلِ، 35«يِ مِشِ كٌبِ يٌ مُ سٌمَ يِ بْشِ قَنيِ مَ، ﭑ نَشَن لَايِدِشِ وٌ بَبَيٍ بّ 36قٌ كَلٍبِ، يٍقُنٍ شَ دِ. عَ تَن عَ تٌمَ نّ. عَ بْشِ دّننَشّ حّرّشِ، نَ قِندِ مَ نّ عَ فبٍ نُن عَ بْنسْي فبٍ رَ، بَرِ مَ عَ بَرَ بِرَ ﭑ تَن عَلَتَلَ شَ كِرَ قْشْ رَ.»›»
37«وٌ تَن شَ قٍ رَ عَلَتَلَ بَرَ شْنْ ﭑ قَن مَ. عَ نَشَ عَ مَسٍن، ‹عِ تَن يّتّ يَتِ مُ سٌمَ يِ بْشِ مَ. 38يٌسُوٍ، نُنُ شَ دِ، عِ مَلِمَ، نَن قَمَ سٌدٍ. لِمَنِيَ قِ عَ مَ، بَرِ مَ عَ تَن نَن تِمَ عِسِرَيِلَكَيٍ يَ رَ يِ بْشِ مَسْتْقٍ رَ، عَ شَ قِندِ عٍ كّ رَ. 39وٌ شَ دِيٍ، وٌ عَ قَلَشِ نَشٍيٍ بّ، عٍ قِندِ مَ فٍيلِمَنِيٍ رَ. عٍ تَن نَشَن مُ قٍ كٌبِ نُن قٍ قَنيِ تَفِ رَبَ كٌلٌنشِ، عٍ تَن نَن قَمَ سٌدٍ نَ بْشِ مَ. ﭑ قَمَ نَ بْشِ قِدٍ عٍ تَن نَن مَ. عَ قِندِ مَ عٍ تَن نَن فبٍ رَ. 40كْنْ وٌ تَن مَن شَ وٌ مَقِندِ فبِلٍنقٍ رَ فبٍنفبٍرٍنيِ بِرِ رَ، سِفَقٍ كَلٍ بَا مَبِرِ.›»
41«وٌ نَشَ عَ يَابِ، ‹مُشُ بَرَ قِندِ يُنُبِتْي رَ عَلَتَلَ يَ عِ، كْنْ يَكْسِ مُشُ قَ وَ مَ سِفَقٍ فٍرٍ سٌدٍ نّ، عَلْ مُشُ مَرِفِ عَلَتَلَ مُشُ يَمَرِشِ عَ رَ كِ نَشّ.› كَنكَن نَشَ فٍرٍ سٌسٍ تٌنفٌ، بَرِ مَ وٌ عَ مَحْشُن نّ عَ يِ فٍيَ تَا مَسْتْقٍ عَ قِندِ مَ سْونّيَ رَ. 42نَ نَن عَ تٌ عَلَتَلَ نَشَ عَ مَسٍن ﭑ بّ، ‹عَ قَلَ عٍ بّ، وٌ نَشَ سِفَ فٍرٍ سٌدٍ دٍ، بَرِ مَ ﭑ مُ نَ وٌ يَ مَ. وٌ نَشَ سِفَ دٍ، وٌ يَشُييٍ نَشَ قَ وٌ بْنبْ.› 43ﭑ يِ مَرَ سِ قِشِ نّ وٌ مَ، كْنْ وٌ مُ تِن وٌ تُلِ مَتِدٍ ﭑ نَ. وٌ نَشَ عَلَتَلَ شُي مَتَندِ، وٌ نَشَ تٍ يّتّ عِفبٌحَ كُي فٍيَ قَرِ. 44نَ تّمُي عَمٌرِكَ نَشٍيٍ نُ سَبَتِشِ فٍيَ قَرِ عٍ نَشَ مِنِ وٌ فٍرٍدٍ عَلْ كُمِ دِنمَ مِشِ رَ كِ نَشّ. عٍ نَشَ وٌ بْنبْ كٍلِ سٍيِرِ هَن هٌرٌ مَ. 45وٌ تٌ فبِلٍن، وٌ نَشَ وَ عَلَتَلَ يَ عِ، كْنْ عَلَتَلَ مُ عَ تُلِ مَتِ وٌ وَ شُي رَ. 46وٌ مَن نَشَ لُ كَدٍ سِ، وٌ بُ نَا عَلْ وٌ سِنفٍ بُي نَشَن نَبَ.»