تِمٌتٍ بِرَقٍ ثْلُ نُن سِلَسِ قْشْ رَ
1ثْلُ نَشَ سِفَ دٍرِبٍ نُن لِسِتِرٍ. عِسَ قْشِرَبِرّ ندٍ نُ نَ، عَ شِلِ تِمٌتٍ. يُوِقِ فِنّ دَنشَنِيَتْي ندٍ شَ دِ نَن نُ عَ رَ. عَ بَبَ فِرّكِكَ نَن نُ عَ رَ. 2لِسِتِرٍ نُن عِكٌنِيٌن نفَشَكٍرٍنيِيٍ نُ عَ شِلِ قَنيِ قَلَمَ. 3ثْلُ تٌ وَ عَ شَنِنقٍ عَ شُن، عَ نَشَ عَ سُننَ يُوِقِيٍ شَ قٍ رَ نَشٍيٍ نُ نَ مّننِ، بَرِ مَ بِرِن نُ عَ كٌلٌن عَ بَبَ فِرّكِكَ نَ عَ رَ.
4عٍ نَشَ شّيرَيٍ نُن عِسَ قْشِرَبِرّيٍ كُنتِفِ نَشٍيٍ نُ نَ دَرِ سَلَمُ، عٍ نَشَ نٍيٍ شَ نَتّ مَسٍن دَنشَنِيَتْييٍ بّ نَ تَايٍ كُي، عٍ شَ عَ رَبَتُ. 5دَنشَنِيَتْي حَمَيٍ شَ دَنشَنِيَ سّنبّ شُن نُ مَسَمَ، دَنشَنِيَتْي كْنتِ قَن شُن نُ مَسَ لْشْ يٌ لْشْ.
ثْلُ لَامَتُنيِ تٌقٍ تِرٌيَسِ
6عَلَ شَشِلِ سّنِيّنشِ تٌ مُ تِن عٍ شَ كَوَندِ تِ عَسِ بْشِ مَ، عٍ نَشَ قِرِفِيَ نُن فَلَتِ بْشِ عِفِرِ. 7عٍ تٌ مَكْرّ مِسِ بْشِ رَ، عٍ نَشَ وَ سٌقٍ بِتِنِيَ، كْنْ عِسَ شَشِلِ مُ تِن عٍ شَ سِفَ نَا. 8عَوَ، عٍ نَشَ مِسِ عِفِرِ، عٍ نَشَ فٌرٌ تِرٌيَسِ. 9كْي رَ، ثْلُ نَشَ لَامَتُنيِ تٌ. مَسٍدٌنكَ ندٍ نَشَ كٍلِ، عَ قَ عَ مَشَندِ، «قَ مَسٍدٌن بْشِ مَ، عِ شَ قَ مُشُ مَلِ.» 10ثْلُ لَامَتُنيِ تٌ شَنبِ، مُشُ نَشَ لَ عَ رَ عَ مَرِفِ بَرَ مُشُ شِلِ شِبَارُ قَنيِ كَوَندِقٍ رَ نَا. مُشُ نَشَ كَتَ سِفَقٍ رَ مَسٍدٌن كٍرٍن نَ.
لِدِ شُنشَقٍ يٍ شْورَ
11مُشُ تٌ كٍلِ تِرٌيَسِ، مُشُ نَشَ بَكِ كُنكُي كُي، مُشُ نَشَ مُشُ يَ رَقِندِ سَمٌتِرَ سِ مَ كٍرٍن نَ. نَ كُيٍ عِبَ، مُشُ نَشَ تِ نٍيَثٌلِ. 12مُشُ تٌ كٍلِ نَا، مُشُ نَشَ سِفَ قِلِثِ، مَسٍدٌن تَا سِنفٍ. عٍ نُ نَ رْ مَكَيٍ شَ مَنفّيَ نَن بُن مَ. مُشُ نَشَ سَشَنيِ رَدَنفِ نَ تَا كُي.
13مَلَبُ لْشْي، مُشُ نَشَ سِفَ تَا قَرِ مَ شُرٍ دّ رَ، مُشُ دّننَشّ مَحْشُن سَلِدٍ رَ. مُشُ تٌ دْشْ، مُشُ نَشَ وْيّن فِنّيٍ رَ نَشٍيٍ نُ مَلَنشِ نَا. 14فِنّ ندٍ نُ نَ عٍ يَ مَ نَشَن شِلِ لِدِ، فَرّ دُفِ مَتِ. تِيَتِرٍكَ نَن نُ عَ رَ. عَ فَاشُ عَلَ يَ رَ. عَ تٌ عَ تُلِ مَتِ، مَرِفِ نَشَ عَ بْحّ رَبِ عَلَكٌ ثْلُ نَشَن قَلَمَ عَ شَ سٌ عَ شَشِلِ مَ. 15عَ تٌ عَ شُنشَ يٍ شْورَ، عَ نُن عَ شَ دٍنبَيَ، عَ نَشَ مُشُ مَيَندِ، «شَ وٌ سَ لَشِ عَ رَ ﭑ بَرَ دَنشَنِيَ مَرِفِ مَ، وٌ قَ لُ ﭑ مَ بَنشِ كُي يِ سَشَنيِ.» عَ نَشَ مُشُ كَرَشَن مَيَندِ رَ.
عٍ نَ فٍيلِ كُي قِلِثِ
16مُشُ تٌ نُ سِفَمَ سَلِدٍ، كٌنيِ فِنّ ندٍ نَشَ قَ مُشُ يَ رَ. حِننّ كَنيِ نَن نُ عَ رَ، حِننّ نَشَن شِلِ تِنّ، نَشَن سٍ مَتٌمَ. نَ فِنّ نُ نَاقُلِ شُنفبٍ رَ سٌمَ عَ كَنيِيٍ مَ. 17عَ نَشَ سٌ بِرَقٍ مُشُ قْشْ رَ، ثْلُ نُن مُشُ تَن. عَ نُ سْنشْي رَتٍ، «يِ مِشِيٍ عَلَ شِلِ شُنفبٍ كَنيِ شَ كٌنيِيٍ نَن عٍ رَ. عٍ وٌ تِقٍ كِسِ كِرَ نَن شْن مَ.» 18عَ نَشَ نَ رَبَ شِ وُيَشِ. ثْلُ تٌ شْنْ، عَ نَشَ عَ يَ رَقِندِ، عَ نَشَ عَ قَلَ حِننّ بّ، «ﭑ بَرَ عِ يَمَرِ عِسَ شِلِ رَ، عَلَ شَ مِشِ سُفَندِشِ، فبِلٍن يِ فِنّ قْشْ رَ.» حِننّ نَشَ فبِلٍن عَ قْشْ رَ كٍرٍن نَ.
19نَ كٌنيِ فِنّ كَنيِيٍ تٌ عَ تٌ عٍ شَ فٍينِ بَرَ كَنَ، عٍ نَشَ ثْلُ نُن سِلَسِ سُشُ. عٍ نَشَ عٍ شَنِن كِيتِسَيٍ يِرٍ. 20عٍ نَشَ عٍ دّنتّفّ كِيتِسَيٍ بّ، عٍ نَشّ، «يِ مِشِيٍ نَن وٌن مَ تَا يَ عِسٌقٍ. 21يُوِقِ نَن عٍ رَ نَشٍيٍ نَامُنيِيٍ شَ قٍ مَسٍنمَ وٌن مُ تِنشِ نَشٍيٍ رَ، وٌن تَن رْ مَكَيٍ.» 22حَمَ قَن نَشَ كٍلِ عٍ رَ، نُن كِيتِسَيٍ. عٍ نَشَ عٍ مَكٌيّن، عٍ نَشَ يَامَرِ قِ عٍ شَ عٍ بْنبْ لُشُسِنيِ رَ. 23عٍ تٌ فّ عٍ بْنبْدٍ، عٍ نَشَ عٍ وٌلِ فٍيلِ كُي. عٍ نَشَ كْسِبِلِ يَمَرِ عَ شَ عٍ كَنتَ عَ قَنيِ رَ. 24نَ كْسِبِلِ تٌ نَ يَامَرِ سْتْ، عَ نَشَ ثْلُ نُن سِلَسِ سَ فٍيلِ كُي، عَ يْلْنشْنيِيٍ سَ عٍ مَ. 25كْي تَفِ تٌ عَ لِ، ثْلُ نُن سِلَسِ نُ عَلَ مَشَندِقٍ، عٍ نُ عَلَ مَتْشْقٍ بّيتِ رَ. فٍيلِمَنِيٍ نُ عٍ شُي مّشِ. 26بْشِ نَشَ سّرّن كٍرٍن نَ، فٍيلِ سَنبُنيِ نَشَ عَ رَ مَشَ. نَ تّمُي كٍرٍنيِ كُي، نَادّ بِرِن نَشَ رَبِ. فٍيلِمَنِيٍ بِرِن شَ يْلْنشْنيِيٍ نَشَ مَبٌلٌن. 27كْسِبِلِ نَشَ شُنُ. عَ تٌ فٍيلِ نَادّيٍ تٌ عٍ رَبِشِ، عَ نَشَ عَ شَ سَنتِدّفّمَ بّندُن عَ تّي عَ شَ عَ يّتّ قَشَ، عَ حْشْ عَ مَ عَ فٍيلِمَنِيٍ نُ بَرَ عٍ فِ.
28كْنْ ثْلُ نَشَ سْنشْ عَ شُي عِتٍشِ رَ، «عِ نَشَ قٍ شْنّ نِيَ عِ يّتّ رَ، مُشُ بِرِن نَ بٍ.» 29عَوَ، كْسِبِلِ تٌ تّ مَشِلِ، عَ نَشَ سٌ مَقُرٍن. عَ نَشَ عَ شِنبِ سِن ثْلُ نُن سِلَسِ بُن مَ، عَ سّرّنمَ. 30عَ نَشَ عٍ رَ مِنِ، عَ عٍ مَشْرِن، «مَرِفِيٍ، عَ لَنمَ ﭑ شَ مُنسٍ رَبَ عَلَكٌ ﭑ شَ كِسِ؟» 31ثْلُ نُن سِلَسِ نَشَ عَ يَابِ، «عِ شَ دَنشَنِيَ مَرِفِ عِسَ مَ. نَ نَن عَ تٌمَ عِ كِسِمَ، عِ تَن نُن عِ شَ دٍنبَيَ.» 32عٍ نَشَ مَرِفِ شَ وْيّنيِ مَسٍن عَ بّ عَ نُن عَ شَ مِشِيٍ. 33عَ نَشَ عٍ شَنِن عَ شُن مَ كٍرٍن نَ كْي كُي، عَ نَشَ عٍ شَ قِيٍ يَيٍ شَ. نَ وَشَتِ يَتِ عَ نَشَ شُنشَ يٍ شْورَ، عَ تَن نُن عَ شَ مِشِ بِرِن. 34عَ نَشَ عٍ يِفِيَ عَ شَ بَنشِ كُي، عَ مَن قَ دٌنسٍ قِ عٍ مَ. عَ نَشَ حّلّشِن عَ قَنيِ رَ، عَ نُن عَ شَ دٍنبَيَ بِرِن بَرِ مَ عٍ بَرَ دَنشَنِيَ عَلَ مَ.
35كُيٍ تٌ عِبَ، كِيتِسَيٍ نَشَ سْورِيٍ شّي عٍ شَ سَ عَ قَلَ كْسِبِلِ بّ عَ شَ نَ مِشِيٍ رَبٌلٌ. 36كْسِبِلِ نَشَ عَ قَلَ ثْلُ بّ، «كِيتِسَيٍ بَرَ شّيرَ تِ عَ وٌ شَ رَبّحِن. عَوَ، يَكْسِ وٌ مِنِ، وٌ شَ سِفَ بْحّسَ كُي.» 37كْنْ ثْلُ نَشَ عَ قَلَ سْورِيٍ بّ، «مُشُ تَن نَشٍيٍ قِندِشِ رْ مَكَيٍ رَ، عٍ بَرَ مُشُ سَ فٍيلِ عٍ مُ مُشُ مَكِيتِ. عٍ نَشَ مُشُ سَ فٍيلِ، يَكْسِ عٍ وَ مَ مُشُ رَ مِنِقٍ فُندٌ رَ؟ نَ مُ لَنمَ قٍوٌ! عٍ يّتّ يَتِ نَن قَمَ مُشُ رَبٌلٌدٍ.» 38سْورِيٍ نَشَ يِ وْيّنيِيٍ رَفبِلٍن كِيتِسَيٍ مَ. عٍ تٌ عَ مّ عَ رْ مَكَيٍ نَن عٍ رَ، عٍ نَشَ فَاشُ. 39عٍ نَشَ قَ عٍ مَيَندِ، عٍ عٍ رَبٌلٌ. عٍ قَن نَشَ عٍ مَشَندِ عَ عٍ شَ كٍلِ نَ تَا.
40عٍ تٌ مِنِ فٍيلِ كُي، عٍ نَشَ سٌ لِدِ شْنيِ. عٍ تٌ بَرَ فّ عٍ نفَشَكٍرٍنيِيٍ رَلِمَنِيَدٍ، عٍ نَشَ سِفَ.