عِسِرَيِلَ رٌبٌوَ مِ مَتَندِقٍ
عِسِرَيِلَ مَنفّيٍ عِ ١٢؛١ ٬ ٢٠
1رٌبٌوَ مِ نَشَ سِفَ سِكٍمِ، بَرِ مَ عِسِرَيِلَكَيٍ بِرِن نُ مَلَنشِ نَا نّ، عٍ شَ عَ تِ مَنفّ رَ. 2نٍبَتِ شَ دِ يٍرٌبٌوَ مِ تٌ نَ قٍ مّ مِسِرَ بْشِ مَ، عَ عَ فِ دّننَشّ سُلٍمَنِ مَ، عَ نَشَ فبِلٍن عِسِرَيِلَ. 3عَ تٌ عِسِرَيِلَ لِ، مِشِ ندٍيٍ نَشَ عَ شِلِ. عَ نُن عِسِرَيِلَكَيٍ بِرِن نَشَ سِفَ رٌبٌوَ مِ يِرٍ، عٍ عَ قَلَ عَ بّ، 4«عِ بَبَ مُشُ سُشُ نّ عَلْ كٌنيِيٍ. يَكْسِ تَن، شَ عِ ندٍ بَمَ مُشُ شَ كٌتٍ رَ عِ بَبَ نَشَن دْشْ مُشُ قَرِ، مُشُ قَمَ عِ شَ يَامَرِ رَبَتُدٍ.» 5عَ نَشَ عٍ يَابِ، «شِ سَشَن نَ دَنفِ، وٌ شَ قَ.» نَ كُي، حَمَ نَشَ سِفَ.
6مَنفّ رٌبٌوَ مِ نَشَ مَرَ سِ مَشْرِن قٌرِيٍ مَ، نَشٍيٍ نُ نَ عَ بَبَ سُلٍمَنِ قّ مَ عَ شَ سِمَيَ كُي. عَ نَشَ عٍ مَشْرِن، «وٌ مَرَ سِ مُندُن قِمَ ﭑ مَ ﭑ حَمَ يَابِمَ نَشَن نَ؟» 7عٍ نَشَ عَ يَابِ، «شَ عِ قٍ قَنيِ رَبَمَ حَمَ بّ، شَ عِ تِن عٍ وَشْنقٍ رَ، شَ عِ وْيّن قَنيِ قَلَ عٍ بّ، عٍ لُمَ نّ عِ شَ يَامَرِ بُن مَ تّمُي بِرِن.»
8كْنْ رٌبٌوَ مِ مُ تِن قٌرِيٍ شَ مَرَ سِ رَ. عَ نَشَ عَ لَنقَنمَيٍ مَشْرِن عَ لَنمَ عَ شَ نَشَن نَبَ. 9عَ نَشّ عٍ بّ، «وٌ مَرَ سِ مُندُن قِمَ ﭑ مَ، ﭑ حَمَ يَابِمَ نَشَن نَ، حَمَ نَشَن ﭑ مَيَندِشِ ﭑ شَ ندٍ بَ عٍ شَ كٌتٍ رَ ﭑ بَبَ نَشَن دْشْ عٍ قَرِ.» 10عَ لَنقَنمَيٍ نَشَ عَ يَابِ، «عِ شَ يِ حَمَ يَابِ يِ كِ نّ، نَشٍيٍ عِ مَيَندِشِ عِ شَ ندٍ بَ عٍ شَ كٌتٍ رَ عِ بَبَ نَشَن دْشْ عٍ قَرِ. عِ شَ عَ قَلَ عٍ بّ، ‹ﭑ بّلّشّ سٌلٍ لَنمَدِ شُنفبٌ ﭑ بَبَ تَفِ بّ. 11يَكْسِ، ﭑ بَبَ شَ كٌتٍ شْرْشْ عَ نَشَن دْشْشِ وٌ مَ، ﭑ نَ عَ شُنمَسَمَ نّ. ﭑ بَبَ وٌ بْنبْ لُشُسِنيِيٍ نَن نَ، كْنْ ﭑ تَن قَمَ وٌ بْنبْدٍ تَلِيٍ نَن نَ.›»
12شِ سَشَن تٌ دَنفِ، يٍرٌبٌوَ مِ نُن حَمَ نَشَ سِفَ رٌبٌوَ مِ يِرٍ، نَشَن نُ بَرَ عَ قَلَ عٍ بّ، «شِ سَشَن نَ دَنفِ، وٌ شَ قَ.» 13مَنفّ رٌبٌوَ مِ نَشَ عٍ يَابِ عَ شْرْشْي رَ. عَ مُ قٌرِيٍ شَ مَرَ سِ تٌنفٌ قٍقٍ مَ. 14عَ نَشَ عٍ يَابِ عَ لَنقَنمَيٍ شَ مَرَ سِ رَ، «ﭑ بَبَ كٌتٍ شْرْشْي نَشَن دْشْ وٌ شُن مَ، ﭑ نَ شُنمَسَمَ نّ. ﭑ بَبَ وٌ بْنبْ لُشُسِنيِيٍ نَن نَ، كْنْ ﭑ تَن قَمَ وٌ بْنبْدٍ تَلِيٍ نَن نَ.» 15نَ كُي، مَنفّ مُ تِن عَ تُلِ مَتِدٍ حَمَ رَ. مَرِفِ عَلَتَلَ نُ بَرَ نَ رَفِرِ عَلَكٌ عَ شَ عَ شَ مَسٍنيِ رَكَمَلِ عَ نَشَن قَلَ نٍبَتِ شَ دِ يٍرٌبٌوَ مِ بّ عَننَبِ عَهِيَ سِلٌكَ سَابُي رَ.
16عِسِرَيِلَكَيٍ تٌ عَ كٌلٌن مَنفّ مُ تِن عَ تُلِ مَتِدٍ عٍ رَ، عٍ نَشَ عَ يَابِ،
«مُشُ فبٍ سٍ مُندُن نَ دَوُدَ يِ؟
كّ مُ نَ مُشُ بّ يِسَيِ شَ دِيٍ تَفِ.
عِسِرَيِلَ شَ فبِلٍن عٍ شْنيِ.
يَكْسِ دَوُدَ، عِ شَ مّينِ عِ شَ بَنشِ مَ عِ يّتّ رَ.»
17عِسِرَيِلَ بِرِن نَشَ فبِلٍن عٍ شْنيِ. عِسِرَيِلَكَ نَشٍيٍ نُ سَبَتِشِ يُدَيَ تَايٍ كُي، عٍ نَشَ لُ رٌبٌوَ مِ شَ يَامَرِ بُن مَ. 18نَ دَنفِ شَنبِ، مَنفّ رٌبٌوَ مِ نَشَ هَدٌرَ مِ شّي، نَشَن حّنفِ نُ سَشِ وَلِ شْرْشْي رَبَقٍ شْن مَ، كْنْ عِسِرَيِلَكَيٍ نَشَ عَ مَفْنْ هَن عَ قَشَ. نَ كُي، مَنفّ رٌبٌوَ مِ نَشَ عَ فِ كٍرٍن نَ سِفَقٍ رَ دَرِ سَلَمُ عَ شَ سْورِ رَفِسٍ كُي. 19عِسِرَيِلَ دَوُدَ بْنسْي مَتَندِ نَ كِ نّ. هَن تٌ عٍ مُ لَنشِ.