سّرّشّ دٌنقٍ نَشَن بَشِ كُيٍ بّ
1وٌن بِرِن بَرَ قَهَامُي سْتْ سّرّشّ سُبٍ شَ قٍ مَ نَشَن بَشِ كُيٍيٍ بّ. قَهَامُي نْمَ قِندِدٍ يّتّ عِفبٌحَ رَ، كْنْ شَنُنتٍيَ نَن مِشِيٍ رَلِمَنِيَمَ. 2مِشِ نَشَن حْشْ عَ مَ عَ بَرَ فّ قَهَامُي سْتْدٍ، ندٍ لُشِ عَ شَ قَهَامُي رَ. 3كْنْ مِشِ نَشَن عَلَ شَنُمَ، عَلَ بَرَ نَ كَنيِ كٌلٌن.
4ﭑ شَ قٍ ندٍ مَسٍن وٌ بّ سّرّشّ سُبٍ دٌنقٍ مَ نَشَن بَشِ كُيٍيٍ بّ. وٌن عَ كٌلٌن كُيٍ يٌ مُ نَ دُنِحَ نَشَن قِندِشِ عَلَ رَ. عَلَ كٍرٍن ثٍتِ نَن نَ. 5دُنِحَ مِشِيٍ قٍ فبٍفبٍ قِندِ مَ عَلَيٍ رَ كٌورٍ نُن بْشِ مَ. عٍ عٍ شِلِمَ «عَلَيٍ،» عٍ عٍ شِلِمَ «مَرِفِيٍ.» 6كْنْ وٌن تَن بّ عَلَ كٍرٍن ثٍتِ نَن نَ، بَبَ عَلَ نَشَن سٍ بِرِن دَاشِ، وٌن قِندِشِ نَشَن فبٍ رَ. مَرِفِ كٍرٍن ثٍتِ نَن نَ، نَشَن قِندِشِ عَلَ شَ مِشِ سُفَندِشِ عِسَ رَ، سٍ بِرِن دَاشِ نَشَن سَابُي رَ، وٌن قَن حّنفِمَ نَشَن سَابُي رَ.
7كْنْ مِشِ بِرِن مُ فّشِ قَهَامُي سْتْدٍ نَ قٍ مَ. مِشِ نَشٍيٍ نُ بَرَ دَرِ كُيٍ قٍيٍ رَ، هَن يَكْسِ عٍ نّ سّرّشّ سُبٍ دٌنمَ، عٍ تَن بّ عَ بَشِ كُيٍ نَن بّ. عٍ شَشِلِ تٌ مُ فّشِ قٍيٍ قَهَامُدٍ سِندٍن، عٍ يُنُبِ سْتْمَ نَ سُبٍ دٌنقٍ كُي. 8دٌنسٍ مُ مِشِ مَكْرّ مَ عَلَ رَ. شَ وٌن بَرَ عَ دٌن، شَ وٌن بَرَ عَ لُ نَ، عَ بِرِن كٍرٍن. 9وٌ شَ عَ مَتٌ عَ قَنيِ رَ، عَلَكٌ وٌ شَ شْرّيَ نَشَ عَ نِيَ قَهَامُتَرٍ شَ يُنُبِ سْتْ. 10شَ قَهَامُتَرٍ ندٍ بَرَ وٌ تَن قَهَامُي كَنيِ تٌ، وٌ دْشْشِ تٍيبِلِ رَ كُيٍيٍ بَنشِ كُي، نَ نْمَ عَ نِيَدٍ قَهَامُتَرٍ قَن شَ كُيٍ سّرّشّ سُبٍ دٌن. 11نَ كُي، قَهَامُتَرٍ، عَلَ شَ مِشِ سُفَندِشِ قَشَ نَشَن بّ، عَ قَمَ لْيدٍ عِ تَن نَن مَ قَهَامُي سَابُي رَ. 12نَ كُي، وٌ بَرَ يُنُبِ رَبَ وٌ نفَشَكٍرٍنيِ قَهَامُتَرٍيٍ رَ، وٌ مَن بَرَ يُنُبِ رَبَ عَلَ شَ مِشِ سُفَندِشِ رَ. 13نَ نَن عَ تٌشِ، شَ دٌنسٍ ندٍ عَ نِيَمَ ﭑ نفَشَكٍرٍنيِ شَ يُنُبِ تٌنفٌ، ﭑ تَن بَرَ دِحّ نَ دٌنسٍ مَ، عَلَكٌ ﭑ نَشَ ﭑ نفَشَكٍرٍنيِ رَبِرَ.