دَوُدَ نُن عَمٌنِكَيٍ شَ فٍرٍ
سَمُوٍلِ عِِ ١٠؛١ ٬ ١٩
1نَ تٌ دَنفِ، نَشَن نَبَ نَ نَن يِ كِ. عَمٌنِكَيٍ شَ مَنفّ نَشَسَ نَشَ قَشَ، عَ شَ دِ نَشَ تِ عَ حْشْي رَ. 2دَوُدَ نَشَ عَ مَحْشُن، «ﭑ قٍ قَنيِ رَبَمَ نّ نَشَسَ شَ دِ شَنُن بّ، بَرِ مَ عَ بَبَ قٍ قَنيِ رَبَ نّ ﭑ بّ.» دَوُدَ نَشَ شّيرَيٍ شّي شَنُن شْن عٍ شَ سَ عَ نُ تْورْ عَ نُ سّفّ سَ عَ بَبَ حْنقٍ مَ. دَوُدَ شَ شّيرَيٍ نَشَ سٌ عَمٌنِكَيٍ شَ بْشِ مَ شَنُن يِرٍ، عٍ شَ عَ نُ تْورْ سَ. 3كْنْ عَمٌنِكَيٍ شَ كُنتِفِيٍ نَشَ عَ قَلَ شَنُن بّ، «عِ حْشْ عَ مَ دَوُدَ يٍيٍ شّيشِ عِ نُ تْورْ سَدٍ عِ بَبَ حْنقٍ نَن مَ؟ عٍ قَشِ نّ عٍ شَ قَ بٍ كٌلٌن، عٍ شَ بٍ يَ عِسٌ، عٍ شَ يِ بْشِ تٍفٍرٍنيَ رَبَ. عَ شَ شّيرَيٍ قَشِ بٍ نَ نَن مَ.»
4نَ كُي شَنُن نَشَ دَوُدَ شَ شّيرَيٍ سُشُ، عَ نَشَ عٍ دّ شَبٍ مَشَبَ، عَ نَشَ عٍ شَ دٌنمَيٍ رَشَبَ عٍ شْرّ يَءِلَنيِ، عَ قَ عٍ رَبّحِن. 5مِشِ ندٍ تٌ نَ قٍ دّنتّفّ دَوُدَ بّ، عَ نَشَ مِشِيٍ شّي عَ شَ شّيرَيٍ يِرٍ عَ قَلَقٍ رَ، «وٌ لُ يٍرِكٌ هَن وٌ دّ شَبٍيٍ شَ مِنِ. نَ تّمُي وٌ شَ فبِلٍن بٍ.» دَوُدَ شَ شّيرَيٍ شَشِلِ نُ بَرَ عِقُ كِ قَنيِ رَ.
6شَنُن نُن عَمٌنِكَيٍ تٌ عَ كٌلٌن عَ عٍ بَرَ شْننَنتٍيَ رَ سٌ عٍ نُن دَوُدَ تَفِ، عٍ نَشَ فبٍتِ كِلٌ وُلُ تٌنفٌ سَشَن نُن نَانِ قِ سِرِيَكَيٍ مَ، نَشٍيٍ نُ نَ مٍسٌثٌتَمِيَ، مَاكَ نُن سٌبَ، عَلَكٌ عٍ شَ قَ سْورِ رَفِسٍيٍ نُن سٌي رَفِيٍ رَ عٍ بّ. 7نَ كُي مَاكَ مَنفّ نُن عَ شَ حَمَ نَشَ قَ سْورِ رَفِسٍ وُلُ تٌنفٌ سَشَن نُن قِرِن نَ، عٍ قَ مَلَن مٍدٍبَ. عَمٌنِكَيٍ قَن نَشَ مِنِ عٍ شَ تَايٍ كُي، عَلَكٌ عٍ شَ دَوُدَ فٍرٍ. 8دَوُدَ قّقّ نَ كٌلٌن، عَ نَشَ سْورِ مَنفّ يٌوَبَ نُن عَ شَ سْورِ فبَنفبَلَنيِ بِرِن شّي عٍ يِرٍ. 9عَمٌنِكَيٍ نَشَ مِنِ، عٍ تِ فٍرٍ كِ مَ تَا سٌدٍ دّ رَ. مَنفّ نَشٍيٍ قَ عٍ مَلِدٍ، عٍ نُ تِشِ عٍ شَتِ مَ دَاشَ عِ.
10يٌوَبَ نَشَ عَ كٌلٌن فٍرٍ نَ عَ يَ رَ، عَ مَن نَ عَ شَنبِ رَ. عَ نَشَ عِسِرَيِلَ سْورِ قَنيِيٍ مَيٍفٍتِ، عَ عٍ تِ سِرِيَكَيٍ يَ رَ. 11عَ نَشَ سْورِ دْنشْييٍ لُ عَ شُنيَ عَبِسَيِ شَ يَامَرِ بُن مَ، عٍ شَ تِ عَمٌنِكَيٍ يَ رَ. 12يٌوَبَ نَشَ عَ قَلَ عَ شُنيَ بّ، «شَ سِرِيَكَيٍ سّنبّ فبٌ ﭑ بّ، عِ شَ قَ ﭑ مَلِدٍ. شَ عَمٌنِكَيٍ قَن سّنبّ فبٌ عِ بّ، ﭑ قَن سِفَمَ عِ مَلِدٍ. 13عِ شَ لِمَنِيَ، وٌن شَ وٌن سّنبّ سٌ وٌن بْنسْي شَ قٍ رَ نُن وٌن مَرِفِ عَلَ شَ تَايٍ شَ قٍ رَ. عَلَتَلَ شَ عَ وَشْنقٍ رَبَ.»
14يٌوَبَ نُن عَ شَ سْورِيٍ نَشَ سِرِيَكَيٍ فٍرٍ. نٍيٍ نَشَ عٍ فِ يٌوَبَ مَ. 15عَمٌنِكَيٍ تٌ عَ تٌ، سِرِيَكَيٍ بَرَ عٍ فِ، عٍ قَن نَشَ عٍ فِ عَبِسَيِ مَ. يٌوَبَ شُنيَ نَشَ سٌ تَا كُي، يٌوَبَ نَشَ فبِلٍن دَرِ سَلَمُ.
16سِرِيَكَيٍ تٌ عَ كٌلٌن عِسِرَيِلَ بَرَ عٍ بْنبْ، عٍ نَشَ شّيرَيٍ شّي سِرِيَكَيٍ مَ نَشٍيٍ نُ نَ شُرٍ نَاكِرِ مَ. هَدَدٍ سٍرِ شَ سْورِ مَنفّ سٌقَكِ نَن نُ نَ عٍ شُنيِ رَ. 17دَوُدَ تٌ نَ كٌلٌن، عَ نَشَ عِسِرَيِلَكَيٍ بِرِن مَلَن، عٍ نَشَ قَ عٍ يُرُدّن عِفِرِ، عٍ سِفَ سِرِيَكَيٍ فٍرٍدٍ. سِرِيَكَيٍ مَن نَشَ عٍ فِ عِسِرَيِلَكَيٍ يَ رَ. 18دَوُدَ نَشَ سْورِ نُن عٍ رَفِسٍ دْشْ وُلُ سٌلٌقٍرٍ قَشَ، عَ نُن سْورِ وُلُ تٌنفٌ نَانِ فبّتّ. عَ نَشَ سْورِ مَنفّ سٌقَكِ قَن قَشَ. 19هَدَدٍ سٍرِ مَلِمَيٍ تٌ عَ كٌلٌن عَ عِسِرَيِلَكَيٍ بَرَ عٍ بْنبْ، عٍ نَشَ لَنيِ شِرِ عٍ نُن دَوُدَ تَفِ، عٍ نَشَ لُ عَ شَ يَامَرِ بُن. كَبِ نَ وَشَتِ، سِرِيَكَيٍ مُ تِنمَ عَمٌنِكَيٍ مَلِدٍ سْنْن.