PITJ

Rome-aku 2

Godalu Aṉangu Uwankara Ngurkantaṟa Tjaralku

1Kulila! Nyuntu kutjupa tjuṯa nyakula kuranmankupai. Palu nyuntunku uti walytjangku kulinmaṯu, panya nyuntu kuḻu palu puṟunypaṯu kura palyalpai tjana nyanga palyantja puṟunypa. Munun tjananya kuranmankula nyuntunku kuḻu walytjangku kuranmananyi tjananya kutju wiya. 2Nganaṉa ninti panya Godalu aṉangu tjuṯa tjukaṟurungku ngurkantaṟa pungkupai tjana kura nyanga puṟunypa tjuṯa palyannyangka. 3Ka nyuntu yaaltji kulini? Nyuntu panya aṉangu kutjupa kuranmankupai, munu nyuntu ngapartji palu puṟunypaṯu palyalpai panya paluṟu kura palyantja puṟunypa. Ka Godalu wanyu nyuntunya nyakula palyanmankuku munu palunya kutju kuranmaṟa pungkuku? Wiya Godalu nyupalinyaṯu kuranmaṟa pungkuku.

4Munta tjinguṟu nyuntu alatji kulini, “Palyantiṉa ngayulu kura tjuṯa palyanma panya Godanya nganampa ngaḻṯuringanyi munulanya tiṯutjarangku mukulyangku kanyini iluntankunytja wiyangku.” Uwa mulapa Godanya ngaḻṯunytju tiṯutjara nyinanyi, panya paluṟu rawa mulatu nyuntumpa paṯaṉi kura wantira palulakutu maḻaku aṟuringkunytjaku. 5Palu nyuntu kuliṟa wantinyi munu kurunpa wituwitu nyinanyi munun rawa Godala tungunpunganyi. Ka palulanguṟu tjiṉṯu maḻatjangka Godalu nyuntunya puḻkaṟa mirpaṉarira pailku, panya tjiṉṯu nyara palula aṉangu uwankara Godalu kutju-kutju ngurkantaṟa tjukaṟurungku tjaralku. 6Panya Godalu aṉangu uwankara nintingku kutju-kutju ngurkantaṟa tjaralku munu kura palyalpai tjuṯa ngapartji kurakura ungkuku munu wiṟu palyalpai tjuṯa ngapartji wiṟu mulapa ungkuku.

7Kutjupa tjuṯangku panya wiṟuṟa rawangku palyalkatinyi Godanya kutju waintaṟa kuliṟa, munuya mukuringanyi Godalu tjananya pukuḻarira palyanmankunytjaku munuya mukuringanyiṯu tjananya wanka tiṯutjarangku kanyintjaku. Ka mulapa Godalu tjananya wanka ungkuku palula tjungu tiṯutjara nyinanytjaku.

8-9Ka kutjupa tjuṯangku walytjangku kulilpai kaṉany-kaṉanytju, munuya paluṟu tjana tjukurpa tjukaṟuru wantira iwara kurangka ananyi tiṯutjara. Ka Godalu tjanampa mirpaṉarira pika puḻka palyalku tjana kurangka tiṯutjara ankunyangka. Panya kura palyalpai uwankara Godalu pika puḻka ungkuku, Jew tjuṯa-waraṟa munu aṉangu kutjupa tjuṯa kuḻu, panya Jew wiya tjuṯa. 10Palu kutjupa tjuṯangku wiṟuṟa palyannyangka Godalu tjananya pukuḻarira palyanmankuku, munu tjananya kurunpa pukuḻpa rapa nyinanytjaku palyalku. Uwa, aṉangu wiṟu palyalpai uwankara Godalu alatjingalku Jew tjuṯa-waraṟa munu aṉangu kutjupa tjuṯa kuḻu. 11Panya Godanya nganampa kutju pukuḻarinytja wiya wiṟuṟa palyannyangka aṉangu Jew wiya tjuṯaku kuḻu paluṟu pukuḻaripai tjana kuḻu wiṟuṟa palyannyangka.

12Panya aṉangu kutjupa tjuṯa Moseku tjukurku ngurpa. Palu nyara paluṟu tjana kura palyannyangka Godalu tjananya ngurkantaṟa pungkuku ngurpanmaṟa ngaḻṯuringkunytja wiyangku. Ka panya Jew tjuṯa ninti nyinanyi tjukurpa nyanga palumpa. Palu tjana kuḻu kura palyannyangka Godalu palunya tjananya kuḻu uwankara ngurkantaṟa pungkuku, panya Moseku tjukurta alatji ngaṟanyi kura palyannyangka pungkunytjaku. 13Panya Moseku tjukurku ninti nyinanyangka kutju Godalu tjukaṟurunmankula walytjanmankunytja wiya. Palu wangaṉarangku kuliṟa palyannyangka kutju Godalu nyakula tjukaṟurunmankula walytjanmankupai. 14(Kaya aṉangu kutjupa tjuṯa ngurpa nyinanyi Moseku tjukurku. Palu kutjupa-aṟa tjana watarku nyinara walytjangku kulilpai tjukaṟuru nyinanytjikitjangku. Palu tjana Godaku tjukurku ninti wiya munuya unngu kulilpai yaaltji-yaaltji palyanyku nyinanytjikitjangku. 15Panya Moseku tjukurtu wangkanyi yaaltji-yaaltji tjukaṟuru nyinanytjaku. Kaya tjukurku ngurpa tjuṯangku yaaltji-yaaltjingku kulini tjukaṟuru nyinanytjikitjangku? Wiya, Godalu panya ngaṉmanytju tjanala unngu nintinu. Ka tjana tjukurpa unngu kanyiṟa kulilpai yaaltji palya, yaaltji kura. Munuya nyara palulanguṟu kura nyinara nintingku kulilpai, “Munta, nyangatjaṉa tjinguṟu kura palyaṉi.” Munuya piṟuku tjukaṟuru nyinara kulilpai, “Munta, tjinguṟuṉa palya nyinanyi.”)

16Ka ngula tjiṉṯu panya maḻatjangka Godalu Jesunya Christanya tjunkuku aṉangu uwankara tjukaṟurungku ngurkantaṟa tjarantjaku. Ka aṉangu tjuṯangku walytjangku unngu kulinnyangka paluṟu nintingku ngurkantankuku munu tjaralku. Godanya mukuringanyi tjukurpa nyangatja kuḻu aṉangu tjuṯangku kulintjaku, ka panyaṉa palunyatjara tjakultjunkupai.

Jew Tjuṯa Munu Tjukurpa Mosenya Ungkunytja

17Palu kuwariṉa nyurala wangkanyi, Jew tjuṯangka. Nyuranku walytjangku mirawaṉipai alatji, “Jew tjuṯa nganaṉa nyinanyi, Godaku walytja mulapa. Panya Godalu palumpa tjukurpa nganampa walytja Mosenya ungu, kala nganaṉa kanyini.” 18Uwa tjinguṟu nyura mulapa ninti Godaku iwaraku, panya nyura Moseku tjukurku nintiringkula nintingku kulini yaaltji-yaaltji palyanyku nyinanytjaku. 19Munu nyura kaṉany-kaṉanypa nyinara aṉangu kutjupa tjuṯa nintilpai. Nyura alatji kulilpai, “Nganaṉa mulapa watarkitja tjuṯa nintilpai Godanya tjukaṟurungku waṉantjaku. Panya tilingku mungangka irnyaṟa iwara utilpai, palu puṟunytjula ngurpa tjuṯangka utiṟa nintilpai Godaku iwara.” Alatji nyura kulilpai ngunti. 20Munu nyura kawakawa tjuṯa tjukaṟuruntjikitjangku kulilpai, munu tjukurku ngurpa tjuṯa kuḻu nintintjikitja mukuringkupai. Panya nyura kulilpai, “Nganaṉa Moseku tjukurpa kanyini munula palulanguṟu Godaku tjukurpa uwankaraku ninti nyinanyi.”

Uwa, mulapa nyura Moseku tjukurpa kanyini munu nyura uwankaraku ninti nyinanyi, palu nyura wanyu wangaṉarangku kulilpai tjukurpa pala palula? Wiya. 21Nyura tjananya kutju nintilpai tjukaṟuru nyinanytjaku, palu tjananya nintiṟa nyura tjukaṟuru nyinapai wiya. Munu nyura kutjupa tjuṯa pailpai kutitjunkuwiyangku wantinytjaku, munu tjananya paintjatjanungku nyura kuḻu kutitjunkupai. 22Ka panya palu puṟunypa nyura tjananya pailpai kuri walytjatjarangka ngariwiyangku wantinytjaku, palu tjananya paiṟa nyura kuḻu kampangkaṯu walytjatjarangka ngaripai. Munu piṟuku nyura wangkapai alatji, “Ngayulu tjanampa waḻi miḻmiḻṯa tjarpara tjanampa god tjuṯa pupakatira waḻkulpai wiya. Ngayulu tjanampa kuraringanyi.” Alatji nyura wangkapai, palu nyura waḻi pala palula tjarpara tjanampa kutjupa kutjupa tjuṯa kutitjuṟa katipai kurangku. 23Munu nyuranku mirawaṉipai tjukurpa panya Godalu Mosenya ungkunytjitja kanyiṟa. Palu nyura wanyu tjukurpa palunya wangaṉarangku kulilpai? Wiya, nyura kuliṟa wantira nyuranku walytjangku mirawaṉipai. Ka nyara palulanguṟu aṉangu kutjupa tjuṯangku nyuranya nyakula Godanya analpai. 24Panya nyiringka tjukurpa iriti wangkatjarangku walkatjunkunytja ngaṟanyi panya Jew tjuṯangka wangkanytja nyanga alatji,

“Nyuralanguṟuya aṉangu Jew wiya tjuṯangku nyuranya nyakula Godanya analpai.”

25Uwa Jew tjuṯa, nyuralaṉa wangkanyi, panya nyura Aipuṟamaku aṟangka iṯinguṟu watiringu, munu nyura palalunguṟu kulilpai, “Nganaṉa Godaku walytja tjuṯa nyinanyi.” Alatji nyura kulilpai, palu nyura tjinguṟu Godalu wangkanytjitja kuliṟa wantira aṟa nyanga iṯinguṟu watiringkunytja upaṉi, panya nyura Godala tungunpunganyi munu palumpa walytja mulapa nyinanytja wiya. Palu nyura Godaku tjukurta wangaṉarangku kuliṟampa aṟa nyanga iṯinguṟu watiringkunytja kuṉpu kanyini.

26Kaya kulila aṉangu kutjupa, panya Jew wiya. Nyara paluṟu Aipuṟamaku aṟangka watiringkunytja wiya nyinanyi. Palu tjinguṟu paluṟu tjukaṟuru palyanyku nyinanyangka Godalu nyakula alatji wangkara walytjanmankuku, “Nyangatja ngayuku walytja nyinanyi. Palya paluṟu watiringkunytja wiya, panya tjukaṟuru nyinanyangka ngayulu palunya walytjanmananyi wati Jew puṟunypa.” Alatji Godalu palunya kulilku.

27Ka nyura watiringkunytja tjuṯangku Godaku tjukurpa kanyintjatjanungku uti wangaṉarangku kulinma, palu nyura tungunpungkupai. Ka nyara palulanguṟu aṉangu kutjupa tjuṯangku tjukaṟuru nyinanytjatjanungku nyuranya kuranmankuku. Panya nyura Aipuṟamaku aṟangka iṯinguṟu watiringu munu panya nyura Godaku tjukurpa nyiringka kanyini wangaṉarangku kulintjikitjangku. Palu aṉangu kutjupa tjuṯaya tjukaṟuru nyinanyi iṯinguṟu watiringkunytja wiyatja, munuya paluṟu tjana nyuranya tungunpungkunyangka nyakula analku.

28Palu ngananya Jew mulapa nyinanyi? Ngananya wanyu Godaku walytja mulapa? Nyara Aipuṟamaku aṟangka iṯinguṟu watiringkunytja tjuṯa kutju? Paluṟu tjana wanyu Jew mulapa? Wiya, nyara paluṟu tjana watiringkunytjatjanu Jew mulapa nyinanytja wiya. 29Palu panya Kurunpa Miḻmiḻṯu unngu palyantjitjanguṟu kutjuya Jew mulapa nyinanyi, watiringkunytjanguṟu wiya. Ka Jew pala palu puṟunypa panya Godaku walytja nyinanyi munu paluṟu tjukaṟuru nyinapai Godanya nyakula palumpa pukuḻarinytjaku aṉangu tjuṯa wiya.