PITJ

Iipuṟuku 12

Godanya Nganampa Mama Nyinanyi munu Nganaṉanya Tjukaṟurulpai

1-2Ka tjana kuwari nganaṉanya ngaṟala nyanganyi winkingku Godaku mulamularingkupai miri tjuṯangku. Kala nganaṉa kuḻu uti Jesunya tungun-tunguntu waṉanma. Panya watingku paluṟu-waraṟa wirtjapakaṟa wirkankunytjikitjangku mantara araṟa tjunkupai tarpipungkula punkatjingantjaku-tawara. Palu puṟunypala uti kura kutjupa kutjupa uwankara wantira Jesunya waṉanma pakuringkunytja wiyangku tiṯutjarangku ilunytjakutu-wangkara. Panya Jesulu iwara aḻaṉu nganaṉa kuḻu Godala wirkankunytjaku munulanya alpamilaṉi pakuwiyangku palunya waṉantjaku munu panya paluṟu paṯaṉi ngura nyara palula nganaṉa ngapartji ma-wirkankunytjaku.

Ka panya kutjupa kutjupa tjuṯangku mantatjangku nganaṉanya angatjunkunyangkala uti wantima munula tiṯutjarangku Jesunya waṉanma. Panya paluṟu pakuringkunytja wiyangku palumpa Mamaku palyaningi munu puṉu kaṯakutjarangka ilunytjikitja nguḻuringkunytja wiya. Ka panya aṉangu tjuṯangku palunya ananingi wati kura-palku kuliṟa. Palu paluṟu rapa alatjiṯu ilungu panya paluṟu waintaṟa kuliningi palumpa Mamangku palunya pukuḻpa puḻka mulapa ungkunytjaku. Munu alatji palyantjatjanu paluṟu kuwari Godala itingkalta nyinanyi mayatja puḻka mulapa. 3Ka nyura uti palunya kuliṟa raparingama, panya Jesunya mantangka nyinanyangkaya aṉangu kura tjuṯangku palunya puḻkaṟa kuraningi munu ananingi, ka paluṟu tungun-tunguntu alatjiṯu ngaṟala palyaningi palumpa mamangku wituntjitja pakuringkunytja wiyangku. Ka nyuranya palu puṟunypaṯu kurannyangka Jesunya kulinma, munuya palu puṟunypaṯu tungun-tungunpa ngaṟama tjituṟu-tjituṟurira wantinytja wiya.

4Uwa, aṉangu kura tjuṯangku nyuranya arkaṟa kuraṉi Godanya wantinytjaku, ka panya nyura tungun-tunguntu tjananya kuliṟa wantinyi. Palu tjana nyuranya Jesunya puṟunypa pungkula iluntankunytja wiya palunya waṉannyangka. Tjinguṟuya nyuranya ngula pungkula iluntankuku rawangku waṉannyangka. 5Palu tjinguṟu nyura watarkuringu nyiringka panya iriti walkatjunkunytjitjaku. Panya tjukurpa paluṟu ngaṟanyi nganaṉa kuliṟa raparingkunytjaku, panya Godalu katja tjuṯa paintja nyanga alatji ngaṟanyi,

“Kulila! Mayatja Godalu nyuntunya tjitji puṟunypa tjukaṟurulpai palulawanu nyinanytjaku,

kan uti palula wangaṉarangku kulinma panya paluṟu nyuntunya ngunti palyannyangka pailpai.

Uti nyuntu kuranguṟu painnyangka kuliṟa tjituṟu-tjituṟurinytja wiyangku wantima.

6Panya paluṟu puḻkaṟa mukuringanyi palumpa katja uṉṯalpa tjuṯaku,

munu pala palulanguṟu tjananya tjukaṟurulpai,

munu kuraringkunyangka tjananya pungkupai tjana tjukaṟuru nyinanytja-tjiratjangku.”

7Kulini nyura? Nyurampa kutjupa kutjupa wituwitu ngaṟanyangkaya mirpaṉariwiyangku Godanya kulinma panya paluṟu nyuranya Mama wiṟungku tjukaṟuruṉi. Panya wati mamangku palumpa katja tjukaṟurulpai, palu puṟunypaṯu Godalu tjukaṟurulpai palumpa tjitji tjuṯa. 8Palu tjinguṟu ngayunya Godalu wantima tjukaṟuruntja wiyangku, kaṉa palulanguṟu kulilku, “Munta, tjinguṟuṉa ngayulu palumpa tjitji wiya, mungutja, mamatjara wiya.” Panya Godalu palumpa tjitji uwankara tjukaṟurulpai kutjupa tjuṯa wantinytja wiyangku.

9-10Panya nganaṉa tjukutjuku nyinanyangka nganampa mama tjuṯangku nganaṉanya tjukaṟuruningi tjana wiṟu kulintjatjanungku mama panya mantatja tjuṯangku. Kala tjana wangkanyangka nganaṉa wangaṉarangku kuliningi. Palulanguṟula uti Mama ilkaṟitjangka ngapartji puḻkaṟaṯu kulinma mulamulangku palula tjungu pukuḻpa nyinanytjikitjangku. Panya paluṟu nganaṉanya alpamilantjikitjangku tjukaṟuruṉi nganaṉa kuliṟa palunya puṟunypa tjukaṟuru mulapa nyinanytjaku.

11Ka panya Godalu nganaṉanya tjukaṟurunnyangka nganaṉa pukuḻarinytja wiya kuliṟa tjituṟu-tjituṟuripai. Palu utila kulinma panya Godalu nganaṉanya tjukaṟuruṉi palya mulapa nyinanytjaku, kala palulanguṟu nganaṉa nintiringkula pukuḻpa nyinapai tjukaṟururingkula.

12Uwa, kulinmaya nyangatja munuya kuṉpungku tungun-tunguntu Jesunya waṉanma. Tjinguṟu nyura maṟa waḻpa-waḻparingkula muṯi tjititingkula pakuringanyi, palu paku nyanga palunya kulintja wiyangku wantira Jesunya rawangku tungun-tunguntu waṉanma. 13Munuya tjukaṟuru tiṯutjara nyinama kurunpa uparingkula punkantjaku-tawara, panya nyura tjukaṟuru nyinara kuṉpuringkula witulya ngaṟaku.

Godanya Kuliṟa Wantinytjaku-tawara

14Rawangkuya kulinma mirpaṉtju wiya kalypa nyinanytjikitjangku munuyanku puḻkaṟa arkanma Godalawanu wiṟuṟa tjukaṟuru nyinanytjikitjangku. Panya nyura tjukaṟuru wiya nyinarampa Mayatjanya puṯu nyakuku. 15Godanya panya ngaḻṯunytju mukulya puḻka, ka nyuranku uti puḻkaṟa aṯunymanama Godalanguṟu paṯuringkula punkantjaku-tawara. Munuyanku nguḻu nyangama aṉangu kutju nyuralanguṟu kuraringkunytjaku-tawara, panya paluṟu tjinguṟu alatjirira nyuranya uwankara kuralku. 16Munuyanku aṯunymanama kuri walytjatjarangka ngarinytjaku-tawara panya alatji wiṟu wiya. Munuyanku anga-nyangamaṯu wati panya Iitjunya puṟunyarinytjaku-tawara panya paluṟu Godaku watarkuringu palumpa mamangku Isaacalu palumpa kalkuṟa pukuḻmankunytjaku ngaṟanyangka, munu panya paluṟu tjiṉṯu kutjupa paḻtjatjiratjarira ngatjinu palumpa maḻanypangka Jacobala alatji wangkara, “Maiṉi uwa, kanta nyuntunya Mamalu kalkuṟa pukuḻmankuku ngayunya wiyangku.” Paluṟu kalkuntja panya wantingu maikitjangku, ka Isaacalu Jacobanya kalkuṟa pukuḻmanu Iitjuku aṟangka. 17Ka nganaṉa ninti panya paluṟu ngulalta maḻaku mukuringu kalkuntja panya palumpa munu palula puṯu ulara puḻkaṟa ngatjiningi mamangka, piṟuku palunya kalkuntjaku. Palu mamangku wantingu. Ka nyuranku wanyu anga-nyangama Iitjunya puṟunyarira Godaku aṟa wantinytjaku-tawara.

18Panya nyura kuwari aṟa kutjupangka nyinanyi arkayitjangka, aṟa panya irititjangka wiya. Panya iritiya Israelkunu tjuṯa puḻi panya ini Tjaniyala wirkaṟa nyinangi, munu panyaya nyangu puḻi panya palula waṟu puḻka pinpanyangka, munu mungawaḻuṟu puḻkangku tjutuṟa ngaṟanyangka ngangkaḻi maṟu puḻkangku. 19-20Munuya kuliningi tuṟampata puḻkaṟa wangkatjingannyangka. Munuya Godaku wangka kuḻu kuliningi, panya paluṟu tjananya puḻkaṟa wangkangu alatji, “Puḻi nyangatjaya pampulwiyangku wantima. Munu kutjupangku pampunnyangka nyakulampaya palunya atuṟa iluntanama, munu tjinguṟu kukangku pampunnyangka nyakulaya palunya kuḻu atuṟa iluntanama.” Kaya aṉangu tjuṯangku kuliṟa puḻkaṟa nguḻuringkula wangkangu, “Wiya, nyangatja wituwitu puḻka mulapa. Wanyu piṟuku nganaṉala wangkanytja wiyangku wantima.” 21Ka Moselu kuḻu nyanganpa uwankara nyakula wangkangu, “Tjititinganyiṉa puḻkaṟa nguḻuringkula.”

22Uwa, puḻi panya palulakutu nyura kuwari ankunytja wiyaṯu, palu nyura wirkanu puḻi kutjupangka puḻi ini Tjayanta, panya God wankaku ngurangka, ini kutjupa Jerusalemala ngura panya ilkaṟitjangka. Ka ngura nyara palula panya angelpa winki mulapa pukuḻpa alatjiṯu nyinara waṉinyi uṯuḻu kutju. 23Uwa, ngura pala palula nyura wirkanu Godaku walytja kutjupa tjuṯangka tjunguringkunytjikitja. Panya nyara palunya tjananya Godalu ngurkantaṟa ini tjuṯa walkatjunu ngura panya ilkaṟitjangka tiṯutjara nyinanytjaku. Uwa, nyura pitjangu God Ngurkantankupailakutu panya paluṟu aṉangu uwankara tjukaṟurungku ngurkantaṟa tjaralku. Ka ngura nyara palula miri tjuṯa kurunpa nyinanyi panya tjana mantangka Godalawanu tjukaṟuru nyinangi munuya ilungu, ka Godalu tjananya wiṟu mulapa palyaṉu. 24Uwa, nyura pitjangu Jesulakutu panya paluṟu nganampa ngalkilarira aṟa kuwaritja palyaṉu paluṟu milkaḻi tjutira. Panya paluṟu nganaṉanya palumpa milkaḻingka paltjiṉu Godanya nganampa kalyparingkunytjaku. Uwa, Jesuku milkaḻingku wiṟu mulapa palyaṉu, Abelku milkaḻingku puṟunytju wiya.

25Ka palulanguṟu nyura uti tungunpungkuwiyangku kulinma Godalu wangkanyangka. Panya iriti paluṟu mantangka Israelkunu tjuṯangka wangkangi, kaya tungunpungkula palunya kuliṟa wantingi, ka nyanga palunya tjananya Godalu pikantanangi, kaya puṯu kumpiningi wankakitja. Ka panya Godalu nganaṉala ilkaṟinguṟu wangkanyangka uti nganaṉa wangaṉarangku kulinma. Panya ilkaṟinguṟu wangkanyangka nganaṉa kuliṟa wantirampa, ka paluṟu mulapa nganaṉanya puḻkaṟa pikantankuku, kala puṯu alatjiṯu kumpilku palulanguṟu. 26Panya iriti puḻi nyara Tjaniyala Godalu manta uritjingaṉu wangkangku wangkara. Palu kuwari nyanga paluṟu kalkuṉu alatji wangkara, “Ngayuluṉa kutju-aṟalta piṟuku manta ilkaṟi kuḻu uritjingalku.” 27Kala nyanga palulanguṟulta kulini, “Mulapa Godalu kutjupa kutjupa uwankara paluṟu paluntja uritjingaṟa wiyalku. Ka panya puṯu uritjingalpai tjuṯa tiṯutjara ngaṟaku wiyaringkunytja wiya panya paluṟu kalkuntja munu palumpa ngura kuḻu ngaṟaku tiṯutjara.”

28-29Ka kutjupangku Godanya puṯu uritjingaṟa wiyalku munu palumpa walytja tjuṯa kuḻu puṯu wiyalku. Panya Godalu ngura ngaṉmanytju palyaṟa wantingu nganampa palula tiṯutjara nyinanytjaku. Palulanguṟu nganaṉa uti Godaku puḻkaṟa pukuḻarima, munula palunya tjukaṟurungku waḻkuṟa puḻkanmanama palumpa nguḻuringkula, panya paluṟu puḻka mulapa munu waṟu puḻka puṟunytju kura uwankara kampara wiyalpai.