PITJ

Acts 8

1Ka wati panya Saulanya nyara palula ngaṟangi munu tjana iluntankunyangka nyakula pukuḻaringi panya paluṟu kuḻu tjanala tjungutja.

Saulalu Jesuku Walytja Tjuṯa Kurantja

Kaya nyara palula aṟangka ngura Jerusalemala Jesunya wantipai tjuṯa Jesuku walytja tjuṯaku puḻkaṟa kuraringu munuya tjananya nguḻuṟa waṯaparaṟa pungangi. Ka nyara palulanguṟuya Jerusalemanya wantikatira nguḻu wililyaraṟa ankula waṉingu ngura tjukutjuku tjuṯakutu manta panya Judeala pulala Tjamiṟiyala kumpiṟa nyinanytjikitja. Kaya wati panya Jesulu iyantja tjuṯa kutju Jerusalemala maḻaringkula nyinangi.

2Kaya Stephennga ilunyangka wati Godaku mukuringkupai tjuṯa puḻkaṟa tjituṟu-tjituṟurira ulara waṉingi munuya palunya mantjiṟa katira kuḻpingka tjuṉutjunu. 3Palu Saulanya mukuringangi Jesuku walytja tjuṯangku Jesunya waṉantja wiyangku wantinytjaku, munu paluṟu kutjupa tjuṯa wituṉu tjananya nguḻuṟa waṯaparantjaku, kaya tjanampa waḻingka para-tjarpangi munuya wati minyma kuḻu witiṟa iṯarikatira tjailangka tjarpatjunangi Jesuku walytja tjuṯa.

Tjamiṟiyanya Nguraṟa Tjuṯa Tjukurpa Palyaku Mulamularingkunytja

4Kaya Jesuku walytja tjuṯangku nguḻu panya wililyaraṟa ankunytjatjanungku Tjukurpa Palya Jesunyatjara tjakultjunangi aṉangu tjuṯangka ngura kutjupangka kutjupangka. 5Ka Philipanya manta pala Tjamiṟiyalakutu ankula nguṟurpa tawunu puḻkangka ini Tjapatjila wirkanu munu Tjukurpa Palya aṉangu tjuṯangka tjakultjunangi Jesunyatjara, panya Godalu palunya iyaṉu aṉangu tjuṯa wankaṟunkunytjaku. 6Munu paluṟu kutjupa kutjupa puḻka tjuṯa witulyangku palyaningi, kaya aṉangu tjuṯangku palyannyangka nyakula palula tjukurpa wangkanyangka rawangku purkaṟangku kuliningi wantinytja wiyangku. 7Ka Philipalu Godaku witulyatjarangku painnyangka mamu tjuṯa mirara pakaningi aṉangu tjuṯanguṟu. Ka nyumpu tjuṯa, wawanypa tjuṯa, tiwilpa ngarinytja tjuṯa kuḻu palyaringangi Philipalu wangkara pakaltjingannyangka. 8Kaya ngura pala palula aṉangu uwankara puḻkaṟa pukuḻaringu.

Wati Ngangkaṟi Ini Simonnga

9Ka ngura pala palula wati ngangkaṟi puṟunypa nyinangi ini Simonnga panya paluṟu kutjupa kutjupa puḻka tjuṯa ayinayinirira palyalpai, kaya Tjamiṟiyanya nguraṟa uwankarangku nyakula wangkapai, “Ai! Nyangangku ayinayiningku palyalpai!” Kanku paluṟu walytjangku mirawaṉipai alatji wangkara, “Ngayuluṉa mayatja puḻka mulapa nyinanyi.” 10Kaya aṉangu winkingku nyakula palumpa puḻkaṟa mulamularingangi, aṉangu puḻka tjuṯangku munu tjukutjuku tjuṯangku kuḻu. Munuya palunya mirawaṉira wangkapai alatji, “Wati nyanga paluṟu-manti mulapampa ilkaṟinguṟu pitjangu, munu nyanga Godalu puṟunytju witulyangku puḻka tjuṯa palyaṉi.” 11Munuya mirawaṉingi alatjiṯuya palunya, panya rawangku paluṟu kutjupa kutjupa puḻka tjuṯa ayinayinirira palyaningi, kaya nyakula kuliningi, “Awari! Nyangatja puḻka mulapa.” Munuya palunya mirawaṉingi munuya paluṟu wangkanyangka kuliṟa palumpa mulamularingangi munuya palunya waṉaningi.

12Palu Philipalu pitjala Tjukurpa Palya Jesunyatjara wangkangi panya Godalu aṉangu tjuṯa palumpa mulamularingkunyangka walytjanmaṟa mayatjangku kanyintja. Kaya aṉangu tjuṯangku kuliṟa mulamularingu paluṟu wangkanyangka, ka tjananya uṟungka baptise-katingu. 13Ka wati panya Simonnga kuḻu Jesuku mulamularingu, ka palunya uṟungka baptise-katingu. Ka palula maḻangka paluṟu Philipala tjunguringkula palula tjungu para-ngaṟangi, munu Philipalu kutjupa kutjupa puḻka tjuṯa Godaku witulyatjarangku palyannyangka nyakula kuliningi, “Awari! Nyangatja wiṟu mulapa.”

14Kaya wati panya Jesulu iyantja tjuṯangku Jerusalemalanguṟu kulinu aṉangu Tjamiṟiyanya nguraṟa tjuṯa Godaku Tjukurku kuliṟa mulamularingkunytja munuya palulanguṟu Peternya pulanya Johnnga iyaṉu palula tjanalakutu. 15Ka pula ngura pala palula wirkaṟa mulamularingkupai tjuṯaku Godala tjapiningi paluṟu Kurunpa Miḻmiḻnga tjanala tjarpatjunkunytjaku. 16Panya Kurunpa Miḻmiḻnga tjanala kuwaripa tjarpanytja wiyaṯu, palu tjana uṟungka tjarpara kutju baptise-aringu ini Jesula kutjungka, ka Kurunpa Miḻmiḻnga tjanala kuwaripaṯu tjarpanytja wiyaṯu. 17Ka Peterlu pula Johntu tjanala katangka maṟa tjunkula Godala tjapinnyangka nyara palula-aṟa Kurunpa Miḻmiḻnga tjanala unngu tjarpangu.

18-19Ka wati panya Simontu nyangu Kurunpa Miḻmiḻnga tjanala unngu tjarpanyangka Jesulu iyantja kutjarangku tjanala katangka maṟa tjunkunyangka. Munu paluṟu mukuringangi paluṟu pula puṟunytjuṯu aṉangu tjuṯangka maṟa tjunkunytjikitja munu Peternya pulanya Johnnga mani ungkula ngatjiningi alatji wangkara, “Wati wiṟu kutjara! Ngayunyaṉi pula nintila witulyangku palyantjaku, kaṉa nyupali puṟunytju aṉangu kutjupa tjuṯangka maṟa tjunkula alatjinama, ka Kurunpa Miḻmiḻnga tjanala kuḻu tjarpama.”

20Ka Peterlu mani wantira palula wangkangu alatji, “Wiya, mani palatjanku ma-kati munu pula maniṟara ngula ngura kurangka tjarpa! Panya nyuntun ngunti kulini Godaku Kurunpa maningka payamilantjikitjangku. 21Nyuntun ngalila tjungutja wiya, kanta Godalu nyuntunya nintintja wiya waṟka nyanga puṟunypa palyantjaku, panya paluṟu nintingku nyanganyi nyuntu ngunti unngu mukuringkunyangka. 22Nyuntun kurangku ngunti kulini maningka payamilantjikitjangku! Palu kuṉṯaringkula wantima mununku kampa kutjuparira Godala tjapila nyuntumpa kalyparingkula nyuntunya pungkuwiyangku wantinytjaku. 23Ngayulu kulini nyuntun ngalimpa puḻkaṟa nyaṟaringanyi ngali puṟunytju palyantja-tjiratja, munu nyuntu kuraringkula rawa alatjiṯu kurangka nyinanyi puṯu wantira.” Alatji Peterlu palula wangkangu.

24Ka Simonnga nyangatja kuliṟa nguḻuringu munu palula pulala wangkangu, “Wanyutju pula tjapila Godala ngalinya maniṟara ngura kurangka waṉinytjaku-tawara.” Ka pula mulapaṯu Godala tjapinu palumpa.

25Munu pula ngura nyara palula aṉangu tjuṯangka rawangku tjakultjunangi tjukurpa Jesunyatjara, munu pula wangkara wiyaringkula ma-pakaṉu maḻaku ngura Jerusalemalakutu. Munu pula manta panya Tjamiṟiyalawanu ngapari maḻaku pitjala ngura tjukutjuku tjuṯangka kuḻu Tjukurpa Palya tjanala ngapartji piṟuku tjakultjunangi aṉangu kutjupa tjuṯangka.

Philipalu Wati Itjiyaupiyanya Nguraṟangka Wangkanytja

26-28Ka Israelta uḻpaṟira manta kutjupangka ngura ini Itjiyaupiyala wati kutju nyinangi. Ka ngura nyara palumpa mayatja puḻka minyma nyinangi munu paluṟu wati panya palunya kamanta tjunu Itjiyaupiyaku mani aṯunymankunytjaku. Palu wati nyara paluṟu Godanya kulilpai munu kutjupa-aṟa paluṟu wakina wiila kutjaratjarangka tatiṟa alinytjaralku anu parari Jerusalemalakutu munu wirkaṟa timpula puḻkangka tjarpara Godanya waḻkuningi. Munu paluṟu waḻkuṟa wiyaringkula maḻaku anangi ngurakutu munu paluṟu wakinangka ankula nyiri nyakula wangkaṟinangi panya Aitjayalu iriti walkatjunkunytja.

Ka nyara palula-aṟangka Philipanya manta panya Tjamiṟiyala nyinangi Jerusalemala alinytjara, ka nyara palula nyinanyangka Mayatja Godaku angeltu Philipala utiringkula wangkangu alatji, “Ara Jerusalemalakutu munu Jerusalemalanguṟu muṉkara ma-pitja uḻpaṟiralku iwara puḻka nyara Kaatjalakutu ma-ngarinytjala, panya iwara nyara paluṟu ilytjiwanu ma-ngarinyi.” Alatji angeltu wangkangu Philipala. Ka paluṟu angelta kuliṟa wangaṉara ma-pakaṉu munu ankula ankula ngura tjuṯa wantikatira ngulalta ma-nyangu wati panya Itjiyaupiyanya nguraṟa wakinangka ma-pitjanyangka. 29Ka Kurunpa Miḻmiḻṯu Philipala wangkangu, “Ma-ilariwa wakinakutu nyara munu ilangku waṉanma.”

30Ka Philipalu wakinakutu ma-ilaringkula kulinu wati panyangku tjukurpa Aitjayalanguṟu nyakula wangkanyangka, munu tjapinu wati palula, “Nyuntu wanyu tjukaṟurungku kulini pala nyuntu nyakula wangkanytjanya?”

31Ka watingku panya wangkangu, “Wiya, puṯuṉa kulini. Kutjupangku nintingku wangkara nintinnyangkaṉa tjinguṟu kulilku. Wanyu nyuntu wakinangka nyanga ngalya-tatila munuṉi wangkara nintinma.” Ka Philipanya tatiṟa palula itingka nyinakatingu.

32Ka tjukurpa panya paluṟu Aitjayalanguṟu nyakula wangkanytjanya nyanga alatji ngaṟangi,

“Wati palunyaya tjiipi puṟunypa katingu iluntankunytjikitjangku,

ka paluṟu piluntu alatjiṯu pika puḻka mantjinu ngaparpungkula tjukurpa wangkanytja wiyangku.

Panya lamalama pilunpa uriwiya ngaripai watingku inyukitjangku tjiiṟamilannyangka,

palu puṟunypa paluṟu wangkanytja wiya alatjiṯu ngaṟangi.

33Uwa, palunyaya witiṟa aṉanguṟa wangkara ngunti kuranmanangi wati kura-palku munuya iluntankunytjikitjangku ma-katingu,

ka kutjupa palumpa anga-wangkanytja wiya alatjiṯu.

Ka nganalu wanyu tjukurpa palumpa tjitjitjara, pakaḻitjara wangkaku?

Wiya alatjiṯu, panya paluṟu wati yangupala ilungu tjitji wiya alatjiṯu.”

34Ka wati panya Itjiyaupiyanya nguraṟangku Philipala tjapinu alatji, “Wanyuṉi tjakultjura wati nyanga wangkatjarangku ngananya wangkanyi? Paluṟunku walytjangku wangkanyi? Munta kutjupa wangkanyi?” 35Ka Philipalu tjukurpa pala palulanguṟu wati panya palula utiṟa tjakultjunangi Tjukurpa Palya Jesunyatjara. 36-37Munu pula ankula ankula karu uṟutjara nyangu, ka wati panyangku Jesuku mulamularingkula wangkangu, “Karungka nyanga uṟu ngarinyi. Wanyuṉi nyanga palula uṟungka tjarpatjuṟa baptise-kati.”

38Munu wati panya paluṟu palumpa wakina ngaṟatjunu. Munu pula ukalingkula uṟungka ankula tjarpangu. Ka Philipalu palunya uṟungka tjarpatjuṟa baptise-katingu. 39Ka pula uṟunguṟu ngalya-pakannyangka Kurunpa Miḻmiḻṯu Philipanya katingu, ka wati panya Itjiyaupiyanya nguraṟangku palunya piṟuku nyakunytja wiya, palu paluṟu pukuḻpa mulapa anu ngurakutu.

40Ka Philipalu nyangu, “Ai! Ngura kutjupangkampaṉal nyangatja nyinanyi ngura ini Atjatatjala.” Munu paluṟu ma-pakaṉu alinytjara munu ankula ngura nguṟuritja tjuṯangka Tjukurpa Palya Jesunyatjara aṉangu tjuṯangka tjakultjunangi munu ngura ini Tjiitjaṟiyalalta wirkanu.