PITJ

Kalaitjiyaku 6

Nyuranku Aṯunymankunytjaku

1Uwa walytja tjuṯa, tjinguṟu Jesuku walytja kutjupangku kura palyalku, ka nyura uti Kurunpa Miḻmiḻngatjarangku aṉangu palunya wangkara tjukaṟurunma. Palu purkaṟangku wangkama, munuyanku walytjangku kulinmaṯu nyura kuḻu kuraringkunytjaku-tawara. 2Alpamilanmayanku, panya yakutja kuṉpu puḻka tjaḻiṟa katinytjatjanu pakuringkupai ka kutjupangku alpamilaṟa katipai, nyanga palu puṟunytjuyanku aṯunymanama. Panya nyura alatji palyaṟampa tjukurpa panya Jesulu ngaṉmanytju wangkanytja wangaṉarangku kulilku.

3Ka tjinguṟu kutjupangku walytjangku kulini, “Ngayuluṉa mulapa puḻka nyinanyi kutjupa tjuṯangka muṉkara.” Palu paluṟu alatji ngunti kulini. 4-5Panya Godalu nganaṉanya waṟka kutju kutju ungu walytjangku walytjangku palyantjaku palumpa. Palulanguṟula uti waṟka palyaṟa aṉangu kutjupa tjuṯa tjana waṟkarinyangka nyakula wangkanytja wiyangku wantima. Tjinguṟu kutjupangku alatji wangkanyi, “Ngayulu waṟka wiṟu mulapa palyaṉi Godaku, palu nyarangku waṟka kurakura tjuṯa palyaṉi.” Palu utila nyanga palu puṟunypa nyakula wangkanytja wiyangku wantima. Utilanku waṟka nganaṉa palyantja walytjangku walytjangku kulinma, tjinguṟu nyangatja palya ngaṟanyi, munta tjinguṟu kurakura ngaṟanyi. Ka tjinguṟu kutjupangku Godaku waṟka tjukaṟurungku palyantjatjanungku paluṟunku palyanmananyi, nyaratja palya.

6Ka aṉangu kutjupangku Jesuku tjukurpa nyurala nintinnyangkampa nyura ngapartji palunya ungama kutjupa kutjupa wiṟu tjuṯa, panya paluṟu Tjukurpa Palya nyurala tjakultjunangi.

7Ka tjinguṟu aṉangu kutjupangku kulilku, “Godalu ngayunya kura palyannyangka nyakunytja wiya.” Palu wiya, nyangatja paluṟu ngunti kulintja. Panya wati kaana kanyilpaingku uṉinypa tjunkupai mantangka, ka ngula pakaṟa maitjararingkupai, ka mai palunyaṯu alatjiṯu uralpai uṉinypa panya paluṟu ngaṉmanytju tjunkunytjatjanungku. Ka palu puṟunypa aṉangungku kura tjuṯa palyannyangka kura palula ngapartji wirkankuku paluṟu tjituṟu-tjituṟurinytjaku, munu wiṟu tjuṯa palyannyangka palula wiṟu tjuṯa wirkankuku paluṟu pukuḻarinytjaku. 8Panya aṉangungku tjinguṟu walytjangku paluṟunku mukuringkunytjitja kutju kuliṟa palyalpai, nyara paluṟu ngula ilura Godalanguṟu tiṯutjara mauṉṯalpa nyinaku ngura kurangka. Palu tjinguṟu aṉangungku Kurunpa Miḻmiḻṯa wangaṉarangku kuliṟa palyaṟampa paluṟu Godala tjungu wanka tiṯutjara nyinaku.

9Kala uti tiṯutjarangku wiṟu tjuṯa kutju palyanma pakuringkula wantinytja wiyangku, panya nganaṉa pakuwiyangku tiṯutjarangku palyantjatjanungku ngula wiṟu mulapa mantjilku palulanguṟu, panya wati kaanangka waṟkaripaingku paku wiya waṟkarinytjatjanungku mai kuṟuringkunyangka uralpai, palu puṟunypa. 10Ka kuwari nganampa ngaṟanyi wiṟu tjuṯa palyantjaku aṉangu uwankaraku. Munula uti Jesuku walytja tjuṯaku wiṟu mulapa palyanma tjanampa puḻkaṟa mukuringkula.

Jesunya Kutjuya Kulinma

11Nyawaya nyanga walka puḻka ngayulu maṟa walytjangku walkatjunanyi alatji, “Nyangatja ngayulu walkatjunanyi, Paulalu.”

12Uwa, aṉangu panya kutjupa tjuṯangkuya nyuranya mayatjarira wituwituṉi Jew tjuṯaku aṟawanu watiringkula nyinanytjaku tjananya puṟunypa, aṉangu Jew kutjupa tjuṯangku tjananya nyakula pukuḻarinytjaku. Panya tjana wangkanytja wiyaṯu Jesunya puṉu kaṯakutjarangka utitjunkunytja. Tjinguṟuya tjukurpa palunyatjara wangkanyangkampa Jew kutjupa tjuṯa tjanampa puḻkaṟa mirpaṉariku. Kaya palumpa tjanampa nguḻungku Jew wiya tjuṯa wituwitulpai nyanga alatji wangkara, “Kulilaya, nganaṉa nyuranya Jesuku walytjaringkunyangka palyaṉi Moseku aṟawanu watiringkunytjaku.” Alatjiya nguḻungku wangkapai. 13Palu Jew paluṟu tjana Moseku tjukurpa uwankara tjukaṟurungku kuliṟa palyantja wiyangku wantipai. Munuya nyaa kutju kulilpai nyura palunya tjananya puṟunyarinyangka mirawaṉinytjikitjangku, munuya alatji wangkapai, “Wiṟungkula mulapa tjananya nganaṉanya puṟunymanu.”

14Palu ngayuluṉatju walytjangku mirawaṉinytjikitjangku kulintja wiya, Mayatja Jesunya Christanya kutjuṉa mirawaṉinyi nganampa puṉu kaṯakutjarangka anga-ilunytja. Munuṉa nyara palulanguṟulta mantatja tjuṯa mukuringkula palyantjaku wiyaringu alatjiṯu. 15Panya Godalu alatji kulintja wiya aṉangu tjuṯa, “Nyara tjana Moseku aṟangka watiringu, ka nyanga tjana Moseku aṟa kulintja wiya nyinanyi.” Alatji kutju paluṟu nyakula kulilpai, “Nyara tjana kuwari aṟa kuwaritjangka nyinanyi.”

16Ka nyura palu puṟunypaṯu kulinma, kaṉa alatji nyura tjukaṟurungku kulinnyangka nyurampa Godala tjapini nyuranya ngaḻṯunytjungku kurunpa rapaṟa pukuḻmankunytjaku, aṉangu Godaku walytja uwankara kuḻu.

17Ka panya nyura kutjupa tjarangku ngayunya kuraṟa pungkupai. Palu kulila, ngayulu Jesuku waṟka palyannyangkaṉiya palumpa mirpaṉtju tjuṯangku ngayunya pungangi ka nyangaṉa pika paḻkuntjara nyinanyi tjana pungkunytja, ka pika nyanganpa kuliṟa nyura uti nintingku kulinma alatji, “Munta-uwa, wati nyanga paluṟu mulamulangku Jesunya waṉaṉi unytjungku wiya.” Nyara palulanguṟuṉi nyura uti ngayunya piṟuku kuraṟa pungkunytja wiyangku wantima.

18Uwa walytja tjuṯa, alatjiṯuṉa walkatjunanyi. Ka Mayatja Jesulu Christalu nyuranya pukuḻtju puḻkangku kurunpa pukuḻmaṟa kanyinma. Uwa mulapa.