PITJ

Genesis 13

Aipamanya Pula Lotanya Kutju-kutjuringkunytja

1-2Uwa, wati panya Aipamanya kutjupa kutjupa tjuṯatjararingu, panya paluṟu kuka kutjupa kutjupa tjuṯa mulapa kanyiningi tjiipi tjuṯa, nanikuta tjuṯa, puluka, tangkiyi tjuṯa kuḻukuḻu munu apu tjiilpa, gold puḻka kuḻu kanyiningi. Munu paluṟu pula kuriṟarangku nyanganpa uwankara Itjipitalanguṟu katingu munu pula tjina-aṟangka anu kakaraṟalku munuya ma-itipirira ma-wirkanu manta panya palulaṯu panya pila Kainanta uḻpaṟira. Ka palumpa maḻanyku katja kuḻu palula tjungu anangi wati panya Lotanya. 3-4Munuya nyara palula ngura tjunkula tjukutjuku nyinara piṟuku ma-pakaṉu alinytjaralku, munuya ngura kutjupangka piṟuku ma-tjunu munuya palulanguṟu ngurili-ngurili para-nyinangi pilangka panya Kainanta uḻpaṟira. Munuya ngulalta wirkanu ngura panya palulaṯu Pitjulta Ailta nguṟur-kutjara panya ngaṉmanytjuya alinytjaranguṟu wirkaṟa ngura tjunkula pitjiltjunu. Munu pitjilpa panya palulaṯu aṟangka wirkaṟa Aipamalu Godanya waḻkuṉu.

5Ka wati panya Lotanya kuritjara Aipamala tjungu para-nyinaṟinangi munu paluṟu kuḻu kuka kutjupa kutjupa winki kanyiningi tjiipi, nanikuta, puluka tjuṯa munu aṉangu waṟka tjuṯa kuḻukuḻu. 6-7Ka nyara palula-aṟangka aṉangu Kainannga nguraṟa tjuṯa munu Piṟitjinya nguraṟa tjuṯa kuḻu nguratja alatjiṯu nyinangi ngura pala palula. Ka ukiṟi puḻka wiya nguwanpa itjanu tjukutjuku kuka tjuṯa mulatu ngalkula paḻtjaringkupai wiya. Palu Aipamaku Lotaku pulampa kuka tjuṯa mulapa, ka pula puṯu kuliningi ngura kutjungka tjunguṟa kutjuṯu kanyintjikitjangku. Ka Aipamaku waṟka tjuṯangku munu Lotaku waṟka tjuṯangku tjanampa mayatjaku kuka tjuṯa aṯunymaṟa kanyiningi, munuya kutjupa-aṟa ukiṟi-tjiratja ngaparku wangkara pikaringkupai.

8Ka nyanga palulanguṟu Aipamalu Lotala wangkangu, “Wanyu kulila! Nyuntu panya ngali walytjaṟara, kayanku nyanganpa nyaaku rawa pikaringanyi? 9Wanyuli kutju-kutjuriwa munuli mauṉṯalpa kanyinma. Nyuntu tjinguṟu nyarangka ankuku, ka ngayulu nyangangka nyinama. Munta tjinguṟu ngayulu nyarangka ankuku, ka nyuntu nyangangka nyinama. Ka-puṯa nyuntu-waraṟa ngurkantara, kaṉa ngayulu maḻa.”

10Ka Lotalu para-nyakula nyangu karu nyara Jordannga wati-ngarira ukalingkunyangka wimaṟu lipi puḻkangka, munu kulinu, “Munta nyaratjampal ngura wiṟu mulapa karu uṟutjara ukiṟi puḻkatjara Mayatja Godaku kaana puṟunypa munu manta Itjipitanya puṟunypa. Tjinguṟuṉa nyara palulakutu ankula nyinaku kuwari.” (Aṟa nyanga palula-aṟangka tawunu puḻka Tjatamanya pula Kumaranya ngaṟangi palya Godalu piḻuntankunytja wiya.) 11Munu Lotalu karu wimaṟu Jordannga ngurkantaṟa anu ngura ma-tjunkunytjikitja kakaraṟa-pitinypa. Alatji Aipamanya Lotanya pula kutju-kutjuringkula mauṉṯalparingu. 12Aipamalu panya manta Kainanta ngura tjunu, ka Lotalu panya ankula ngura ma-tjunu Jordanta wimaṟungka ngura panya tawunu Tjatamala itingka, ilytjingka wiya. 13Ka ngura pala palula aṉangu panya Tjatamala nyinanytja tjuṯa kura mulapa nyinangi watarku alatjiṯu Godanya kulilpai wiya.

Aipamanya Ngura Ipuṟanta Ankula Nyinanytja.

14Nyanga palula maḻangka Lotanya ankunyangka Mayatja Godalu Aipamala wangkangu, “Pala nyuntu ngaṟanytjalanguṟu purkaṟangku para-miṟaṟa waṉaṟa manta winki nyawa. 15Ngayuluṉanta manta nyanga uwankara nyuntunya ungkuku nyuntumpa walytja tjuṯa kuḻu maḻatja maḻatja, ka nyuramparira nyurampa alatjiṯu tiṯutjara ngaṟaku. 16Panya ngayulu palyalku nyuntumpa walytjapiti winki mulararinytjaku maḻatja maḻatja, kaya minga puṟunypa mungilyi mulapa nyinaku puṯu kantamilantjaku. 17Ka kuwari ara munu para-nyangama manta winki, panya ngayulu manta nyanga palunya uwankara nyuntunya unganyi.”

18Ka palulanguṟu Aipamalu tjana ma-pakaṉu munu ankula tawunu ini Ipuranta itingka ngura tjunu puṉu miḻmiḻpa tjuṯangka ini Muuṟaila. Munu paluṟu pitjilpa puḻka palyaṉu Mayatja Godaku palunya waḻkuntjikitjangku. Munu ngura nyanga palulanguṟulta para-nyangangi.