PITJ

Exodus 32

Aarontu Puluka Ngalypa-ngalypa Gold-nguṟu Palyantja

1Kaya aṉangu Israelkunu tjuṯangku Mosenya puḻinguṟu ukaling-kunytjaku puṯu nyakula nyakula tjunguringkula Aaronta wangkangu, “Ai! Pakaṟa god nganampa palyala nganaṉanya katiṟinkunytjaku. Panya nganaṉa puṯu kulini, yaaltjiringu Mosenya? Nyara paluṟu panyalanya Itjipitalanguṟu pakaltjingaṟa katingu, munu kuwari yaaltjiringu?”

2Ka palulanguṟu Aarontu tjanala wangkangu, “Nyurampa kuringku katjangku uṉṯaltu ringi apu gold-nguṟu palyantja tjuṯa pinangka kanyinnyangka araltjaṟa ngayulakutu ngalya-kati!”

3Kaya aṉangu uwankarangku paluṟu tjana pinangka kanyintja uwankara araltjaṟa mulapaṯu palulakutu katingu. 4Ka Aarontu mantjiṟa gold panya palunya tjananya pitingka tjunu munu palulanguṟu waṟungka kutjaṉu kampara uṟuringkunytjaku. Ka uṟuringkunyangka mantjiṟa piti kutjupangka tjutiṟa puluka nyiṯayira kuḻunypa puṟunypa palyaṉu, gold-nguṟu panya. Kaya aṉangu tjuṯangku nyakula tjananku Israelngamaṟa wangkangu, “Nyangatja nganampa god, panya nganaṉanya nyanga paluṟu Itjipitalanguṟu pakaltjingaṟa ngalya-katingu.”

5Ka palulanguṟu Aarontu pitjilpa palyaṉu puluka panya palula kuranyu munu tjanala wangkangu, “Mungawinki inma puḻka ngaṟanyi nganaṉa Mayatja Godanya waḻkuntjaku.” 6Kaya mungawinki mulapa kuka tjananku katingu pungkula pitjilta katu tiliwakaṟa Godanya ungkunytjikitjangku munuya kuka kutjupa tjara tjunguringkula ngalkunytjikitjangku katingiṯu. Munuya palulanguṟu pungkula pauṟa wiyaringkula nyinakatira mai kuka puḻka ngalkula tjikiningi, munuya tjikiṟa ngalypa-ngalyparingkula minyma kutjupa kutjupa pampuningi tjana pukuḻarinytjikitjangku.

7Ka palulanguṟu Godalu Mosela puḻi katu nyinanyangka wangkangu, “Wala puḻka ukaliwa! Nyuntumpa panya aṉangu tjuṯaya nyuntu panya Itjipitalanguṟu katinytja tjuṯa kuraringu munuya ngayuku watarkuringu. 8Paluṟu tjana mapalku kampa kutjuparingu munuya ngayulu wangkanytja uwankara wantingu. Munuya puluka ngalypa-ngalypa gold-nguṟu palyaṟa tultjungaṟakatira waḻkuṟa mirawaṉinyi puluka palunya. Munuya kuka katira pitjilta katu pungkula tiliwakaṉi puluka palunya ungkula waḻkuntjikitjangku. Munuya alatji wangkanyi, ‘Nyangatja nganampa God! Nyanga paluṟu panyalanya Itjipitalanguṟu pakaltjingaṟa ngalya-katingu.’ 9Ka ngayulu nyanga palumpa tjanampa ninti, panya tjana rawa ngayula tungunpungkupai. 10Kaṉi markulwiyangku wantir'iyala kaṉa puḻkaṟa mirpaṉarira tjananya uwankara iluntara wiyalku. Munuṉa nyuntulanguṟu kutju aṉangu tjuṯa mulararinytjaku palyalku.” Alatji Godalu Mosela wangkangu.

11Palu Moselu Mayatja Godanya puḻkaṟa wangkara markuningi, “Mayatja! Nyaanguṟun tjanampa puḻkaṟa mirpaṉarinyi panya nyuntu palunya tjananya Itjipitalanguṟu pakaltjingaṟa ngalya-katingu witulya puḻkangku? 12Ka nyuntu tjananya pungkula wiyannyangka tjinguṟu Itjipitanya nguraṟa tjuṯangkuya alatji nyuntunya wangkaku, ‘Ai! God panya tjanampangku kunyu tjananya iluntankunytjikitjangku ngura nyanganguṟu pakaltjingaṟa ma-katingu. Paluṟu tjananya ngura puḻitjarakutu pungkunytjikitjangku katingu tjananya uwankara wiyantjikitjangku.’ Alatjiya tjinguṟu nyuntunya anaṟa wangkaku. Ka nyara palula-tawara nyuntu uti Israelkunu tjuṯa iluntankuwiyangku wantima, munu tjanampa mirpaṉariwiya kalyparingama. 13Panyatja kulila, panya nyuntunya waṉalpai maṉkurpa, Aipuṟamanya, Isaacanya, Jacobanya tjananya. Panya nyuntu tjananyan kalkuṉu palula tjanalanguṟu aṉangu tjuṯaringkula mungilyi mulararinytjaku, kililpi tjuṯa puṟunypa. Munu panyan kalkuṉu tjananya manta panya Kainannga tjanampa walytjapiti ungkunytjikitjangku tjanampa tiṯutjara ngaṟanytjaku.” Alatji Moselu Godala purkaṟangku wangkara palunya kalypaningi Israelkunu tjuṯa iluntankuwiyangku wantinytjaku.

14Ka Mayatja Godalu nyangatja kuliṟa kampa kutjuparingu munu palumpa aṉangu tjuṯa uwankara wiyantjikitjangku kulintjatjanungku wantingu.

15-16Ka Mosenya maḻaku ukalingu puḻi Tjaniyalanguṟu puḻi panya tjiwa kutjaritjatjara, panya tjiwa pala palula pulala kampa kutjarangka Godalu walytjangku tjukurpa puḻka walkatjuṟa wantingu.

17Ka Moseku maḻpangku Tjatjuwalu aṉangu tjuṯa mirara waṉinyangka kuliṟa palumpa mayatjangka Mosela wangkangu, “Ngurangka nyara pikaringanyi puṟunypa.”

18Ka Moselu wangkangu, “Wiya mira nyaratja pikaringkunytja wiya. Inma puṟunypaya inkanyi.”

19Munu Moselu ngalya-ukalingkula ilaringkula nyangu puluka panya ngalypa-ngalypa munu aṉangu tjuṯa kuḻu pukuḻarira waṟarakatinyangka, munu paluṟu puḻkaṟa mulapa mirpaṉaringu. Munu tjiwa panya paluṟu katinytja kutjara aṉṯawaṉira kaṯantanu puḻi paṉṯangka. 20Munu paluṟu puluka panya ngalypa-ngalypa tjana palyantja mantjiṟa waṟungka tjarpatjuṟa uṟuṉu, munu palulanguṟu wariringkula apuringkunyangka tjiwangka rungkaṟa uḻupungu, munu palulanguṟu kapingka tjunguṟa Israelkunu tjuṯa wituwituṉu tjikintjaku mina panya palunya.

21Munu palulanguṟu Moselu Aaronta wangkangu, “Aṉangu nyanga tjuṯangkuntaya kuliṟa nyuntunya nyaa wangkangu, kan tjanampa kuliṟa mulamularingu munun tjananya kura nyanga puḻka palyannyangka paintja wiyangku wantingu?”

22Ka Aarontu wangkangu, “Wanyu ngayuku mirpaṉarinytja wiyangku wantima. Nyuntun ninti aṉangu nyanga palumpa tjanampa, panya tjana kura tjuṯa palyantjikitja rawa mukuringkupai. 23Tjana alatji ngayula wangkangu, ‘Ai! Pakaṟa god nganampa palyanma nganaṉanya katiṟinkunytjaku. Panya nganaṉa puṯu kulini, yaaltjiringu Mosenya? Nyara paluṟu panyalanya Itjipitalanguṟu pakaltjingaṟa katingu, munu paluṟu kuwari yaaltjiringu?’ Alatjiṉiya wangkangi. 24Kaṉa tjananya wangkangu ringi tjuṯa pinangka kanyintja kutjupa kutjupa tjuṯa kuḻu gold-nguṟu palyantja uwankara ngalya-katinytjaku. Kaya paluṟu tjana kanyintjatjanungku mulapaṯu ngayunya araltjaṟa ungu, kaṉa gold palunya tjananya tjunguṟa waṟungka waṉingu, ka puluka puṟunyaringu.”

25Ka Moselu kulinu Aarontu Israelkunu tjuṯa puṯu markunnyangka, panya Aarontu tjananya puṯu paiṟa wantingu, kaya tjana puḻkaṟa ma-kuraringu aṉangu ngura kutjupitja tjuṯangku nyakula ikaringkunytjaku tjanampa. 26Munu paluṟu ankula ngurangka itinguṟu puḻkaṟa mirara wangkangu, “Aṉangu Godaku mukuringkula ngayulakutu ngalya-pitja.”

Kaya Levikunu tjuṯa pitjala kapuṯuringu palula. 27Ka tjanala Moselu wangkangu, “God panya Israelkunu tjuṯaku Mayatjangku nyuranya Levikunu tjuṯa wangkanyi tjuḻa waṟa mantjiṟa ngurangka para-iluntankunytjaku nyurampa kuṯa maḻanypa tjuṯa, maḻpa tjuṯa munu nyurala itingka nyinanytja tjuṯa kuḻukuḻu.”

28Kaya mulapaṯu Levikunu tjuṯangku wangka kutju kuliṟa ankula para-iluntanangi, kaya tjiṉṯu pala palula aṉangu tjuṯa mulapa ilungu 3,000. 29Ka Moselu Levikunu tjuṯangka wangkangu, “Kuwari nyanga nyura Mayatja Godala wangaṉarangku kulinu munu nyanga nyura nyurampa katja, kuṯa, maḻanypa tjuṯa, walytjatja tjuṯa iluntanu. Ka nyanga palulanguṟu Godalu nyuranya pukuḻmanu palula wangaṉarangku kulinnyangka nyura palumpa waṟka miḻmiḻpa palyantjaku.”

30Ka tjiṉṯungka Moselu Israelkunu tjuṯangka wangkangu, “Panya nyura kura puḻka mulapa palyaṉu puluka ngalypa-ngalypa palyaṟa waḻkuṟa. Palu kuwari nyangaṉa piṟuku puḻi katu tatiṟa Mayatja Godala tjapilku nyurampa kalyparingkunytjaku nyura kura nyanga palunya palyantjitjanguṟu.”

31Ka palulanguṟu Moselu Mayatja Godalakutu maḻaku ankula wangkangu, “Aṉangu nyangantuya kura puḻka mulapa palyaṉu. Panya tjanaya gold-nguṟu god ngalypa-ngalypa palyaṟa palunya waḻkuningi. 32Wanyu tjanampa ngaḻṯuringama kura panya palyantjitjanguṟu munu tjananya kalypangku wantima pungkuwiyangku. Palu wiyangka ngayuku ini nyiringuṟu panya kurala, nyiri panya nyuntu aṉangu nyuntumpa tjuṯa ini walkatjunkunytjatjanungku.”

33Ka Mayatja Godalu wangkangu, “Wiya, panya tjana ngayula tungunpungkunytja tjuṯa kutjuṉa nyiri ngayukunguṟu ini kuralku. 34Ala! Ara munu tjananya aṉangu tjuṯa ma-kati ngura panya ngayulu nyuntula ngaṉmanytju wangkanytjitjakutu. Palu kulinma panya ngayuku angeltunta nyuntunya katiṟinkuku. Palu ngulaṉa tjananya kura palyantjitjanguṟu pikantankuku tjiṟirpi ngayulu kalkuntjitjangka.”

35Munu palulanguṟu Mayatja Godalu pika puḻka tjananya ungu, panya tjanaya Aaronnga wituwituṉu tjanampa puluka gold-nguṟu palyantjaku.