PITJ

Iipuṟuku 2

Tjukurpa Nganampa Wankakutu Mulapa

1Uwa, Jesunya puḻka mulapa angelpa tjuṯangka waintaṟa, kala uti Jesuku tjukurpa nganaṉa ngaṉmanytju kulintjatjanungku purkaṟangku kulinma watarkurinytja wiyangku. Panya nganaṉa tjukurpa nyanga palumpa watarkurirampa Jesulanguṟu paṯuringkuku. 2Panya iriti puḻi panya ini Tjaniyala angelpa tjuṯangku Mosenya ungu Godaku tjukurpa. Ka tjukurpa nyara paluṟu panya tjukaṟuru mulapa, panya aṉangungku tungunpungkula tjukurpa palunya kuliṟa wantinyangka palumpa kura ngapartji utiringu.

3Ka tjukurpa nyanga puḻka Jesuku nganaṉa kuliṟa wantinyangka nganampa kura puḻka palu puṟunypaṯu ngaṟaku, panya tjukurpa nyanga paluṟu puḻka mulapa kuliṟa mulamularingkula wankaringkunytjaku. Palu nganaṉa kuliṟa wantirampa puṯu wankaringanyi. Panya tjukurpa wanka nyanga palunya Mayatja Jesulu-waraṟangku tjanala tjakultjunu, ka tjana ngapartji kulintjatjanungku nganaṉala utingku ngalya-tjakultjunu kuliṟa mulamularingkunytjaku. 4Ka tjana tjukurpa nyanga palunya nganaṉala wangkanyangka Godalu miracle kutjupa kutjupa tjuṯa nintipukangku palyaningi witulya puḻkangku, nganaṉa nyakula tjukurpa nyanga palumpa mulamularingkunytjaku. Munu Godalu Kurunpa Miḻmiḻnga nganaṉala unngu tjarpatjunu, ka nganaṉanya witulyananyi Kurunpa Miḻmiḻṯu kutjupa kutjupa tjuṯa witulya puḻkangku palyantjaku paluṟu nintinnyangka. Kala nyanga alatji witulyatjararingkula tjukurpa panya palumpa puḻkaṟaṯu mulamularinganyi. Kala wanyu tjukurpa puḻka nyanga palunya kuliṟa wantima? Wiya, utilanku kuliṟa wantinytja wiyangku wantima wankakitjangku.

Jesunya Aṉangurira Nganaṉanya Puṟunyaringu

5Ka panya Godalu angelpa tjuṯa tjunkunytja wiyaṯu mayatjarira uwankara kanyintjaku ngula manta ilkaṟi kuwaritja utiringkunyangka. 6Palu Godalu aṉangu tjuṯa tjunu mayatjarira kanyintjaku, panya nyiringka iriti walkatjunkunytja alatji ngaṟanyi wati kutjupangku wangkanytja,

“God, nyuntu panyan puḻka mulapa, ka panya aṉangu tjuṯa minga puṟunypa.

Palu nyuntu tjananya ngaḻṯunytjungku kulilpai,

Munun tjananya aṯunymaṟa kanyilpai.

7Panya nyuntu aṉangu palyaṉu puḻka mulapa nyinanytjaku angelpa tjuṯangka itingka, pitalytji puḻkatjara.

8Munu panyan nyuntu aṉangu tjunu mayatjarira nyuntu panya paluntja uwankara kanyintjaku.”

Panya alatji ngaṟanyi iriti walkatjunkunytja, kala nyanga palulanguṟu kulini mulapa Godalu aṉangu tjunu uwankara mulapa aṯunymaṟa kanyintjaku.

Palu kuwarila puṯu nyanganyi aṉangu kutjupangku uwankara tjukaṟurungku kanyinnyangka. Wiya alatjiṯu. 9Palu nganaṉa Jesunya kutju nyanganyi. Paluṟu kutju mayatja puḻka nyinara uwankara kanyini. Nyara palunya panya Godalu angelpa tjuṯanguṟu unytjungku tjaṟuṉu pula tjungu nyinanytjatjanungku paluṟu aṉangurira ngalkilpa ilunytjaku aṉangu uwankaraku. Godalu panya mukulya puḻkangku iyaṉu aṉangu tjuṯa ngalkintjaku, ka panya paluṟu pikatjararingkula anga-ilungu nganaṉa kura tjuṯa palyantjitjanguṟu. Nyara palulanguṟu paluṟu ilunytjitjanguṟu Godalu palunya puḻka mulapa tjunu uwankarangku palunya waḻkuntjaku.

10Nyangatja Godalu tjukaṟurungku palyaṉu nganaṉanya palumpa tjitji tjuṯa wankaṟu maḻakungku wirkakatinytjikitjangku. Panya paluṟu kutjungku uwankara paluntjatjanungku wiṟuṟa kanyilpaingku kuliṟa Jesunya iyaṉu aṉangu tjuṯaku iwarankunytjaku Godalakutu, tjana palumpa walytjaringkula wirkankunytjaku palumpa pitalytjingka. Panya Jesunya iyaṉu pikatjararingkula ilunytjaku, ka nyara palulanguṟu kutju paluṟu nganaṉanya wankaṟu wirkakatinyi Godalakutu. 11Panya Jesunya nganaṉa walytjaṟara walytjaṟara Mama kutjutjara nyinanyi palumpa walytja kutjupa tjuṯa kuḻukuḻu. Nyara paluṟu nganaṉanya wankaṟunu kura nganampa paltjiṟa wiyaṟa, munulanya palulanguṟulta kuṉṯawiyangku pukuḻṯu maḻanypanmananyi. 12Panya Jesulu iriti Mama Godala wangkangu nyanga alatji,

“Ngayuluṉa ngayuku maḻanypa tjuṯangka nyuntunya tjakultjunkuku.

Munuṉa tjana tjunguringkunyangka tjanala nguṟur-nguṟurpa ngaṟala nyuntunya inkara waḻkulku.”

13Munu alatji piṟuku wangkangu,

“Ngayuluṉa mulamularingkuku Godaku.”

Munu nyangatja kuḻu wangkangu alatji,

“Nyanga ngaṟanyiṉa Godaku tjitji tjuṯangka tjungu,

panya paluṟuṉi wituṉu tjananya aṯunytju kanyintjaku.”

14Godaku tjitji tjuṯa panya aṉangu nyinanyi iltjanpa milkaḻitjara. Palulanguṟu Jesunya nganaṉanya puṟunypaṯu aṉanguringu munu iltjanpaṯu milkaḻitjararingu. Alatji paluṟu aṉanguringu nganampa anga-iluṟa mamu Satannga wiyantjikitja, panya paluṟu nganaṉanya ilunytjaku kuralpai. 15Uwa, Jesunya pitjangu nganaṉanya ngalkintjikitja Satantanguṟu munu paluṟu nganaṉanya raparingkunytjaku palyaṉu. Panya ngaṉmanytjula mamungka kuliṟa nganaṉa tiṯutjara nguḻuringkupai ilunytjaku-tawara. 16Palu Jesunya angelpa tjuṯa ngalkintjikitja pitjanytja wiya. Paluṟu nganaṉanya wankaṟunkunytjikitja pitjangu Aipuṟamaku tjamupiti maḻatja maḻatja.

17Nyanga palunyakitja panya paluṟu mantakutu pitjala aṉanguringu munu mantangka nyanga nyinangi aṉangu alatjiṯu nganaṉanya puṟunypa. Munu panya Godaku waṟkarira nganampa tjukurtjara puḻka nyinangi ngaḻṯunytju puḻkanya munu paluṟu tjukaṟurungku palyaṉu nganampa ngalkiltu Godalu nganaṉanya kura palyantjitjanguṟu pungkunytjaku-tawara nganaṉa kaṟalyarira Godalakutu maḻaku aṟuringkunytjaku. 18Panya mamu tjuṯangku munu aṉangu tjuṯangku kuḻu Jesunya kuraringkunytjaku rawangku arkaningi, palu paluṟu tungunpungkula alatjiṯu wantingi. Nyanga palulanguṟu paluṟu nganaṉanya nintini nganaṉa palu puṟunypaṯu kura palyalwiya tungun-tungunpa nyinanytjaku.