PITJ

Iipuṟuku 7

Tjukurtjara Milkitjatikanya

1-3Panya Milkitjatikanya ngura ini Tjalamaku mayatja nyinangi munu paluṟu wati tjukurtjara puḻka nyinangi God Katutjaku. Ka ini panya Milkitjatikanya tjaa Iipuṟu ngaṟanyi munu ini paluṟu wangkanyi alatji, Iwara tjukaṟuruku mayatja. Ka ngura ini Tjalamanya wangkanyi alatji, Kalypa nyinanytjanya. Kala palulanguṟu Milkitjatikanya kulilpai nyanga alatji, “Paluṟu-maṉṯu mayatja puḻkangku aṉangu tjuṯa kalypa nyinanytjaku palyalpai.” Palu ngananya wanyu palumpa mama ngunytju, tjamu kami kuḻu? Ngurpala nyara palumpa. Palu wanyu ngura yaaltjingka iṯi paluṟu wirkanu? Munu ngura yaaltjingka paluṟu ilungu? Nganaṉa ngurpa. Panya tjanaya ngaṉmanytju nyiringka walkatjunkunytja wiyaṯu. Palu nganaṉa kulini panya paluṟu wati tjukurtjara puḻka tiṯutjara nyinapai, Godaku katja puṟunypa.

Panya nganaṉa ninti Milkitjatikaku pulampa Aipuṟamaku, panya iriti Aipuṟamalu tjana palumpa maḻpa tjuṯangku kuḻu pikangku pungkula wiyaṉu mayatja kutjara kutjara tjanampa tjaultji tjuṯa kuḻukuḻu. Munuya tjanampa kutjupa kutjupa tjuṯa mantjiṟa katingu ngurakutu. Ka panya nguṟurpa wati Milkitjatikanya ngalya-ngaparikatingu Aipuṟamanya wati-pitjanyangka nyakula munu palunya pukuḻmanu alatji wangkara, “Godalu nyuntunya wiṟuṟa kanyinma maṟangku.”

Ka palulanguṟu Aipuṟamalu kutjupa kutjupa tjuṯa tjana mantjiṟa katinytja tjaraṟa tjukutjuku ungu Milkitjatikanya mayatja puḻka kuliṟa. 4Panya Milkitjatikanya-maṉṯu mayatja puḻka mulapa kutjupa tjuṯangka waintarinytja, ka Aipuṟamalu Israelkunu tjuṯaku tjamu ngaṉmanyitjangku palunya ungu tjaraṟa warmaḻanguṟu tjulyaṟa katinytjatjanungku. Tjinguṟu Aipuṟamanya palu puṟunypa puḻka mulapa nyinanyangkampa Milkitjatikalu tjaraṟa ungama palunya. Palu wiya, Aipuṟamalu palunya tjaraṟa ungu mayatja puḻka kuliṟa.

5Ka panya nganaṉa Israelkunu tjuṯangku wati tjukurtjara tjuṯa ngurkantankupai aṉangu Levikunu tjuṯanguṟu. Munula Moseku tjukurpa kuliṟa nganaṉa kutjupa kutjupa tjuṯa kanyintjatjanungku tjaraṟa tjukutjuku ungkupai palunya tjananya tjukurtjara tjuṯa. Uwa, tjana walytjanguṟu mantjilpai, panya paluṟu nganaṉa uwankara Aipuṟamalanguṟu. 6-7Palu wati tjukurtjara nyanga Milkitjatikanya Aipuṟamaku walytja wiya, wati malikitja, Levilanguṟu wiya. Munu paluṟu mantjinu Aipuṟamalu tjaraṟa ungkunyangka, munu palunya wangkara pukuḻmanu. Palu panya Godalu Aipuṟamanya ngaṉmanytju kalkuṉu puḻka nyinanytjaku, kala tjinguṟu kulini paluṟu mayatja puḻka mulapa Milkitjatikala waintarinytja. Palu wiya, nyangatja Milkitjatikalu palunya wangkara pukuḻmanu ngaṉmanypa puḻka mulapa nyinanytjatjanungku. Panya nganaṉa ninti wati maḻatjangku wati puḻkanya alatji wangkara pukuḻmankupai wiya, palu wati puḻkangku kutju pukuḻmankupai wati maḻatja. 8Kulini nyura? Panya Milkitjatikanya Aipuṟamala waintaṟa puḻka mulapa nyinangi, wati tjukurtjara tjuṯangka kuḻu. Panya paluṟu tjana mantjilpai Israelkunu tjuṯangku tjaraṟa ungkunyangka palu tjukurtjara paluṟu tjana ilura wiyaringkupai. Ka Milkitjatikalu Aipuṟamala mantjinu kutju-aṟa paluṟu tjaraṟa ungkunyangka, munu palulanguṟu paluṟu yaaltjiringu? Wiya nyiringku tjakultjunanyi paluṟu wanka nyinanytja, ilunytja wiyaṯu.

9-10Uwa, nganaṉa rawangku tjaraṟa ungkupai wati tjukurtjara tjuṯa. Palumpa tjanampa tjamu ngaṉmanyitja ini panya Levinya, panya Aipuṟamaku pakaḻiku katja. Ka panyaya tjukurtjara tjuṯa nyinakatingi maḻatja maḻatja Aipuṟamalanguṟu. Ka panya Aipuṟamalu Milkitjatikanya tjaraṟa ungu Levila kuwaripangka paluṟu tjana nyinanytja wiyangka. Paluṟu kutjungku ungu Milkitjatikanya, palu tjanampa kuḻu ungu ngaṉmanytju watarku-watarkungku, panya Leviku tjanampa palumpa walyatjapiti maḻatja maḻatjaku kuḻu.

Jesunya Tjukurtjara Nyinanyi Milkitjatikanya Puṟunypa

11Ka Moselu nintiningi tjukurpa panya Godalu palunya ungkunytja, munu paluṟu wangkangi waṟka wati tjukurtjara tjuṯaku kuḻu. Ka palumpa kuṯa Aaronnga tjukurtjara ngaṉmanyitja nyinangi. Wati panya paluṟu Levilanguṟu. Ka ngulalta palula maḻangka palumpa walytjapiti maḻatja maḻatja tjukurtjara tjuṯaringangi. Nyanga paluṟu tjana panya uwankara Leviku tjamupiti maḻatja maḻatja wanapari wanapari. Palu Israelkunu tjuṯangku tjukurpa panya Godalu Mosenya ungkunytjanguṟu nintiringu yaaltji-yaaltji tjukaṟuru nyinanytjikitja, munuya nintiringu kura palyantjatjanungku kuka katira ungkunytjikitja wati tjukurtjarangku pungkula Godanya ungkunytjaku paluṟu tjananya kura palyantjitjanguṟu kalypangku pungkuwiyangku wantinytjaku. Palu nyanga alatji palyaṟaya Godala miṟangka tjukaṟuru ngaṟanytja wiya. Panya aṟa nyanga ngaṉmanyitja waṉaṟaya puṯu nguwanpa palyaringangi tjukaṟuru ngaṟanytjikitja Godala miṟangka.

Ka nyara palulanguṟu Godalu tjukurtjara kutjupa iyaṉu ini Jesunya, panya tjukurtjara ngaṉmanyitja tjuṯangku aṉangu tjuṯa puṯu palyaningi Godala miṟangka tjukaṟuru ngaṟanytjaku. Palu Jesunya tjukurtjara kutjupa mulapa, Aaronnga tjana puṟunypa wiya, palu Milkitjatikanya puṟunypa. 12Panya Godalu Jesunya tjukurtjara iyaṟa aṟa panya ngaṉmanyitja kampa kutjupanu. Munu paluṟu wati tjukurtjara tjuṯaku waṟka wiyaṉu munu kampa kutjupanu. Ka nganaṉa kuwari aṟa kutjupangka nyinanyi aṟa kuwaritjangka. 13-14Panya aṟa ngaṉmanyitjangkaya Levilanguṟu kutju tjukurtjara nyinapai, palu Jesunya tjukurtjara kutjupa Leviku walytjapitinguṟu wiya, palu Judah-ku walytjapitinguṟu. Panya Judah-nya tjana walytjaṟara walytjaṟara tjukurtjara nyinanytja wiyaṯu, panya Moselu tjananya wangkanytja wiya kuka pungkula Godanya ungkunytjaku paluṟu aṉangu tjuṯaku kalyparingkunytjaku. Wiya, paluṟu Levikunu tjuṯa kutju wangkangu. Kala nyanga palulanguṟu kulini aṟa panya ngaṉmanyitja wiyaringu, kala aṟa kuwaritjangkalta nyinanyi.

15Uwa, mulapa Godalu aṟa ngaṉmanyitja kampa kutjupanu, panya paluṟu tjukurtjara kutjupa mulapa ngurkantanu Milkitjatikanya puṟunypa, Aaronnga tjana puṟunypa wiya. 16Panya aṟa ngaṉmanyitjangkaya tjukurtjara tjuṯa ngurkantaṟa tjunkupai Leviku walytjapitinguṟu. Palu tjukurtjara nyangatja Levikunu wiya. Paluṟu panya wanka tiṯutjara nyinanyi wiyaringkunytja wiya alatjiṯu, ka nyara palulanguṟu Godalu palunya ngurkantaṟa tjunu tjukurtjara nganampa nyinanytjaku. 17Panya iriti nyiringka walkatjunkunytja nyanga alatji ngaṟanyi,

“Nyuntun tjukurtjara puḻka tiṯutjara nyinaku Milkitjatikanya puṟunypa ilunytja wiya.”

Alatji Godalu Jesunya wangkangu.

18-19Uwa, aṟa ngaṉmanyitja wiyaringu, panya aṟa nyara paluṟu kuṉpu wiya kurakura ngaṟangi, panya aṟa nyara palulawanu nyinara aṉangu tjuṯa puṯu tjukaṟuru nyinangi. Ka nyara palulanguṟu Godalu aṟa panya palunya kampa kutjupanu munu aṟa kuwaritja wiṟu mulapa palyaṉu nganaṉa mulamularingkula palula tjunguringkunytjaku.

20-21Piṟukula wanyu nyangatja kulinma! Panya Jesunya tjukurtjararingkunyangka Godalu palunya wangkangu alatji,

“Ngayuluṉa nyuntunya mulamulangku kalkuṉi

munuṉa ngayulu piṟuku walytjangku kuliṟa kampa kutjuparinytja wiya.

Panya nyuntun tjukurtjara puḻka tiṯutjara nyinaku wiyaringkunytja wiya.”

Palu panya tjukurtjara ngaṉmanyitja tjuṯa kalkuntja wiyaṯu tjana tiṯutjara tjukurtjara nyinanytjaku. Wiya, paluṟu Jesunya kutju kalkuṉu. 22Ka nyara palulanguṟu Jesulu aṟa kuwaritja tiṯutjara ngaṟanytjaku kanyini. Aṟa nyara paluṟu panya Mosenya ungkunytja puṟunypa wiya, aṟa kutjupa wiṟu mulapa.

23-24Kaya nyangatja kuḻu kulila kutjupa ngapartji. Panya tjukurtjara tjuṯa mulapaya nyinakatingi, munuya tjukutjuku waṟkarira tjiḻpiringkula ilungi, kaya kutjupa tjuṯa ngapartji waṟkaringi. Palu Jesunya kulinma paluṟu tiṯutjara nyinaku ilunytja wiya alatjiṯu. Nyara palulanguṟu panya paluṟu kutju tjukurtjara puḻka tiṯutjara nyinaku wiyaringkunytja wiya. 25Ka pala palulanguṟu aṉangu uwankara palumpa mulamularingkula Godalakutu pitjanyangka paluṟu tjananya mulapa wankaṟunkuku Godala tjungu pukuḻpa nyinanytjaku. Panya paluṟu wanka tiṯutjara nyinanyi munu tjanampa rawangku Mamala tjapini wiyaringkunytja wiyangku.

26Panya aṟa nyanga kuwaritjangka Jesunya kutju nganampa tjukurtjara puḻka nyinanyi munu nganampa kutjupa kutjupa uwankara tjukaṟurungku palyalpai. Paluṟu ngaṉmanyitja tjuṯa puṟunypa wiya. Paluṟu panya tjukaṟuru mulapa nyinanyi munu kuralpai wiya alatjiṯu. Paluṟu kuraku ngurpa aṉangu tjuṯa puṟunypa wiya. Paluṟu kutjupa alatjiṯu, palya mulapa. Munu paluṟu mayatja puḻka mulapa uwankarangka waintaṟa nyinanyi Godala tjungu ngura nyara ilkaṟingka. 27Paluṟu wati tjukurtjara puḻka puṟunypa wiya, panya tjukurtjara paluṟu puṯu palya mulapa nyinapai munu kura palyalpai. Palulanguṟu paluṟu kuka pungkula tiliwakalpai Godalu nyakula palunya munu aṉangu tjuṯa kuḻu kura tjuṯa palyantjitjanguṟu kalypangku wantinytjaku. Munu tjukurtjara panya paluṟu alatji tiṯutjarangku palyalpai tjiṉṯu kutjupa tjiṉṯu kutjupa. Palu panya Jesunya palu puṟunypa wiya, panya paluṟu kutju-aṟangku palyaṉu munu ngalkilpa ilungu aṉangu uwankaraku kuranguṟu, ka nyara palulanguṟu Godanya aṉangu tjuṯaku kalyparingkupai.

28Nyura uti kulini? Panya Moseku tjukurtu wangkangi wati tjukurtjara puḻka aṉangu tjuṯanguṟu ngurkantaṟa tjunkunytjaku. Palu wati paluṟu tjana tiṯutjara upa nyinangi, panya paluṟu tjana nganaṉa puṟunypa aṉangu alatjiṯu. Uwa, Godalu aṟa panya ngaṉmanyitja tjananya ungu, palu maḻangkalta paluṟu mulamulangku kalkuṉu aṟa kuwaritjaku, munu ngurkantaṟa tjunu palumpa katja tjukurtjara puḻka nyinanytjaku aṟa nyanga kuwaritjangka. Ka paluṟu panya Godanya mukuringkunytja uwankara tjukaṟurungku palyaṟa wiyaṟa wiṟu mulapa tiṯutjara nyinanyi.