Itjipitanya Nguraṟa Tjuṯangku Israelkunu Tjuṯa Kurantja
1-4Jacobanya, panya ini kutjupa Israelnga, ngura nyara Itjipitalakutu ngaṉmanypa anu munu paluṟu palumpa katja tjuṯa kuriṟara kuriṟara katingu ini nyanga palunya tjananya Rupinnga, Tjimiyannga, Levinya, Judah-nya, Itjakanya, Tjipulunnga, Pintjimannga, Dannga, Napatalinya, Kaatanya, Atjanya tjananya. 5Munuya ankula Josephala tjunguringkula ma-nyinangi ngura panya palula, panya Josephanya ngaṉmanypa ankula nyinanytjitjangka. Munuya tjunguringkula tjuṯa mulapalta nyinangi nampa 70 aṉangu wati panya Jacobalanguṟu kanyintja tjuṯa.
6Munuya rawa mulapa nyinangi ngura nyara Itjipitala. Ka Josephanya munu palumpa kuṯa tjuṯa kuḻu ngula tjiḻpiringkula ilungu ngura nyara palula. 7Palu nyanga palula tjanalanguṟuya pakaḻipitiku puḻiripitiku katjapiti uṉṯalpiti kuḻukuḻu ma-tjuṯaringangi maḻatja maḻatja. Munuya rawa nyinara nyinara tjuṯa mulararingu, munuya manta panya Itjipitala lipiwanu alatjiṯu nyinangi aṉangu Israelkunu winki mulapa.
8Palu ngula mulapalta Itjipitanya nguraṟa tjuṯaku mayatja puḻka kutjupa nyinangi ini Piiṟanya panya mayatja ini ngaṉmanyitja puṟunypa. Palu paluṟu ninti wiya Josephaku. 9-10Munu mayatja nyanga paluṟu palumpa aṉangu tjuṯangka wangkangu, “Nyawaya aṉangu nyanga Israelkunu tjuṯa! Tjanaya kuwari tjuṯa mulararingu, munuya nganampa ngura angaṉu. Tjinguṟu aṉangu ngura kutjupitja tjuṯa warmaḻa pitjaku nganaṉanya pikangku pungkunytjikitja, ka tjinguṟu nyanga tjana tjanala tjunguringkula tjaṯuringkuku nganampa munuya nganaṉanya pungkuku munuya palulanguṟu tjinguṟu nganaṉanya pungkula wiyaṟa tjana ngura nyanganguṟu ma-pakalku. Wanyula wangkara kulila munula tjukurpa palya wangkara kuliṟa kalkuṟa wanti ngaṉmanytju aṉangu nyanga paluṟu tjana piṟuku ma-tjuṯaringkunytjaku-tawara.” Munuya Piiṟalu tjana wangkara kuliningi, munuya kulinu Israelkunu tjuṯa waṟka puḻka ungkunytjikitjangku tjana unytju wiyakitja rawa waṟkarinytjaku mayatja Piiṟaku.
11Ka Piiṟalu palumpa wati tjuṯa aḻṯingu munu wangkangu, “Ankulaya wati nyara Israelkunu tjuṯaku nyura mayatjari munu tjananya pauntjingaṟa wituwitunma puḻkaṟa waṟkarinytjaku.” Kaya ankula palunya tjananya mantjiṟa katira puḻkaṟa waṟkarinytjaku wituwituningi waḻi tjuṯangka. Kaya waḻi tawunu puḻka kutjara palyaningi ini panya Pitjamanya munu Ramatjinya wati mayatja Piiṟaku waḻi tjuwa puṟunypa paluṟu ngula mai puḻka uṯuḻuṟa tjunkukatinytjaku. 12Ka wati panya Itjipitanya nguraṟa tjuṯangku tjananya puḻkaṟa alatjiṯu pauntjingaṟa alkaningi aṉangu panya Israelkunu tjuṯa, kaya puḻkaṟa mulapa nguḻu waṟkaringi. Palu tjana rawa alatjiṯu tjitji tjuṯatjararingangi munuya tjuṯa mulararira aḻa lipiwanu alatjiṯu nyinangi ngura panya Itjipitala. Kaya Itjipitanya nguraṟa tjuṯa tjanampa nguḻu-nguḻuringu, 13-14munuya piṟuku tjananya waṟka puḻka mulapalta ungu Israelkunu panya tjuṯa ngaḻṯuringkunytja wiyangku alatjiṯu, kaya puḻkaṟa alatjiṯu waṟkaringi mungawinkinguṟu mungaku-wangkara. Panya paluṟu tjanaya tjuminta palyaningi waḻi tjuṯaku, ka tjara kutjupa uṟilta paama tjuṯangka waṟkaringi, panya ngaḻṯuringkunytja wiyangkuya tjananya pakuningi waṟka puḻkangka.
15-16Ka ngula wati panya mayatja Piiṟalu wangkangu minyma panya kutjarangka Tjipuṟala pulala Puwala nyanga alatji, “Ngula nyupali minyma panya Iipuṟu tjuṯa alpamilaṟampa palumpa tjanampa iṯi nyiṯayira wirkankunyangka nyakulampa iṯi nyara palunya mapalkungku iluntara, palu iṯi kungka wirkankunyangkampa palya wantima iluntankunytja wiyangku.” Alatji Piiṟalu pulanya wangkara wituṉu.
17Palu minyma nyanga paluṟu pula Godala wangaṉarangku kulilpai munu pula mayatja panya Piiṟalu wangkanytja palyantja wiyangku wantingi. Munu pula iṯi nyiṯayira tjuṯa nyinanytjaku wantingi iluntankunytja wiyangku. 18Ka ngula mayatja Piiṟalu wati kutju iyaṉu ankula minyma panya kutjara aḻṯira ngalya-katinytjaku. Munu wirkankunyangka paluṟu pulala tjapinu, “Nyaanguṟu nyupali nyanga alatji palyaningi? Munu nyupali nyaaku iṯi nyiṯayira tjuṯa wanka nyinanytjaku wantingi?”
19Ka minyma panya kutjarangku ngapartji Piiṟala wangkangu, “Wiya, minyma nyanga Iipuṟu tjuṯaya minyma Itjipitanya nguraṟa tjuṯa puṟunypa wiya, panya tjanaya tjitji iṯi mapalku kanyilpai ngali wirkankunytja kuwaripangka. Kali maḻa wirkankupai iṯi ngaṉmanypa ngarinyangka.” 20-21Ka palulanguṟu Godanya palumpa pulampa puḻkaṟa pukuḻaringu, munu pulampa palu puṟunypaṯu palyaṉu tjitji kanyintjakuṯu panya pula Godanya kutju kuliningi munu iṯi Iipuṟu tjuṯa pungkuwiyangku wantingi. Ka panya Iipuṟu tjuṯa ilaṯu-ilaṯu tjuṯa mulararingi. 22Ka palulanguṟulta Piiṟalu Itjipitanya nguraṟa tjuṯangka wangkara puḻkaṟa wituwituṉu, “Nyanganguṟuya iṯi nyiṯayira Iipuṟu tjuṯa wirkankunyangka nyakulampa mantjila munuya ma-katira karu ini Nayilta waṉi uṟu puḻkangka ilunytjaku, munuya kungka tjuṯa kutju wanti wanka nyinanytjaku.”