PITJ

Exodus 5

Moselu Pula Aarontu Mayatja Piiṟala Wangkanytja

1Ka maḻangka aṉangu tjuṯangka wangkara wiyaringkula Mosenya pula Aaronnga Itjipitaku mayatja puḻkakutu anu Piiṟalakutu palula wangkanytjikitja munu pula wirkaṟa wangkangu nyanga alatji, “Israelkunu tjuṯaku Mayatja Godalu ngalinya wituṉu alatji puḻkaṟa wangkanytjaku nyuntula, ‘Ngayuku aṉangu tjuṯa wantir'iyanma tjana ilytjikutu ankula ngayunya waḻkuntjikitjangku inma puḻka palyantjaku.’ ”

2Palu mayatja panya Piiṟalu kuliṟa wiyanmanu wangkara, “Palu ngananya wanyu mayatja paluṟu? Ngayulu palumpa ngurpa. Nyaakuṉa palula kulilku munuṉa wantir'iyalku Israelkunu tjuṯa? Ngayulu palula kuliwiyangku wantinyi, munuṉa palunya tjananya wantir'iyantja wiyangku wantinyi.”

3Ka pula palula wangkangu, “Wiya, Mayatja Godalu, panya aṉangu Iipuṟu tjuṯaku Godalu, ngalila mulapa utiringkula wangkangu. Palulanguṟu nganaṉanya kanyintja wiyangku wantir'iyanma tjiṟirpi maṉkurpa ankunytjaku ilytjikutu, kala nganaṉa kuka pungkula tiliwakaṟa Mayatja nganampa Godanya ungkuku paluṟu nganampa pukuḻarinytjaku. Palu nganaṉa tjinguṟu ankuwiyangku wantinyangkampa paluṟu nganaṉanya iluntankuku pika kutjupa kutjupa tjuṯa iyaṟa, munta tjinguṟulampa warmaḻa tjuṯa iyalku, kalanya iluntankuku.”

4-5Palu wati panya Piiṟalu pulala wangkangu, “Wiya, nyaaku nyupali Iipuṟu tjuṯa wangkanyi waṟka wantikatira ilytjikutu ankunytjaku? Panya kuwariya tjuṯa mulararingu munuya nganampa waṟka puḻka palyaṉi, kaṉa tjananya wantir'iyantja wiyangku wantinyi. Maḻaku pula ara munu tjananya piṟuku puḻkaṟa waṟkarinytjaku wangka.” Ka pula puṯu tjapiṟa anu.

6-7Ka pula ankunyangka maḻangka Piiṟalu aḻṯingu wati panya paluṟu mayatja tjunkunytja tjuṯa munu tjanala wangkangu alatji, “Nyura panya Israelkunu tjuṯa pauntjingaṟa wituwitulpai nganampa puḻkaṟa waṟkarinytjaku. Munu panya nyura ilintji piḻṯi tjuṯa ungkupai tjana tjuḻpirta tjunguṟa tjuminta wituwitu palyantjaku. Palu kuwariya tjananya wantima ungkuwiyangku, kaya walytjangku nguriṟa mantjinma. 8Palu tjana uti tjuminta tjuṯa rawangku palyanma nampa panya palunyaṯu, panya ngaṉmanytjuya palyaningi, palu puṟunypa. Ka nyura mankurpa palyannyangka pukuḻarinytja wiyangku wantima, panya nyura alatjingannyangkaya aṉangu pala waṟka tjuṯa ma-nyaṯaringu munuya palulanguṟu tjana waṟka wantira ngayula rawangku ngatjini tjananya ilytjikutu wantir'iyantjaku tjana kuka pungkula tjanampa God ungkunytjikitjangku. 9Ka palula-tawara nyura tjananya puḻkaṟa alatjiṯu waṟkamilanma tjana ngurangka waṟka wiya nyinara tjukurpa ngunti kulintjaku-tawara Moselu wangkanyangka.” Alatji Piiṟalu tjananya wituwituṉu wati panya mayatja tjuṯa.

10-11Kaya paluṟu tjana kuliṟa ankula Israelkunu tjuṯangka wangkangu, “Mayatja Piiṟalu wangkangu nganaṉa piṟuku nyuranya ukiṟi ilintji piḻṯi tjuṯa ungkuwiyangku wantinytjaku munu nyuranya wangkangu walytjangku ankula para-nguriṟa mantjintjaku. Palu nyura kunyu tjiṟirpi kutjungka tjuminta nampa panya palu puṟunypaṯu palyanma, panya nyura ngaṉmanytju tjiṟirpi kutjungka tjuṯa mulapa palyaningi, palu puṟunypa.”

12Kaya nyangatja kuliṟa Israelkunu tjuṯa anu ngura panya Itjipitala uwankarangka munuya para-nguriningi ukiṟi panya ilintji piḻṯiku. 13Kaya wati panya mayatja tjuṯangku tjananya puḻkaṟa alatjiṯu wituwituningi waṟka puḻka palyantjaku. Munuya wangkangu, “Nyura uti tjuminta tjuṯa palyaṟampa panya ngaṉmanyitja puṟunypa palyanma tjuṯa mulapa, panya ngaṉmanytjula nyuranya ukiṟi ilintji piḻṯi tjuṯa ungangi, ka panya nyura tjuṯa mulapa palyaningi, palu puṟunypaya tjuṯa palyanma.” 14Palu puṯuya palyaningi, kaya Piiṟalu panya mayatja tjunkunytjitja tjuṯangku tjananya pungangi wati panya Israelkunuku mayatja tjuṯa, panya wati palunya tjananyaya aṉangu Israelkunu tjuṯanguṟu ngaṉmanytju ngurkantaṟa tjunu tjanampa walytja tjuṯa mayatjarira waṟkamilantjaku. Kaya Piiṟalu mayatja tjunkunytjitja tjuṯangku palula tjanala wangkangu nyanga alatji, “Ai! Nyurampa walytja tjuṯangku palyantja wiya tjuminta tjuṯa mulapa, nampa panya ngaṉmanytju tjana palyantjitja puṟunypa. Nyaanguṟu? Utiya panya palu puṟunypaṯu tjuṯa palyanma, maṉkurpa wiyangku.”

15-16Kaya wati panya Israelkunuku mayatja tjuṯa anu Piiṟalakutu munuya wirkaṟa wangkangu, “Mayatja wiṟu, ngaḻṯuringamalampa. Palu nyaakulanyan alatjingaṉi? Nganaṉa panya nyuntumpa waṟkarinyi, kalanya nyaanguṟu nyuntu panya mayatja tjunkunytjitja tjuṯangku nganaṉanya punganyi? Paluṟu tjana nganaṉanya ungkunytja wiya ilintji panya tjuminta palyantjaku, kala nganaṉa puṯu palyaṉi tjuminta tjuṯa ilintji wiyangka. Kalanya paluṟu tjana mirpaṉarira alkaṉi tjuṯa palyantja-tjiratjangku. Palu nyuntu uti tjanampa mirpaṉarima panya tjana nganaṉanya ilintji tjuṯa ungkunytja wiyangku wantinyangka.”

17-18Ka Piiṟalu tjanala wangkangu, “Wiya, nyura waṟkaku ngurpa! Nyura tjukutjuku waṟkarira mapalku pakuringkupai. Pala palulanguṟu nyura ngayunya tiṯutjarangku ngatjini nyuranya wantir'iyantjaku ankula kuka pungkula nyurampa God ungkunytjikitjangku. Maḻakuya ara waṟkaku. Kala nganaṉa nyuranya piṟuku ungkuwiyangku wantinyi ilintji panya piḻṯi tjuṯa, palu piṟukuya palyala tjuminta panya tjuṯa mulapa nyura panya ngaṉmanytju palyantja puṟunypa.” 19Kaya aṉangu Israelkunuku mayatja tjuṯangku nyangatja kuliṟa puḻkaṟa nguḻuringu munuya kuliningi, “Yaaltjirikula? Panya Piiṟanya mukuringanyi nganaṉa tjuminta tjuṯa mulapa palyantjaku, panya nganaṉa ngaṉmanytju palyantja puṟunypa. Palu tjana ilintji piḻṯi tjuṯa nganaṉanya ungkuwiyangku wantinyangkampa nganaṉa nampa panya palu puṟunypaṯu puṯu nguwanpa palyalku, kalanya uwankara pungkuku Piiṟaku panya wati tjuṯangku.” Munuya palulanguṟu Piiṟanya wantikatira anu.

20Munuya Piiṟaku nguranguṟu ma-pakaṟa nyangu Mosenya pulanya Aaronnga tjanampa paṯannyangka. 21Munuya puḻkaṟa mirpaṉarira wangkangu pulanya nyanga alatji, “Mayatja Piiṟanya palumpa wati mayatja tjuṯa kuḻu nganampa puḻkaṟa mirpaṉarinyi nyupalilanguṟu, munulampa kuraringanyi. Ka uti Mayatja Godalu nyupalinya pungama, panya nyupali Piiṟala wangkangu nganaṉanya ilytjikutu wantir'iyantjaku, kaya nyara palulanguṟu paluṟu nganaṉanya iluntankunytjikitjangku kulini.”

Moselu Godala Tjituṟu-tjituṟungku Tjapintja

22-23Ka palulanguṟu Moselu Godala piṟuku tjapinu alatji wangkara, “Mayatja God! Nyaakulanya nyuntu wantingu nyanga tjana kurantjaku, panya nganaṉa nyuntumpa walytja tjuṯa. Nyaakuṉin panyatja wanyu nyangakutu iyaṉu? Kaṉa mulapaṯu pitjala Piiṟala tjapinu nyanga ngayuku walytja tjuṯaku. Ka panya ngayulu wangkanyangka Piiṟalu kuliṟa tjanampa puḻkaṟa mirpaṉarira waṟka puḻka mulapa tjunu tjana piṟuku waṟkarinytjaku. Ka nyuntu tjanampa anga-wangkanytja wiyangku alatjiṯu wantingu. Nyaanguṟu?”