PITJ

Exodus 33

Godalu Tjananya Wituntja Puḻi Tjaniyanya Wantikatinytjaku

1Ka Mayatja Godalu Mosela wangkangu, “Nyuntu panya Israelkunu tjuṯa Itjipitalanguṟu pakaltjingaṟa ngalya-katingu. Ka kuwari nyuntu ngura nyangatja wantikatira tjananya ma-kati manta panya ngayulu kalkuntjalakutu. Panya ngayulu Aipuṟamanya, Isaacanya, Jacobanya tjananya manta panya palunya ungkunytjikitjangku kalkuṉu tjanampa walytjapiti maḻatja maḻatja kuḻu. 2Ngayulu angelpa iyalku nyuranya katiṟinkunytjaku. Munuṉa manta nyara palulanguṟu aṉangu nguratja tjuṯa pakaltjingaṟa ma-paiṟa waṉaṟa iyalku, panya wati Kainankunu tjuṯa, Amurkunu tjuṯa, Iitakunu tjuṯa, Piṟitjikunu tjuṯa, Ipakunu tjuṯa, Tjaipukunu tjuṯa kuḻukuḻuṉa uwankara paiṟa iyalku. 3Ka manta nyara palula nyura mai puḻka pakaltjingalku munu nyura kuka kutjupa kutjupa tjuṯa mulapa kanyilku, panya manta nyara paluṟu wiṟu mulapa. Palu ngayulu nyurala tjungu ankunytja wiya panya nyura rawa ngayula tungunpungkupai. Tjinguṟuṉa nyurala tjungu ankula nyuranya nguṟurpa uwankara iluntaṟa wiyalku.”

4Kaya nyanga palulanguṟu Godalu wangkanyangka kuliṟa aṉangu uwankara puḻkaṟa tjituṟu-tjituṟuringu munuya ulara waṉingi. Munuya palumpa tjanampa liritja, manyirkangka kanyintja munu kutjupa kutjupa uwankara araltjaṟa tjunangi tjituṟu-tjituṟu nyinara. 5Panya Godalu Mosela ngaṉmanytju wangkangu nyanga alatji, “Aṉangu nyanga paluṟu tjana ngayula rawa tungunpungkupai. Kaṉa tjinguṟu tjanala tjungu tjukutjuku ankula tjananya uwankara mapalkungku alatjiṯu iluntara wiyalku ngayula tungupungkunyangka. Ka nyuntu tjananya wangka liritja, manyirkitja, pinatja, kutjupa kutjupa tjuṯa tjana kanyintjatjanungku araltjankunytjaku. Kaṉa palulanguṟulta kulilku, ‘Yaaltjingalkuṉa aṉangu nyanganpa?’ ” 6Kaya ngura nyara Tjaniyala Israelkunu tjuṯangku mulapaṯu uwankara araltjaṟa tjunu, munuya piṟuku tanpantja wiyangku wantingu.

Tiinta Panya Godala Tjunguringkula Kulilpai

7Ka Israelkunu tjuṯangku ngura kutjupangka wirkaṟa ngura tjunkunyangka Moselu tiinta katira wiltjalpai palumpa tjanampa ngurangka paṯu nguwanpa. Munu paluṟu tiinta nyara palunya ininu “Godala Tjunguringkula Kulilpai”. Ka kutjupa Godala tjapintjikitja mukuringkula tiinta nyara palulakutu ankupai Godalu wangkanyangka kulintjikitja. 8Ka Mosenya tiinta nyara palulakutu ankunyangka aṉangu tjuṯa tiinta tjanampangka tjaangka paṯaṟa ngaṟala nyakupai Mosenya tiinta nyara palula ankula tjarpanyangka. 9Ka Mosenya tiintangka tjarpanyangka maḻangka ngangkaḻi panya waṟa tiintakutu ukalingkula tiinta tjaangka ngaṟapai, ka Mayatja Godalu Mosela wangkapai ngangkaḻinguṟu. 10Kaya Israelkunu tjuṯangku ngangkaḻi waṟa tiinta tjaangka ngaṟanyangka nyakula Godanya waḻkulpai palumpa tjanampa tiintanguṟu ngaṟala. 11Ka Mayatja Godalu Mosenya ilangku wangkapai panya wati maḻpaṟara wangkapai, palu puṟunypa. Ka palulanguṟu Mosenya maḻaku ankupai ngurakutu. Palu wati panya Tjatjuwanya Moseku panya maḻpa kutju maḻaringkula nyinapai tiinta nyara palula. Wati paluṟu panya yangupala wati ini Nanku katja.

Mayatja Godalu Kalkuntja Tjanala Tjungu Pitjalinkunytjikitjangku

12Ka Moselu Mayatja Godala wangkangu, “Mulapa nyuntu ngayunya wangkangu Israelkunu tjuṯa manta nyara palulakutu katinytjaku. Palu wangkanytja wiyaṯuṉin ngananya ngayula tjungu iyantjikitjangku. Nyuntu panyaṉin wangkangu nyuntu ngayuku ninti mulapa, munutjun ngayuku pukuḻarinyi. 13Palu ngayuku pukuḻarirampaṉi nintinma nyuntumpa kulintja tjuṯa, kaṉa nyuntumpa nintiriwa munuṉantawi rawangku nyuntunya waṉanma nyuntu ngayuku pukuḻarinytjaku. Panyatja kulinma, panya aṉangu nyanga Israelkunu tjuṯan nyuntu ngurkantanu nyuntumparinytjaku.” Alatji Moselu wangkangi.

14Ka Mayatja Godalu wangkangu, “Wiya, palya ngayulu nyurala tjungu ankula nyuranya rapalku.”

15Ka Moselu wangkangu, “Nyuntu nganaṉala ankuwiyangku wantirampa nganaṉanya nyanganguṟu iyalwiyangku wantima. 16Palu nyuntu nganaṉala tjungu ankunyangkampa aṉangu ngura kutjupitjangku nyakula kulilku, ‘Mulapa Mayatja Godanya Moseku tjanampa pukuḻarinyi.’ Kala nyuntumpa aṉangu tjuṯa mauṉṯalpa nyinaku kutjupa nguwanpa aṉangu kutjupa tjuṯa puṟunypa wiya.”

17Ka Mayatja Godalu Mosela wangkangu, “Uwa palya, ngayulu nyuntu wangkanytjitja palyalku, panya ngayulu nyuntumpa ninti mulapa munuṉa nyuntumpa pukuḻarinyi.”

18Ka palulanguṟu Moselu tjapinu, “Wanyuṉi nyuntumpa pitalytji puḻka nintima.”

19Ka Mayatjalu wangkangu, “Uwa palya! Ngayuluṉa Mayatja Godanya, munuṉa ngayulu mukuringkula aṉangu kutjupa ngaḻṯunytjungku ngurkantankupai palunya mukulyangku kanyintjikitjangku. Kuwariṉa ngayulu pitalytji puḻka mulapa nyuntula itiwanu ankuku, munuṉatju nyuntu kulintjaku ini miḻmiḻpa wangkaku. 20Palu ngayulu yunpa nyuntula utiringkunytja wiya, panya aṉangungku ngayuku yunpa nyakulampa iluku. 21Palu nyangatja ngura ngayula itingka ngaṟanyi nyuntu waḻungka tatiṟa ngaṟanytjaku. 22Ka ngayulu pitalytji puḻkatjara nyuntula itiwanu ankula nyuntunya waḻu tjilpirpangka tjarpatjunkuku munuṉa maṟangku nyuntunya angatjunkuku. 23Munuṉa nyuntula itiwanu ankula maṟangku angatjunkunytjatjanungku aḻalku, kaṉin palulanguṟulta tjaṉa kutju miṟalku, palu puṯun nyakuku ngayuku yunpa.”