PITJ

Danielku 7

Danieltu mamu kutjara kutjara tjukurmaṟa nyakunytja

1-2Panya ngaṉmanypa wati Piltjatjanya ngura Papilanku mayatja puḻka nyinanyangka Danieltu tjukurmanu kunkunpa ngarira, munu nyakunytjatjanungku walkatjunu alatji, “Ngayulu ngarira nyangu waḻpa puḻka mulapa wangkanyangka kakaraṟanguṟu wiluṟaranguṟu alinytjaranguṟu munu uḻpaṟiranguṟu munu paluṟu uṟu puḻka uritjingaṉu puḻkaṟa mulapa. 3Ka mamu kutjara kutjara puḻka mulapa pakaṉu uṟu ngatinguṟu, kaṉa nyakula nguḻu-nguḻuringu. Mamu paluṟu tjana kutjupa kutjupa mulapa.

4“Ka mamu kutju lion puḻka puṟunypa ngaṟangi walawuruku nyaḻpitjara. Ka ngayulu nyakunyangka kutjupangku palumpa tjaṉanguṟu nyalpi winki ilaṟa waṉingu, ka katuringkula wati puṟunypa paltjuṟa ngaṟangi, munu paluṟu kulilpairingu aṉangungku kulintja puṟunypa.

5“Munuṉa piṟuku mamu kutjupa ngapartji nyangu bear puṟunypa, ka paluṟu katuringkula ngalya-pupangi, munu paluṟu kuka kantilypa mankurpa patjaṟa katitingku kanyiningi. Ka kutjupangku bear palula wangkangu, ‘Pakaṟa aṉangu tjuṯa mulapa ngalkula paltjariwa.’

6“Palulanguṟuṉa piṟuku nyangu mamu kutjupa ngapartji leopard puṟunypa kata kutjara kutjaratjara, munu paluṟu tjuḻpuku nyaḻpi kutjara kutjara tjaṉangka kanyiningi. Ka kutjupangku mamu palunya tjunu aṉangu tjuṯa mayatjarira kanyintjaku.

7“Munuṉa piṟuku kutju-aṟalta nyangu mamu maḻatja. Paluṟu kuṉpu puḻka mulapa, panya tjanala waintaṟa. Kaṉa nyakula puḻkaṟa alatjiṯu kurunpa unngu nguḻuringu. Panya paluṟu katiti ayanatjara puḻka mulapa uwankara patjaṟa minya-minyalpai munu tjinangku kantuṟa kaṯantankupai. Paluṟu yuṟuwilya ten-tjara kutjupa mulapa.

8“Ka ngayulu yuṟuwilya ten palunya tjananya nyakunyangka yuṟuwilya kuḻunypa ngalya-pakaningi nguṟur-kutjara, ka kutjupangku yuṟuwilya panya mankurpa warpuṟa waṉingu yuṟuwilya panya kuḻunypa pakantjaku. Ka yuṟuwilya kuḻunypa paluṟu kuṟutjara munu tjaatjara ngaṟangi aṉangu puṟunypa munu paluṟu kaṉany-kaṉanytju miralmiraltu wangkangi.”

Danieltu God Tiṯutjara Wanka Nyinapainya tjukurmaṟa nyakunytja

9Munu Danieltu piṟuku wangkangu, “Palulanguṟuṉa nyangu kutjupangku mayatjaku tjiya wiṟu tjuṯa tjunkunyangka. Ka mayatja panya Tiṯutjara Wanka Nyinapainya tjiya kutjungka nyinakatingu aṉangu tjuṯa ngurkantankunytjikitja. Palumpa panya mantara piṟanpa mulapa nyinnga puṟunypa munu mangka palu puṟunypaṯu piṟanpa mulapa. Ka palumpa tjiya wiṟunguṟu waṟu tili tiitiilaraṟa waṉaningi, ka tjiya paluṟu wilatjara, ka wila palula tjanalanguṟu kuḻu waṟu tili tiitiilaraṟa waṉaningi. 10-11Ka waṟu uṟu puṟunypa palulanguṟu ukalingangi, Tiṯutjara Wanka Nyinapailanguṟu. Ka angelpa mungilyi mulapa palula kuranyu ngaṟala waṉaṟa palumpa palyaningi. Ka kuuṟtpa tjataringu aṉangu tjuṯa ngurkantankunytjaku, kaya nyiri tjuṯa aḻaṉu. Kaṉa uwankara nyakula waintaṟa nyangu yuṟuwilya panya kuḻunypangku kaṉany-kaṉanytju wangkanyangka, ka ngayulu nyakunnyangka mamu panya palunya kutjupangku iluntanu, panya aṉangu tjuṯa ngalkula wiyalpainya, munu palunya waṟungka tjarpatjunu kampara piltiṟa wiyantjaku ka mulapaṯu piltiringkula muluṟuringu. 12Kaya mamu panya kutjupa mankurpa mayatja puḻka nyinanytjatjanu tjukutjukuringu, panya kutjupangku tjananya tjaṟuṉu, palu tjananya iluntankunytja wiyangku wantingu tjukutjuku rawa nguwanpa nyinanytjaku.

13“Kaṉa kuwaripangkuṯu nyangangi munuṉa kutjupa ngangkalingka pitjanyangka nyangu watiku katja puṟunypa. Kaya palunya Godalakutu ma-katingu Tiṯutjara Wanka Nyinapailakutu. 14Ka palunya pukuḻṯu mirawaṉira mayatja puḻka mulapalta tjunu manta winkitjaku mayatja nyinanytjaku, aṉangu ngura winkitjangku palunya wangaṉarangku kuliṟa walkuntjaku wangka kutjupa kutjupangku, miṟi kutjupa kutjupangku. Ka paluṟu tiṯutjara alatjiṯu nyinaku mayatja puḻka mulapa ka kutjupangku palunya puṯu wiyalku. Alatjiṉa tjukurpa nyangu.”

Angeltu Danielta tjukurpa utiṟa wangkanytja

15Munu Danieltu piṟuku wangkangu, “Uwa, ngayulu puḻkaṟa nguḻuringu munuṉa puṯu kuliningi tjukurpa nyangatja nyakunytjatjanungku. 16Mununa angelpa tjuṯakutu ma-ilaringkula kutjungka tjapinu, ‘Tjukurpa nyanga paluṟu nyaa wanyu nintini?’ Kaṉi angeltu utiṟa wangkangu nyanga alatji, 17‘Mamu panya kutjara kutjarangku nintini wati kutjara kutjarangku ma-kunpuringkula aṉangu tjuṯa mayatjarira kanyintjaku. 18Palu mayatja panya paluṟu tjana ngaṟala ma-wiyaringkunyangka maḻangka God Katutja Puḻkalu palumpa walytja tjuṯa mayatja tjunkuku tjana mayatjarira tiṯutjarangku aṯunymaṟa kanyintjaku.’ Alatjiṉi angeltu tjakultjunu.

19“Kaṉa mukuringangi angeltu mamu panya maḻatja kuḻu utiṟa wangkanytjaku. Panya mamu paluṟu kutjupa mulapa puḻkaṟa nguḻuringkunytjaku, mamu nyara mankurta waintaṟa alatjiṯu. Panya paluṟu katiti ayanangku munu maṟa puṟantjingku aṉangu tjuṯa warpuṟa mutuny-mutunymankupai munu ngalkupai munu tjara kutjupa tjinangku kantuṟa pilkilpai. 20Munuṉa mukuringangi yuṟuwilya panya ten kuḻu kuliṟa nintiringkunytjikitja mamu panya palula katangka ngaṟanytjanya munu yuṟuwilya panya kuḻunypa nguṟurpa pakantja kuḻu, panya kutjupangku yuṟuwilya panya mankurpa warpuṟa waṉingu yuṟuwilya kuḻunypa paluṟu pakantjaku. Kuḻunypa paluṟu panya witulya puḻka mulapa munu kuṟu aṉangu puṟunypa paluṟu rawa kaṉany-kaṉanypa wangkapai. 21Kaṉa rawangku nyangangi yuṟuwilya panya kuḻunypa paluṟu aṉangu Godaku walytja tjuṯaku pikaringkula waintarinyangka. 22Palu Katutja Puḻkalu, Titutjara Wanka Nyinapailu, pitjala palumpa walytja tjuṯa nyakula tjukaṟurunmanu, munu tjananya mayatja tjunu tjana mayatjarira uwankara aṯunymaṟa kanyintjaku.

23“Munu paluṟu ngayula alatji utiṟa wangkangu, ‘Panya mamu nyara malatjangku nintini mayatja puḻka ngula pakantjaku. Mayatja nyara paluṟu pakaṟa aṉangu tjuṯa mayatjarira kunpungku kanyilku ngura tjuṯa mulapa, mayatja panya ngaṉmanyitja maṉkurpa purunypa wiya, panya paluṟu manta winkingka ngura munu aṉangu tjuṯa minya-minyaṟa kantuṟa wiyalku. 24Ka mayatja nyara palula maḻangka mayatja kutjupa tjuṯa pakalku 10-pa kutjupa ngapartji ngura panya tjuṯa kanyintjaku. Panya yuṟuwilya panya 10-pangku nyanga palunya nintini. Ka palula tjanalanguṟu mayatja kutjupalpi pakalku munu paluṟu kunpu puḻkaringkula mayatja ngaṉmanyitja maṉkurpa wiyalku. Nyanga palunya panya yuṟuwilya kuḻunypangku nintini, panya paluṟu nguṟurpa pakannyangka yuṟuwilya kutjupa mankurpa kaṯakatingu. Ka mayatja nyara paluṟu kutjupa nguwanpa nyinaku kura puḻka mulapa, mayatja ngaṉmanyitja tjuṯa puṟunypa wiya. 25Munu mayatja nyara paluṟu God Katutja Puḻkanya kuraṟa pungkuku munu aṉangu panya Godaku walytja tjuṯa kuḻu kuralku munu pungkuku. Munu paluṟu kulilku Godaku tjukurpa tjuṯa kampa kutjupankunytjikitjangku, munu inma tjuṯa kuḻu panya Godalu tjananya ungkunytjitja. Ka Godalu mayatja palunya markuntja wiyangku wantiku, ka year kutjara-kutjara nguwanpa nyara paluṟu Godaku walytja tjuṯalta mayatjarira kuralku. 26Palu kuutpa nyara ilkaṟingka Godalu mayatja panya palunya puḻkaṟa wangkara kuranmankuku, ka paluṟu mayatja ngaṟanytja wiyaringkuku alatjiṯu. 27Ka palulanguṟulta God Katutja Puḻkalu palumpa walytja tjuṯalta mayatja tjunkuku, ka tjana mayatjarira manta winki tiṯutjarangku aṯunymaṟa kanyilku ngura uwankara. Ka mayatja kutjupa uwankarangku palunya walkulku munu palula kutjungka wangaṉarangku kulilku.’ Alatjiṉi angeltu utiṟa wangkangu.

28“Uwa, nyanga alatjiṉa ngarira tjukurpa nyangu munuṉa puḻkaṟa alatjiṯu nguḻuringu munuṉa yunpa kutjuparingu, mununa kutjupangka wangkawiyangku alatjiṯu wantingi munuṉa unngu kutju kuliningi.”