PITJ

Itjikilku 3

1-4Palulanguṟuṉi wangkangu, “Kuwariṉanta unganyi nyiri nyangatja, ka nyuntu mantjiṟa ngalkula.” Munuṉi mulapaṯu nyiri ungu kaṉa ngalkunu. Ka mayu panya wiṟu mulapa tjuwita tjaḻa puṟunypa.

Munuṉi piṟuku wangkangu, “Kuwari Israelkunu tjuṯakutu ara munu tjanala tjakultjura ngayulu kuwari nyuntunya wangkanytjitja. 5-6Aṉangu ngura kutjupa-pitja tjuṯa nyinanyi ngura kutjupa tjuṯangka wangka kutjupa uti wiya. Tjinguṟuṉa nyuntunya tjanalakutu iyanma, kaya nyuntu ngayuku tjukurpa wangkanyangka wangaṉarangku kulinma. Palu wiya, ngayuluṉa tjanalakutu nyuntunya iyantja wiyangku wantinyi. Ngayulu nyuntunya iyaṉi nyuntumpa walytja tjuṯangka wangkanytjaku Israelkunu tjuṯangka. 7Palu paluṟu tjana nyuntula kulintja wiyangku wantiku. Panya tjana ngayunya kulintja wiyangku wantipai, palulanguṟuya nyuntunya kuḻu kulintja wiyaṯu. Uwa, Israelkunu tjuṯa apu tjuṯa kurunpa wituwitu alatjiṯu. 8-9Palu kulila! Ngayulu ngapartji nyuntunya kunpuṉi tjanala tungun-tungunpa ngaṟanytjaku, ka palulanguṟu tjana nyuntula tungunpungkunyangka nyuntu tjanampa nguḻuringkunytja wiyangku wantima. Kutjupa-aṟaya nyuntunya rawangku nyakula uṟa-kanyilku pungkunytjikitjangku, palu nyuntu tjanampa nguḻuringkunytja wiyangku wantima. Paluṟu tjana ngayunya tiṯutjarangku tungunpungkupai.” Alatji Mayatja Godalu ngayunya wangkangu.

10Munuṉi piṟuku wangkangu like this, “Tjukurpa nyanga ngayulu kuwari nyuntunya wangkanytja puḻkaṟa kulila kurunpa winkingku. 11Munu ankula Israelkunu tjuṯangka tjakultjura nyuntumpa panya walytja tjuṯangka ngura nyanga Papilanta nyinanyangka. Tjanala wangka alatji, ‘Mayatja Godalu nyuranya wangkanyi.’ Kaya tjinguṟu nyuntunya wangaṉarangku kulilku tjinguṟu wiya, palu nyuntu tjanala ngayuku tjukurpa tjakultjura alatjiṯu.”

12Ka palulanguṟu Godalu ngayunya waḻpa puḻkangka katuṉu munuṉi ngura kutjupakutu katingu. Kaṉa katungku katinyangka ngayula tjanangka kulinu wangka rurku puḻkangku wangkanyangka alatji, “Mayatja Godanya puḻkaṟa mirawaṉima witulya puḻka mulapa palumpa panya ngurangka nyinanyangka.” 13Uwa, rurku panya paluṟu puḻka mulapa, panya kutjupa-aṟa manta unngu puḻkaṟa uri-uripai, rurku palu puṟunypa. Palu rurku paluṟu panya nyaḻpitjara panya puḻka kutjara kutjara, panya paluṟu tjana nyaḻpi uri-uritjingaṟa kaputu-kaputu anangi ka nyaḻpi tjananku pampu-pampuṟa puḻkaṟa rurkuningi. Ka panya wiila kutjara kutjara palula tjanala itingka uriṟa kuḻu puḻkaṟa rurkuningi. 14Ka waḻpa puḻkangku ngayunya ma-katinyangkaṉa puḻkaṟa mirpanaringu, panya Mayatja Godalu ngayunya witiṟa katingi wantinytja wiyangku. 15Uwa, ka waḻpangku panyaṉi ngalya-katira ngalya-walatjunu ngura ini Tilapipala panya Israelkunu tjuṯaku ngurangka, karu ini Kapala itingka. Kaṉa ngura nyara palula puṯu kuli-kuliṟa nyinangi tjiṉṯu tjuṯa nampa nyangatja tjapanpa.

Godalu Ezekielnga ngurkantaṟa tjunkunytja Israelkunu tjuṯa aṯunymankunytjaku

16Palula maḻangka Godalu piṟuku ngayunya wangkangu alatji, 17“Ezekiel! Kuwariṉa nyuntunya tjunanyi Israelkunu tjuṯa ngaṟala aṯunymankunytjaku. Ka ngayulu nyuntunya tjukurpa wangkanyangka nyuntu tjananya nguḻutjuṟa tjakultjunama ngayuku panya tjukurpa.” 18192021222324252627