PITJ

Genesis 11

Waḻi Waṟa Puḻka Palyantja Ngura Ini Papilanta

1Ngaṉmanypaya aṉangu uwankara wangka kutju wangkapai nyinangi. 2Munuya palulanguṟu kakaraṟa para-nyinara para-nyinara ngulalta ngura uṟilpa ukiṟitjarangka wirkaṟa ngura tjunkula nyinangi ngura ini Papilanta. 3-4Munuya paluṟu tjana wangkangu, “Wanyula tawunu puḻka palyala nganaṉa tjungu nyinanytjikitjangku uṯuḻu kutju, aḻa lipikutu wililyarantjaku-tawara. Munula wanyu nguṟurpa palyala waḻi waṟa mulapa ilkaṟikutu. Kaya ngula maḻatja tjuṯangku waḻi nyanganpa nyakula nguwankurira kulilku munulanya mirawaṉiku alatji wangkara, ‘Munta-uwa, Tjamulu tjanaya kunyu nyangatja iriti palyaṉu ninti puḻkangku.’ ” Alatjiya wangkangi waḻi puḻka palyantjikitjangku. Munuya wangkangi, “Wanyula tjuminta tjuṯa tjuḻpirnguṟu palyala munula waṟungka tjunkula wanti ka kampara wituwituringkuku, kala palulanguṟu wituwituringkunyangka mantjiṟa waḻi puḻkalta palyala.” Munuya mulapaṯu palyaṉu tjuminta tjuṯa tjuḻpirnguṟu, munuya kutjupa kutjupa kiṯi puṟunypa uraṉu tjuminta tjuṯa katulkira-katulkira tjakatjunkunytjikitjangku. Munuya palulanguṟu waḻi tjuṯa tjumintanguṟu palyaningi apunguṟu wiya.

5Ka Mayatja Godanya ilkaṟinguṟu ukalingu tawunu puḻka palyannyangka nyakunytjikitja, waḻi panya waṟa mulapa palyannyangka kuḻu nyakunytjikitja. 6Munu paluṟu nyakula wangkangu, “Nyanga tjana panya walytjapiti kutjuṯu nyinanyi wangka kutjutjara. Pala palulanguṟuya tawunu puḻka palyaṉi waḻi waṟa kuḻu tjaṯu waṟkarira. Palu tjinguṟu puḻka nyanga palunya palyantjatjanungku tjana kuliṟa kaṉany-kaṉanyarira piṟuku kutjupa puḻka mulapalta palyalku. Munuya palulanguṟu tjanampa kutjupa kutjupa uwankara palyantjaku ngaṟaku tjana mukuringkula.

7Wanyula ukalingkula tjananya tjaraṟa tjanampa wangka kutjupa kutjupara, kayanku wangka kutjuparinytjatjanungku wangkara puṯu kulilku.” 8Munu tjananya Godalu tjaraṟa wangka tjanampa kutjupa kutjupanu, kaya waḻi puḻka panya wantikatingu piṟuku palyantja wiyangku munuya wililyaraṟa tjara-tjara anu ngura kutjupa kutjupa tjuṯakutu walytjaṟara walytjaṟara manta winkingka tiṯitiṯu nyinanytjikitja. 9Ka tawunu nyara paluṟu panya ini Papilannga, waḻi panya waṟatjara. Panya ngura nyara palula Godalu aṉangu uwankara tjaraṟa tjananya wangka kutjupa kutjupanu, tjananku ngapartji-ngapartjingku wangkara puṯu kulintjaku. Palulanguṟuya uwankara wililyaraṟa tjara-tjara ankula ngura tjuṯangka lipiringu, munuya manta winkingka nyinangi wangka kutjupa kutjupa.

Wati Tjimalanguṟu Aṉangu Ma-tjuṯaringkunytja

10Ka nyangatja Noah-ku walytjapiti maḻatja maḻatja ma-tjuṯaringkunytja palumpa katja Tjimalanguṟu. Panya uṟu puḻkangka maḻangka yiya kutjara ngaṟala wiyaringkunyangka Tjimalu katja ini Apakatanya utinu yiya nampa 100 nyinanytjatjanungku. 11Munu palula maḻangka paluṟu piṟuku yiya tjuṯa mulapa nyinangi 500, munu tjitji kutjupa tjuṯatjararingangi. Munu palulanguṟulta ilungu rawa mulapa nyinanytjatjanu.

12-13Ka Apakatalu yiya nampa 35 nyinanytjatjanungku katja utinu ini Tjilanya. Munu palulanguṟu paluṟu piṟuku yiya tjuṯa mulapa nyinangi nampa 403, munu tjitji kutjupa tjuṯatjararingangi munu palulanguṟulta ilungu.

14-15Ka wati panya Tjilalu yiya nampa 30 nyinanytjatjanungku katja utinu ini Iipanya. Munu palula maḻangka paluṟu piṟuku yiya tjuṯa mulapa nyinangi nampa 403, munu tjitji kutjupa tjuṯatjararingangi munu palulanguṟulta ilungu.

16-17Ka Iipalu yiya nampa 34 nyinanytjatjanungku katja utinu ini Pilikinya. Munu palulanguṟu paluṟu piṟuku yiya tjuṯa mulapa nyinangi nampa 430, munu tjitji kutjupa tjuṯatjararingangi munu palulanguṟulta ilungu.

18-19Ka Pilikilu yiya nampa 30 nyinanytjatjanungku katja utinu ini Ruunya. Munu palulanguṟu paluṟu piṟuku yiya tjuṯa mulapa nyinangi nampa 209, munu tjitji kutjupa tjuṯatjararingangi munu palulanguṟulta ilungu.

20-21Ka Ruulu yiya nampa 32 nyinanytjatjanungku katja utinu ini Tjirukanya. Munu palulanguṟu paluṟu piṟuku yiya tjuṯa mulapa nyinangi nampa 207, munu tjitji kutjupa tjuṯatjararingangi munu palulanguṟulta ilungu.

22-23Ka Tjirukalu yiya nampa 30 nyinanytjatjanungku katja utinu ini Nayunya. Munu palulanguṟu paluṟu piṟuku yiya tjuṯa mulapa nyinangi nampa 200, munu tjitji kutjupa tjuṯatjararingangi munu palulanguṟulta ilungu.

24-25Ka Nayulu yiya nampa 29 nyinanytjatjanungku katja utinu ini Taiṟanya. Munu palulanguṟu paluṟu piṟuku yiya tjuṯa nyinangi nampa 119, munu tjitji kutjupa tjuṯatjararingangi munu palulanguṟulta ilungu.

26Munu palulanguṟu Taiṟalu yiya nampa 70 nyinanytjatjanungku utinu katja ini Aipamanya. Munu palulanguṟu katja kutjupa utinu ini Nayunya, munu palula maḻangka utinu katja maḻatja ini Aṟannga.

Wati Taiṟakunu Tjuṯa

27-28Ka nyangatja tjukurpa wati Taiṟanya tjananyatjara, panya Taiṟanya Aipamaku, Nayuku, Aṟanku mama. Ka Aṟantu katja ini Lotanya utinu, munu palulanguṟu wiyaringu mamangka miṟangka ngura tawunu ini Aaṟala manta panya Papilaniyala, panya nyara palula paluṟu iṯi ngaringu, Aṟannga panya. 29-30Ka Aipamalu kungkawaṟa ini Tjiiṟainya aḻṯingu, palu Tjiiṟainya puṯu tjitjitjararingangi. Ka Aipamaku maḻanytju Nayulu kungkawaṟa ini Milkanya aḻṯingu palumpa panya maḻanyku uṉṯalpa Aṟanku. Ka Nayuku maḻanytju Aṟantu katja kutjupa utinu ini Itjakanya, Lotaku maḻanypa.

31Ka palulanguṟu tjiḻpi Taiṟalu kulinu ngura ini Kainanku ankunytjikitjangku nyara palula ngura tjunkula nyinanytjikitjangku. Munu paluṟu walytja tjuṯa aḻṯingu palula tjungu ankunytjaku. Ka Aipamanya pula kuriṟara Tjiiṟainya palula tjunguringu munu palumpa pakaḻi Lotanya kuḻu Aṟanku panya katja. Munuya paluṟu tjana uwankara ngura panya Aaṟalanguṟu ma-pakaṉu munuya ankula ankula nguṟurpa wirkanu ngura ini Aaṟanta munuya nyara palulalta ngura tjunkula nyinangi ngura panya Kainannga wantira. 32Ka ngura nyara palulalta Taiṟanya yiya nampa 205 nyinanytjatjanu ilungu.