PITJ

Iipuṟuku 10

1Tjukurpa panya Godalu Mosenya tjananya ungkunytja, nyara paluṟu ngaṯalpa ngaṟanyi ruwa nguwanpa. Panya tjukurpa paluṟu kuranyukutungku nintiningi aṟa kutjupa wiṟu mulapa Godalu kalkuntjitja. Palulanguṟu, ngaṯalpa ngaṟanyangka, Moseku tjukurtu aṉangu tjuṯa puṯu tjukaṟurulpai tjana Godala miṟangka palya ngaṟanytjaku. Panya tjukurpa paluṟu wangkapai Godanya ilaringkula waḻkuntjikitjangku kuka katira pungkula ungkunytjaku palunya. Palu nyanga alatjiya rawangku kuḻi kutjupa kuḻi kutjupa ungkula ungkula puṯu tjukaṟururingangi munuya kura winkiṯu ngaṟangi Godala miṟangka.

2Tjinguṟuya kuka ungkula tjukaṟururingkulampa Godala miṟangka palya ngaṟama kuṉṯaringkuwiya munuya palulanguṟu tjinguṟu kuka piṟuku katinytja wiya ngaṟama palyaringkunytjatjanungku. Palu tjana ungkula palyaringkunytja wiya munuya rawaṯu kuranguṟu kuṉṯaringangi Godala miṟangka, 3munuya kuḻi kutjupa kuḻi kutjupa ungkula rawangku kuliningi panya tjana kura palyantjatjanungku. 4Panya nanikutaku pulukaku milkaḻingku Godanya puṯu kalypalpai paluṟu nganaṉanya kura palyantjitjanguṟu pungkuwiyangku wantinytjaku.

5-6Ka palulanguṟu Christalu mantakutu pitjanytjikitjangku wangkangu alatji Godala,

“Nyuntu mukuringkunytja wiya aṉangu tjuṯangku nyuntunya rawangku kuka katira ungkunytjaku.

Panya tjana kuka pitjilpangka tjunkula katu kurkaltjuṟa wantipai kampara mulururinytjaku nyuntu tjanampa kalyparingkunytjaku.

Palu nyanga kuka pungkunytjitjanguṟu nyuntu pukuḻaripai wiya.

Panya nyuntuṉin wituṉu aṉangurira ilunytjaku.

7“Kaṉa palulanguṟu nyuntula wangkangu, ‘Uwa, nyangatjaṉa ngaṟanyi ngayulu nyuntu witunnyangka wangaṉarangku kuliṟa palyantjikitja nyuntu mukuringkunytja uwankara.

Panya alatjiya iriti walkatjunu nyiringka, ngayulu nyanga alatjirinytjaku.’ ”

Nyanga palunya Christalu wangkangu Godala.

8Palu aṟa Godalu Mosenya ungkunytjitjangku wangkangu alatji kuka mai katira palunya ungkunytjaku, kaya wangaṉarangku kuliṟa palyaningi. Ka panya Christalu wangkangu, “Nyanga palumpa Godanya pukuḻarinytja wiya, munu paluṟu kuka katira palunya ungkunytjaku mukuringkunytja wiyaṯu.” 9Munu palulanguṟu wangkangu Godala, “Uwa, nyangatjaṉa ngaṟanyi ngayulu nyuntula wangaṉarangku kuliṟa palyantjikitja nyuntu wangkanyangka.” Alatji Christalu Godala wangkangu. Ka nyura kulini nyanga palunya? Panya Godalu aṟa irititja wiyaṉu munu kutjupalta tjunu kuwaritja palumpa katjawanungku.

10Panya Jesulu wangaṉarangku kuliṟa palyaṉu Godalu wangkanyangka, ka nyara palulanguṟu Godalu nganaṉanya kura palyantjitjanguṟu kalypangku wantingu pungkunytja wiyangku. Panya palumpa katja walytja alatjiṯu intjanuringu munu nganampa ngalkilpa kutju-aṟa ilungu. Ka nyara palulanguṟu nganaṉa Godala miṟangka kuṉṯa wiya kalyparingkula nyinanytjaku ngaṟanyi.

11Panya wati tjukurtjara tjuṯangkuya rawangkuṯu tjiṉṯu kutjupa tjiṉṯu kutjupa kuka pungkula Godanya ungkupai aṉangu tjuṯangku kura palyantjitjanguṟu. Palu aṉangu tjuṯaya rawaṯu kuṉṯa ngaṟapai Godalu tjananya kura palyantjitjanguṟu pungkunytjaku paṯaṟa. Panya tjukurtjara tjuṯangku kuka pungkula Godanya ungkula palunya puṯu kalypalpai paluṟu aṉangu tjuṯa pungkuwiyangku wantinytjaku. 12Palu Jesunya walytja intjanuringu kutju-aṟa alatjiṯu ilura, munu palula maḻangka paluṟu wankaringkula anu munu nyinakatingu Godala itingka mayatja puḻka mulapa. Panya paluṟu kutju-aṟa ilunytjatjanungku Godanya kalypaṉu, 13munu paluṟu kuwari paṯaṟa nyinanyi Godalu palumpa mirpaṉtju tjuṯa tjaṟuntjaku tjanala waintarira mayatja puḻka mulapa nyinanytjikitjangku.

14Uwa, paluṟu kutju-aṟa ilura aṉangu uwankara kutju-kutju palulakutu pitjanyangka kuranguṟu piṟanmanu palula tjunguringkula tiṯutjara kalypa nyinanytjaku. Panya palunya tjananya Godalu ngurkantanu palumpa walytjaringkunytjaku. 15Ka Kurunpa Miḻmiḻṯu tjukurpa nyanga palunyaṯu nganaṉala tjakultjunanyi, panya paluṟu alatji wangkangu,

16“Nyangatja aṟa kuwaritja ngayulu ngula nintilku.

Panya ngayulu ngayuku tjukurpa tjanala unngu nintilku tjana aṟa nyanga palunya pina aḻaringkula tjukaṟurungku kulintjaku.”

17Ka piṟuku Godalu nyangatja wangkangu,

“Ngayulu tjana kura palyantjitjaku watarkuriku alatjiṯu piṟuku kulintja wiya.”

18Uwa, paluṟu aṉangu tjuṯaku kalyparingu munu tjananya kura palyantjitjanguṟu kalypangku wantipai. Kala wanyu Godanya kuka rawangku katira ungama nganampa kalyparingkunytjaku? Wiya, aṟa panya ngaṉmanyitja wiyaringu panya paluṟu alatjiṯu nganampa kalyparingu.

Utila Raparingkula Godala Tiṯutjara Tjungu Nyinama

19Uwa, walytja wiṟu tjuṯa! Nyanga palulanguṟula uti raparingkula Godala tjunguringama, panya Christalunku milkaḻi palumpa tjutiṟa aḻaṉu nganaṉa Godaku ngura miḻmiḻpa mulata rapa tjarpanytjaku. 20Panya Jesunya ilunyangka kutju mantara panya timpulangka waṟaly-waṟalyngaṟanytjanya tjilpiraraṉu munu aḻaringu ngura panya miḻmiḻpa mulata nganaṉa waintaṟa tjarpanytjaku. Nyangatja paluṟu ilura iwara kuwaritja palyaṉu wankakutu Mamala tjunguringkula wankaṟu nyinanytjaku. 21-22Kala uti raparingkula Godala ilaringama, panya Jesulu tjukurtjara puḻkangku Godaku ngura miḻmiḻpa kanyini. Munu panya paluṟu nganaṉanya kurunpa paltjiṉu Jesulu palumpa milkaḻingka nganaṉa kuṉṯa wiya nyinanytjaku, munulanya piṟanmanu kapi kaḻṯaṟa wiṟungka palumpa walytja mulapa nyinanytjaku. Kala uti alatjinkunyangka kurunpa winki pukuḻarira Godala ilaringama palumpa puḻkaṟa mulamularingkula kutju. 23Munula uti mulamularingkula Godaku aḻa-aḻangku paṯanma panya paluṟu nganaṉanya kalkuṉu wiṟuṟa kanyintjikitjangku munu palumpa ngurakutu katinytjikitjangku. Kala uti tungun-tunguntu kulinma watarkurinytja wiyangku tiṯutjarangku, panya Godalu ngunti kalkulpai wiya tjukaṟurungku kutju wangkapai.

24Wanyula kulinma wiṟuṟa nyinanytjikitjangku, munulanku wituwitunma aṉangu uwankaraku puḻkaṟa mukuringkunytjikitjangku, munulanku ngaḻṯunytjungku alpamilantjikitjangku kulinma. 25Munula uti Godanya waḻkuntjikitja rawa tjunguringama, panya kuwari nyura kutjupa tjara ngurangka nyinapai tjunguringkunytja wiya. Palu wanyuya Tjiṉṯu Maḻatja kulinma panya waṯalpi ilaringanyi Jesunya maḻaku pitjanytjaku, kalanku uti uwankara rawaṯu tjunguringama munulanku kuṉpunma Christanya tiṯutjarangku waṉantjikitjangku.

26-27Ka nganaṉa panya ninti Christaku munu palumpa tjukurku kuḻu. Palu tjinguṟula nyanganpa kuliṟa wantira kura tiṯutjarangku palyannyangkampa Godanya yaaltjingaṟa nganampa piṟuku kalyparingkuku? Wiya, panya Christanya ngaṉmanypa ilungu, ka kutjupa muṉkara palu puṟunypa ngaṟanytja wiya nganampa kuranguṟu piṟuku ilunytjaku. Kala yaaltjiriku palunya wantirampa? Wiya kutju nganampa ngaṟanyi panya nganaṉa nguḻu-nguḻu paṯaṟa nyinanytjaku Godalu nganaṉanya ngula ngurkantaṟa tjarantjaku Tjiṉṯu Maḻatjangka. Panya Godanya puḻkaṟa mirpaṉariku palula tungunpungkupai tjuṯaku munu paluṟu tjananya wiyalku, panya waṟu puḻkangku kampara nyaṟulpai, palu puṟunytju uwankara wiyalku.

28-29Panya aṉangu kutjupangku Moseku tjukurta tungunpungkunyangka palunya pungkula iluntankunytjaku ngaṟapai. Panya aṉangu kutjarangku, tjinguṟu maṉkurtu, aṉangu palunya tungunpungkunyangka nyakula wati mayatjangka tjakultjunkupai, ka palunya iluntankunytjaku wangkapai ngaḻṯuringkunytja wiyangku. Palu aṉangu kutjupangku tjinguṟu Godaku katja anannyangkampa Godalu palunya tjituṟu-tjituṟu puḻka mulapa palyalku. Munu tjinguṟu paluṟu Jesunya milkaḻi tjutinytja nguntinmankunyangka Godalu palunya mapalku alatjiṯu pungkuku. Munta tjinguṟu paluṟu Godaku Kurunpa ngaḻṯunytjunya analku, ka Godalu palu puṟunypaṯu palunya pungkuku. Panya aṉangu nyara palumpa alatjiṯu Jesunya ilura tjutingu milkaḻi, ka nyara palulanguṟu Godanya palumpa kalyparingu aṟa nyanga kuwaritjangka. Ka paluṟu aṟa nyanga palunya tungunpungkula wantinyangkampa Godalu wantinytja wiyangku palunya pungkuku.

30Panya nganaṉa ninti Godalu alatji wangkangu, “Ngayuku aṟa ngaṟanyi, panya aṉangungku ngayula tungunpungkunyangka ngayulu palunya pikantankunytjaku ngaṟanyi.” Munu piṟuku paluṟu wangkangu, “Ngayuluṉa tjukaṟurungku ngurkantaṟa tjaralku ngayuku walytja tjuṯa.” 31Kaya wanyu kulinma! Godanya wanka alatjiṯu nyinanyi witulya puḻkanya munulanya paluṟu kuwari nyanganyi. Kala wanyu nguḻu-nguḻu nyinama anannyangka pitjala nganaṉanya pungkunytjaku-tawara.

32Kulilaya panyatja, panya nyura ngaṉmanypa Jesuku walytjaringkunytja Godalu nintinnyangka. Nyara palula aṟangka panya kutjupa tjuṯangku nyuranya puḻkaṟa kuraṟa pungangi, ka nyurampa aṟa wituwitu mulapa ngaṟangi. Palu aṟa nyara palulawanungku nyura tungun-tunguntu Jesunya waṉaningi wantinytja wiyangku. 33Panya kutjupa-aṟa tjana aṉangu tjuṯangka miṟangka nyuranya anaṟa kuraṟa pungkupai. Munu tjana Jesuku walytja kutjupa tjuṯa kuḻu palu puṟunymankupai. Palu nyura panya palunya tjananya nyakula nguḻuringkula paṯuringkunytja wiyangku wantira palula tjanala tjunguringangi. 34Munuya Jesuku walytja kutjupa tjuṯa tjailangka tjunkunyangka nyura panya ngaḻṯuringkula tjananya wiṟuṟa kanyiningi. Munu panya kutjupa tjuṯangku nyurampa ulytja uwankara tjulyaṟa katinyangka nyura pukuḻpa nyinangi tjanampa mirpaṉarinytja wiya, panya nyura nintingku kuliningi, “Ngayuku pukuḻpa kutjupa ngaṟanyi mantanguṟutja wiya palu Godalanguṟu, paluṟu kalkuntjitja. Ka pukuḻpa nyara paluṟu wiyaringkupai wiya tiṯutjara ngaṟapai.”

35-36Uwa, nyura panya Christanya rawangku rapangku waṉaningi, palu pakuringkunytja wiyangkuya wantima. Panya Godalu nyuranya kalkuṉu wiṟu ungkunytjikitjangku nyura rawangku rapangku waṉannyangka. Kaya tungun-tunguntu waṉanma, munuya palulanguṟu Godala wangaṉarangku kuliṟampa nyura Godalu kalkuntjitja mantjilku alatjiṯu.

37-38Panya nyiringka iriti walkatjunkunytja alatji ngaṟanyi,

“Paluṟu kalkuntjatjanu mulapa pitjaku alatjiṯu kuwari nguwanpa, rawa ma-nyinanytja wiya.

Kaya ngayuku walytja tjuṯa mulamularingkula tiṯutjara nyinaku,

palu tjinguṟuya ngayulanguṟu paṯuringkunyangka ngayulu tjanampa pukuḻarinytja wiya.”

Nyanga palunya Godalu wangkangu.

39Ka nganaṉa Godanya waṉaṟampa paṯuringkunytja wiya panya aṉangu kutjupa tjuṯa puṟunypa wiya, panya tjana Godanya wantira ma-paṯuringkula kawankatipai mirikutu alatjiṯu. Palu nganaṉa rawa mulamularingama Godaku, kalanya wankaṟu kanyilku.