Jesunya Tjukurtjara Puḻka Aṟa Kuwaritjaku
1-2Palu tjukurpa nyangatjaṉa nyurala nyaaku wangkanyi? Wiya panya nyura kuliṟa tjukurpa puḻka kulintjaku nyangatja Jesunya panya nganampa tjukurtjara puḻka nyinanyi Mayatja Godala tjungu ngura ilkaṟitjangka. Munu paluṟu waṟkarinyi ngura miḻmiḻpa mulata panya Godalu palyantjitjangka ngura panya ilkaṟitjangka. Paluṟu tiinta miḻmiḻpa panya Moselu tjana ngaṉmanytju palyantjitjangka waṟkarinytja wiyaṯu. 3Panya nyura ninti Godalu tjunu wati tjukurtjara tjuṯa aṉangu tjuṯanguṟu mai kuka kuḻu mantjiṟa palunya ma-ungkunytjaku. Ka uti nganampa tjukurtjarangku Jesulu kuḻu palu puṟunytjuṯu Godanya ungama panya paluṟu nganampa tjukurtjara puḻka nyinanyi ilkaṟingka. 4Palu tjinguṟu Jesunya mantangka rawaṯu nyinarampa tjukurtjara wiyaṯu nyinama, panya tjukurtjara tjuṯaya ngaṉmanypa nyinangi wati Levilanguṟu munu panya paluṟu tjana Moseku tjukurwanu nyinara Godaku waṟkaringi tiinta panya miḻmiḻṯa.
5Palu tiinta nyara palunyaya unytjungku mantangka kanyiningi. Panya tiinta nyara paluṟu nganaṉanya nintini ngura kutjupa ilkaṟingka ngaṟanytja miḻmiḻpa mulapa. Panya iriti Mosenya tiinta panya palunya palyantjikitja palyany-palyanyarinyangka Godalu palula wangkangu alatji, “Ngayulu panyaṉanta apu katu wangkara nintinu tiinta miḻmiḻpa palyantjaku. Ka panya palu puṟunypa alatjiṯu palyala tjukaṟurungku.” Ka panya Moselu tjana palyaṉu tiinta mantangka, ka tiinta nyanga mantatjangku ngura ilkaṟingka ngaṟanytja nintini.
6Palu Godalu Jesunya waṟka wiṟu mulapa ungu, ka paluṟu aṟa kuwaritja pakaltjingaṉu palya mulapa, panya wati tjukurtjara kutjupa tjuṯangku palyantja puṟunypa wiya. Panya paluṟunku walytjangku ungkunytja puḻka mulapa tjukurtjara kutjupa tjuṯangku kuka ungkunytja puṟunypa wiya. Panya Godalu Jesulawanungku kalkuntja puḻka mulapa ngaṟanyi, Moselawanungku kalkuntja puṟunypa wiya. Ka nyara palulanguṟu Jesunya tjukurtjara puḻka mulapa nyinanyi tjukurtjara kutjupa tjuṯangka waintarira. 7Panya aṉangu tjuṯangku aṟa irititja waṉaṟa puṯu wankaringangi. Ka nyara palulanguṟu Godalu aṟa kutjupa kuwaritjalta pakaltjingaṉu.
8Palu Godalu nyangu palumpa aṉangu tjuṯa kuraringkunyangka, panya aṉangu nyara paluṟu tjanaya palumpa aṟa Mosenya panya ungkunytjitja waṉalwiyangku wantinyangka. Munu paluṟu tjanala wangkangu nyanga alatji,
“Kulilaya Jew tjuṯangku ngura Israelta munu Judah-la nyinanytja tjuṯangku!
Ngayulu ngula palyalku nyurampa aṟa kutjupa kuwaritja.
9-10Palu aṟa kuwaritja panya ngaṉmanyitja puṟunypa wiya.
Panya iriti ngayulu aṟa ngaṉmanyitja wangkangu Mosela tjanala ngura panya Itjipitalanguṟu katinytjatjanungku.
Ka panya paluṟu tjana kuliṟa wantira tungunpungu, kaṉa palulanguṟu tjananya wantingu.
Palu nyangatja panya aṟa kuwaritja ngayulu kalkuṉi Israelkunu tjuṯa tjana tiṯutjarangku kulilkatinytjaku.
Ngayulu ngayuku tjukurpa tjanala unngu nintilku tjana aṟa nyanga palunya pina aḻaringkula tjukaṟurungku kulintjaku.
Kaṉiya ngayunya kutju mulamulangku waḻkulku munuya ngayuku walytjapiti mulapa nyinaku.
11Palu uwankarangkuṉiya ngayunya tjukaṟurungku ngurkantankuku,
ka kutjupangku aṉangu kutjupa arkaṟa wituwituntja wiya Mayatjaku nintiringkunytjaku.
Panya uwankarangkuṉiya alatjiṯu ngurkantankuku, aṉangu kuranyitja tjuṯangku munu aṉangu maḻatja tjuṯangku kuḻukuḻu.
12Kaṉa ngayulu ngaḻṯunytjungku tjana kura palyantjitjanguṟu tjananya kalypangku wantiku,
munuṉa tjana kura palyantjitjaku watarkuriku alatjiṯu piṟuku kulintja wiya.”
Alatji Godalu iriti wangkangu aṉangu tjuṯangka aṟa kuwaritja palyantjikitjangku.
13Ka nyura kulini? Panya aṟa nyanga kuwaritja wangkara utiṟa Godalu aṟa ngaṉmanyitja wiyaringkunytjaku wangkangu, ka panya kuwari nguwanpalta wiyaringanyi.