PITJ

Genesis 46

Jacobanya Tjana Itjipitalakutu Ankunytja

1-7Munu palulanguṟu paluṟu pirtji-pirtjingulta ankunytjikitja palumpa katja tjuṯa kuḻu. Munuya ulytja uwankara uṯuḻuṟa utitjunu tangkiyingka wakinangka panya Itjipitaku mayatjangku tjanampa iyantjitjangka. Munuya kuka tjuṯa kuḻukuḻu uṯuḻunu katinytjikitjangku puluka, tjiipi, nanikuta. Palulanguṟuya katja tjuṯangku mama panya tatitjunu munu tjanampa kuri tjuṯa, tjitji kuḻunypa tjuṯa kuḻukuḻu wakina tjuṯangka. Munuya ma-pakaṉulta Itjipitalakutu uwankara katja uṉṯalpiti, mingkayi tjuṯa, pakaḻi puḻiripiti kuḻukuḻu.

Munuya ankula nguṟurpa ngaṟatjunu ngura Piitjiipala. Ka Jacobanya ukalingu ngura pala palula, munu pitjilta katu kuka pungkula tiliwakaṟa Godanya ungu paluṟu pukuḻarinytjaku. Panya palumpa mamangku Isaacalu palu puṟunypaṯu ungkula waḻkulpai God panya palunyaṯu. Palulanguṟu mungangka tjukurmankunyangka Godalu Jacobala wangkangu mirara, “Jacob! Kuliniṉin?”

Ka Jacobalu wangkangu, “Uwa kuliniṉanta.”

Ka Godalu palula wangkangu, “Ngayuluṉa Godanya nyuntula wangkanyi, panya nyuntumpa mamangku ngayunya waḻkulpai. Ka nyuntu palya Itjipitala ankula nyinama nguḻuringkunytja wiya panya ngayuluṉa nyurala tjungu nyinaku. Munuṉa nyuranya nyara palula nyinanyangka palyalku nyurampa walytjapiti ma-tjuṯaringkunytjaku maḻatja maḻatja. Panya nyuntumpa pakaḻi puḻiripitingku tjitji tjuṯa mulapa kanyilku, nyuntumpa kulypalpitingku ngunytjupitingku kuḻukuḻu. Alatjingaṟa nyuntulanguṟu walytja tjuṯa mularariku maḻatja maḻatja. Ka ngula mulapa nyuntumpa walytjapiti maḻatja tjuṯa mulararinyangka ngayulu piṟuku tjananya ngalya-katiku maḻakungku ngura nyanga Kainantakutu. Mulapaṉa nyanga alatjingalku. Ka nyuntu ngula katja Josephala miṟangka ilunyi.” Alatji Godalu wangkangu Jacobala paluṟu pukuḻarinytjaku katjangka miṟangka ilunytjaku. Munuya Piitjiipala ngarira tjiṉṯuringkula ma-pakaṉu Itjipitalakutu.

8-25Tjana panya tjuṯa mulapa anu Itjipitalakutu Jacobaku walytjapiti. Panya Jacobaku kuri ngaṉmanyitjangku Liyalu kanyinu katja maṉkur-maṉkurpa munu uṉṯalpa kutju ini Tiinanya. Paluṟu panya Rupinnga-waraṟa kanyinu, ka paluṟu pininu Tjimiyannga, ka paluṟu pininu Levinya, ka paluṟu pininu Judah-nya, ka paluṟu pininu Itjakanya, ka paluṟu pininu Tjipulunnga, ka Tjipuluntu pininu kungka Tiinanya.

Ka katja nyanga tjana katja tjuṯa ngapartji utinu Jacobaku pakaḻipiti. Rupintu katja kutjara kutjara utinu ini nyanganpa – Anakanya, Palunya, Itjuṟannga, Kaaminya tjananya. Ka Tjimiyantu katja maṉkur-maṉkurpa utinu ini nyanganpa – Tjimuwilnga, Tjaminnga, Awutanya, Tjakinnga, Tjuuwanya, Tjuulanya tjananya. Ka Levilu utinu katja maṉkurpa ini nyanganpa – Kiitjannga, Kawatjanya, Miṟaṟainya tjananya. Ka Judah-lu utinu katja maṉkur-kutjara ini nyanganpa – Tjilanya, Piṟitjinya, Tjiṟanya tjananya. (Palu palumpa katja kutjara ngaṉmanypa wiyaringu ngura panya Kainanta ini nyanganpa – Uurnga pula Anannga.) Ka Itjakalu katja kutjara kutjara utinu ini nyanganpa – Tulanya, Puwanya, Tjatjupanya, Tjimuṟannga tjananya. Ka Tjipuluntu katja maṉkurpa utinu ini nyanganpa – Tjiṟitanya, Iilannga, Tjaalilnga tjananya. Aṉangu nyanga paluṟu tjana uwankara Liyalanguṟu utiringu Tiinanya kuḻu aṉangu 33.

Ka palulanguṟu Jacobaku kuri maḻatjangku Raitjiltu tjitji wiya nyinara kungkawaṟa panya palumpa waṟkaripai Jacobanya ungangi ini panya Pilanya palula tjunguringkunyangka tjitji utintjaku. Ka Jacobalu Pilala katja kutjara utinu Dannga pulanya Napatalinya. Ka nyanga paluṟu pula ngapartji utinu katja tjuṯa, Danku kutju ini Uutjimanya, Napataliku kutjara kutjara ini nyanganpa – Tjatjiilanya, Kuninya, Tjitjanya, Tjilimanya tjananya. Nyanga paluṟu tjana panya Raitjilku ngaṉatinguṟu Pilalanguṟu utiringu aṉangu 7.

Ka palulanguṟu Liyalu kungkawaṟa panya palumpa waṟkaripai Jacobanya ungangi ini panya Tjilpanya palula tjunguringkunyangka tjitji utintjaku. Ka paluṟu kanyinu katja kutjara Kaatanya munu Atjanya. Ka Kaatalu utinu katja maṉkur-kutjara kutjara ini nyanganpa – Tjipannga, Aakinya, Tjuninya, Itjipannga, Iṟinya, Aṟatanya, Aṟilinya tjananya. Ka Atjalu utinu katja kutjara kutjara ini nyanganpa – Iminanya, Itjipanya, Itjipinya, Piṟiyanya tjananya munu uṉṯalpa kutju ini Tjiṟanya. Ka Atjaku katja kutjungku Piṟiyalu katja kutjara ngapartji utinu Atjaku pakaḻi kutjara ini nyanganpa – Iipanya pulanya Malkiyilnga. Nyanga paluṟu tjana panya Liyaku ngaṉatinguṟu Tjilpalanguṟu utiringu aṉangu 16.

Ka palulanguṟu Jacobalu katja kutjara utinu Raitjilta panya Josephanya pulanya Pintjimannga. Ka Josephalu ngura panya Itjipitala katja kutjara utinu palumpa kuringka ini Atjinatjala. Katja paluṟu pula panya ini nyanganpa – Manatjanya munu Ipuṟaimanya. Ka Pintjimantu utinu katja tjuṯa mulapa 10-pa ngura nyara Kainanta nyinaralpi ini nyanganpa – Pilanya, Pikanya, Atjapilanya, Kiranya, Naimannga, Iiyinya, Ratjunya, Mupiminya, Uupiminya, Aatanya tjananya. Nyanga paluṟu tjana Raitjiltanguṟu utiringu aṉangu 14.

26-27Ka Jacobaku katja uṉṯalpa tjuṯa, pakaḻi puḻiripiti, kulypalpiti paluṟu tjana tjunguringkula 66 anangi ngura panya Itjipitalakutu. Ka Jacobanya tjana Itjipitala wirkaṟa Josephala palumpa katja kutjarangka tjunguringkula aṉangu 70-ringulta. Kaya Jacobaku mingkayi tjuṯa kuḻukuḻu anu.

Jacobanya Tjana Itjipitala Wirkankunytja

28Ka Jacobanya tjana panya ankula ankula manta panya Itjipitala tjarpangu. Ka mamangku wangkangu katja kutjungka Judah-la alatji, “Nyuntu wanyu ma-kuranyurira wangka Josephala ngalya-ngaparikatinytjaku ngura pala Katjintakutu.” Ka paluṟu mulapaṯu wangkanyangka kuranyurira Josephala wangkangu.

29Ka tjana Katjinta wirkankunyangka Josephanya palumpa tjinkangka tatiṟa ngaparikatingu palumpa mama nyakunytjikitja. Munu palula wirkaṟa nyangu palumpa mama munu pulanku puḻkaṟa ampuṟa ulangi pukuḻarira, rawa nyakuwiya nyinanytjatjanungku. 30Ka Jacobalu wangkangu katjangka, “Kuwariṉa kurunpa pukuḻpa mulararingu, munuṉa palyalta ilunyi nyuntunya nyakunytjatjanu.”

31Palulanguṟu Josephalu wangkangu tjanala, “Wanyu kaṉa ankula wangka Itjipitaku mayatjangka Piiṟala nyura panya pitjanytja nyara Kainantanguṟu. 32Ngayulu wangkaku palula panya nyura puluka, tjiipi, nanikuta tjuṯa Kainanta kanyintjatjanungku uwankara ngalya-katingu nyurampa ulytja tjuṯa kuḻukuḻu kutjupa kutjupa uwankara. 33Ka mayatja Piiṟalu nyuranya aḻṯira tjapilku alatji, ‘Waṟka nyaangka waṟkaripai nyura?’ 34Ka alatji tjapinnyangka nyura palula wangka, ‘Nganaṉala puluka, tjiipi, nanikuta tjuṯa kanyilpai nganampa mamangka tjamungka aṟangka.’ Ka nyura alatji wangkanyangka paluṟu wangkaku nyura nyinanytjaku ngura nyanga Katjinta. Panya Itjipitanya nguraṟa tjuṯangkuya aṉangu kuka kanyilpai tjuṯa wantipai tjungu nyinawiyangku. Pala palulanguṟu Piiṟalu nyurala wangkaku mauṉṯalpa nyinanytjaku ngura nyanga Katjinta.” Alatji Josephalu wangkangu palumpa walytja tjuṯangka.