PITJ

Itjikilku 34

Godalu Wati Aṯunymankupai Tjuṯa Puntuṟa Wangkanytja

1-2Ka Mayatja Godalu ngayula wangkangu Israelkunu tjuṯaku mayatja tjuṯa wangkara paintjaku munu palumpa wangka tjanala tjakultjunkunytjaku nyanga alatji, “Ngayuluṉa Mayatja Godanya nyurampa puḻkaṟa mirpaṉarinyi. Panya aṉangu nyanga Israelkunu tjuṯa tjiipi munu nanikuta tjuṯa puṟunypa nyinanyi, ka nyura mayatja tjuṯangku tjananya tjapata puṟunytju aṯunymaṟa kanyintjaku ngaṟanyi. Palu nyura panya tjananya mulapa wiṟuṟa palyanyku kanyintja wiyaṯu, munu panya nyuranku kutju walytjangku alatjiṯu pukuḻmankupai. 3Uti nyura tjapata mulatumpa tjiipi munu nanikuta nyanga tjuṯa aṯunymanama. Palu nyura kurangku nanikutanguṟu ipi tjikilpai munu nyura tjiipi inyunguṟu mantara walytja kutju palyaṟa tjarpapai, munu nyura kuka tjiipi wiṟu mulapa ngurkantaṟa pungkula ngalkupai. Palu nyura tjananya paḻtjantja wiyangku wantipai, munu nyura kutju walytja paḻtjaringkupai nyura kutju pukuḻpa nyinanytjikitja. 4Munu nyura kutjupa tjuṯa uparingkunyangka nyakula palunya tjananya kuṉpuṟa kanyilpai wiya, munu kutjupa tjuṯa pikatjararingkunyangka nyakula nyura palyanyku kanyilpai wiya. Munu nyura kutjupa tjuṯa puṉungku wakannyangka nyakula paṉṯitjingka karpintja wiyangku wantipai, munu nyura kutjupa tjuṯa pakuringkula wawanyarinyangka nyakula ankula palunya tjananya pakaltjingaṟa katinytja wiyangku wantipai, munu nyura kawankatinytja tjuṯa kuḻu para-nguriṟa mantjiṟa katira tjunguntja wiyangku kuḻu wantir'iyalpai tjana kawalirinytjaku. Mulapa nyura palunya tjananya pauntjingaṟa kanyilpai mukulya wiyangku. 5Kaya paluṟu tjana wililyaraṉu, ka tjananya tjiṯutja inuṟa tjuṯangku patjaṉi, panya tjananya tjapata tjuṯangku aṯunymankunytja wiyangku wantinyangka. 6Ka panya ngayuku tjiipi tjuṯa wililyaraṟa kawankatingu apukutu munu puṯikutu kuḻu ngura kutjupa uwankarakutu, ka aṉangu kutjupangku palunya tjananya waṉaṟa nguriṟa mantjiṟa ngalya-katinytja wiya alatjiṯu. Ngaḻṯutjara!

7“Palu wanyuya ngalya-kulinma wati tjapata tjuṯangku! Ngayuluṉa Mayatja Godalu nyurala wangkanyi. 8Ngayulu panya Godanya tiṯutjara nyinapainya munuṉa ngayulu nyurala wangkanyi, kaṉiya kulinma! Panya ngayuku tjiipi tjuṯa inuṟangku patjaṟa ngalkula wiyaṉu nyura tjananya aṯunymankunytja wiyangku wantinyangka. Palu tjana kawankatinyangka uti nyura palunya tjananya waṉaṟa nguriṟa mantjinma, palu nyura wantinyi alatjiṯu ngayuku tjiipi tjuṯa aṯunymaṟa kanyintja wiyangku. Munu nyuranku kutju walytjangku kulilpai, nyara tjiipi tjuṯa kulintja wiyangku. 9-10Wanyuya tjapata tjuṯangku ngayunya puḻkaṟa kulinma! Panya ngayulu Mayatja Godanya nyurampa puḻkaṟa mirpaṉarinyi, munuṉa kuwari ngayuku tjiipi tjuṯa mantjilku nyuralanguṟu, munuṉa piṟuku maḻakungku nyuranya ungkunytja wiyangku wantiku nyura piṟuku tjananya kurantjaku-tawara. Panya nyura ngaṉmanytju palunya tjananya wiṟuṟa aṯunymankuwiyangku wantira tjananya pungkula ngalkuningi. Palula-tawaraṉa tjananya nyuralanguṟu mantjilku.

11“Uwa, ngayulu Mayatja Godalu nyurala mulamulangku wangkanyi, panya ngayuluṉatju tjiipi tjuṯa nguriṟa mantjiṟa kanyilku. 12Panya tjapata palyangku tjiipi wililyarannyangka waṉaṟa nguriṟa mantjilpai wiṟuṟa kanyintjikitjangku. Palu puṟunypa ngayulu ngayuku aṉangu kawankatinytja tjuṯa nguriṟa mantjilku munuṉa maḻakungku ngalya-katira kanyilku. Panya mungaṯu kura puḻka ngaṟanyangka paluṟu tjana wililyaraṟa anu. Palu kuwari ngayulu tjapata palyangku tjananya nguriṟa mantjiṟa ngayuluṉatju aṯunymaṟa kanyilku. 13-1415Ngayuluṉa tjapata tjanampa ngaṟaku tjananya wiṟuṟa aṯunymankunytjikitja, munuṉatju ngayulu tjanampa ngura wiṟu mulapa palyalku tjana pakuwiyaringkula pukuḻpa palyanyku nyinanytjaku.

16“Nyangatjaṉa mulamulangku palyalku ngayulu Mayatja Godalu. Ngayuluṉatju kawankatinytja panya tjuṯa waṉaṟa nguriṟa mantjiṟa katira tjungulku, munuṉatju punkaṟa kaṯakatinyangka nyakula tjananya paṉṯitjingka karpilku, munuṉa uparingkunyangka nyakula tjananya ngaḻṯunytjungku kuṉpulku. Palu panya kaṉpi puḻka tjuṯa munu kuṉpu tjuṯa kuḻu ngayulu wiyalku, panya ngayuluṉatju tjapata wiṟu tjiipi tjuṯa tjukaṟurungku aṯunymaṟa kanyilpai.

17“Palu kuwariṉatju ngayuku tjiipi tjuṯa nyanganyi munuṉa ngayulu nyakula ngurkantananyi kutjupa tjara palya, kutjupa tjara kura. 18-19Panya tjiipi kaṉpi puḻka tjuṯangku uti tjiipi kutjupa tjuṯa aṯunymaṟa kanyinma, palu tjana ukiṟi puḻka nyakula tjana-waraṟa pitjala ngalkupai munuya paḻtjaringkunytjatjanungku ukiṟi kutjupa tjana wantinytja pirpuntaṟa wantikatipai, kaya maḻa tjiipi kutjupa tjuṯangku pitjala nyakupai, ‘Munta! Nyangatja kaṉpi tjuṯangku ngaṉmanytju pitjala ngalkula pirpuntaṟa wiyaṉu.’ Ka palu puṟunypa tjiipi panya kaṉpi puḻka tjuṯa mina kaḻṯaṟa wiṟungka tjana-waraṟa wirkankupai munuya tjikiṟa tjaḻapungkula mina panya tjunpinpi palyalpai. Kaya maḻatja panya tjuṯangku tjikintjikitjangku pitjala nyakupai mina tjunpinpi ngarinyangka kaḻṯaṟa wiya. Ngaḻṯutjara! Panya paluṟu tjana maḻatjangku ukiṟi kurakura ngalkupai munuya mina kurakura tjikilpai tjunpinpi ngaṉmanyitja tjuṯangku kuraṟa wantikatinytja.

20“Pala palulanguṟuṉa nyuranya kuwari wangkanyi, panya nyura kaṉpi puḻka nyinanyi mai palya ngalkunytjatjanu munu mina palya tjikintjatjanu. 21Kaya panya tjana kuwari ngaḻṯutjara upa nyinanyi panya nyura mai palya mina palyanguṟu mauṉṯankunytja tjuṯa. 22-23Kaṉa nyuranya kuwari ngayulu ngurkantananyi munuṉatju kuwari upa tjuṯa wankaṟunanyi nyura piṟuku kurantjaku-tawara. Ngayuluṉatju kuwari ngurkantaṟa tjaraṉi palya tjuṯa munu kura tjuṯa kuḻu, munuṉa palulanguṟu tjapata palya tjunanyi nyuranya uwankara wiṟuṟa kanyintjaku. Tjapata nyara paluṟu panya Davidalanguṟu palumpa walytja maḻatja, munu paluṟu Davidalu puṟunytju nyuranya wiṟuṟa aṯunymankuku. 24Nyara paluṟu nyuranya kuranyurira kanyilku, kaṉa ngayulu nyurampa God nyinaku. Uwa, ngayuluṉa Mayatja Godalu nyurala wangkangu nyura ngayula kulintjaku.

25“Kuwariṉa ngayuku tjiipi tjuṯa kaḻkuṉi tjananya tiṯutjarangku pukuḻpa wankaṟu kanyintjikitjangku. Munuṉa tjiṯutja inuṟa tjuṯa tjanampa nguranguṟu wiyaṉi tjiipi paluṟu tjana ukiṟi wankaṟungku ngaṟala ngalkunytjaku munu puṉu wiltjangka nguḻuwiya ngarinytjaku. 26-2930Kaṉiya paluṟu tjana ngayunya mulapa kulilku alatji, panya ngayulu tjanampa Godanya Mayatja puḻka mulapa tjanala tjunguṯu nyinanyi. Kaya paluṟu tjana kulilku alatji, ‘Mulapala nganaṉa Godaku walytja tjuṯa nyinanyi aṉangu Israelkunu tjuṯa.’ 31Nyura mulapa ngayuku tjiipi tjuṯa nyinanyi, ngayuku walytjapiti, kaṉa ngayulu God nyurampa nyinanyi.” Nyanga alatji Godalu Mayatja Puḻkangku wangkangu.