PITJ

Jonah-ku 4

Jonah-nya Mirpaṉarinytja Munu Godanya Ngaḻṯuringkunytja

1Ka palulanguṟu Jonah-nya tjituṟu-tjituṟuringu munu Godaku mirpaṉarira paluṟu wangkangu, 2“Nyaakun panyatja ngayunya iyaṉu ngura parari Ninipalakutu ankula aṉangu tjuṯa wangkanytjaku? Munun nyaaku tjananya mapalku iluntankuwiyangku wantingu? Utin tjananya kalyparingkuwiyangku iluntara wiyanma. Panya nyuntun ngayula ngaṉmanytju wangkangu tjananya iluntankunytjikitjangku. Kaṉa ngayulu kulinu, ‘Wiya nyuntu tjinguṟu tjanampa ngaḻṯuringkuku.’ Ka panyaṉa alatji kuliṟa ngayulu tjanalakutu ankunytja wiya wantira kampa kutjuparira anu ngura panya Paintakutu ankunytjikitja. God, ngayulu nyuntumpa ninti panya nyuntu aṉangu tjuṯaku mukulya, munun warpungkula mirpaṉaripai wiya, ngaḻṯunytju mulapa. Nyuntu kutjupaṟa aṉangu tjuṯa iluntankunytjikitjangku kulilpai munun tjana kampa kutjuparinyangka iluntankuwiyangku ngaḻṯuringkula wantipai. Mulapa nyuntu kurunpa kakuly-kakulypa.”

3Munu palulanguṟu Jonah-lu wangkangu, “Mayatja God, nyuntu ngayuku wangka kulintja wiya. Ngayunyaṉi palya iluntara.”

4Ka Mayatja Godalu Jonah-nya ngapartji kuliṟa wangkangu, “Wiya, nyaakun mirpaṉarinyi? Wantima!”

5Ka Jonah-nya pakaṟa anu kakaraṟalku parari wiya uṟilta nyinanytjikitja Ninipala tjartjarpa. Munu paluṟu ankula wiltja kurakura palyaṟa paṯaṟa nyinara kuliningi, “Tjinguṟu Godalu iluntanku aṉangu tjuṯa, tjinguṟu tjananya wantir'iyalku.”

6Ka Jonah-ku ngurangka Mayatja Godalu puṉu puya pakaltjingaṉu Jonah-nya wiltjangka pukuḻpa nyinanytjaku. Ka puṉu puya paluṟu mapalku puḻkaringu puḻkuṉpa wiṟu mulapa. Ka Jonah-nya wiltjangka pukuḻpa mulapa nyinangi. 7Ka mungawinki Godalu maku kataṯi puṟunypa iyaṉu puṉu panya palunya ngalkula wirwirmaṟa wiyantjaku. 8Munu tjiṉṯu pakannyangka Godalu waḻpa waṟu iyaṉu, ka Jonah-nya kuḻingku kampangu wiltja wiyangka. Ka paluṟu nyinara puṯu warikitja ngaṟangi munu nguwanpa punkaningi. Munu paluṟu wiltja wiyangka ilunytjikitja mukuringangi, munu Godala wangkangu, “Palyaṉi iluntara wanka kanyilwiyangku.”

9Ka Godalu wangkangu Jonah-nya, “Nyaakun mirpaṉarinyi puṉunguṟu?”

Ka Jonah-lu ngapartji wangkangu, “Wiya, palyaṉa ngayulu mirpaṉarinyi ilunytjikitja.”

10-11Ka Godalu Jonah-nya piṟuku wangkangu, “Puṉu nyangatja munga kutju pakaṉu munu mungawinki piḻṯiringu rawa ngaṟanytja wiya. Ka nyaaku nyuntu tjituṟu-tjituṟu nyinanyi? Nyuntun wanyu minangka kurpiṟa puṉu nyangatja pakaltjingaṉu? Wiya palatja ngayulu tjunkunytja. Palu nyuntun puṉu wanka rawa ngaṟanytja-tjiratja ngalytjurmananyi. Wiya palatja puṉu piḻṯiringu, aṉangu wiya. Kan nyaaku aṉangu tjuṯaku ngaḻṯuringkuwiya puṉuku nyinara ulanyi? Kulila, ngura pala Ninipala aṉangu tjuṯa mulapa nyinanyi nampa nyangatja 120,000 munu puluka, tjiipi kuḻu puḻka ngaṟanyi. Utiṉa ngayulu aṉangu Ninipanya nguraṟa tjuṯaku ngaḻṯuringama tjananya wiṟuṟa kanyintjikitja, panya paluṟu tjana kuwari ngayunya kulilpairingu.” Alatji Godalu Jonah-la wangkangu.