PITJ

Revelation 2

1. Tjukurpa Ipitjala Nyinanytja Tjuṯaku

1Munuṉi palulanguṟu piṟuku wangkangu alatji, “Panya angelpa kutjungku nyara tjananya kanyini Godaku walytja tjuṯa tawunu ini Ipitjala nyinanytja tjuṯa. Ka nyuntu angelpa palulakutu tjukurpa nyangatja walkatjuṟa ma-iyala tjana nyakunytjaku alatji,

Ngayulu kililpi panya 7 maṟa wakungku kanyintjalu nyurala wangkanyi, puṉu tili katuṟa kanyilpai 7-ta nguṟurwanu para-pitjalinkunytjalu panya. 2Ngayuluṉa nyurampa ninti. Nyura panya ngayuku puḻkaṟa waṟkaripai, munuṉi nyura tungun-tunguntu waṉalpai wantinytja wiyangku. Munu nyura wati kura tjuṯangka tjunguringkuwiyangku wantipai wiṟungku. Ka panya kutjupa tjuṯangku ngunti wangkapai, ‘Ngayunyaṉi Christalu wituṟa iyaṉu.’ Ka panya alatji wangkanyangka nyura kuliṟa wantipai alatji wangkara, ‘Nyangantuya ngunti wangkanyi.’

3Uwa, mulapa nyura ngayunya tungun-tunguntu waṉalpai. Panya nyura ngayuku mulamularingkunyangka kutjupa tjuṯangku nyuranya analpai munu kuralpai, ka alatjirinyangka nyura ngayunya wantinytja wiyangku wiṟungku tiṯutjarangku waṉaṉi. Kaṉa puḻkaṟa nyurampa pukuḻarinyi.

4-5Palu kulila! Ngayulu kutjunguṟu tjituṟu-tjituṟurinyi, ngayuku panya nyura pukuḻarinytja wiyanguṟu. Ngaṉmanypa panya nyura ngayuku mukulya mulapa nyinangi, palu kuwari nyanga nyura nyaaku ngayuku mukuringkunytja wiyaringu? Uti nyura panya palu puṟunytjuṯu ngayunya kulinma, panya ngaṉmanypa nyura ngayuku puḻkaṟa mukuringangi. Palu nyura tjinguṟu rawa ngayuku pukuḻarinytja wiya nyinanyangkaṉa ngayulu pitjala nyurampa puṉu panya tili katuṟa kanyilpai mantjilku.

6Palu nyangatja nyura wiṟuṟa kulilpai panya nyura wati ini Nikilatjanya waṉalpai tjuṯaku kuraringkupai, panya nyara paluṟu tjana Godaku tjukurpa ngunti-ngunti nintilpai. Ka ngayulu palu puṟunypaṯu ngunti nintilpai tjuṯaku kuraringanyi.

7Uwa, nyura pina aḻa ngaṟalampa wanyu ngalya-kulinma Kurunpa Miḻmiḻṯu wangkanyangka Godaku walytja tjuṯangka. Palu kutjupa tjuṯangku nyuranya wangkanyangkaya ngayunya kulinma wantinytja wiyangku munuṉi tiṯutjarangku ngayunya tungun-tunguntu waṉanma. Kaṉa alatji wiṟuṟa waṉannyangka nyuranya tjunkuku Godaku ngura wiṟungka mai wanka ngalkunytjaku. Panya Mamaku ngurangka puṉu wankaṟunkupai ngaṟanyi, ka nyura puṉu palulanguṟu mai ngalkula wanka tiṯutjara nyinaku.

Uwa, alatji tjanampa walkatjura ngayuku walytja tjuṯaku ngura nyara Ipitjala nyinanytja tjuṯaku.”

2. Tjukurpa Muunala Nyinanytja Tjuṯaku

8Munu palulanguṟuṉi piṟuku wangkangu, “Panya angelpa kutjupangku nyara tjananya kanyini Godaku walytja tjuṯa tawunu ini Muunala nyinanytja tjuṯa. Ka nyuntu angelpa palulakutu tjukurpa nyangatja walkatjuṟa ma-iyala tjana nyakunytjaku alatji,

Ngayuluṉa kuwaripatjara mulapa nyinangi uwankara wiya ngaṟanyangka, munuṉa tiṯutjara mulapa nyinanyiṯu, panya manta ilkaṟi wiyaringkunyangka ngayulu nyinaku alatjiṯu wiyaringkuwiya. Ngayulu panyaṉa ilungu munuṉa palulanguṟu wankaringkula pakaṉu. 9Ngayulu nyurampa ninti panya nyuranya mirpaṉtju tjuṯangku rawangku anaṟa wangkapai munu pungkula kuralpai munu nyii-nyiipungkupai. Munuṉa ninti panya nyura ngaḻṯutjara maṟalpa mani wiya nyinanyi. Palu pukuḻarimaya panya ngayula nyura maṟangka alatjiṯu wankaṟu nyinanyi pukuḻpa. Ka ngayulu ninti panya kutjupa tjuṯangkuya nyuranya kura wangkara analpai. Paluṟu tjanayanku mirawaṉira walytjangku wangkapai, ‘Nganaṉa Jew tjuṯa, Godanya tjukaṟurungku waṉalpai!’ Palu wiyaya tjana Satanku walytja tjuṯa munuya palunya waṉalpai. 10Ka paluṟu tjana nyuranya rawangku anaṟa wangkara pungkula kurannyangka nguḻuringkuwiyaya rapa nyinama.

Kulila! Mamu panya Satantu aṉangu kura tjuṯa wituwitulku nyuranya witiṟa tjailangka tjarpatjunkunytjaku. Panya mamu paluṟu mukuringanyi nyuranya arkaṟa punkatjingantjikitja munu paluṟu tjiṉṯu 10 nyuranya rawangku arkalku tjaila unngu kanyiṟa nyura kuraringkula ngayuku watarkurinytjaku. Palu ngayunyaṉiya wantinytja wiyangku tiṯutjarangku kulinma. Tjinguṟuya nyuranya miri pungkunytjikitjangku wangkaku, kaṉiya ngayunya tungun-tunguntu waṉanma alatjiṯu ilunytjakutu-wangkara. Kaṉa nyuranya puṯuru wankanya ungkuku, panya wati raitjangka wirtjapakaṟa waintarinyangkaya palula katangka puṯuru nyaḻpitjara tjunkupai, palu puṟunypa, panya ngayulu nyuranya wankalku tiṯutjara ngayula tjungu pukuḻpa nyinanytjaku.

11Uwa, nyura pina aḻa ngaṟalampa wanyu ngalya-kulinma Kurunpa Miḻmiḻṯu wangkanyangka Godaku walytja tjuṯangka. Palu nyuranya anannyangka wantinytja wiyangkuṉi tiṯutjarangku tungun-tunguntu waṉanma. Ka alatji rawangku waṉannyangkaṉa nyuranya wankaṟu kanyilku waṟungka panya ilunytjaku-tawara.

Uwa, wanyu tjanampa nyanga alatji walkatjuṟa ma-iyala panya ngayuku walytja tjuṯakutu nyara Muunala nyinanytja tjuṯakutu.”

3. Tjukurpa Puukamala Nyinanytja Tjuṯaku

12Munuṉi palulanguṟu piṟuku wangkangu, “Panya angelpa kutjupangku nyara tjananya kanyini Godaku walytja tjuṯa tawunu ini Puukamala nyinanytja tjuṯa. Ka nyuntu angelpa palulakutu tjukurpa nyangatja walkatjuṟa ma-iyala tjana nyakunytjaku alatji,

Ngayuluṉa tjuḻa waṟa iṟi kampa kutjaratjara kanyintjalu nyuranya wangkanyi. 13Ngayuluṉa ninti nyurampa nguraku, panya nyara palula Satannga mayatjaringu, kaya tjuṯangku palunya waṉaṉi. Palu nyura tjukaṟurungku palunya wantira ngayunya kutju kulini. Ngura nyara palulaya panya wati ngayuku maḻpa ini Antipanya mungaṯu pungkula iluntanu tjukurpa ngayunyatjara tungun-tunguntu para-wangkanyangka. Kaṉi nyura nguḻuringkuwiyangku ngayunya rawangku waṉaningi wantinytja wiyangku ngura pala Satannga nyinanytjala, kaṉa puḻkaṟa pukuḻaringu.

14Mulapa nyura ngayunya rawangku waṉaṉi. Palu kulila! Ngayulu tjituṟu-tjituṟuringu panya nyura paintja wiyangku wantinyi kutjupa tjarangku ngunti wangkanyangka. Panya tjana kuliṟa mulamularinganyi wati miri ini Pailamalu wangkanytjitjaku. Panya iriti paluṟu ngunti nintiningi wati ini Pailakala, ka wati paluṟu ngapartji aṉangu Israelkunu tjuṯa kura nyinanytjaku wituwituningi. Paluṟu panya tjananya wituwituningi kuka panya god ngalypa-ngalypa ungkunytja ngalkunytjaku, kaya mulapaṯu ngalkuningi Godala tungunpungkula. Munu paluṟu piṟuku tjananya wituwituningi kutjupangka kutjupangka pirtjinytjaku, kaya palunya kuliningi Godalu paintjitja wantira. Ka nyuralanguṟu kuḻu palu puṟunypa kutjupa tjarangku kuwari palyaṉi Pailamaku panya tjukurpa kulintjatjanungku. 15Ka palu puṟunypa tjara kutjupa kuliṟa mulamularingkupai wati ini Nikilatjalu ngunti wangkanytjitjaku.

16Palu kulila, tjukurpa nyanga Nikilatjaku pulampa Pailamaku kura ngaṟanyi, ka nyura wantiwiyangku tjananya painma tjukurpa palumpa pulampa kulintja tjuṯa. Palu nyura paintja wiyangku wantinyangkampa ngayulu pitjala tjananya pikangku pungkuku tjuḻa waṟa panya tjaangku kanyintjitjangka.

17Uwa, nyura pina aḻa ngaṟalampa wanyu ngalya-kulinma Kurunpa Miḻmiḻṯu wangkanyangka Godaku walytja tjuṯangka. Munu tjana nyuranya anaṟa wangkanyangka ngayunya wantinytja wiyangku rawangku waṉanma. Ka aṉangungkumpa alatji ngayunya tungun-tunguntu waṉannyangka ngayulu palunya ungkuku mai kumpilitja ini panya manna, munuṉa piṟukuṯu palunya ungkuku apu piṟanpa ini palunyatjara, ini kuwaritja. Ka paluṟu kutju initjara mantjiṟa ninti nyinaku, kaya kutjupa uwankara ngurpa nyinaku ini pala palumpa.

Uwa, wanyu tjanampa nyanga alatji walkatjuṟa ma-iyala panya ngayuku walytja tjuṯakutu nyara Puukamala nyinanytja tjuṯakutu.”

4. Tjukurpa Tjayatiṟala Nyinanytja Tjuṯaku

18Munuṉi palulanguṟu piṟuku wangkangu, “Panya angelpa kutjupangku nyara tjananya kanyini Godaku walytja tjuṯa tawunu ini Tjayatiṟala nyinanytja tjuṯa. Ka nyuntu angelpa palulakutu tjukurpa nyangatja walkatjuṟa ma-iyala tjana nyakunytjaku alatji,

Ngayuluṉa Godaku katjangku nyurala tjukurpa nyangatja wangkanyi. Ngayulu panya kuṟu waṟu tili puṟunypa irnyaṉi munuṉa tjina ayana yalawana tjalkanymankunytja puṟunypa irnyaṉi.

19Palu kulila! Ngayulu nyurampa ninti nyura palyantjitjaku, panya nyura ngayuku puḻkaṟa mukuringanyi, munu nyura ngaḻṯutjara tjuṯa ngaḻṯunytjungku ungkupai. Ngayulu ninti panya nyura mulapa ngayunya kulini, munu nyura ngayuku waṟka wiṟuṟa palyalpai. Munu panya nyura rawangku tungun-tunguntu ngayunya kutju waṉalpai. Panya nyura ngaṉmanypa tjukaṟuru nyinara ngayuku wiṟuṟa palyalpai, palu kuwari nyura kuṉpu puḻkaringkula puḻka mulapalta palyaṉi, ngaṉmanyitjangka waintaṟa.

20Palu kulila! Ngayulu kutjunguṟu tjituṟu-tjituṟurinyi panya nyanga alatji nyura kuliṟa palyannyangka panya minyma ini Tjiitjipilnga nyura paintja wiyangku wantipai nyurala tjukurpa ngunti wangkara nintinnyangka. Paluṟunku wangkapai, ‘Ngayunyaṉi Godalu wangkara iyaṉu.’ Palu paluṟu ngunti nyuranya kuraṉi nyura palumpa tjukurpa waṉantjaku. Panya paluṟu wangkapai aṉangu kutjupangka kampangkaṯu ngunti ngarinytjaku munu kuka panya god ngalypa-ngalypa ungkunytja ngalkunytjaku.

21-22Alatjiṯuṉa wangkangu palunya kura wantira kampa kutjuparinytjaku, munuṉa paṯaṟa paṯaṟa, ka ngayunya wantinyi kulintja wiyangku. Kaṉa palulanguṟu pikatjaralku minyma pala palunya puḻkaṟa tjituṟu-tjituṟurinytjaku, palula panya ngunti ngaripai tjuṯa kuḻuṉa pika puḻka ungkuku. Palu wati nyangantu mapalkungku kampa kutjuparinytja wiyangku wantinyangkaṉa kuwariṯu nyanga palunya palyalku. 23Munuṉa minyma nyanga palumpa tjukurpa lipintankupai tjuṯa kuḻu iluntankuku. Kaya ngayuku walytja tjuṯangku tawunu panya tjuṯanguṟu nyangatja kuliṟa urulyaralku, ‘Awari! Jesulu nintingku nyakupai aṉangu uwankarangku unngu kulinnyangka.’ Alatjiya kulilku ngayuku walytja tjuṯangku. Kaṉa ngayulu tjananya tungunpungkula kuralpai tjuṯa waṟungka waṉiku, palu tjukaṟuru nyinapai tjuṯaṉa wiṟuṟa kanyilku.

24Ka ngura pala Tjayatiṟala kampa kutjara nyinanyi minyma panya palunya waṉalpai munu ngayunya kulilpai, ka nyura ngayunya waṉalpai tjuṯangku wiṟungku palunya kulilwiyangku wantinyi. Panya palunya kulilpai tjuṯangkuya alatji wangkapai, ‘Nyangatja Satanku wangka nganaṉa kulini, tjukurpa puḻka miḻmiḻpa.’ Ka nyura tjukurpa nyangaku nintiringkuwiyangku wantinyangka ngayulu pukuḻaringu. Munuṉa palulanguṟu nyuranya piṟuku wangkanytja wiyangku wantinyi. 25Palu panya nyura ngayunya tungun-tunguntu waṉaṉi palu puṟunytjuṉiya wanyu rawangku waṉanma ngayulu pitjanytjakutu-wangkara.

26-27Palu nyura ngayuku wangka rawangku kuliṟa tjukaṟurungku waṉannyangkampaṉa ngayulu nyuranya mayatja puḻka tjunkuku aṉangu tjuṯa ngura winkingka kanyintjaku. Panya Mamaluṉi tjunu mayatjarira tjananya kanyintjaku, ka nyura palu puṟunytjuṯu tjananya mayatjarira kanyilku wiṟungku. Munu nyura mayatja kuṉpungku tjananya wituwituṟa kanyilku, kaya tjinguṟu tungun-tungunarinyangka nyura tjananya pungkula wiyalku panya piti pungkula kaṯantaṟa minya-minyantja puṟunypa. 28Kaṉa nyuranya mayatja tjunkula ungkuku kililpi panya Katanya tjiṟirpikutu pakantjanya.

29Uwa, nyura pina aḻa ngaṟalampa wanyu ngalya-kulinma Kurunpa Miḻmiḻṯu wangkanyangka Godaku walytja tjuṯangka.

Uwa, wanyu tjanampa nyanga alatji walkatjuṟa ma-iyala panya ngayuku walytja tjuṯakutu nyara Tjayatiṟala nyinanytja tjuṯakutu.”