PITJ

Danielku 10

Danieltu piṟuku tjukurmaṟa nyakunytja

1Ka ngulalta wati ini Tjaiṟatjanya ngura Puutjaku mayatja nyinanytja aṟangka Godalu ngayula tjukurpa utinu. (Panya ngayulu ini Danielnga munuṉa ini kutjupa Piltatja-tjanya.) Palu tjukurpa nyara paluṟu wituwitu mulapa ngayulu puṯu kulintjaku. Kaṉi palulanguṟu Godalu kutjupa kutjupa nintinu ngayulu nyakula tjukurpa panya palunya tjukaṟurungku kulintjaku.

2-3Nyara palula-aṟa ngayulu tjituṟu-tjituṟu pilunpa alatjiṯu nyinangi weeki mankurpa kuka ngalkuntja wiya, wama kuḻu tjikintja wiya, munuṉatju yunpa minangka paltjintja wiya nyinangi mangka kuḻu wiṟuntja wiyaṯu.

4Palulanguṟuṉa piṟa panya ngaṉmanyitjangka tjiṉṯu nampa 24-ngka ngayulu karu uṟutjarangka itingka ngaṟangi ini Taikiṟitjala. 5Munuṉa ira-nyakula nyangu wati mantara piranpa wiṟutjara munu pilta kaulnguṟu palyantjitjatjara. 6Ka palumpa puntu irnyaningi puḻi upala nguwanpa, ka yunpa palumpa pinpa-pinpangi wanangaṟa puṟunypa, kuṟu palumpa waṟu tili puṟunypa, miṉa munu tjalpa irnyaningi ayana panya puṟantji puṟunypa, munu wangka palumpa aṉangu winkingku wangkanytja puṟunypa.

7Uwa ngayulu kutjungkuṉa nyanga palunya nyangu, kaya aṉangu panya ngayula tjungutja tjuṯangku nyakunytja wiyaṯu, palu tjana kutjupa kutjupa kuliṟa puḻkaṟa nguḻuringkula wirtjapakaṟa kumpinu. 8Ka ngayulu kutjungku ngaṟala nyangangi kutjupa kutjupa wiṟu mulapa Godalu ngayula utinnyangka, munuṉa nyakula kurunpa uparingkula wawanyaringu. 9Munuṉa paluṟu wangkanyangka kuliṟa nguḻuringkula yunpanguṟu punkaṟa ngaringi mantangka kunkunpa awu mulapa.

10Kaṉi kutjupangku maṟa kutjungku witiṟa pakaltjinganingi, kaṉa muti tjunkula maṟa kutjarangku manta pampuṟa tultjungaṟangi munuṉa muti winki tjititingangi. 11Kaṉi angelpangku wangkangu, “Daniel, Godanya panya nyuntumpa puḻkaṟa pukuḻarinyi, munuṉi ngayunya wituṉu nyuntulakutu, ka pakaṟa ngaṟa munuṉi atatjuṟa purkaṟangku kulila kaṉanta ngayulu wangkaku.”

Kaṉa pakaṟa ngaṟala kuwaripaṯu nguḻu-nguḻu tjititingangi.

12Kaṉi paluṟu wangkangu, “Daniel, nguḻuringkunytja wiya ngaṟama, panya mungaṯun kuwaripatjara nyuntu Godala purkaṟangku tjapiningi, ka panya palula-aṟangka nyuntunya kulinu. Nyuntu panya tjapiningi paluṟu nyuntula utintjaku, kaṉi palulanguṟu ngayunya wituṟa iyaṉu nyuntula wangkanytjaku. 13Kaṉa nyuntulakutu pitjangi, palu angelpa panya ngura Puutjanya kanyilpaingku ngayuku iwara angatjuṟa kanyiningi rawa nguwantu tjiṉṯu 21-kutu-wangkara, kaṉa puṯuliringi ankunytjikitja. Ka palulanguṟu angelpa panya mayatja puḻka Michaelnga pitjangu ngayuku iwara alantjikitja ngayulu ankunytjaku. 14Ka nyangaṉa kuwari nyuntula wirkanu tjukurpa panyatja utintjikitja, kan utilta kulilku nyaaringkuku ngula nyuntumpa walytjapiṯiku.” Alatjiṉi angelpa panya Gabrieltu wangkangi.

15Kaṉa paluṟu alatji wangkanyangka ngayulu kata tjaṟuringkula manta walu-nyangangi panya puṯuṉa kuliningi wangkanytjikitjangku. 16Kaṉi kutjupangku wati puṟunytju tjalinypa pampuṉu, kaṉa palula wangkangu, “Ngayulu tjukurpa nyangatja nyakula puḻkaṟa nguḻuringkula wawanyaringu. 17Munuṉa nyuntula puṯu wangkanyi, panya nyuntu witulya puḻka mulapa, kaṉa ngayulu tjukutjuku upa alatjiṯu munuṉa puṯu nguwanpa ngaalymananyi.”

18-19Kaṉi piruku paluṟu pampuṉu munuṉi wangkara kunpuṉu, “Nguḻuringkuwiya! Godanya nyuntumpa puḻkaṟa mukuringanyi, ka nyuntumpa uwankara palya wiṟu ngaṟaku. Ala, raparingkula kuṉpu ngaṟama!”

Ka paluṟu ngayula wangkanyangka ngayulu raparingkula kunpuringu munuṉa palula wangkangu, “Uwa palya, panya wiṟungkuṉin nyuntu kunpuṉu, kaṉa kuwariṯu kulintjikitja mukuringanyi.”

20-21Kaṉi angeltu wangkangu alatji, “Nyaakuṉa-puṯa pitjangu nyuntulakutu? Ngayulu pitjangu tjukurpa panya palunya nyuntula wangkara utintjikitja, tjukurpa panya Godalu nyiringka walkatjuṟa wantinytjitja. Kuwariṉa nyanga palula maḻangka maḻaku ananyi, munuṉa angelpa panya Puutjanya nguraṟa tjuṯa kanyilpaiku pikaringkuku, ka ngayulu palunya pungkula waintarinyangka angelpa kutjupa ngapartji ngura Kiṟitjinya kanyilpainya ngayuku piṟuku pikaringkuku. Palu angelpa panya mayatja ini Michaeltuṉi kutjungku ngayunya alpamilalpai. Nyara paluṟu panya Israelkunu tjuṯa aṯunymankupai.