1-2Palu nyaaku nyura tjukurpa ngaṉmanyitja tjuṯa Christanyatjara rawangku wangkara kulintjikitja mukuringanyi? Wanyuya tjukurpa ngaṉmanyitja tjuṯaku nintiringkunytjatjanungku waintaṟa kulinma tjukurpa kutjupa tjuṯaku nintiringkunytjikitjangku. Panya aṉangu tjuṯa Jesuku walytjaringkunyangka nganaṉa palula tjanala ngaṉmanytju nintilpai iwara kurangka ankunytjatjanu kampa kutjuparinytjaku ilunytjaku-tawara, munu Godaku mulamularingkula palumpa iwarangka ankunytjaku. Munula tjanala nintilpai minangka baptise-katinytja, munu katangka maṟa tjunkunytja kuḻu panya Godalu witulyankunytjaku. Munula tjanala nintilpai panya ngula Godalu nganaṉanya ilunyangka wankaṟa pakaltjingantja, munu paluṟu aṉangu uwankara ngurkantaṟa tjarantja, munu kura tjuṯa paiṟa iyantja ngura kurakutu tiṯutjara nyinanytjaku. Alatji-alatjila tjanala nintilpai kuwari kutju Jesuku walytjaringkunytja tjuṯa. Ka nyura nyaaku tjukurpa nyanga palumpa tjanampaṯu piṟuku nintiringkunytjikitja mukuringanyi? Uti nyura Godanya waṉaṟampa tjukurpa kutjupa tjuṯaku kuḻu rawaṯu nintiringkukatima munkaritja tjuṯaku kuḻu. 3Uwa, wanyula tjukurpa kutjupa tjuṯaku kuḻu rawa nintiringama Godalu nintintjikitja mukuringkunyangka.
4-6Kulilaya! Tjinguṟu aṉangu kutjupa Jesuku walytjaringanyi. Ka panya Godalu palula utini palumpa tjukurpa, ka kulilpairinganyi munu palula tjunguringkula kurunpa pukuḻarinyi panya palunya wankaṟunu Godalu. Ka panya Kurunpa Miḻmiḻnga palula pitjala unngu tjarpara nyinakatinyi. Ka paluṟu unngu kulini panya Godalu kalkuntjitja mulapa tjukaṟuru ngaṟanyi. Munu kulini, “Mulapa Kurunpa Miḻmiḻnga witulya puḻkanya ngayula unngu waṟkarinyi.” Palu tjinguṟu paluṟu nyanganpa uwankara kulintjatjanungku Jesunya wantiku munu aḻa kutjupangka ankuku, kala yaaltjingaṟa palunya Godalakutu maḻakungku katiku kampa kutjuparira palunya waṉantjaku? Wiya alatjiṯu, panya paluṟu ngaṉmanypa Jesuku mulamularingu munu palulanguṟu ngulalta palunya ngunti kuraṟa wantingu. Ka nyangatja panya Jesunya piṟuku puṉu kaṯakutjarangka utitjunkunytja puṟunypa. Panya aṉangu tjuṯangku Godaku katja wantira mirara wangkangi puṉu kaṯakutjarangka utitjunkunytjaku, palu puṟunypa paluṟu palyaṉi Jesunya wantikatira, kaya aṉangu tjuṯangku palunya nyakula Jesunya anaṉi.
7-8Tjukurpa nyangatjaya kulila! Wati kaanangka waṟkaripaingku uṉinypa tjunkupai mantangka mai pakaltjingantjikitjangku. Ka minangku puyiṟa manta tulykulpai ka mai puḻka pakalpai. Ka Godalu manta nyara palunya nyakula palyanmankupai. Ka manta nyanga paluṟu aṉangu kulilpai tjuṯa puṟunypa. Palu manta kutjupa kuḻu ngaṟanyi, ka nyara palunya kuḻu minangku puyilpai palu kutjupa kutjupa tjuṯa pakalpai manta nyara palula tjilka, ukiṟi kurakura tjuṯa kuḻukuḻu. Ka manta nyanga palunya tjinguṟu Godalu nyakula kuranmankuku. Ka ngula waṟungku kampara wiyalku manta nyanga palunya. Palu manta nyanga paluṟu aṉangu kuliṟa wantipai tjuṯa puṟunypa, panya ngaṉmanypaya Jesuku mulamularingu munuya maḻangka palunya wantikatira kurangka anu.
9Palu nyanganpaṉa nyurala ngaṉmanytju tjakultjunanyi nyura Godanya wantinytjaku-tawara. Ka walytja wiṟu tjuṯa, ngayulu nyuranya kulini panya nyura iwara palyangka kutju ananyi wantinytja wiya. 10Ka panya Godanya palya mulapa tjukaṟuru ngaṟanyi, munu nyuranya nyanganyi palumpa wiṟuṟa waṟkarinyangka munu paluṟu nyurampa pukuḻarinyi. Paluṟu nyanganyi nyuranya palumpa mukuringkunyangka, panya nyura palumpa walytja tjuṯaku mukuringkupai munu tjananya alpamilalpai. Munu nyura kuwari nyanga alatjiṯu nyinanyi. 11-12Palu ngayulu mukuringanyi nyura uwankarangku rapangku waṟka wiṟu palyalkatinytjaku kurunpa winkingku ilunytjakutu-wangkara. Panya Godalu nyuranya wiṟuṟa kalkuṉu, ka nyura pukuḻpa paṯaṉi palumpa pakuringkunytja wiya. Nyara palulanguṟu nyura uti rapangku tiṯutjarangku Jesunya waṉanma munu nyura wiṟu mulapa mantjilku Godalanguṟu. Uwa, ngaṉmanyitja tjuṯa puṟunytjuya waṉanma pakuringkuwiyangku, panya tjana iriti Godaku tiṯutjara mulamularingangi pakuringkunytja wiya munuya nyara palulanguṟulta kuwari mantjini kalkuntja panya palunya.
13-14Panya iriti mulapa Godalu Aipuṟamanya kalkuṉu alatji wangkara, “Ngayulu nyuntunya kalkuṉi pukuḻmankunytjikitjangku. Ka nyuntulanguṟu maḻatja maḻatja ma-tjuṯaringkuku.” Munu paluṟu Aipuṟamanya palumpa mulamularingkunytjaku ini paluṟunku wangkara kalkuṉu. Tjinguṟu ini kutjupa puḻka mulapa ngaṟanyangkampa paluṟu ini palunya wangkara kalkunma. Palu wiya, ini kutjupa puḻka mulapa palula waintaṟa ngaṟanytja wiya alatjiṯu. Ka nyara palulanguṟu Godalu paluṟunku ini wangkara kalkuṉu. 15Ka Aipuṟamanya rawa alatjiṯu Godaku mulamularingangi nguṟurpa watarkurinytja wiya alatjiṯu. Ka Godalu palunya mulapaṯu ungu panya paluṟu kalkuntjatjanungku. 16Kaya panyatja kulinma, panya kutjupangku kalkunnyangka aṉangu kutjupa tjinguṟu puṯu mulamularingkupai, ka aṉangu nyara paluṟu mulamularingkunytjaku wati puḻkaku ini wangkapai, ka aṉangu puḻka ini wangkanyangka kuliṟa mulamularingkupai. 17Ka palu puṟunypaṯu Godalu tjananya ini puḻka mulapa wangkara kalkuṉu ini paluṟunku tjana palumpa mulamularingkunytjaku. Panya paluṟu mukuringangi tjana nintingku kulintjaku paluṟu panya kalkuntja kutjuparinytja wiya ngaṟanytjaku. Munu paluṟunku ini wangkangu kalkuntjatjanungku tjana mulapa kulintjaku.
18Uwa, panya Godalu mulapa tjukaṟurungku kalkulpai ngunti wangkanytja wiyangku, munu paluṟu kalkuṟa paluṟunku ini wangkanytjatjanungku kampa kutjuparinytja wiyangku ungkupai. Kala nyanga palulanguṟu nganaṉa puḻkaṟa raparingkula pukuḻṯu aḻa-aḻangku paṯaṉi paluṟu nganaṉanya kalkuntjatjanungku ungkunytjaku, panya nganaṉa Godala tjunguringu palula wankaṟu nyinanytjikitja. 19-20Palu nganaṉa panya Godalu kalkuntja tiṯutjarangku kuliṟa mulamularingkula kutju kuṉpu tungun-tungunpa nyinaku Jesuku paṯaṟa. Panya paluṟu Mamaku ngurakutu ngaṉmanypa anu ilkaṟikutu nganampa ngalkilpa ilunytjatjanu. Panya wati tjukurtjara puḻka tiinta miḻmiḻṯa tjarpara waintaṟa ma-tjarpapai ngura miḻmiḻpa mulata, nyara palu puṟunytju Jesunya waintaṟa tjarpangu ngura panya ilkaṟitjangka munu nganampa aḻaṉu ngalkilarinytjatjanungku, nganaṉa ngapartji maḻawanu tjarpara nyinanytjaku palula tjungu. Panya paluṟu tjukurtjara puḻkaringkula tiṯutjara nyinanyi wati panya Milkitjatikanya puṟunypa.