PITJ

Danielku 5

Mayatja Pilytjatjalu tjana mai puḻka ngalkunnyangka maṟangku utiringkula wall-ta walkatjunkunytja

1-2Ka ngula Papilanku mayatja puḻka kutjupa nyinangi wati ini Pilytjatjanya munu paluṟu tjiṉṯu kutjupa mai puḻka palyaṉu mayatja kamanta tjuṯaku, kaya wati tjuṯa mulapa maiku tjunguringu nampa nyangatja, 1,000. Ka mayatja paluṟu tjanala tjungungku pukuḻarira wama tjikiningi munu taṟangkarira wati waṟkaripai tjuṯangka wangkangu, “Kulilaya! Iriti panya ngayuku tjamu Nipaka-nitjalu Jerusalemaku timpulanguṟu kaapa tjuṯa ngalya-katingu, panya kaulnguṟu tjiilpanguṟu palyantja tjuṯa. Palunya tjananyaya ngalya-kati nganaṉalakutu, kala uwankarangku palula tjanala waina tjikinma munu ngayuku kuri tjuṯangku kuḻu.”

3-4Kaya mulapaṯu wati waṟka tjuṯangku kaapa panya tjuṯa mantjiṟa katingu. Kaya Pilytjatjalu tjana mayatja panya tjuṯangku kuḻu kaapa panya palula tjanala waina tjikiningi munuya tjikiṟa tjanampa god tjuṯa waḻkuningi, god panya kaulnguṟu, tjiilpanguṟu, puṟantjinguṟu, ayananguṟu, puṉunguṟu, puḻinguṟu palyantja tjuṯa.

5-6Ka nyara palula mapalku alatjiṯu watiku maṟa utiringu munu wallpangka walkatjunu kutjupa kutjupa. Ka palula itingka lampa ngaṟangi munu tilingku irnyaningi, ka Pilytjatjalu walkatjunkunyangka nyakula puḻkaṟa alatjiṯu nguḻuringkula yunpa kutjuparingu, munu muti tjaḻpa puḻkaṟa tjititingkula wawanyaringu.

7Munu paluṟu wati waṟka tjuṯa wituṉu ngangkaṟi tjuṯa, nintipuka tjuṯa, munu kiḻiḻpi nyakupai tjuṯa kuḻu aḻṯira ngalya-katinytjaku. Ka tjana ngalya-wirkankunyangka paluṟu tjanala wangkangu, “Walka nyaa nyangatja ngaṟanyi? Walka nyanga palunyaṉiya nyakula utiṟa wangka. Ka kutjupangku tjukaṟurungku utiṟa wangkanyangkampa ngayulu palunya mayatja nampa 3 tjunkuku ngayula itingka nyinara ngura nyanga Papilannga kanyintjaku, munuṉa palunya pukuḻarira ngayuku mantara puupulpa wiṟunya ungkuku munuṉa liritja tanpalku kaulnguṟu palyantja paluṟu mayatja nyinanytjaku.”

8Kaya nintipuka uwankarangku walka panya nyakula puṯu alatjiṯu kuliningi mayatja Pilytjatjala utiṟa wangkanytjikitjangku. 9Ka paluṟu puḻkaṟa mulapa nguḻuringkula yunpa kutjupa alatjiṯu ngaṟangi, ka mayatja kutjupa tjuṯangku kuḻu walka panya palunya nyakula puṯu alatjiṯu kuliningi.

10Ka Pilytjatjaku ngunytjungku ruuma kutjupanguṟu kulinu tjana nguḻuringkula wangkara waṉinyangka munu tjanalakutu ngalya-tjarpara nyakula wangkangu, “Mayatjan wiṟu mulapa. Nyuntumpala mukuringanyi mayatja nganampa tiṯutjara nyinanytjaku! Wanyu kulila! Puḻkaṟa nguḻuringkunytja wiyangku wantima! 11Panya nyuntumpa tjamungku mayatja puḻka nyinaralpi wati kutjupa ngurkantaṟa tjunu ngangkaṟi tjuṯa munu kililpi nyakupai tjuṯa kuḻu mayatjangku kanyintjaku. Ngayulu ninti palumpa, panya nganampa god tjuṯa wati nyara palula tjungu nyinanyi. Paluṟu nintipuka mulapa tjukaṟurungku kulilpai nganampa god tjuṯa puṟunytju. 12Wati nyara paluṟu ini Danielnga, palu nyuntumpa tjamungku palunya ini kutjupa tjunu Piltatjanya. Ka wati paluṟu nintipuka mulapa munu aṉangu kutjupangku tjukurmaṟa puṯu kulinnyangka tjukaṟurungku utiṟa tjakultjunkupai munu kutjupa kutjupa wituwitu ngaṟanyangka paluṟu kuliṟa wangkara tjukaṟurulpai. Ka wanyu nyuntumpa waṟka tjuṯa wituṟa iyala palunya aḻṯira ngalya-katinytjaku, ka paluṟu pitjala walka pala wallpangka ngaṟanytjanya nyakula nyuntula tjukaṟurungku utiṟa tjakultjunkuku.”

Danieltu walka panya wall-ta ngaṟanytjitja utira wangkanytja

13Kaya mulapaṯu ankula Danielnga mantjiṟa ngalya-katingu. Ka wirkankunyangka mayatja panya Pilytjatjalu palula tjapinu, “Nyuntu mulapa Danielnga? Panya ngayuku tjamungku kunyu nyuntunya ngalya-katingu ngura nyara Judah-languṟu kutjupa tjuṯangka tjungu. Mulapa? 14Ka panya kunyu nganampa god tjuṯa nyuntula tjungu nyinanyi, kan palulanguṟu nintipuka nyinanyi munun kutjupa kutjupa tjuṯa tjukaṟurungku utiṟa wangkapai. Mulapan? 15Panya ngayulu tjapiningi ngangkaṟi tjuṯa walka nyangatja nyakula utiṟa wangkanytjaku, kaya paluṟu tjana puṯu alatjiṯu kuliningi. 16Ka kunyu nyuntu kutjupangku puṯu kulinnyangka utiṟa wangkapai. Wanyuṉi walka nyangatja riitamilaṟa utiṟa wangka, kaṉanta tjukaṟurungku wangkanyangkampa nyuntunya mantara puupulpangka tjarpatjunkuku, munuṉanta liritja kaulnguṟu palyantja kuḻu liringka tanpalku, munu ngayulu nyuntunya nguraku mayatja nampa 3 tjunkuku ngayula itingka nyinanytjaku.”

17Ka Danieltu wangkangu, “Mayatjan wiṟu! Palyaṉa kuwari riitamilaṉi walka nyangatja, munuṉanta utiṟa wangkanyi. Palu nyuntu pala ngayunya ungkunytjikitjangku wangkara kalkuṉu, pala palunya wati kutjupa uwa.

18“Wanyu kulila! God katutja puḻkangku nyuntumpa tjamu Nipaka-nitjanya mayatja puḻka tjunu ngura nyangaku munu palunya puḻka mulapa palyaṉu, kaya aṉangu tjuṯa palumpa pukuḻaringi. 19Kulinin? Mayatja panya Nipaka-nitjanya puḻka mulapa nyinangi, kaya aṉangu uwankara wangka kutjupa wangka kutjupa ngura kutjupitja ngura kutjupitja palumpa puḻkaṟa nguḻuringkupai. Munu paluṟu panya mukuringkula aṉangu kutjupa iluntankupai munu paluṟuṯu mukuringkula aṉangu kutjupa walatjunkupai. Paluṟu aṉangu tjara kutjupaku pukuḻaripai, munu paluṟu tjara kutjupa kuraringkula paiṟa iyalpai.

20“Palu paluṟu kanany-kananyarira aṉangu tjuṯangka kulintja wiyaringu, ka Godalu palunya paiṉu mayatja wiyaringkunytjaku, ka aṉangu uwankara palumpa pukuḻarinytja wiyaringu. 21Ka paluṟu kuka tjuṯa puṟunyaringu, kaya aṉangu tjuṯangku ilytjikutu palunya paiṟa iyaṉu tangkiyi inuṟa tjuṯangka tjungu patu nyinanytjaku munu ukiṟi ngalkunytjaku pulukangka tjungungku, ka munga kutjupa munga kutjupa kulyarpangku palunya puntu winki uṟulpai. Ka palulanguṟu paluṟu pina aḻaringkula kulinu mulapa Godanya katutja puḻka mulapa ngura uwankaraku mayatja munu paluṟu alatjiṯu mukuringkula aṉangu ngurkantaṟa mayatja tjunkupai.

22-23“Palu nyuntu ninti uwankaraku, panya nyuntu palumpa pakaḻi alatjiṯu. Palu nyuntu kuwari kanany-kananyarinyi munu nyangan Mayatja Ilkaṟitjala tungunpunganyi. Panya nyuntu wangkangu wati warka tjuṯa kaapa panya miḻmiḻpa tjuṯa timpulanguṟu katinytja nyuntunya katira ungkunytjaku. Munu nyangan nyuntu kaapa palula tjanala waina tjikinu, mayatja nyanga tjuṯangku kuḻu, nyurampa kuri tjuṯangku kuḻukuḻu. Munu nyura tjikiṟa puṉu tjuṯa godanyanmaṟa waḻkuningi puṉu panya tjiilpanguṟu, kaulpanguṟu, ayananguṟu, puṉunguṟu, apunguṟu palyantjitja tjuṯa. Palu puṉu nyara paluṟu tjana puṯu nyakupai, puṯu kulilpai, ninti wiya. Godalu kutjungku nyuntunya wanka ungkupai, munu paluṟu kutjungku nyuntunya wanka kanyilpai nyuntu kutjupa kutjupa tjuṯa palyantjaku. Palu nyuntun palunya wantinyi palumpa pukuḻarinytja wiyangku alatjiṯu.

24“Pala palulanguṟu nyanga nyuntu kuwari nyangu maṟangku utiringkula walkatjunkunyangka.

25“Ka nyanga ngaṟanyilta uti alatjiṯu wall-pangka:

MINAI, MINAI, TIKIL, PAATJIN.

26“Ka alatji ngaṟanyi ini nyanga paluṟu tjana:

MINAI wangkanyi alatji RAWA WIYA panya Godalu nyuntunya wangkanyi mayatjarira rawa nyinanytja wiya.

27Ka nyanga TIKIL wangkanyi alatji, WAYAMILALPAI panya Godalu nyuntunya wayamilaṉu mununta nyangu nyuntu tjukaṟuru wiya.

28Munu PAATJIN wangkanyi alatji, TJARALPAI panya Godalu nyuntunya mayatja wiyaṉi munu nyuntumpa aṉangu uwankara tjaraṉi, ka tjara kutjupa wati kutju Miitanya-nguraṟangku pitjala mayatjarira kanyilku, ka tjara kutjupa wati kutjupa Puutjanya-nguraṟangku pitjala mayatjarira kanyilku.”

Alatji Danieltu mayatja panya Pilytjatjala utiṟa wangkangu.

29Ka paluṟu wati waṟkaripai tjuṯa wangkangu Danielnga mantara puupulpangka tjarpatjunkunytjaku munu liritja kaulnguṟu palyantja palula liringka tanpantjaku, munu paluṟu Danielnga Papilanku mayatja nampa 3 tjunu.

30Ka munga nyara palulaṯu wati kutjupangku Pilytjatjanya iluntanu, Papilanku panya mayatja puḻka. 31Ka palumpa aṟangka wati ini Taṟiyatjanya mayatjaringu. Nyara paluṟu panya ngura ini Miitanya-nguraṟa munu paluṟu 62 years old nyinangi.