Jesuku Walytja Tjuṯa Alpamilanma
1-2Tjinguṟu nyuntu kuṉpu ngaṟalampa utin Jesuku walytja kutjupa tjuṯa upa ngaṟanyangka alpamilanma anaṟa wantinytja wiyangku, panya tjana kuwaripaṯu kuṉpuringkunytja wiya. Utilanku walytjangku pukuḻmankunytja wiyangku wantima. Panya Christalunku walytjangku pukuḻmankunytja wiyaṯu, munu paluṟu Mamanya kutju pukuḻmanangi munu paluṟu kulintja wiya aṉangu kutjupa tjuṯangku palunya kuranmankunyangka. Kala uti Jesunya puṟunypa Godaku walytja kutjupa tjuṯa tjananya pukuḻmanama tjana ma-kuṉpuringkula Jesunya tungun-tunguntu waṉantjaku. 3Panya iriti nyiringka walkatjunkunytja ngarinyi nyanga alatji,
“Mama, kutjupa tjuṯangku nyuntunya warkira ngayunya kuḻu warkinyi.”
4Panya tjukurpa iriti nyiringka walkatjunkunytja wiṟu mulapa ngarinyi nganaṉa nyakula wangkara nintiringkunytjaku. Panya tjukurpa paluṟu tjana nganaṉanya nintilpai kuṉpu nyinanytjaku munu tungun-tunguntu palunya waṉantjaku wantinytja wiyangku. Kala nyara palulanguṟu unngu raparingkula kulini, “Mulapa Godalu nganaṉanya wiṟuṟa kanyilku tiṯutjarangku.” 5Panya Godalu puntu winki rapalpai tungun-tunguntu tiṯutjarangku palunya waṉantjaku. Kaṉa palula nyurampa tjapilpai paluṟu nyuranya tiṯutjarangku nintintjaku nyura uwankarangku Christanya waṉaṟa kulintja kutjuringkula palula kalypa nyinanytjaku. 6Ka nyara palulanguṟu nyura uwankarangku tjungungku wangka kutjuringkula mirawaṉima Godanya, Mayatja Jesuku Mama nyinanytjanya.
Jesunya Pitjangu Aṉangu Uwankaraku
7Jesuku walytja tjuṯa! Christalu panya nyuranya walytjanmaṟa palula tjunguṉu, ka nyuranku uti palu puṟunytjuṯu Jesuku walytja kutjupa tjuṯa pukuḻṯu walytjanmaṟa tjungunma wantinytja wiyangku. Ka alatji nyura mukulya nyinanyangka aṉangu kutjupa tjuṯangku nyakula kulilku, “Munta, mulapa Godanya mukulya wiṟu mulapa.” 8Panya Christanya pitjangu nganampa Jew tjuṯaku waṟkarinytjikitja munu nganaṉanya nintintjikitja panya Godanya mulapa tjukaṟuru nyinanyi kalkuntjatjanungku palyalpai alatjiṯu. Panya Christanya pitjangu Godalu ngaṉmanytju Aipuṟamanya tjananya kalkuntja utintjikitja. 9Munu panya Christanya pitjangu aṉangu kutjupa tjuṯaku kuḻu, Jew wiya tjuṯaku, tjana kuḻu Godaku mulamularingkula palunya mirawaṉinytjaku alatji, “Nyuntun ngaḻṯunytju puḻka mulapa nyinanyi.” Panya nyiringka iriti walkatjunkunytja ngarinyi nyanga alatji,
“Kaṉa aṉangu kutjupa tjuṯawanu nyinanytjatjanungku nyuntunya mirawaṉiku.
Munuṉa inma kuḻu inkara nyuntunya waḻkulku.”
10Ka tjukurpa kutjupa piṟuku ngarinyi Jew wiya tjuṯangka wangkanytja nyanga alatji,
“Pitjalaya Godaku aṉangu tjuṯangka tjunguringkula puḻkaṟa pukuḻarima.”
11Ka piṟuku tjukurpa kutjupa nyanga alatji ngarinyi,
“Aṉangu tjuṯa, Godanyaya mirawaṉima!
Munuya inma inkara palunya waḻkunma, manta winkitjangku.”
12Ka panya piṟuku tjukurpa kutjupa ngarinyi wati panya Aitjayalu Jesunyatjara iriti walkatjunkunytja nyanga alatji,
“Wati kutju utiringkuku Jesse-kunu maḻatja mularku.
Munu nyara paluṟu mayatjarira kanyilku aṉangu kutjupa tjuṯa ngura uwankaratja.
Kaya wati nyara palumpa mulamularingkula rapa mulapa nyinaku.”
13Uwa, mulapa panya Godalu nganaṉanya palyaṉu palumpa rapa aḻa-aḻa paṯaṟa nyinanytjaku. Kaṉa nyurampa palula tjapilpai nyanga alatji,
“Mama God, nyara tjananya pukuḻpa mulapa kurunpa rapa nyinanytjaku palyanma tjana nyuntumpa mulamularingkunyangka. Ka nyara palulanguṟu, Kurunpa Miḻmiḻṯu witulyankunyangka, tjana rapa mulararira aḻa-aḻa paṯaṟa nyinaku ngura wiṟukitja.”
Paulalu Aṉangu Kutjupa Tjuṯangka Para-wangkanytja
14Uwa walytja tjuṯa, ngayulu ninti panya nyura wiṟuṟa palyanyku nyinapai. Munu nyura Godaku tjukurku munu palumpa iwaraku kuḻu ninti puḻka nyinanyi. Munu nyuranku kunyu ngapartji-ngapartjingku wangkara tjukaṟurungku nintilpai wiṟungku. 15-16Palu lita nyanga palulaṉa aṟa kutjupa tjara nyurampa tjukaṟurungku walkatjunangi nguḻuringkunytja wiyangku nyura piṟuku kulintjaku. Panya Godaluṉi ngaḻṯunytjungku ngurkantaṟa tjunu aṉangu Jew wiya tjuṯawanu tjukurtjara waṟkarinytjaku Jesuku Christaku, waṟka panya puḻka mulapa. Kaṉa Tjukurpa Palya Godalanguṟu para-tjakultjunanyi aṉangu Jew wiya tjuṯangka paluṟu tjana kuliṟa kampa kutjuparira Jesunya waṉantjaku. Nyanga alatji ngayulu nintini aṉangu nyanga palunya tjananya Godala wirkakatinytjikitjangku paluṟu tjananya mantjiṟa pukuḻarinytjaku, panya Kurunpa Miḻmiḻṯu tjananya palyaṉu tjana Godala miṟangka tjukaṟuru ngaṟanytjaku. Nyara palulanguṟuṉa nyuranya tjukaṟurungku wangkanyi lita nyanga palula nyura kuliṟa tjukaṟururingkunytjaku.
17Uwa, ngayulu puḻkaṟa pukuḻarinyi waṟka nyanga Godaku palyaṟa, panya Jesunya Christanya ngayula tjungu ngaṟanyangka kutjuṉa tjukaṟurungku palyaṉi. 18-19Palu ngayulu walytjangku palyantjatjanungku mirawaṉinytja wiya, panya Christalu ngayulawanungku palyantjitjanguṟu kutjuṉa mirawaṉinyi. Nyara paluṟu panya tjananya kampa kutjupanu Godala wangaṉarangku kulintjaku. Nyangatja paluṟu palyaṉu ngayulawanungku panya ngayulu tjukurpa wangkanytjitja-wanungku munu ngayulu kutjupa kutjupa tjuṯa palyantjitja-nguṟu kuḻu. Panya Kurunpa Miḻmiḻṯuṉi witulyangku nintiningi miracle kutjupa kutjupa tjuṯa palyantjaku, kaya aṉangu tjuṯangku nyakula Godaku mulamularingangi, Kurunpa Miḻmiḻṯu tjananya unngu nintinnyangka. Uwa, ngayulu ngura winkingka Tjukurpa Palya Jesunyatjara para-tjakultjunangi Jerusalemalanguṟu ngura panya Iliṟi-kamalakutu. Ngura parariwanungkuṉa wangkaṟinangi, ngura nguṟuritja tjuṯangka kuḻu. 20Panya ngayulu rawa mukuringkupai Jesuku ngurpa tjuṯangka tjakultjunkunytjikitja palumpa tjukurpa. Munuṉa tjukurtjara kutjupa ngaṉmanypa ankunytjitjangka piṟuku aṟangkaṯu ankunytjikitjangku kulintja wiya, panya paluṟu tjana ngaṉmanytju kulinu. 21Panya nyiringka iriti walkatjunkunytja ngarinyi nyanga alatji,
“Tjuṯangku panya tjukurpa palunyatjara ngaṉmanytju kulintja wiya, palu nyara paluṟu tjana kulilku.
Uwa tjana watarku nyinanytjatjanungku kuliṟa pina aḻaringkuku.”
Paulalu Rome-alakutu Ankunytjikitjangku Wangkanytja
22Uwa, aṉangu panya watarkitja tjuṯangkaṉa tjukurpa para-wangkangi munuṉa puṯu kuliningi nyuralakutu ma-pitjanytjikitjangku. 23Palu kuwariṉa waṟka nyanga palunya wiyaṉu ngura nyanganta, ka ngayuku kuwari aḻalta ngaṟanyi nyuralakutu ma-pitjanytjaku, panya ngayulu tiṯutjarangku kuliningi yiya kutjupa yiya kutjupa nyuralakutu ma-pitjanytjikitjangku. 24Ngayulu kuwari ngura Paintakutu ananyi munuṉa nyara palulakutu ma-pitjala nguṟurpa Rome-ala-waraṟa wirkaṟa nyurala tjunguringkuku. Munuṉa nyurala tjukutjuku rawa nguwanpa wiṟuṟa nyinara pakuwiyaringkuku, ka nyara palulanguṟulta nyura tjinguṟu ngayunya iyalku ngura Paintakutu ankunytjaku. 25Palu kuwari nyanga ngayuku Jerusalemalakutu-waraṟa ngaṉmanypa ankunytjaku ngaṟanyi, panya ngayulu mani tjanampa ma-katinyi munuṉa tjananya ungkuku Godaku walytjapiti ngura nyara palula. 26Panya Godaku walytja tjuṯaya uṯuḻu kutjupa kutjupa nyinanyi ngura nyanga Matja-tuniyala munu Akayala. Munuya paluṟu tjana walytjangku kulinu mani uraṟa tjunguṟa ngaḻṯutjara tjuṯa ungkunytjikitjangku nyara Jerusalemala nyinanytja tjuṯa. Panya nyara palulaya Godaku walytja kutjupa tjuṯa nyinanyi ngaḻṯutjara tjuṯa, kaṉa palula tjanalakutu kuwari katinyi. 27Panya tjanaya walytja alatjiṯu mukuringu mani uraṟa ungkunytjikitja aṉangu Jew ngaḻṯutjara tjuṯa. Ka nyangatja tjukaṟurungku ungkunytja ngapartji, panya Tjukurpa Palya Jesunyatjara Jew tjuṯanguṟu-waraṟa wirkanu aṉangu kutjupa tjuṯangka kaya mulamularingkula pukuḻaringu, ka nyara palulanguṟu tjananya ngapartji alpamilantjaku ngaṟanyi alatjiṯu. 28Kaṉa kuwari Jerusalemalakutu mani nyanga palunya ma-katinyi munuṉa tjananya ungkunytjatjanu wati-pakalku ngura nyara Paintakutu, munuṉa nyuranya nguṟurpa nyakuku. 29Munuṉa alatji kulini, “Ngayulu nyurala ma-wirkaṟa tjunguringkunyangka Christalulanya nganaṉanya uwankara tjungu puḻkaṟa pukuḻmankuku.”
30Walytja tjuṯa, ngayuluṉatju tjapilpai Godala ngayunya alpamilantjaku, ka wanyu nyura kuḻu puḻkaṟa Godala ngayuku tjapinma kurunpa winkingku. Panya nyuntu nganaṉa mulamularingkupai Mayatja Jesuku Christaku. Ka panya Kurunpa Miḻmiḻṯu nyuntunya nganaṉanya mukulya nyinanytjaku palyalpai. Kaṉa nyara palulanguṟu nyurala wangkanyi nyura ngayuku Godala puḻkaṟa tjapintjaku. 31Alatjiya ngayuku tjapinma Godalu ngayunya aṯunymaṟa kanyintjaku ngura nyara Judeala wirkankunyangka. Tjinguṟutjuya puṯu mulamularingkupai tjuṯa nyakula pikaringkuku, palula-tawaratjuya ngayuku tjapinma. Munuya tjanampa kuḻu tjapinma Godaku walytja tjuṯaku nyara Jerusalemala nyinanytja tjuṯaku, kaya mani nyangatja ngayulu katira ungkunyangka mantjiṟa pukuḻariku. 32Kaṉa nyara palulanguṟu pukuḻpa mulapa ma-pitjala nyurala tjunguringkuku ngayunya Godalu iyannyangka. Munuṉa nyurala tjungu nyinara nyuntu nganaṉa uwankaraṯu pukuḻariku. 33Uwa, ka Godanya nyurala uwankarangka tjungu tiṯutjara nyinama, panya paluṟu nganaṉanya kurunpa rapa pukuḻpa kanyilpai. Uwa mulapa.