Minyma Kura Wati Tjuṯangka Ngaripainya
1Uwa, angelpa 7 panya pititjara ngaṟangi. Ka kutju palula tjanala-nguṟu ngayulakutu pitjangu munuṉi wangkangu, “Pitjala nyawa minyma panya wati tjuṯangka ngaripainya. Nyaratja paluṟu karu tjuṯangka itingka nyinanyi. Palu kuwari Godalu palunya tjituṟu-tjituṟu puḻka palyalku ka wiyaringkuku. Palu minyma nyanga palunya kampa kutjupa kulinma, panya aṉangu tjuṯa tawunu panya puḻka ini Papilanta nyinanytja tjuṯa, panya paluṟu tjana kura puḻka mulapa nyinanyi. Tawunu nyara paluṟu panya karu tjuṯangka itingka ngaṟanyi, kaya ngura pala palula aṉangu tjuṯa kura mulapa nyinapai munuya Godanya wantira puṉu tjuṯa tjananku palyantja waḻkulpai. Panya minymangku kuri walytja wantira wati tjuṯangka pirtjipai, nyara palu puṟunypaya Godanya wantira puṉu tjananku palyantjitja tjuṯaku mukuringkupai puḻkaṟa. 2Kaya mayatja tjuṯa ngura kutjupa kutjupa tjuṯanguṟu pitjala tawunu palula tjunguringkula kuraringu minyma kurangka ngarinytja puṟunypa. Ka palu puṟunypaṯu aṉangu tjuṯa kuḻu manta winkinguṟu pitjala kuraringu tawunu nyara palunya nguraṟangku wituwitunnyangka. Nyaa puṟunypa, panya kutjupangku waina tjikintjaku wituwitulpai, ka tjikiṟa taṟangkaripai, palu puṟunypaya wituwitunnyangka kuraringangi Godanya kulintja wiya ngura kutjupitja tjuṯa.” Nyanga alatjiṉi nintiṟa tjakultjunangi angeltu.
3Ka palulanguṟu Kurunpa Miḻmiḻṯu ngayunya piṟuku nintiningi, kaṉi angeltu kurunpa katingu pilakutu. Kaṉa tjukurpa nyangu minyma nyinanyangka mamu tjitin-tjitinta katu. Ka mamu paluṟu puntu ngaya puḻka puṟunypa munu kata 7-tjara, yuṟuwilya 10-tjara kuḻu ngaṟangi. Ka mamu pala palula aṉangungka ini tjuṯa ngaṟangi kura tjuṯa Godanya warkira anantja-tjara.
4Ka minyma paluṟu mantara wiṟu tjitin-tjitinpa kanyiningi, munu paluṟu wiṟu tjuṯa kanyiningi gold-nguṟu munu upulanguṟu palyantja, maṟatja munu liritja, tjinatja, kaṟilitja kuḻu. Ka manyirkangku paluṟu kanyiningi gold-nguṟu palyantja panikina kura kutjupa kutjupa tjuṯatjara paluṟu panya palyantja tjuṯa. Panya paluṟu wati tjuṯangka ngaripai munu kura kutjupa kutjupa tjuṯa palyalpai. Nyara palula tjanalanguṟu kura palumpa panikinangka tjaalyngaṟangu. 5Ka palula ngalyangka ini ngaṟangi tjukurpa kumpilitja puṯu nguwanpa kulintjaku. Nyanga alatji ini paluṟu ngaṟangi, “Ngayulu tawunu puḻka Papilannga. Ngayulu ngunytju puḻka nyinanyi kampangkaṯu ngaripai tjuṯaku, munu kura palyalpai uwankaraku kuḻu.”
6Kaṉa nyangu minyma panya palunya taṟangka nyinanyangka. Panya paluṟu Godaku walytja tjuṯa rawangku iluntara iluntara puḻkaṟa pukuḻaringi, munu taṟangka puṟunypa nyinangi. Paluṟu Jesunya tungun-tunguntu waṉalpai tjuṯa pungkula wiyantjatjanu puḻkaṟa alatjiṯu pukuḻaringu.
Kaṉa minyma nyanga palunya nyakula puḻkaṟa kawaṟu-kawaṟuringu. 7Kaṉi angeltu wangkangu, “Nyaakun kawaṟu-kawaṟurinyi? Kuwari ngayulu nyuntula utini tjukurpa nyanga kuwari nyuntu nyakunytjitjanguṟu panya minyma palunya, munu mamu panya palunya kuḻu kata 7-tjara munu yuṟuwilya 10-tjara. 8Mamu nyara paluṟu panya ngaṉmanypa wanka nyinangi munu paluṟu ilungu, ka palunya piṯi ngaṯi puḻkangka tjarpatjunu. Ka kuwari piṯi nyara palulanguṟu piṟuku ngalya-pakalku, ka Godalu palunya wiyalku. Palu aṉangu kura tjuṯangku mamu palunya piṯinguṟu piṟuku pakannyangka nyakula puḻkaṟa urulyaralku. Panya aṉangu nyanga palunya tjananya Godalu nyiringka ini walkatjunkunytja wiyaṯu wanka tiṯutjara nyinanytjaku. Ka panya mamu nyara paluṟu wanka nyinangi ngaṉmanypa munu panya paluṟu ilungu, palu piṟuku paluṟu utiringkuku, kaya nyakula kata pauṉaralku.
9“Tjukurpa nyangatja nintipukangku kutju kulilku nyanga kumpilpa ngaṟanytja tjuṯa. Kata 7 panya apu murpu 7 nintini minyma paluṟu nyinanytja. Munu kata 7 paluṟu tjana piṟuku kutjupa nintini panya mayatja 7 nyinanytja tjuṯa. 10Ka mayatja 5 ngaṉmanypa wanapari wanapari nyinanytjatjanu wiyaringu, ka kuwari mayatja kutju nampa 6 nyinanyi, ka kutjupa kuwaripa mayatjarinytja wiyaṯu ngaṟanyi. Munu paluṟu ngula mayatjarira rawangku kanyintja wiya tjukutjuku kutju nyinara wiyaringkuku. 11Ka mamu panya wanka nyinara wiyaringkunytjanya paluṟu mayatja kutjupa nampa 8. Munu panya mayatja nampa 7 nyinangi, palu puṟunypaṯu paluṟu maḻa nyinaku mayatja puḻka. Palu Godalu palunya waṟungka urkuwaṉiku ka paluṟu wiyaringkuku.
12“Ka panya yuṟuwilya 10-pa nyuntu nyakunytja. Nyara paluṟu tjana kampa kutjupa nintini mayatja 10-pa, palu kuwaripa paluṟu tjana mayatjarinytja wiyaṯu. Ka mamu ngaya puḻka puṟunypa mayatjarira nyinanyangkaya palula tjunguringkula aṉangu tjuṯa mayatjarira kanyilku. Palu tjana mayatjarira rawangku kanyintja wiya 1 hour kutju nyinara wiyaringkuku tjukutjuku alatjiṯu. 13Kaya 10 nyanga paluṟu tjana wangkangu mamu pala palunya, ‘Nyuntu kutjungku mayatjarira uwankara kanyinma, kala nyuntula kutju kuliṟa palyanma.’ 14Munuya mayatja paluṟu tjana Lamalamaku pikaringkuku, palu Lamalamangku tjananya pungkula wiyalku, panya paluṟu mayatja puḻka mulapa uwankarangka waintarinytja nyinanyi. Kaya palumpa waṉalpai tjuṯangku palula tjunguringkula tjananya pungkula uwankara wiyalku. Nyanga palunya tjananya panya Godalu ngurkantaṟa aḻṯingu, kaya Lamalamanya tungun-tunguntu waṉaningi.” Nyanga alatjiṉi angeltu utiṟa tjakultjunu.
15Munuṉi piṟuku wangkangu, “Panya nyuntu nyangu minyma panya kura wati tjuṯangka ngaripainya uṟu karu tjuṯangka iṯingka nyinanyangka. Palu karu nyara paluṟu tjana kampa kutjupa nintini aṉangu tjuṯa ngura kutjupitja kutjupitja, wangka kutjupa kutjupa, miṟi kutjupa kutjupa. 16Ka panya nyuntu nyangu yuṟuwilya 10-pa panya kampa kutjupa nintini mayatja 10-pa, munun mamu ngaya puḻka puṟunypa kuḻu nyangu. Nyara paluṟu tjana kuraringkuku minyma panya palumpa wati tjuṯangka ngaripaiku. Munuya uwankara paluṟu kanyintja araltjaṟa wiyalku, ka nikitiriku. Munuya minyma palunya iltjanpa ngalkuku munuya waṟungka urkuwaṉiku. 17Panya Godalu tjananya mayatja 10-pa kutjuṉu tjana tjunguringkula mamu panya palunya wangkara mayatja puḻkanmankunytjaku, ka mamu paluṟu uwankara kanyilku Godalu ngaṉmanytju wangkanytja tjuṯa utiringkunytjaku paṯaṟa.
18“Ka minyma panya palunya kuwari nyuntu nyangu. Nyara palunya tjukurpa kampa kutjupa tjakultjunanyi tawunu puḻka panya Papilannga. Tawunu nyara paluṟu mayatja puḻka puṟunytju mayatjarira mayatja mantatja kutjupa uwankara kanyilpai.”