Tjiṉṯu Miḻmiḻṯa Wangkanytja
(Matthew-ku 12:1-8; Markaku 2:23-28)
1Kutjupa aṟa Saturday-ngka tjiṉṯu panya pakuwiyaringkupaingka Jesunya tjana kaanawanu anangi mai wiita tjuṯangka unnguwanu. Kaya palumpa nintintja tjuṯangku uṉinypa maṟangku mantjiṟa runyuṟa ngalkukatingi. 2Palu Paṟatji tjuṯangku tjananya nyakula wangkangu alatji, “Nyura nyaaku tjiṉṯu nyanga pakuwiyaringkupaingka mai uṉinypa uraṉi? Panya alatji palyaṟa nyura waṟkarinyi munuya nganampa aṟa kuraṉi, panya tjukurpa ngaṟanyi tjiṉṯu nyanga miḻmiḻṯa waṟkarinytja wiyangku wantinytjaku.”
3-4Ka Jesulu wangkangu tjanala, “Palu nyura wanyu nyiringka nyakunytja wiyaṯu panya iriti mayatja Davidalu paḻtjatjiratjarira Godaku tiinta miḻmiḻṯa tjarpara mai panya miḻmiḻmaṟa tjunkunytja ngalkuṉu munu palumpa tjungutja tjuṯa kuḻu ungu ngalkula paḻtjaringkunytjaku. Palu panya tjukurpa aṟa ngaṟanyi tjukurtjara tjuṯangku kutju mai nyara palunya ngalkunytjaku. Ka paluṟu tjana tjukurpa aṟa nyanga palunya kuliṟa wantingu munu mai ngalkuṉu, palu kutjupa tjuṯangku tjananya paintja wiyangku wantingi paḻtjatjiratjarira ngalkunyangka.”
5Munu Jesulu piṟuku wangkangu alatji, “Uwa, nyura uti kulinma panya ngayulu Watiku Katjanya mayatja puḻka mulapa nyinanyi, munuṉa ngayulu alatjiṯu wangkapai kutjupa kutjupa tjuṯa tjiṉṯu panya pakuwiyaringkupaingka palyantjaku.”
Wati Maṟa Wawanypa Palyantja
(Matthew-ku 12:9-14; Markaku 3:1-6)
6Munu Saturday kutjupangka tjiṉṯu panya pakuwiyaringkupaingka Jesulu waḻi inmatjangka tjarpara aṉangu tjuṯangka nintiningi. Ka wati kutju nyara palula nyinangi miṉa waku nyuṯi-nyuṯi tiwilpa. 7Kaya wati Moseku tjukurpa nintilpai tjuṯangku Paṟatji tjuṯangku kuḻu ilangku nyangangi tjiṉṯu panya pakuwiyaringkupaingka pikatjara palyaṟungunnyangka nyakula palunya kuranmankunytjikitjangku. Munuya kuliningi, “Tjinguṟu kuwari wati nyanga paluṟu wati nyanga miṉa tiwilpa palyaṟungulku tjiṉṯu nyanga pakuwiyaringkupaingka.”
8Ka Jesulu nintingku kuliningi tjana unngu kulinnyangka munu wangkangu wati panya pikatjarangka, “Pakala munu pitjala nyangangka nguṟurpa ngaṟa.” Ka wati panya paluṟu mulapaṯu pakaṉu munu pitjala ngaṟangu tjanala nguṟurpa. 9-10Ka Jesulu tjapinu tjanala, “Nyaalkula wanyu tjiṉṯu pakuwiyaringkupaingka? Palyaringkunytjakula palyalku munta kuraringkunytjakula wantiku? Aṉangula alpamilalku munta iluntankukula?” Munu alatji wangkara tjananya para-nyakula waṉaṟa wati panya miṉa tiwilpangka wangkangu, “Miṉa pala waṟariwa!” Ka mulapaṯu ngalya-waṟaringu munu miṉa panya paluṟu palyaringu alatjiṯu.
11Kaya Paṟatji tjuṯangku Moseku tjukurpa nintilpai tjuṯangku kuḻu nyakula puḻkaṟa mirpaṉaringu munuyanku wangkara kuliningi, “Yaaltjingalkula wati nyanga palunya? Panya nyanga paluṟu kutjupa kutjupa tjuṯa tjiṉṯu pakuwiyaringkupaingka palyaṟa Moseku tjukurpa kuraṉi.”
Jesulu Nintintja 12 Ngurkantankunytja
(Matthew-ku 10:1-4; Markaku 3:13-19)
12Tjiṉṯu kutjupa Jesunya anu puḻikutu Godala tjapintjikitja munu tjapiṟa tjiṉṯuringu. 13Munu tjiṉṯuringkula palumpa panya maḻpa tjuṯa aḻṯingu munu tjanalanguṟu wati 12 ngurkantanu palumpa nintintja tjuṯa nyinanytjaku munu tjananya ininu Iyantja Tjuṯa. 14-16Paluṟu ngurkantanu Simonnga, munu palunya ini kutjupa tjunu Peternya, munu palumpa maḻanypa kuḻu ngurkantanu Andrew-nya. Munu palulanguṟu ini nyanga palunya tjananya kuḻu ngurkantanu Jamesanya, Johnnga, Philipanya, Patjalamunya, Matthew-nya, Thomasanya, munu James kutjupa panya Alpiyatjaku katja, munu Simon kutjupa kuḻu ngurkantanu, panya paluṟu Rome-anya nguraṟa tjuṯa Israeltanguṟu paiṟa iyantjikitja puḻkaṟa mukuringkupai. Munu Jesulu ngurkantanu Jude-anya Jamesaku katja, munu panya pungkunytjaku nintilpainya kuḻu ngurkantanu wati Judasanya ini kutjupa Kaṟiyatanya.
Jesulu Wangkanytja Munu Palyaṟunguntja
(Matthew-ku 4:23-25)
17Munu palulanguṟu Jesunya puḻinguṟu ukalingu palumpa iyantja tjuṯa kuḻu munuya mantangka wirkaṟa ngaṟangi. Kaya aṉangu winki mulapa palunya waṉalpai kutjupa tjuṯa kuḻu Jesula tjanala tjunguringu ngura tjuṯanguṟu Jerusalemalanguṟu munu Tayala Tjaitanta tjanalanguṟu kuḻu. 18Nyara paluṟu tjanaya pitjangu Jesulu tjukurpa wangkanyangka kulintjikitja kaya tjanala tjungu pitjangu pikatjara tjuṯa munu mamutjara tjuṯa kuḻu paluṟu palyaṟunguntjaku. Ka paluṟu tjananya pikatjara uwankara palyaṟunguṉu munu mamu tjuṯa kuḻu tjanalanguṟu painu. 19Uwa, Jesulu witulya puḻkangku tjananya pampuṟa palyaṟunguningi pikatjara uwankara. Kaya aṉangu winkingku maṟa katuningi palunya pampuṟa palyaringkunytjikitjangku.
Pukuḻmankunytja Munu Nguḻutjunkunytja
(Matthew-ku 5:1-12)
20Ka Jesulu palumpa nintintja tjuṯa nyakula tjanala wangkangi alatji,
“Nyura kutjupa tjuṯa ngaḻṯutjara nyinanyi ulytja tjuṯa kanyintja wiya.
Palu nyuranya Godalu mayatja puḻkangku walytjanmaṟa kanyini, ka palulanguṟu nyura pukuḻpa nyinaku.
21Nyura kutjupa tjuṯa paḻtjatjiratja nyinanyi mai wiya.
Palu nyuranya Godalu alatjiṯu paḻtjalku pukuḻpa nyinanytjaku, ka palulanguṟu nyura pukuḻpa nyinaku.
Nyura kutjupa tjuṯa tjituṟu-tjituṟu nyinara ulanyi.
Palu nyuranya Godalu ikaringkunytjaku palyalku, ka palulanguṟu nyura pukuḻpa nyinaku.
22-23“Ngayulu panya Watiku Katjanya Godalu panya iyantja, ka nyura ngayunya waṉannyangka aṉangu kutjupa tjuṯa tjinguṟu nyurampa kuraringkuku munuya nyuranya paiṟa iyalku. Tjinguṟuya nyuranya warkira kuraṟa pungkuku munuya nyuranya ngunti kuranmankuku tjukurpa ngunti tjuṯa tjunguṟa wangkara. Palu tjana alatjingannyangka nyura wantima munu nyara palulanguṟu nyura pukuḻpa nyinaku. Panya iriti tjanampa walytjapitingku palu puṟunytjuṯu Godaku wangkatjara tjuṯa kuraningi. Ka tjana kuwari nyuranya palu puṟunytju kurannyangka nyura uti Godaku puḻkaṟa pukuḻarira waṟarakatima, panya paluṟu nyurampa wiṟu mulapa ungkunytjikitjangku paṯaṟa kanyini ngura nyara ilkaṟingka.”
Alatji Jesulu tjanala wangkangi palumpa nintintja tjuṯangka. 24Munu palulanguṟu paluṟu aṉangu kutjupa tjuṯangka wangkangi alatji,
“Kulilaya mani ulytja puḻkatjara tjuṯa! Panya nyurampa tjituṟu-tjituṟu puḻka ngula ngaṟaku.
Panya nyura mantangka nyanga puḻkatjara pukuḻpa nyinanytjatjanu ngula pika puḻkangka nyinaku tjituṟu-tjituṟu.
25Kaya paḻtja nyinanytja tjuṯa kuḻu kulila! Panya nyurampa tjituṟu-tjituṟu puḻka ngula ngaṟaku.
Panya nyura mantangka nyanga paḻtja nyinanytjatjanu ngula paḻtjatjiratja puḻka nyinaku.
Kaya ikaringkupai tjuṯa ngapartji kulila! Panya nyurampa tjituṟu-tjituṟu puḻka ngula ngaṟaku.
Panya nyura mantangka nyanga ikaringkula pukuḻpa nyinanytjatjanu ngula tjituṟu-tjituṟu puḻka nyinara ulaku.
26“Uwa, nyura pukuḻaripai aṉangu uwankarangku nyuranya mirawaṉira waḻkunnyangka. Palu nyurampa tjituṟu-tjituṟu puḻka ngula ngaṟaku. Panya iritiya nyurampa walytjapiti tjuṯangku palu puṟunytjuṯu wati wangkatjara ngunti tjuṯa mirawaṉingi tjukurpa ngunti wangkanyangka.”
Alatji Jesulu aṉangu kutjupa tjuṯangka wangkangi.
Nyurampa Mirpaṉtju Tjuṯaku Mukuringkunytjaku
(Matthew-ku 5:38-48, 7:12)
27-30“Palu nyuralaṉa wangkanyi ngayula kulilpai tjuṯangka nyanga alatji nyurampa mirpaṉtju tjuṯaku puḻkaṟa mukuringama munuya wiṟu palyanma nyurampa kuraringkupai tjuṯaku kuḻu. Pukuḻmanamaya nyuranya kurannyangka munuya tjanampa Godala tjapinma nyuranya kuraṟa pungkunyangka. Tjinguṟu kutjupangku nyuntunya anaṟa nguku uṉṯunnyangkampa nguku kampa kutjupa nintila piṟuku uṉṯuntjaku. Tjinguṟu kutjupangku nyuntumpa wupukuta pauntjingaṟa nyuntulanguṟu tjulyannyangkampa mantara nyuntu kanyintja kutjupa kuḻu ungama palunya. Munu aṉangungku ngatjinnyangka ngaḻṯuringkula ungama munu kutjupangku nyuntumpa kutjupa kutjupa katinyangkampa wantima waṉaṟa maḻakungku tjulyalwiyangku.
31“Uwa, panya nyura mukuringanyi aṉangu kutjupa tjuṯangku nyurampa wiṟuṟa palyantjaku. Palu wanyu nyura alatjiṯu tjanampa mukulyangku wiṟuṟa palyanma wantinytja wiyangku.
32-33“Tjinguṟu nyura aṉangu kutjupaku mukuringanyi paluṟu nyurampa mukuringkunyangka kutju. Ka Godalu nyakula nyurampa puḻkaṟa pukuḻariku? Wiya, panya aṉangu kura tjuṯa palu puṟunypaṯu nyinanyi munuya ngapartji mukuringkunyangka kutju mukuringkupai. Palu nyura uti nyurampa kuraringkupai tjuṯaku mukuringama alatjiṯu munu tjanampa wiṟu palyanma.
34“Tjinguṟu nyura aṉangu kutjupa wiṟu kutju ungkupai kuliṟa paluṟu ngula ngapartji wiṟungku ungkunytjaku. Ka Godalu nyakula nyurampa puḻkaṟa pukuḻaripai? Wiya, panya aṉangu kura tjuṯangku kuḻu palu puṟunytju ungkupai ngapartji ngula ungkunytjaku. 35Palu wanyu Godanya kulinma panya paluṟu mukuringanyi nyura mirpaṉtju tjuṯaku mukulya puḻka nyinanytjaku munu tjanampa wiṟu palyantjaku, munu intjanungku ungkunytjaku ngapartji kulintja wiyakitjangku. Ka nyura palulanguṟu ngula puḻka mulapalta mantjilku Godalu ungkunyangka munu nyura God Katutja Puḻkaku katja uṉṯalpa mulapa nyinaku, panya paluṟu aṉangu kuralpai tjuṯaku mukuringkupai alatjiṯu munu kuliṟa wantipai tjuṯaku kuḻu. 36Uwa, ngaḻṯunytjuya nyinama Mama Godanya puṟunypa panya paluṟu uwankaraku ngaḻṯunytju nyinanyi.”
Nyakula Kuranmankuwiyangku Wantinytjaku
(Matthew-ku 7:1-5)
37Munu Jesulu piṟuku wangkangi alatji, “Aṉangu kutjupaya nyakula ngurkantaṟa kuranmankuwiyangku wantima. Panya nyura nyanga alatjingannyangka Godalu nyuranya kuḻu ngula palu puṟunypaṯu ngurkantaṟa kuranmankuku. Munuya palu puṟunytjuṯu aṉangu kutjupa nyakula ngukantja wiyangku wantima. Panya nyura nyanga alatjingannyangka Godalu nyuranya kuḻu ngula palu puṟunypaṯu kuranmankuku. Munuya aṉangu kutjupangku nyuranya kurannyangkampa palunya kalypangku kuralwiyangku wantima, ka Godalu nyuranya palu puṟunypaṯu kura palyannyangka nyakula kalypangkuṯu wantiku. 38Munuya ngaḻṯuringkula munytjangku ungama, ka Godalu palu puṟunypaṯu nyuranya ngapartji ngaḻṯuringkula puḻka mulapalta ungkuku nyura ungkunytjitjangka waintaṟa mulapa. Palu nyura kutjupa tjuṯa tjukutjuku ungkunyangka paluṟu palu puṟunypaṯu nyuranya ngapartji tjukutjukuṯu ungkuku.”
39Munu paluṟu piṟuku tjukurpa aṟa kutjupatjara tjanala wangkangi alatji, “Kulila, wati kuṟu patingku wanyu wati kuṟu pati kutjupa katiṟinkupai? Wiya. Paluṟu pula kutjara piṯi ngaṯingka punkalku. 40Munu wanyu piṟuku kulinma. Aṉangu nintiringkupai wanyu palumpa nintilpaingka waintaripai? Wiya. Aṉangu nintiringkupai puḻkaṟa nintiringkunytjatjanu kutju palumpa nintilpaingka tjungu ngaṟaku.
41-42“Palu nyaaku nyura aṉangu kutjupa tjuṯa wangkara kuranmankupai? Tjinguṟu nyura nyanganyi Godaku walytja kutjupaku kuṟungka puṉu tjilpirpa tjukutjuku ngarinyangka. Palu nyurampa kuṟungka tjinguṟu puṉu puḻka ngarinyi. Ka nyura kuṟu palyangku-palku wangkaku palula alatji, ‘Wanyu kaṉanta puṉu pala tjilpirpa tjukutjuku mantjiṟa waṉi.’ Palu wiya, nyura ngunti kuṟu palyangku-palku kaṉany-kaṉanytju watarku wangkanyi. Uti nyura nyurampa kuṟunguṟu-waraṟa puṉu pala puḻkanya mantjiṟa waṉima munu palulanguṟu kuṟu palyaringkula utilta nyakuku aṉangu nyara kutjupaku kuṟunguṟu tjilpirpa tjukutjuku mantjiṟa waṉinytjikitjangku.” Alatji Jesulu tjanala wangkangi tjana kura walytjangku-waraṟa tjukaṟurungku ngurkantankunytjaku munu palulanguṟu kutju aṉangu Godaku walytja kutjupa kura nyakula wangkanytjaku.
Puṉunguṟu Aṉangu Wangkanytja
(Matthew-ku 7:15-20, 12:33-35)
43Munu piṟuku Jesulu wangkangu tjukurpa kutjupa alatji, “Panya puṉu wiṟungka mai kura pakalpai wiya. Ka palu puṟunypaṯu puṉu kurakurangka mai wiṟu pakalpai wiyaṯu. 44Panya mai uwankara pakalpai puṉu walytjangka kutju. Nyura puṯu iḻi mantjilpai puṉu tjilkatjaranguṟu munu nyura puṯu kiripitji mantjilpai puṉu wakalpukanguṟu. 45Ka palu puṟunypa aṉangu palyangku palya tjuṯa palyalpai kurunpa palya ngaṟala. Ka aṉangu kurangku kura tjuṯa kutju palyalpai kurunpa kura ngaṟala. Panya tjaangku wangkapai unngunguṟu. Ka kurunpa wiṟu ngaṟanyangka tjaangku wiṟu kutju wangkanyi, palu kurunpa kura ngaṟanyangka tjaangku kura kutju wangkapai.”
Waḻi Kutjaranguṟu Tjukurpa Wangkanytja
(Matthew-ku 7:24-27)
46Munu piṟuku Jesulu tjukurpa kutjupa wangkangu nyanga alatji, “Nyaakuṉi nyura ngayunya mayatjanmananyi munu nyura kuliṟa wantinyi ngayulu wangkanytjitja uwankara? 47Kulilaya, aṉangu ngayulakutu pitjala munu ngayulu wangkanytjitja wangaṉarangku kuliṟa palyannyangkampaṉa nyuranya nintilku yaaltji-yaaltji paluṟu nyinanytja. 48Alatji paluṟu nyinanyi wati nyanga puṟunypa panya paluṟu waḻi palyantjikitjangku piṯi-waraṟa tjawaṟa aṟintanangi munu apu tjiwa puḻka tjuṯa unngu tjunkula waṉaṉu munu wituwitu palula tjanala purkaṟangku waḻi palyaningi kuṉpu ngaṟanytjaku. Ka ngula mina puḻkangku pitjala puyinu. Ka uṟu puḻkaringkula katuringu munu waḻi panya puṯu uṉṯuningi. Ka witu alatjiṯu ngaṟangi urinytja wiya. 49Palu aṉangungku ngayuku tjukurpa kuliṟa wantirampa paluṟu panya wati nyanga puṟunypa nyinanyi. Panya paluṟu waḻi mantangka warpungkula palyaṉu, apu tjiwa puḻka tjuṯa-waraṟa tjunkunytja wiyangku munu mapalku palyaṟa wiyaṉu. Ka ngula mina puḻkangku pitjala puyinu munu uṟu puḻkaringkula katuringu munu waḻi panya uṉṯuṉu. Ka mapalku alatjiṯu piḻukatingu.”