Jesunya Puḻka Mulapa Mosela Muṉkara
1-2Walytja wiṟu tjuṯa, nyanganguṟula uti Jesunya puḻkaṟa kulinma, panya Godalu nganaṉanya aḻṯingu palula tjunguringkula nyinanytjaku. Kala uti palunya rawangku kulinma, panya palunya Godalu tjukurtjara puḻka ngurkantaṟa iyaṉu nganampa ngalkilpa puḻka nyinanytjaku. Ka paluṟu wangaṉarangku Godala kuliṟa palumpa waṟka palyaṉu wantinytja wiyangku Moselu puṟunytju, panya paluṟu Godala wangaṉarangku kuliningi Godaku walytjapiti tjukaṟurungku kanyiṟa.
3Palu Jesunya Mosela waintaṟa nyinanyi mayatja puḻka mulapa, panya Mosenya Godaku walytja tjuṯangka tjungu nyinanyi aṉangu alatjiṯu, ka Jesunya panya palula tjanala waintaṟa nyinanyi panya paluṟu aṉangu tjuṯa Godaku walytjaringkunytjaku palyaṉu. 4Panya aṉangu watarku nyinara puṯu Godaku walytjaringanyi, palu Jesulu palyannyangka kutju palumpa walytjaringanyi. Uwa, Godalu uwankara mulapa palyaṉu.
5Ka Mosenya panya Godaku waṟkaripai nyinangi munu palula wangaṉarangku kuliṟa waṟkaringi Godaku walytja tjuṯangka. Munu panya tjanala tjakultjunangi alatji, “Ngula Godalu kutjupa kutjupa tjuṯa wangkara utilku.” 6Ka panya Christanya palu puṟunypaṯu Godala wangaṉarangku kuliṟa waṟkaripai Godaku walytjapiti aṯunytju kanyiṟa. Palu panya paluṟu Godaku katja, ka Mosenya Godaku katja wiya wati waṟkaripai kutju aṉangu tjuṯa puṟunypa. Ka panya nganaṉa Godaku walytjapiti nyinanyi. Munula pakuwiyangku Jesunya rawangku waṉaṟampa tiṯutjaralta palumpa walytja nyinaku. Utila rawa pukuḻpa aḻa-aḻa paṯaṟa nyinama palumpa, panya paluṟulanya ngula ngura wiṟukutu katinyi. Uwa-maṉṯu nganaṉa palumpa walytjapiti tiṯutjara nyinaku nyanga palunya rapangku kuliṟampa.
Ngura Kalkuntjitjangka Wirkaṟa Pakuwiyaringkunytjaku
7-8Kaya nyangatja kulinma Kurunpa Miḻmiḻku tjukurpa panya nyiringka iriti walkatjunkunytja ngaṟanyi nyanga alatji,
“Nyura kuwari Godalu wangkanyangka kuliṟa tungunpungkunytja wiyangku wantima.
Panya iriti pilangka nyurampa walytjapitingku Godala tungunpungkula kulintja wiyangku wantingi.
Ka nyura palunya tjananya arkalwiyangku wantima.”
9Godalu panya wangkangu alatji,
“Panya tjana iriti pilangka rawa para-ngaṟangi kuḻi 40, kaṉa kutjupa kutjupa wiṟu tjuṯa tjanampa palyaningi nyakula mulamularingkunytjaku.
Palu paluṟu tjana nyakula mulamularingkuwiyangku wantingi,
munuya ngayunya rawangku wituwituningi piṟuku palyannyangka nyakunytjikitjangku.
10Kaṉa palulanguṟu tjanampa puḻkaṟa mirpaṉaringi
munuṉa kuliningi alatji, ‘Nyaakuya ngayunya tiṯutjarangku wantira kampa kutjupa kulini munu ngayulu wangkanyangka wangaṉarangku kulintja wiyangku wantinyi?’
11Munuṉa palulanguṟu tjanampa mirpaṉarira mulamulangku tjananya kalkuṉu nyanga alatji,
‘Paluṟu tjana ngura panya ngayulu kalkuntjitjangka wirkankunytja wiya alatjiṯu ngaṟaku ngayula tjungu nyinara pakuwiyaringkunytjikitja.’ ”
12Walytja wiṟu tjuṯa, puḻkaṟayanku nyangama munuyanku aṯunymanama. Tjinguṟu kutjupangku nyuralanguṟu kuraringkula kutjupangka ngunti kuliṟa Godalanguṟu paṯuringkuku, ka nyuranku palula-tawara puḻkaṟa aṯunymanama, panya Godanya wanka alatjiṯu nyinanyi. 13Uti nyuranku ngapartji-ngapartjingku wangkara kuṉpunma kura ngunti kuliṟa tarilarantjaku-tawara, panya kurangku nganaṉanya ngunti kuralpai Godala tungunpungkunytjaku. Palu rawangkuyanku kuṉpunma tjiṉṯu kutjupa tjiṉṯu kutjupa ngulaku paṯantja wiyangku, panya nyura ngulaku paṯaṟampa tjinguṟu nguṟurpaṯu iluku tjukurta kuṉpuringkunytja wiyaṯu. 14Uwa, puḻkaṟayanku aṯunymanama, panya nganaṉa uwankara Christala tjunguringu munula tiṯutjarangku tungun-tunguntu palunya waṉaṟampa nganaṉa rawa palula tjungu nyinaku. Panya nganaṉa ngaṉmanytju palumpa puḻkaṟa mulamularingkula palunya waṉaningi, palu puṟunytjula uti waṉanma ilunytjitjakutu-wangkara, munula mulapa palula tjungu nyinaku.
15Panya nyiringka iriti walkatjunkunytja ngaṟanyi alatji,
“Nyura kuwari Godalu wangkanyangka kuliṟa tungunpungkuwiyangku wantima.
Panya iritiya nyurampa walytjapitingku Godala tungunpungangi, ka nyura palunya tjananya arkalwiyangku wantima.”
16Ka nganalu tjana wanyu panyatja Godala kulintja wiyangku wantira tungunpungangi? Wiya panya paluṟu tjana, panya Moselu tjananya Itjipitalanguṟu katingu. 17Palu nganaku tjanampa Godanya rawa mirpaṉaringi kuḻi 40? Wiya panya palumpa tjanampa, panya pilangkaya tungunpungkula kura palyaningi, munu panyaya nyara palula aṟangka pilangka ilungi. 18Godalu panya mirpaṉarira kalkuṉu alatji, “Paluṟu tjana ngura panya ngayulu kalkuntjitjangka wirkankunytja wiyaṯu ngayula nyinara pakuwiyaringkunytjikitja.” Palu ngananya tjananya wanyu paluṟu alatji wangkangu? Wiya panya palula tjanalaṯu, panya palula tungunpungkupai tjuṯangka. 19Kala kulini panya tjana Godaku mulamularingkuwiyangku wantira ngura panya pakuwiyaringkupaingka puṯu wirkanangi.