Uṟungku Katuringkula Uwankara Wiyantja
1Ka pauta panya palyaṟa wiyaringkunyangka Mayatja Godalu Noah-la wangkangu, “Pauta unnguya tjarpa nyupali kuriṟara munu nyupalimpa katja maṉkurpa munu tjanampa kuri maṉkurpa kuḻu. Panya ngayulu nyuntunya kutju nyangu tjukaṟuru palyanyku nyinanyangka, panya aṉangu kutjupa uwankaraya kura kutju palyalpai nyinanyi. 2Ka panya kuka kutjupa kutjupa tjuṯa ngaṟanyi nyura pungkula waṟungka tiliwakaṟa Godanya ungkula waḻkuntjaku. Kuka panya palula tjanalanguṟu tjara mantjiṟa pautangka tjarpatjura 7 kutjupa, 7 kutjupa kuriṟara kuriṟara. Palu kuka kutjupa tjuṯanguṟu kutjara kutju kuriṟara mantjiṟa tjarpatjura kutjara kutjupa, kutjara kutjupa. 3Munu tjuḻpu kutjupa kutjupa uwankaranguṟu kuḻu mantjiṟa tjarpatjura 7 kutjupa, 7 kutjupa. Alatji kuka, tjuḻpu, mantangka para-ngaṟapai uwankaranguṟu tjara mantjiṟa tjarpatjura paluṟu tjana wankaringkula uṟungka maḻangka pautanguṟu ukalingkula piṟuku mantangka nyinara ma-tjuṯaringkunytjaku. 4Uwa, kuwari nyanga tjiṉṯu 7 ngaṟala wiyaringkunyangkaṉa ngayulu mina puḻka iyalku mantakutu, ka mina paluṟu kaḻaḻa mungangka rawangku puyilku piṟa kutjara nguwanpa, ka manta winkingka uṟu puḻkaringkuku munu ngayulu palyaṟa tjunkunytja uwankara wiyalku, aṉangu tjuṯa, kuka tjuṯa, tjuḻpu tjuṯa kuḻukuḻu, mantangka para-ngaṟapai uwankara.” Alatji Godalu wangkangu. 5Ka Noah-lu wangaṉarangku kulinu munu Godalu wangkanytja uwankara palyaṉu.
6Ka uṟu puḻka mantangka wirkankunytja aṟangka Noah-nya wati irititja mulapa nyinangi yiya nampa 600. 7Munu paluṟu pula kuriṟara pautangka tjarpangu uṟunguṟu wankaringkunytjikitja, ka pulampa katja maṉkurpa munu tjanampa kuri maṉkurpa kuḻu tjarpanguṯu. 8-9Ka Godalu mantangka para-ngaṟapai uwankaranguṟu nyiṯayira kungka ngurkantanu munu Noah-lakutu wirkakatingu, kuka tjuṯa, tjuḻpu tjuṯa, kutjupa kutjupa tjuṯa kuḻukuḻu. Ka Noah-lu tjananya uwankara pautangka tjarpatjunu Godalu wangkanytjitjangka. 10Ka uwankara tjarpara wiyaringu, ka palulanguṟu tjiṉṯu 7 ngaṟala wiyaringkunyangka uṟu puḻka mulatu manta tjutuṉu.
11-12Uwa, Noah-nya yiya panya 600 nyinanyangka maḻangka piṟa kutju ngaṟala wiyaringkula piṟa kutjupalta piṟuku ma-pakaṉu kutjararinytjikitja, ka nyara palula-aṟangka mina puḻka mulatu manta winki apu murpu tjuṯa kuḻu tjutuṉu. Panya uṟungka unngu manta unngunguṟu mina kutjupa puḻka mulapa ngalya-pakaṉu, ka uṟungku panya ma-puḻkaringkula ma-lipiringkula mantalta tjutuṉu. Ka panya ilkaṟinguṟu mina puḻka mulapa punkaṟa tjunguringangi uṟu panya mantatjangka munu kaḻaḻa mungangka kuḻu rawangku puyiningi piṟa kutjara nguwanpa. 13-16Ka panya palula kuwaripangka Godalu wangkanyangka Noah-lu mantangka para-ngaṟapai kutjupa kutjupa uwankaranguṟu kuriṟara kuriṟara mantjiṟa pautangka tjarpatjunu, kuka kutjupa kutjupa tjuṯa munu kuka wiya tjuṯa kuḻukuḻu, ngultju tjuṯa munu inuṟa tjuṯa, tjuḻpu kutjupa kutjupa tjuṯa munu tjuninguṟu ankupai kutjupa kutjupa tjuṯa kuḻukuḻu Noah-lu tjarpatjunu. Munu palulanguṟu paluṟu pula kuḻu kuriṟara pauta unngu tjarpangu, ka pulampa katja maṉkurpa Tjimanya, Aamanya, Tjaipitjinya tjana kuḻu tjarpangu kuriṟara kuriṟara. Ka tjana uwankara tjarpara wiyaringkunyangka Godalu tuwa patinu.
17-18Ka panya minangku rawangku puyiningi kaḻaḻa mungangka piṟa kutjara nguwanpa, ka uṟu mantangka puḻkaringkula katuringangi, munu ngaṯi puḻka mulapalta ngaringi tjiwariwari. Ka pauta panya palunya uṟungku katuningi, ka uṟungka katu nyinangi. 19Ka uṟungku panya piṟuku katuringkula tjaalyngaṟala puḻi murpu waṟa tjuṯa uwankara tjutuṟa patinu munu uṟu kutju ngaringi tjiwariwari manta winkingka. 20Munu uṟu paluṟu piṟukuṯu katuringkula katu mulapa ngaringi puḻi murpungka waintaṟa nampa panya 7 metre. 21Ka uwankara mulapa mantangka wanka para-ngaṟanytja tjuṯa ilungu uṟu tjikiṟa, tjuḻpu tjuṯa, kuka tjuṯa, kuka wiya tjuṯa, tjuninguṟu ankupai tjuṯa, uwankara mulapa wiyaringu aṉangu uwankara kuḻu. 22-23Uwankara panya mulyanguṟu tjaanguṟu ngaalymankupai ilungu uṟu unngu. Mantangka wanka para-ngaṟapai uwankara mulapa wiyaringu Godalu uṟungka wiyannyangka, aṉangu tjuṯa, kuka tjuṯa, kuka wiya tjuṯa, tjuninguṟu ankupai tjuṯa, tjuḻpu tjuṯa kuḻukuḻu uwankara paluṟu wiyaṉu. Ka Noah-nya tjana pauta panya unngu nyinanytja tjuṯa kutju wankaringu. 24Ka uṟu panya puḻkangku manta tjutuṟa ngaringi rawa alatjiṯu tjiṉṯu nyanga alatjiṯu 150, panya piṟa panya maṉkur-kutjara.