Josephalu Tjamu Kutjara Jacobalakutu Katinytja
1Ka Josephanya ngurakutu maḻaku ankula nyinangi. Munu ngula kulinu palumpa mama pikatjararingkunyangka. Munu palumpa katja kutjara Manatjanya Ipuṟaimanya pulanya katingu tjamu nyakunytjaku. 2Ka wirkankunyangka aṉangu kutjupangku tjarpara wangkangu Jacobala, “Nyuntumpa katja Josephanya pitjangu.” Ka Jacobalu kuliṟa tiwilpa ngarinytjatjanu purkaṟa pakaṟa nyinangi ngaripaingka. Ka Josephanya ma-tjarpangu katja kutjara kuḻu.
3-4Ka Jacobalu nyakula wangkangu, “Iritiṉi ngayula God witulyanya utiringu ngura nyara Latjala manta Kainanta munuṉi pukuḻmanu wangkara, ‘Ngayulu nyuntunya ungkuku tjitji tjuṯa. Kaya nyuntumpa katjapitingku tjitji tjuṯa mulapa utilku ka maḻatjangku maḻatjangku tjitji tjuṯa mulararinytjaku palyalku nyuntumpa walytjapiti tjuṯa mulapa. Ka ngayulu manta nyanga Kainannga tjananya ungkuku tjana walytjaringkula tiṯutjara nyinanytjaku.’ Alatjiṉi Godalu wangkara pukuḻmanu. 5Ka nyuntumpa nyanga katja kutjara panya iṯi ngaringu ngura nyanga Itjipitala ngayulu pitjanytja kuwaripangka. Palu ngayuluṉa palunya pulanya kuwari katjanmananyi paluṟu pula mama tjuṯa puṟunypa nyinanytjaku panya Rupinnga pula Tjimiyannga puṟunypa. 6Palu ngula nyuntu katja kutjupa tjuṯa utinnyangkampa palunya tjananya ngayulu katjanmankunytja wiya, ka paluṟu tjana ngula Kainantakutu ankula ngura walytjatja mantjintja wiya kuṯa kutjaraku ngurangka kutju nyinaku Ipuṟaimaku pulampa Manatjaku. 7Uwa, ngayulu palunya pulanya katjanmananyi pulampa panya kaminguṟu, ngayuku panya kuri Raitjiltanguṟu, panya ngayulu palumpa puḻkaṟa mukuringangi. Palu panya paluṟu ngaṉmanypa wiyaringu ngura nyara Kainanta iṯi panya Pintjimannga kanyiṟa, nganaṉa ngura panya Mitjupu-taimiyalanguṟu pitjala. Kaṉa kurunpa puḻkaṟa iluṟu-iluṟuringu, munuṉa palunya tjuṉutjunu iwarangka itingka ngura tawunu Ipuṟatjala itingka.” Alatji Jacobalu katjangka wangkangu Josephala. (Kuwariya ngura panya “Ipuṟatjanya” ini kutjupa wangkapai “Bethlehemanya”.)
Jacobalu Pakaḻi Kutjaraku Godala Tjapintja
8-10Munu Josephala wangkara wiyaringkula waintaṟa nyangu palumpa pakaḻi kutjara ngaṟanyangka. Paluṟu pulanya ngaṉmanytju nyakunytja wiya ngaṟanyangka, panya paluṟu kuṟu paulpa. Munu paluṟu nyakula wangkangu, “Yaalitja kutjara palatja?”
Ka Josephalu wangkangu, “Nyanga paluṟu pula panya nyuntumpa pakaḻi kutjara, panya Godaluṉi ungu ngura nyanga Itjipitala.”
Ka Jacobalu wangkangu, “Ngalya-kati pulanya ngayulakutu kaṉa Godala tjapilku pulanya palyaṟa pukuḻmankunytjaku.” Munu pulanya ngalya-katinyangka ampuṟa nguku kutjara nyunytjuṉu.
11Munu wangkangu Josephala, “Nguntiṉa kulinu nyuntu ngaṉmanypa ilunyangka-palku, munuṉa nyuntunya-tjiratja rawa tjituṟu-tjituṟu nyinangi nyuntunya piṟuku nyakunytjikitjangku kulintja wiya alatjiṯu. Palu Godalu ngayunya ngalya-katingu Itjipitalakutu nyuntunya nyakunytjaku nyuntumpa katja kutjara kuḻu.” 12Ka palulanguṟu Josephalu pulala wangkangu, “Alatjiṯulta wanti pula tjamunya ampuntja wiyangku, palya.” Munu Josephanya mamangka tultjungaṟakatira ngalyangku manta pampuṉu palunya waḻkuntjikitja.
13-14Munu pakaṟa wangkangu palumpa katja kutjara tjamungka itingka tultjungaṟakatinytjaku kata witiṟa pulampa Godala tjapintjaku. Munu paluṟu kuṯa tjamu wakungka tjunu munu maḻanypa tjampungka, panya tjakangku kuṯa pampulpai maṟa wakungku panya paluṟu ngaṉmanyitja. Palu Jacobanya mukuringu katja maḻatja maṟa wakungku pampuntjikitja paluṟu kuranyu ngaṟanytjaku. Munu paluṟu maṟa waku tjunu maḻanymangka Ipuṟaimala munu maṟa tjampu tjunu kuṯangka Manatjala. 15-16Munu Josephanya pukuḻmankunytjikitjangku Godala tjapinu pakaḻi kutjaraku alatji wangkara, “Mayatja God, nyuntunya ngayuku tjamu Aipuṟamalu kuliṟa waḻkuningi ngayuku mama Isaacalu kuḻu. Kaṉi nyuntu panya rawangku ngayunya katiṟinangi munuṉin wankaṟu kanyiningi. Kaṉa nyanga kuwari nyuntula tjapini aṯunytju kanyintjaku nyanga pulanya. Ngayulu nyanga pulanya katjanmananyi, ka nyuntu wanyu pulanya palyanma. Kaya aṉangu tjuṯangku pulanya nyakula kulilku, ‘Munta, Godalu nyanga pulanya palyaṟa kanyini panya paluṟu Jacobanya Isaacanya Aipuṟamanya tjananya palyaṟa kanyiningi, palu puṟunytjuṯu pulanya kanyini.’ Alatjiya palunya pulanya ngurkantankunytjaku palyanma. Munu Mayatja God, nyuntu pula kuritjararingkula tjitji tjuṯa utintjaku palyanma palula pulalanguṟu walytja tjuṯa mulararinytjaku maḻatja maḻatja.”
17-18Ka Josephalu mamangku maṟa tjunkunyangka nyakula tjituṟu-tjituṟuringu kuṯa katangka maṟa waku tjunkunytja-tjiratja. Munu mama maṟa witiṉu Ipuṟaimala katanguṟu katuṟa kuṯa katangka tjunkunytjikitjangku munu wangkangu, “Mama, nyuntu ngunti maṟa tjunanyi. Kuṯa ngaṉmanyitja nyangatja. Tjura maṟa waku palula katangka.”
19-20Ka mamangku wiyanmankula wangkangu, “Wiya, palya ngayulu kulini. Kuṯa Manatjalanguṟu walytja tjuṯaringkuku palu maḻatjakulta tjuṯa mularariku kuṯaku tjitjingka waintaṟa.” Alatji Jacobalu maḻanypa katangka maṟa waku tjunkula wangkangu paluṟu waintankunytjaku puḻka nguwanpa, munu kuṯa katangka maṟa tjampu tjunkula wangkangu ngaṯalpa ngaṟanytjaku. Munu piṟuku pakaḻi kutjarangka wangkangu pukuḻarinytjaku alatji, “Israelnga nguraṟa tjuṯangku nyupalinya rawangku kulilku watarkurinytja wiyangku palya mulapa nyinakatinyangka nyakula. Munuya kulintjatjanungku tjanayanku ngapartjilta Mayatja Godala tjapilku nyanga alatji, ‘Mayatja God, nyuntu wanyu nyanganpa ngapartji palyanma Ipuṟaimanya Manatjanya pula puṟunypa tjukaṟuru nyinanytjaku.’ ”
21Munu pulala wangkara wiyaringkula palumpa katja Josephala ngapartji wangkangu, “Nyanga kuwariṉa uparingkulalta ilunyi. Palu Godalu nyuranya rawangku kanyilku munu ngula nyuranya maḻakungku katiku Kainantakutu manta panya nganampakutu. Panya manta nyara paluṟu Godalu Aipuṟamanya Isaacanya ngayunya ungkunytja. 22Ka panya manta nyara palula nguṟurpa ngura ini Tjikimanya ngaṟanyi ngura wiṟu mulapa mina puḻkatjara. Panya ngura pala palula aṉangu Amurkunu tjuṯa ngaṉmanypa nyinangi, kaṉa panya tjanampa pikaringkula tjananya paiṟa iyaṉu. Kaṉa kuwari ngura nyara wiṟu palunya nyuntunya kutju unganyi nyuntumpa kuṯa tjuṯa ungkunytja wiyangku.” Alatji Jacobalu palumpa katja Josephanya wangkara pukuḻmanu.