Wati Ini Putipalu Josephanya Payamilantja Ngura Itjipitanya
1Ka panya Itjumailku pakaḻipitingku Josephanya katira manta ngura kutjupangka Itjipitala ma-ungu wati kutjupa manikitjangku wati ini Putipanya. Ka wati panya paluṟu mayatja tjukutjuku nyinangi tjaultji tjuṯaku. Tjaultji nyara paluṟu tjana panya mayatja Piiṟaku ngura aṯunymaṟa anga-kanyilpai. 2Ka Josephanya wati panya Putipaku ngurangka nyinangi munu ngura pala palula wiṟuṟa palumpa waṟkaringi, panya Mayatja Godalu palunya puḻkaṟa alpamilannyangka. 3Ka Putipalu nyakula kulinu, “Munta, mulapa Godalu palunya alpamilaṉi ngayuku tjukaṟuru wiṟuṟa waṟkarinytjaku.” 4Munu paluṟu palumpa puḻkaṟa pukuḻarira wangkangu waḻi ulytja uwankara palumpa aṯunymaṟa kanyintjaku. 5Ka palulanguṟu Godalu Putipaku wiṟuṟa palyaningi Josephalawanungku. Ka palumpa ngura waḻi uwankara palya alatjiṯu ngaṟangi, ka palumpa kaanangka mai puḻka pakaningi. 6Ka Putipalu nyakula puḻkaṟa mulapa Josephaku pukuḻaringu munu palunya tjunu palumpa kutjupa kutjupa uwankara kanyintjaku. Munu paluṟu aṯunymaṟa uwankara palumpa kulintja wiyangku mai kutju kuliningi palumpa ngurangka pitjala ngalkunytjikitjangku.
Putipaku Kuri Josephaku Nyaḻiringkunytja
Palu Josephanya wati yangupala wiṟunya munu yunpa wiṟunya mulapa aṉangu lipula. 7Ka palulanguṟu Putipaku kuringku nyangangi munu nyakula nyaḻiringangi palumpa. Munu kutjupa-aṟa nyakula Josephala wangkangu, “Wai, nyuntu ngali ngariku?”
8-9Ka Josephalu wiyanmaṟa wangkangu, “Wiya, kulila! Ngayuku mayatja Putipaluṉi waḻi nyangaku tjunu palumpa kutjupa kutjupa uwankara aṯunymaṟa kanyintjaku. Munu palulanguṟu kulintja wiyangku wantinyi ngayulu uwankara tjukaṟurungku kanyinnyangka munu panya pukuḻpa alatjiṯu nyinanyi. Palu nyuntunya kanyintjakuṉi tjunkunytja wiya alatjiṯu. Panya nyuntu palumpa kuri ngayuku mayatjaku kutju. Ka ngayulu tjinguṟu nyuntula ngarirampa kura puḻka mulapa palyalku Godala miṟangka.” Munu palunya wantingi alatjiṯu. 10Palu minyma paluṟu rawangku tjapiningi tjiṟirpi kutjupa tjiṟirpi kutjupa Josephanya palula tjunguringkunytjaku. Palu paluṟu kuliṟa alatjiṯu wantingi rawangku.
11Munu palulanguṟu Josephanya tjiṟirpi kutjupa uṟilta waṟkarinytjatjanu waḻi unngu ngapartji waṟkarinytjikitja tjarpangu. Ka aṉangu panya waḻi unngu waṟkaripai tjuṯa wiya ngaṟangi. 12Palu minyma panya Putipaku kuri kutju unngu nyinangi munu paluṟu Josephanya nyakula pakaṟa ma-waṯaparaṟa upukuta witiṟa wangkangu, “Josepha! Wiṟun mulapa! Yaaltjin kulini? Ngarimali.”
Palu Josephanya tjirkaṉu paluṟu witinnyangka, ka minymangku panya upukuta palumpa puḻkaṟa witiṉu ka paluṟu araṟa wantikatingu witiṟa kanyinnyangka, munu ma-wirtjapakaṉu uṟilkutu.
Putipaku Kuringku Ngunti Wangkanytja
13Ka minyma panya paluṟu upukuta kutju mantjiṟa kanyiṟa puḻkaṟa mirpaṉaringu. 14-15Munu paluṟu ngunti kampa kutjupaṟa wangkanytjikitjangku kuliningi munu waṟkaripai tjuṯa aḻṯira wangkangu, “Kuuta nyangatjaya nyawa. Wati panya Iipuṟungku nyangatja wantikatira nguḻu wirtjapakaṉu, panya paluṟu ngayulakutu pitjangu munuṉi witiṉu ngarilyinkunytjikitjangku. Kaṉa puḻkaṟa mirangu. Ka paluṟu upukuta wantikatira nguḻu wirtjapakaṉu. Ngunti palunya ngayuku miitangku palya-palku mantjinu, kaṉi ngayunya kuraṉu.” 16Munu paluṟu upukuta panya kanyiningi Putipaku paṯaṟa.
17Munu Putipanya ngurangka wirkankunyangka nyakula piṟuku wangkangu ngunti, “Wati panya Iipuṟungkuṉi kuraṉu nyuntumpa panya waṟkangku. Paluṟuṉi pitjala witiṉu watarku nyinanyangka ngarilyinkunytjikitjangku. 18Palu ngayuluṉatju puḻkaṟa mirangu, ka paluṟu upukuta nyangatja wantikatira wirtjapakaṉu.”
Josephanya Tjailangka Tjarpatjunkunytja
19Ka Putipanya kuliṟa puḻkaṟa mirpaṉaringu Josephaku. 20Munu wati tjaultji tjuṯangka wangkangu witiṟa katira tjailangka tjarpatjunkunytjaku. Tjaila nyara palula panya mayatja Piiṟalu wati kuralpai tjuṯa tjarpatjunkupai. Kaya pala palula Josephanya tjarpatjunu.
21Palu Mayatja Godalu palunya tjaila unngu nyinanyangka wiṟuṟa aṯunymanangi. Kanku paluṟu pukuḻpa alatjiṯu nyinangi palya mulapa. Ka tjailaku mayatjangku palunya nyangangi pukuḻpa nyinanyangka munu palumpa pukuḻaringu. 22Munu palulanguṟu palunya tjunu wati nyara tjailangka nyinanytja tjuṯa aṯunymankunytjaku. Ka tjananya uwankara para-nyakupai, wati panya Josephalu. 23Ka tjailaku panya mayatja puḻkangku wantingu Josephalu uwankara kanyintjaku panya Mayatja Godanya Josephala tjungu nyinangi. Munu palunya nintiningi tjukaṟuru wiṟuṟa waṟkarinytjaku, ka uwankara palya alatjiṯu ngaṟangi Josephalu kanyinnyangka.