Aipuṟamanya Pula Apimilikanya
1-2Ka Aipuṟamanya ngura panya Mamaṟainya wantikatira anu uḻpaṟiralku munu ngura tjunkula nyinangi pilangka Kainanta uḻpaṟira ngura ini Katitjala pulala Tjuula nguṟurpa. Munu palulanguṟu piṟuku ankula ngura kutjupangka ini Kiṟarta ngura tjunkula nyinangi. Palu ngura Kiṟarku mayatja nyinangi wati ini Apimilikanya. Ka Aipuṟamalu ngura pala palula nyinara nguratja tjuṯangka wangkangi nyanga alatji, “Minyma nyanga Tjiiṟanya ngayuku maḻanypa.” Alatji paluṟu kuri palumpa maḻanypanmanangi.
Ka mayatja panya Apimilikalu wati palula waṟkaripai wituṉu ankula Tjiiṟanya mantjiṟa ngalya-katinytjaku, panya mayatja paluṟu palunya aḻṯinytjikitja mukuringangi. Ka mulapaṯu ankula mantjiṟa ngalya-katingu, palu Apimilikalu minyma palunya aḻṯinytja wiyangku kanyiningi kuwaripangku. 3Ka munga kutjupa Godanya utiringu Apimilikala paluṟu ngarira tjukurmankunyangka munu wangkangu palula, “Nyuntu kuwari ilunyi minyma nyanga palunya aḻṯirampa, panya paluṟu ngaṉmanytju aḻṯinytja, kuritjara.”
4Palu Apimilikalu Tjiiṟanya panya aḻṯinytja wiyaṯu nyinangi kuwaripa munu palulanguṟu Godala wangkangu alatji, “Mayatja, ngayuluṉa watarkungku wangkangi palunya ngalya-katinytjaku aḻṯinytjikitjangku, palu aḻṯinytja wiyaṯuṉa kuwaripa paṯaningi. Kaṉin nyaaku ngayunya iluntankuku ngayuku aṉangu tjuṯa kuḻu? Nganaṉala tjukaṟuru nyinanyi. 5Palu Aipuṟamalu panya walytjangku Tjiiṟanya maḻanypanmanu, ka minyma panya paluṟu palu puṟunypaṯu Aipuṟamanya kuṯanmanangi. Kaṉa ngunti mulamularingu munuṉa kuri wiya-palku mantjinu ngurpangku, palu kuralwiyaṯuṉa.”
6Ka Godalu palula piṟuku wangkangu, panya ngarira tjukurmankunyangka nyanga alatji, “Uwa, ngayulu ninti panya nyuntu tjukaṟurungku palunya mantjinu ngurpangku kurantjikitjangku wiya. Palulanguṟuṉa nyuntunya anga-kanyinu ngayula tungunpungkula kuraringkunytjaku-tawara, munuṉanta angatjunu nyuntu minyma palunya pampuntjaku-tawara. 7Palu kuwari minyma nyanga palunya maḻakungku uwa wati palumpa kuri. Wati paluṟu panya ngayuku wangkatjara, munu paluṟu ngayula tjapilku nyuntumpa, kaṉanta wantiku iluntankunytja wiyangku. Palu nyuntu maḻakungku ungkuwiyangku wantirampa kulinma panya nyuntu munu nyuntumpa aṉangu tjuṯa uwankara iluku.” Alatji Godalu Apimilikala wangkangu paluṟu ngarira tjukurmankunyangka.
8Ka mungawinki mulapa Apimilikalu palumpa mayatja tjukutjuku tjuṯa uwankara aḻṯira tjakultjunu panya Godalu palula mungangka wangkanytja, kaya kuliṟa puḻkaṟa nguḻuringu. 9-10Ka Apimilikalu Aipuṟamanya aḻṯira wangkangu, “Nyaakun nganaṉanya ngunti kuraṉu? Ngayulu wanyu kutjupa kutjupa nyuntumpa kuraṉu, kan ngapartji ngayunya kuraṉi? Nyaakun alatji palyaṉi?”
11Ka Aipuṟamalu wangkangu, “Wiya, nguntiṉa kulinu ngura nyanga Kiṟarnga nguraṟa tjuṯa Godaku ngurpa-palku. Munuṉa kuliningi, ‘Tjinguṟuṉiya minymakitjangku pungkula iluntankuku.’ 12Palu mulapa minyma nyanga paluṟu ngayuku maḻanypa. Mama kutjutjali, palu ngunytju kutjupa kutjupalimpa. Kaṉa palunya aḻṯira kanyini ngayuku kuri. 13Ka panya Godalu ngayunya mamaku nguranguṟu wantikatira ankunytjaku wituṉu, kaṉa ankula ngura kutjupangka wirkaṟa minyma palula wangkapai nyanga alatji, ‘Ngayuku mukuringkulampa aṉangu malikitja nyakula palula wangka panya ngayuluṉa nyuntumpa kuṯa. Alatji wangka ngayunya aṯunymankunytjikitjangku, palya.’ Alatjiṉa ngayulu Tjiiṟanya wangkapai.”
14Ka palulanguṟu Apimilikalu Tjiiṟanya maḻakungku ungu Aipuṟamanya munu kuka kutjupa kutjupa tjuṯa kuḻu Aipuṟamanya ungu tjiipi tjuṯa, puluka tjuṯa, munu wati kungkawaṟa waṟkaripai tjuṯa kuḻu palunya ungu paluṟu tjana palumpa waṟka tjuṯa nyinanytjaku. 15Munu wangkangu Aipuṟamala nyanga alatji, “Nyangatja uwankara ngayuku manta, ka nyuntu nguraku mukuringkula manta nyanga lipiwanungku para-nguriṟa nyawa munu manta wiṟu ngurkantara ngura tjunkunytjikitjangku.” 16Munu paluṟu Tjiiṟanya wangkangu, “Ngayulu kuwari unganyi nyuntumpa kuṯa mani panya tjiilpa puḻka mulapa nampa 1,000. Alatjiṉa unganyi panya aṉangu nyuntula nyinanytjitja tjuṯangku nyuntunya palya ngurkantankunytjaku tjana ngunti pampuntja kulintjaku-tawara. Mani nyanga palulanguṟuya nyuntunya kulilku palya mulapa.”
17-18Ka nyara palula-aṟangka Apimilikaku kuri munu palumpa minyma waṟkaripai tjuṯa kuḻu tjitji wiya alatjiṯu nyinangi. Panya Godalu tjananya tjitjiku wiyaṉu Tjiiṟanya tjanala tjunguringkula nyinanyangka. Ka maḻangka Tjiiṟanya maḻakungku ungkunyangka Aipuṟamalu Apimilikaku tjanampa Godala tjapiningi, ka Godalu tjananya piṟuku tjitjitjararingkunytjaku palyaṉu.