Moselu Tjiwa Kutjupa Kutjara Palyaṟa Godalakutu Katinytja
1Ka Mayatja Godalu Mosela wangkangu, “Puḻi kutjara mantjila piṟuku munu tjitjulangka palyala tjiwa kutjara panya ngaṉmanyitja puṟunypa, kaṉa tjiwa pala palula pulala walkatjunkuku tjukurpa puḻka panya ngaṉmanytjuṉa tjiwa kutjupa kutjarangka walkatjunu kan kaṯantanu. 2Ka mungawinki pakaṟampa pitjala piṟuku tatila puḻi pala Tjaniyala, munu nyara palula katu ngayula tjunguriwa. 3Ka wati kutjupa uti nyuntula tjungu pitjanytja wiya. Palu nyuntu kutju uti ngayula wirkanama. Munu aṉangu uwankara paila puḻi nyangawanu para-ngaṟanytjaku-tawara. Munu tjananya wangka tjiipi, nanikuta, puluka kuḻukuḻu puḻi nyanga paṉṯawanungku ukiṟiku para-katiṟiṟa kanyilwiyangku wantinytjaku.”
4Ka palulanguṟu Moselu palyaṉu tjiwa kutjara panya ngaṉmanyitja puṟunypa, munu mungawinki mulapa piṟuku tatinu puḻi panya palulaṯu tjiwa panya kutjaratjara Godalu wangkanytjitjangka.
5Ka Mayatja Godanya ngangkaḻingka unngu ngalya-ukalingkula palula tjunguringkula ngaṟangu puḻi panya katu, mununku ini wangkangu, “Ngayulu panyaṉa, Mayatjanya panya.” 6Munu Mayatjanya palula kuranyu itiwanu anu munu wangka katungku mirara wangkangu nyanga alatji, “Ngayuluṉa Mayatja Godanya panya ngaḻṯunytju puḻkanya, munuṉa mapalku mirpaṉaripai wiya, palu ngayulu mukulya tiṯutjara pukuḻtju alatjiṯu nyinapai, munuṉa kalkuntjatjanungku tjukaṟurungku palyalpai. 7Munuṉa kalkuntjatjanungku watarkuriwiyangku rawa mulatu mukulyangku kulilpai aṉangu tjuṯa mulapa. Munuṉa aṉangu ngayula tungunpungkula kura pampunnyangka tjanampa kuraringkunytja wiya kalypangku pungkunytja wiyangku wantipai. Palu aṉangu kutjupangku ngayunya wantira kura rawangku palyannyangkaṉa palulanguṟu palunya pikatjaralku, munuṉa mamaku kuranguṟu pikatjaralku palumpa tjitji tjuṯa, munu palumpa pakaḻi puḻiri tjuṯa, munu palumpa pakaḻitja puḻiritja tjuṯa kuḻu, aṉangu panya ngaṉmanyitjaku kuranguṟu.” Alatji Godalu Mosela wangkangu.
8-9Ka Moselu mapalku tultjungaṟakatira ngalyangku manta pampuṟa palunya waḻkuṉu wangkara, “Mayatja, nyuntu ngayuku pukuḻarirampa wanyu nganaṉanya katiṟinama. Aṉangu nyanganpa panyaya rawa nyuntula tungunpungkupai, palu wanyulampa ngaḻṯuringama munulanya kalypangku pungkuwiyangku wantima nganaṉa kura palyantjitjanguṟu, munulanya nyuntumparinytjaku mulapa palyala.”
Mayatja Godalu Tjukurpa Puḻka Tjuṯa Piṟuku Wangkanytja
(Exodus 23:14-19)
10Ka Mayatja Godalu Mosela wangkangu, “Kuwariṉa aṉangu Israelkunu tjuṯa wangkara kalkuṉi. Ngayulu tjanala miṟangka kutjupa kutjupa puḻka mulapa palyalku tjana ngaṉmanytju nyakunytja wiyatja ngurpatja mulapa kutjupangku palyantjitja puṟunypa wiya. Ka aṉangu ititja tjuṯangku ngayulu nyurala kutjupa kutjupa puḻka mulapa palyannyangka nyakula urulyaraṟa puḻkaṟa nguḻu-nguḻuringkuku. 11Palu ngayulu nyurala kuwari wangkanyangkampaya wangaṉarangku kulinma. Ka nyura manta nyara palulakutu ankunyangkaṉa aṉangu nguratja tjuṯa-waraṟa pakaltjingaṟa ma-paiṟa waṉaṟa iyalku, panya wati Amurkunu tjuṯa, Kainankunu tjuṯa, Iitakunu tjuṯa, Piṟitjikunu tjuṯa, Ipakunu tjuṯa, munu Tjaipukunu tjuṯa. 12Palu kulilaṉiya! Nyura manta nyara palula wirkaṟa aṉangu nguratja tjuṯangka wangkara kalypantara purkaṟangku kalkuntja wiyangku wantima alatjiṯu nyuranya kurakutu katinytjaku-tawara. 13Palu tjanampa pitjilpa tjuṯaya piḻuntaṟa wiyala, munu puḻi tjana muṟutjunkula miḻmiḻmankunytja tjuṯa kuḻu kaṯantaṟa wiyala, munuya tjanampa god ngalypa-ngalypa ini Atjuṟaku puṉu miḻmiḻpa tjuṯa kuḻu kaṯantaṟa uwankara minya-minyala.
14“Munuya god kutjupa tjuṯa waḻkulwiyangku wantima, panya ngayulu god kutjupa waḻkunnyangka puḻkaṟa mirpaṉaripai ngayunya kutju waḻkuntja-tjiratja. 15Munuya aṉangu manta nyara palunya nguraṟa tjuṯangka kalypantara wangkara purkaṟangku kalkuntja wiyangku wantima! Tjana tjinguṟu nyuranya aḻṯiku palula tjanala tjunguringkula tjanampa god tjuṯa waḻkuntjaku, munuya nyuranya wangkaku kuka pungkula tjanampa god tjuṯa ungkunytjaku. Munuya tjinguṟu nyuranya aḻṯiku tjunguringkula kuka panya god tjanampa ungkunytjanya ngalkunytjaku. Kaya pala palula-tawara tjananya kalypantara wangkara kalkuntja wiyangku wantima. 16Tjinguṟu nyura tjanampa kalyparingkula nyinanyangka nyurampa katja tjuṯangku aṉangu nyara palumpa tjanampa uṉṯalpa tjuṯa aḻṯiku, ka tjinguṟu minyma paluṟu tjana nyurampa katja tjuṯa iwara kurangka katiku tjana ngayunya wantira tjanampa god ngalypa-ngalypa tjuṯa waḻkuntjaku. 17Munu nyura uti ayananguṟu god ngalypa-ngalypa waḻkuntjikitjangku palyantja wiyangku wantima.
18“Munuya aṟa panya mai pilytja ngalkunytjanya rawangku kulinma yiya kutjupa yiya kutjupa inma kanyintjikitjangku. Panya ngayulu nyurala wangkara wantingu mai pilytja ngalkukatinytjaku tjiṉṯu 7 piṟa panya ini Apipala, panya nyara palula aṟangka nyura Itjipitanya wantikatira ngalya-pakaṉu.
19“Ka panya nyurampa katja ngaṉmanypa ngarinytja uwankara ngayuku, munu tjiipingku nanikutangku pulukangku ngaṉmanytju kanyintja uwankara kuḻu ngayuku. 20Palu nyura tangkiyi nyiṯayira ngaṉmanypa ngarinytja maḻakungku mantjinma lamalama ngayunya ungkula palu puṟunypaṯu. Palu tjinguṟu nyuntu tangkiyi palunya maḻakungku mantjintja wiyangku wantinyi. Palulanguṟu nyuntu tangkiyi palunya nguṉṯi kaṯantara. Palu nyura uti tjitji katja ngaṉmanypa ngarinytja tjuṯa ngayunya ungkunytjatjanungku maḻakungku payamilanma wantinytja wiyangku.” Alatji Godalu wangkangu.
Munu piṟuku wangkangu, “Nyura uti ngayulakutu pitjanytjikitja mukuringkulampa kutjupa kutjupa ungkunytjikitjangku katima maṟalpa pitjanytja wiyangku.
21“Munu nyura uti tjiṉṯu 6 waṟkarima, munu palula maḻangka tjiṉṯu panya 7-ta nyinara tjiṉṯu kutju pakuwiyaringama waṟkarinytja wiya. Tjinguṟu waṟka puḻka ngaṟanyi kaanangka manta tjawaṟa waṉantjaku, munta tjinguṟu mai urantjaku, palu tjiṉṯu 6 waṟkarinytjatjanungku tjiṉṯu panya 7 wirkankunyangka waṟka palatja wantima munu nyinara pakuwiyaringama.
22“Munu nyura uti kuḻi kutjupa kuḻi kutjupa inma panya ini ‘Mai Urantjanya’ palyanma nyurampa mai wiita piḻṯiringkunyangka urantjikitjangku. Munu kuḻingka maḻangka nyura uti piṟuku inma kutjupa ini ‘Wiltjanya’ palyanma yiya kutjupa yiya kutjupa.
23“Uwa, yiya kutjupa yiya kutjupa wati uwankara uti maṉkuraṟa inmangka tjunguringama ngayunya waḻkuntjikitja, panya ngayulu Israelkunu tjuṯaku Mayatja Godanya. 24Ka manta nyara palula ngayulu aṉangu nguratja tjuṯa-waraṟa pakaltjingaṟa ma-paiṟa waṉaṟa iyalku, ka nyura maḻangka tjarpara nyinara nguraṟariku. Ka nyara palula maḻangka inma nyanga maṉkurpa ngaṟanytja-aṟangka warmaḻa tjuṯa nyurampa pikaringkunytjikitja pitjanytja wiya ngaṟaku nyurampa ngurakutu munuya nyurampa manta puṯu mantjilku.
25“Palu nyura ngayunya kuka pungkula ungkunytjikitja mukuringkula mai nyuma yiitjatjara kukangka tjunguṟa ungkuwiyangku wantima, mai pilytja kutjuṉiya kukangka tjunguṟa ungama. Munuya inma panya Katuwanu Ankunytjanya kulintjikitjangku kuka lamalama pungkula ngalkunytjatjanungku tjara mungawinkiku tjunkunytja wiyangku wantira uwankara ngalkula wiyanma.
26“Ka panya nyura kuḻi kutjupa kuḻi kutjupa mai wiita nyurampa kuṟuringkunyangka uralpai. Munu nyura uti mai ngaṉmanytju urantja katima Mayatja Godaku waḻikutu, munu palulanguṟu maḻa urantja tjuṯa kutju nyurampa ngurakutu katima.
“Munuya tjiipi kuḻunypa munta tjinguṟu nanikuta kuḻunypa ngunytjunguṟu ipi uṟu mantjiṟa kuka panya kuḻunypa palunya ipi uṟungka kutjantjikitjangku kulilwiyangku wantima alatjiṯu.”
27Munu palulanguṟu Mayatja Godalu Mosela wangkangu, “Tjukurpa nyanganpa walkatjura nyura watarkurinytjaku-tawara rawangku kulintjikitjangku, panya ngayulu nyuranya kalkuṉu aṯunymaṟa kanyintjikitjangku munu panya nyurala tjukurpa wiṟu tjuṯa wangkangu nyura kuliṟa palyantjaku, ka panya nyura ngapartji kalkuṉu ngayulu wangkanytja uwankara wangaṉarangku kulintjikitjangku.” Alatji Godalu wangkangi. 28Ka Mosenya puḻi katu Mayatja Godala tjungu nyinangi tjiṉṯu 40 munga 40 mai ngalkuwiya, mina kuḻu tjikilwiya. Munu tjiwa panya kutjarangka walkatjunu Godalu wangkara wituntjitja tjuṯa tjukurpa panya puḻka 10.
Mosenya Ukalingkunytja Puḻi Tjaniyalanguṟu
29Ka Mosenya ngula ukalingu puḻi panya Tjaniyalanguṟu munu katingi tjiwa kutjara panya Godaku tjukurpatjara, ka palumpa yunpa irnyaningi, panya Mayatja Godanya palula tjungu nyinara pula rawa wangkangi, ka pala palulanguṟu palumpa yunpa puḻkaṟa irnyaningi. Palu paluṟunku yunpa walytjangku irnyannyangka nyakunytja wiya. 30Ka Aarontu munu aṉangu panya Israelkunu tjuṯangku kutju Mosenya yunpa irnyannyangka nyangu, munuya nguḻu-nguḻuringkula palulakutu ilaringkunytja wiya paṯu ngaṟangi. 31Ka tjananya Moselu aḻṯingu, ka Aaronnga munu wati Israelkunu puḻka tjuṯa palulakutu pitjangu. Ka paluṟu tjanala wangkangi. 32Ka palula maḻangka aṉangu Israelkunu tjuṯa ngalya-uṯuḻurira ngaṟangu Mosela tjukurpa kulintjikitja. Ka tjanala tjakultjunangi panya Mayatja Godalu palunya puḻi katu wangkanytja uwankara tjana kuliṟa wangaṉarangku Godala kulintjaku. 33Munu palulanguṟu Moselu tjanala wangkara wiyaringkula paluṟu yunpa paluṟunku raikingka tjutuṉu. 34Munu paluṟu tiinta panya Godala Tjunguringkula Kulilpaingka tjarpara kutju raiki panya palunya araltjankupai Godala wangkanytjikitjangku. Munu tiintanguṟu ngalya-pakaṟa Israelkunu tjuṯangka Mayatja Godalu wangkanytjitja uwankara tjanala tjakultjunkupai, 35Kaya yunpa palunya nyakupai irnyannyangka alatjiṯu, ka palulanguṟu Moselu maḻakungku raiki panya tanpaṟa kanyilpai piṟuku Godala ngula wangkanytjikitjangku tiintangka panya unngu tjarpara.