1-14Ka munga nyara palula wati panya mayatja puḻkanya puṯu nguwanpa kunkunaringi. Munu paluṟu aḻṯingu wati waṟkaripai kutju munu palula wangkangu, “Nyuntu panya nyiringka walkatjunkupai nganaṉa kutjupa kutjupa tjuṯa wangkanyangka munu palyannyangka kuḻu. Wanyu nyiri panya palunya mantjila munu nyakula wangka kaṉa kulila nyaaringangiya ngura nyangangka.”
Ka paluṟu nyiri panya palunya mantjinu munu nyakula wangkangi tjukurpa tjuṯa munu tjukurpa nyangangka wirkaṟa wangkangu alatji,
“Wati kutjarangku pula mayatja panya puḻka iluntankunytjikitjangku kuliningi. Ka wati ini Mutukailu nyanga palunya kuliṟa ankula palula wangkara nguḻutjunu.”
Alatji wati panya waṟkangku mayatja puḻkangka wangkara utinu.
Ka mayatjangku wangkangu, “Munta-uwa panya wati nyanga paluṟuṉi wankakutuṉu. Kaṉa nyaa palunya ngapartji ungu paluṟu ngayunya wankakutunnyangka?”
Ka wati panya waṟkaripaingku wangkangu, “Wiya, nyuntu Mutukainya kutjupa kutjupa ngapartji ungkunytja wiyaṯu.”
Ka pula nyinara wangkanyangka Aimannga ngalya-tjarpangu mayatjaku waḻingka munu paṯaṟa ngaṟangi, panya paluṟu pitjangu mayatjangka tjapintjikitja mungawinki Mutukainya waṟaly-waṟalytjunkunytjikitjangku. Ka wati waṟkaripaingku nyangu Aimannga munu wangkangu mayatjangka, “Aimannga nyangatja nyuntumpa paṯaṟa ngaṟanyi.”
Ka wangkangu, “Palya, pitjanytjaku wangka.”
Munu palulanguṟu Aimannga pitjanyangka mayatjangku palula tjapinu, “Wati kutjuṉa pukuḻmankunytjikitja mukuringanyi munuṉa nyaalku?”
Ka Aimantu unngu alatji kuliningi, “Munta, Mayatjalu tjinguṟu ngayunya kulini pukuḻmankunytjikitjangku.” Munu wangkangu, “Uti nyuntu palunya tjarpatjunama nyuntumpa mantara wiṟungka munu nyuntumpa panya nyanytjungka tatitjura. Ka wati nyuntumpa waṟkaripaingku uti puṟala witiṟa katima iwara tjuṯangka aṉangu tjuṯangku nyakunytjaku, munu uti paluṟu aṉangu tjuṯangka para-wangkama nyanga alatji, ‘Mayatja panya puḻkanya wati nyanga palumpa puḻkaṟa pukuḻarinyi munu paluṟu mukuringanyi nyura kuḻu palumpa pukuḻarira palunya mirawaṉinytjaku.’ ”
Ka mayatjangku kuliṟa Aimannga wituṉu, “Warpungkula ngayuku mantara wiṟu kati munu Mutukainya tjarpatjura munu nyanytjungka tatitjura iwara tjuṯangka kati munu aṉangu tjuṯangka tjakultjunama panya nyuntu wangkanytjanya alatjiṯu.”
Ka Aimantu wangaṉarangku kulinu mayatjangku wangkanyangka palu unngu paluṟu puḻkaṟa kuṉṯaringu. Munu wiyaringkula paluṟu mapalku anu ngurakutu kata mantarangka tjutuṟa panya paluṟu kuṉṯaringu. Munu ankula waṟkaripai tjuṯangka palumpa kuringka kuḻu tjakultjunangi. Ka nyinara wangkanyangka mayatjaku wati waṟkaripai kutju wirkanu munu wangkangu, “Wala puḻka kunyu pitja maikutu, panya Esther-lu palyantja riti ngarinyi.”