1-15Ka mayatja panya puḻkaku maḻpa nyinangi ini Aimannga. Ka mayatja paluṟu wati palunya mayatja tjunu palula itingka nyinanytjaku. Ka wati paluṟu mayatja puḻkaku nguranguṟu ma-pakannyangka aṉangu tjuṯangku palunya pupakatira waḻkulpai. Palu wati panya Mutukailu wantingi palunya waḻkuntja wiyangku panya paluṟu wati Jew munu kuliningi alatji, “Ngayulu Godanya kutju waḻkulpai.” Munu paluṟu pupakatinytja wiya ngaṟangi. Ka kutjupangku nyakula tjakultjunu wati panya Aimanta, “Wati nyara paluṟu Jew nyinara nyuntunya pupakatira waḻkuntja wiyangku wantipai.” Ka Aimantu nyangatja kuliṟa Mutukaiku puḻkaṟa mirpaṉaringu munu paluṟu kuliningi, “Utila Mutukainya pungkula iluntanama palumpa walytja tjuṯa kuḻukuḻu aṉangu panya Jew uwankara ngura winkingka manta nyanga Papilaniyalawanu nyinanyangka muṉkara kuḻu.”
Munu paluṟu ankula mayatja panya puḻkangka wangkangu, “Kulila, aṉangu Jew winkiya nyangatja nyinanyi tawunu nyanga uwankarangka munuya wangaṉarangku kulintja wiya nyuntula. Wanyu tjakulpa tjuṯa iyala tawunu tjuṯakutu kaya nyuntumpa tjaultji tjuṯangka wangka Jew uwankara iluntankunytjaku.”
Ka mayatjangku kuliṟa wangkangu palula, “Uwa, palya nyangatja nyuntu nyanga wangkanytja. Ka tjukurpa palunya nyiringka walkatjura munu aṉangu tjuṯakutu iyala.”
Ka Aimantu wati walkatjara tjuṯangka wangkangu nyiri tjuṯangka tjukurpa walkatjunkunytjaku wangka kutjupangka kutjupangka alatji,
“Jew uwankaraya tjiṉṯu kutjungka iluntanama wati, minyma, tjitji kuḻukuḻu, kutju wanka kanyintja wiyangku. Munuya tjana kanyintja uwankara mantjinma kutjupa kutjupa wiṟu tjuṯa.”
Munu paluṟu tjiṉṯu kuḻu walkatjunkunytjaku wangkangu panya tjaultji tjuṯangku tjananya iluntankunytjaku. Munuya walkatjuṟa wiyaringkula mayatja panya puḻkaku ini tjaṟu walkatjunu munuya mayatjaku ringi kiṯi puṟunytja tjaḻatjuṟa nyiringka walka tjampamilaṉu aṉangu tjuṯangku nyakula mulamularingkunytjaku. Munuya wati tjakulpa tjuṯa ungu ngura uwankarakutu katira aṉangu tjuṯangka nintintjaku. Ka tjakulpa kutjungku ngura pala Tjuutjala tjukurpa panya palunya nyakula wangkangu aṉangu tjuṯangku kulintjaku.