Ngunti Wangkapai Tjuṯa
1Palu kulila! Kurunpa Miḻmiḻṯu utingku wangkangu panya ngula kunyu aṉangu kutjupa tjara Jesuku Christaku mulamularingkunytja wiyaringkuku ngaṉmanytju panya kulintjatjanu. Munuya kunyu mamu ngunti wangkapai tjuṯangka kulilku wangaṉarangku palumpa tjanampa tjukurpa tjuṯaku kutju mulamularingkula. 2Palu tjukurpa pala mamu tjuṯaku wati ngunti-wangka tjuṯangku para-tjakultjunkupai aṉangu tjuṯangka. Nyanga paluṟu tjana panya mamutjarangku alatjiṯu rapangku wangkapai kuṉṯa wiyangku. 3Panya tjanaya kunyu wangkapai watingku kuri aḻṯinytja wiyangku wantinytjaku, munuya piṟuku wangkapai mai kuka tjara kutjupa ngalkuwiyangku wantinytjaku. Palu utila nyanga tjananya kulilwiyangku wantima, panya Godalu mai kuka palunya tjananya ngalkunytjaku mantangka tjunu. Munu panya paluṟu mukuringanyi Jesuku walytjapitingku mai kuka palunya tjananya ngalkunytjikitjangku palunya-waraṟa waḻkuntjaku panya maiku kukaku pukuḻarira. Godalu panya mai kuka ngalkunytjaku tjunu palumpa walytjapitiku, panya paluṟu tjana tjukurpa mularku walytjaringu. 4Panyatja-maṉṯul tjuṯa mulapa Godalu paluṟa wantingu, ka uwankara wiṟu mulapa ngaṟanyi. Kala uti wantiwiyangku pukuḻṯu mantjinma Godanya-waraṟa waḻkuṟa. 5Mai kuka uwankara paluṟu paluṟa palyanmanu nganaṉa ngalkunytjaku. Munu paluṟu pukuḻaripai nganaṉa ngalkunytjikitjangku palunya-waraṟa waḻkunnyangka munu nganampa nyakula mirpaṉarinytja wiya.
Tjukurpa Tjukaṟurungku Wangkanytjaku
6Timitji, nyuntu tjukurpa nyanganpa Jesuku walytja tjuṯangka tjakultjuṟa tjananya tjukaṟurunma. Ka palulanguṟu nyuntu nyanga alatjingannyangka Jesunya Christanya nyuntumpa puḻkaṟa pukuḻariku mununta nyuntunya kulilku palumpa wiṟu mulapa palyantja. Panya nyuntu Godaku tjukurpa mulapa tjitjingkulpi kulilkatira maingka puṟunypa paḻtjaringkukatingi. Panya nyuntunya Tjukurpa Palya nintinnyangkan wangaṉarangku kuliningi. 7Palu panya kutjupa tjuṯangkuya ngunti wangkapai tjukurpa kutjupa kutjupa tjuṯa kuliṟa. Palu tjukurpa nyanga paluṟu tjana Godaku wiya, ka nyuntu tjananya kuliṟa wantima. Uti nyuntu Godala kutju wangaṉarangku kulinma munu arkaṟa rawa palyanyku nyinama ma-palya mulararinytjikitja Godalu nyakula nyuntumpa pukuḻarinytjaku. 8Panya wati kuṉpuringkunytjikitja arkaṟa wirtjapakalpai. Arkantja nyanga paluṟu palya, palu uti nyuntu waintaṟa munkaritja kulinma panya Godanya munu palumpa tjukurwanungku rawangku arkaṟa kulilkatima palya mulararinytjikitjangku. Panya nyuntu alatji arkantjatjanu kurunpa palya mulararira wanka mulapa tiṯutjara nyinaku kuwari nyanga mantangka nyinara munu ngula kuḻu Godaku ngurangka. 9-10Nyanga palulanguṟu nganaṉa Godaku tungun-tungunpa puḻkaṟa alatjiṯu waṟkarinyi. Panya palumpa nganaṉa pukuḻpa mulapa mulamularingkupai God wankaku, panya paluṟu uwankara wankaṟunkupainya. Paluṟu panya mulapa aṉangu palumpa mulamularingkunyangka wankalpai. Nyangatja mulapa alatjiṯu, uwankarangku kuliṟa puḻkaṟa mulamularingkunytjaku alatjiṯu.
11Uwa, tjukurpa nyanganpa tjanala wangkara nintinma tjana kulintjatjanu tjukaṟururingkunytjaku. 12Palu nyuntu panya wati yangupala nyinanyangkaya tjara kutjupangku tjinguṟu nyuntunya ngunti kuliṟa tjukutjukunmanama. Ka nyuntu alatji wangkanyangka tjananya kuliṟa wantima munu rawa tjukaṟuru alatjiṯu nyinama. Ka nyuntu alatji nyinanyangka Jesuku walytja tjuṯangku tjinguṟu nyakula nyuntunya puṟunyarira arkaṟa palya alatjiṯu nyinaku. Panya nyuntu wiṟuṟa palyanyku wangkanyangka, munu panya tjukaṟuru nyinanyangka, aṉangu tjuṯaku mukulyangku alpamilannyangka, munu panya Jesuku mulamularingkula rapa nyinanyangka, munu ngunti kuralwiya palya alatjiṯu nyinanyangka tjana nyakula kulilku munu palu puṟunypaṯu arkaṟa nyinaku.
13Ka nyuntu ngayulu maḻaku pitjanytjaku paṯaṟa tjanala inmaku pitjala nyinanyangka Godaku tjukurpa nyakula wangkama munu tjananya tiṯutjarangku utiṟa wangkama tjana kulintjaku munu tjananya puḻkaṟa nintinma ninti muḻararinytjaku. 14Aṟa panyatja watarkuriwiyangku kulinma panya ngaṉmanytjunta tjukurtjara tjuṯangku nyuntunya kata witiṟa wangkanytja. Ka panya wangkatjarangku tjukurpa nyuntula tjakultjunu Godalu ngaṉmanytju palunya wangkanytjitja. Ka panya palula aṟangka Kurunpa Miḻmiḻṯu nyuntunya unngu witulyanu nyuntu rapa mulararira palumpa tjukurpa nintintjaku. Ka nyuntunya alatji witulyankunyangka tungun-tunguntu nintinma wantinytja wiyangku witulya palunyatjarangku.
15Uwa, Godaku tjukurpa tjanala wangkara puḻkaṟa nintinma. Munu uwankara ngayulu nyuntunya wangkara wantinytja wangaṉarangku kuliṟa palyanma rawangku pakuringkunytja wiyangku. Kantaya tjuṯangku nyakuku nyuntu alatji tjukaṟurungku palyannyangka, munuya kulilku, “Mulapa nyangatja ma-nintipukaringkula wiṟu mulararinyi.” 16Palu nyuntunku kuliṟa aṯunymanama tarilarantjaku-tawara, tjukaṟuru nyinanytjikitjangku. Munun aṉangu tjuṯangka tjukaṟurungku nintintjikitjangku atatjuṟa kulinma tarilaraṟa ngunti wangkanytjaku-tawara. Ala Timitji, tiṯutjara alatjiṯu tjukaṟuru nyinama ngaṯalpa pakuringkunytja wiya munu palu puṟunytjuṯu tiṯutjarangku tjanala tjukurpa nintinma tjukaṟuru mulatu. Panya nyanga puṟunymankunytjatjanungkun nyuntunku wankaṟunkuku nyuntu panya nintilpai tjuṯa kuḻu.