DNT

Mathuyu 1

Djesuny dhuwal yarraṯaŋur dhiyakuwurruŋgal

The Ancestors of Jesus

Mathuyu 1.1-17

(Luk 3.23-38)

1Dhuwandja yarraṯaŋur wäwa'mirriŋuwal, ga yan bili ga gäthu'mirriŋuwal, ga yan bili ga märi'mumirriŋuwal, ga yan bili ga yuṯawalnha bäpa'mirriŋuwal.

Dhuwandja Djesuny yarraṯaŋur, ŋunhi ŋayi Maŋutji-dhunupayanhawuy God-Waŋarrwuŋ, ŋunhi ŋayi mala-bunhawuynydja Daybitkuŋ, ga ŋayiny Daybittja mala-bunhawuy Yipurayimguŋun.

2Ga ŋayiny Yipurayimdja bäpa'mirriŋu Yitjakkun,

ga ŋayiny Yitjaktja bäpa'mirriŋu Djaykupku,

ga Djaykuptja bäpa'mirriŋu Djudaw, ga wäwa'mirriŋuw walalaŋ nhanukalaŋaw,

3ga Djudany bäpa'mirriŋu Beratjku ga Djeraw ŋunhi maṉḏaŋ ŋäṉḏi'mirriŋuny Dayma,

ga Beratjtja bäpa'mirriŋu Yitjurungu,

ga Yitjurundja bäpa'mirriŋu Rämgu,

4ga Rämdja bäpa'mirriŋu Minadapku,

ga Minadaptja bäpa'mirriŋu Nätjungu,

ga Nätjundja bäpa'mirriŋu Djalmangun,

5ga Djalmandja bäpa'mirriŋu Bawatjku ga Rayap nhanŋu Bawatjkuny ŋäṉḏi'mirriŋu,

ga ŋayiny Bawatjtja bäpa'mirriŋu Wopitku ga ŋäṉḏi'mirriŋuny nhanŋu Ruth,

ga Wopittja bäpa'mirriŋu Djitjiw,

6Djitjiny bäpa'mirriŋu Daybitkun, ŋunhi ŋayi Ŋurruḏawalaŋu buŋgawa.

Ga Daybittja ŋunhi bäpa'mirriŋu Djalamangun, ga ŋäṉḏi'mirriŋuny nhanŋu Djalamangu yäku Bätjiba ŋunhi ŋäthilnydja ŋayi ŋunhiyiny miyalk ḏirramuw yäkuw Yuriyaw.

7Ga Djalamandja bäpa'mirriŋu Riyapawamgu,

ga ŋayiny Riyapawamdja bäpa'mirriŋu Yabitjaw,

ga Yabitjany bäpa'mirriŋu Yätjaw,

8ga Yätjany bäpa'mirriŋu Djutjapatku,

ga Djutjapattja bäpa'mirriŋu Djoramgu,

ga Djoramdja bäpa'mirriŋu Yutjayaw,

9ga Yutjayany bäpa'mirriŋu Djothamgu,

ga Djothamdja bäpa'mirriŋu Yayatjku,

ga Yayatjtja bäpa'mirriŋu Yitjakayaw,

10ga Yitjakayany bäpa'mirriŋu Manatjaw,

ga Manatjany bäpa'mirriŋu Yämungu,

ga Yämundja bäpa'mirriŋu Djawtjayaw,

11ga Djawtjayany bäpa'mirriŋu Djiyawtjingu ga wäwa'mirriŋuw mala nhanukalaŋaw, ga balanyamirriyyin ŋunhi Djotjiya ga nhanŋu gäthu'mirriŋu walal gan nhinan ŋunhili Yitjural bala yan miriŋun walalaŋ bunan, bala bumarnha Yitjuralnhany bäpurruny, yindin dhika mari malŋ'thurr, ga wiripuwurrunhany gan ŋunhi yolŋuny walalany djaw'-djawyurra balan bitjarra wäŋalil yäkulil Babilunlila.

12Ga beŋuryiny dhurrwaraŋur, walalnydja ŋunhi Yitjuralpuynhany yolŋuny walalany gan ŋaŋ'ŋaŋ'thurra balan Babilunlila wäŋalil yäkulil. Dhiyaŋuwurruyiny ga mala-ŋurrkanhayŋuy maŋutji-lakaram ŋanyanhan Djesu-Christnhan dhawal-guyaŋanhawuynha.

Yo, manymak ŋayiny Djiyawtjiny bäpa'mirriŋu Djiyalṯiyalwu,

ga ŋayiny Djiyalṯiyalnydja bäpa'mirriŋu Djirabaybulwu,

13ga Djirabaybulnydja bäpa'mirriŋu Yabiyutku,

ga Yabiyuttja bäpa'mirriŋu Yiliyakimgu,

ga Yiliyakimdja bäpa'mirriŋu Yätjuw,

14ga ŋayiny Yätjuny bäpa'mirriŋu Djädukku,

ga Djäduktja bäpa'mirriŋu Yaykimgu,

ga Yaykimdja bäpa'mirriŋu Yiliwutku,

15ga Yiliwuttja bäpa'mirriŋu Yiliyatjaw,

ga ŋayiny Yiliyatjany bäpa'mirriŋu Mathan'ku,

ga Mathan'tja bäpa'mirriŋu Djaykupkun.

16Ga ŋayiny Djaykuptja bäpa'mirriŋu Djawutjipkun, ŋunhi ŋayi Meriwnha dhuway'mirriŋu, ga Meriny ŋäṉḏi'mirriŋu nhanŋu Djesuwnha, ŋunhi ŋayi Maŋutji-dhunupayanhawuynha.

17Ga 14-mirr walal mala-ŋurrkanhamin nhanŋuny Yipurayimguny djamarrkuḻi', ga yan bili-i-i ga Daybitkal wapthurr, ga beŋur Daybitkalnydja walal bulu 14-mirryi yan mala-ŋurrkanhamin, yan bili-i-i ga ŋunhi walu ŋayathaŋal ŋunhi walalany Yitjuralnhan bäpurruny miriŋuynha mala djaw'-djawyurr balan wäŋalil yäkulil Babilunlila. Ga bulu beŋuryiny muka walal dhurrwaraŋur 14-mirryi yan mala-ŋurrkanhamin, ga yan bili ga ŋayin Garraynha dhawal-guyaŋan Djesu-Christnha ŋunhi ŋayi Maŋutji-dhunupayanhawuynha.

Dhiyaŋuny ga dhukarryu lakaram Djesu-Christnhan dhawal-guyaŋanhawuy

The birth of Jesus

Mathuyu 1.18-25

(Luk 2.1-7)

18Ga ŋäṉḏi'mirriŋuny nhanŋu ŋunhi Djesuw Meriny, miyalktja ŋayi ŋunhi dhawu'mirrnydja ḏirramuw yäkuw Djawutjipku, ga yurrnha maṉḏa ŋunhi märranhaminany, ŋayiny ŋunhi Meriny ŋäthil yan marŋgithinany ŋunhi ŋayi yothumirriyinany Dhuyu-Birrimbirrwuŋ. 19Ga ŋayiny ŋunhi Djawutjiptja dhuway'mirriŋuny nhanŋu Meriw, dhuwurr-dhunupa balanya yolŋu ga bitjarra ŋayi gan ŋunhi guyaŋanany ŋayi dhu yaka gora gurrupan ŋanya Meriny bukmakkal nhakun yolŋuwal walalaŋgal bala ganarrthaman ŋanya, bala ŋayi balaŋ gayulnha ŋunhi djämany bitjanayiny.

20Ga ŋunhi ŋayi gan bitjarryiny guyaŋan, God-Waŋarrwuny dhäwu-gänhamirrnydja bunanan nhanŋu Djawutjipkuny mäwa'wurra, ga bitjarr ŋayi ŋunhi nhanukal waŋanany, “Djawutjip mala-bunhawuy Daybitkuŋ, yaka barrari märranharaw Meriwnydja. Märranhamirra maṉḏa, märr nhuŋu ŋayi dhu miyalknha, bili ŋunhiyiny yothu ŋayi ga gäma beŋur Dhuyu-Birrimbirrwuŋ gurrupanawuy. 21Ga Meriwuŋuny dhu dhawal-guyaŋany yothuny ḏirramun, ga yäku-gurrupananawuynydja dhu ŋayi ŋunhi Djesu. Ga ŋayin dhu ga ŋunhi Djesuynha walŋakumany yolŋunhany walalany nhanŋuwuy ŋayi beŋurnydja ŋunhi walalaŋgiyingal dhuwurr-yätjŋurnydja romŋur,” bitjarra ŋayi gan ŋunhi ŋuriŋiyiny dhäwumirriynydja lakaraŋal Djawutjipkuny.

22Ga bitjarrnydja dhuwal maḻŋ'thurr, märr walalnydja dhu yolŋuynydja walal dharaŋana dhuwali yuwalkkuman yan, ŋunhi ŋäthil gan God-Waŋarr waŋan ŋuliwitjarr djawarrkmirriwal bitjarr, 23“Ga yuṯa dhu ḻuni miyalk yothumirriyirr, ga ḏirramun nhanukuŋ dhu ŋunhi yothuny dhawal-guyaŋi, ga yäku-lakaramany walal ŋanya dhu ga Yimannyuwal, mayali' God-Waŋarrnydja dhuwanna limurruŋgal.”

24Ga ŋunhi ŋayi Djawutjip rur'yurrnydja yakurrŋurnydja, bala ŋayi märraŋal Merinhany wäŋalila nhanukiyingal ŋayi, bitjarr yan bili nhakun ŋunhi God-Waŋarrwal dhäwu-gänhamirriymirriy gan lakaraŋal nhanukal. 25Yo, ŋunhi maṉḏa märranhaminany, yurr ŋäthilnydja maṉḏa ŋunhi bäyŋu ŋula ŋorranha waŋganyŋurnydja ga ŋula galŋa-ŋayathanhaminya, yan bili ga yothu nhanŋu ḏirramu dhawal-guyaŋan. Bala Djawutjipthuny ŋanya yäku-nhirrparnydja Djesun.